ᐃᖃᓗᐃᑦ, ᓄᓇᕗᑦ (ᒫᔾᔨ 25, 2024) − ᐃᑲᔪᖅᑎᖃᖅᖢᑎᒃ ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᓄᓇᕗᑦ ᑐᙵᕕᒃ ᑎᒥᖓᓐᓂᒃ. (ᓄᓇᕗᑦ ᑐᙵᕕᒃᑯᑦ) ᓇᓗᓇᐃᖅᓯᓚᐅᖅᐳᑦ ᓄᓇᕐᔪᐊᒥ ᐳᕙᒡᓗᖕᓇᖅ ᐅᓪᓗᖃᓛᕐᓂᖓᓂᒃ ᓈᑦᑎᖑᔭᖅ, ᒫᔾᔨ 24, 2024−ᒥ, ᓇᓗᓇᐃᖅᓯᒃᑲᓐᓂᖅᖢᑎᒃ ᑐᓂᓯᒪᑦᑎᐊᕐᓂᕐᒥᓂᒃ ᐃᓱᓕᑎᓪᓗᒍ ᐳᕙᒃᓗᖕᓇᖅ ᓄᓇᕗᒻᒥ.
ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᒻᒪ ᓄᓇᕗᑦ ᒐᕙᒪᒃᑯᑦ ᐋᖅᑭᒃᓯᓯᒪᓕᖅᑐᑦ ᐃᓕᓐᓂᐊᖅᑎᑦᑎᔾᔪᑎᒃᓴᓂᒃ ᑕᖅᓯᖅᓱᒐᒃᓴᓂᒃ ᑲᑎᙵᓪᓗᑎᒃ ᐅᖃᒪᔭᒍᑕᐅᓪᓗᑎᒃ ᖃᐅᔨᒪᔾᔪᑎᒃᓴᑦ ᐊᖓᔪᖅᑳᓄᑦ, ᐸᖅᑭᔨᓄᑦ, ᐊᒻᒪ ᐃᓐᓇᕐᓄᑦ. ᑖᒃᑯᐊ ᐃᑲᔫᑎᒃᓴᑦ ᐃᑲᔫᑕᐅᓂᐊᖅᐳᑦ ᓄᓇᕗᒥᐅᓄᑦ ᐅᖃᐅᓯᖃᖅᐸᓪᓕᐊᓕᕐᓗᑎᒃ ᐳᕙᒡᓗᖕᓇᐅᑉ ᒥᒃᓵᓄᑦ ᑕᒻᒪᖅᓯᒪᙱᑦᑐᓂᒃ ᐊᒻᒪ ᒫᓐᓇᓕᓴᕐᓂᒃ ᑐᑭᓯᒋᐊᒐᒃᓴᓂᒃ. ᑕᖅᓯᖅᓱᒐᒃᓴᑦ ᑎᑎᕋᖅᓯᒪᔪᑦ ᐋᖅᑭᒃᑕᐅᓚᐅᖅᐳᑦ ᓄᑕᖅᑲᑦ ᐃᓚᐅᖁᓪᓗᒋᑦ ᐃᓕᓐᓂᐊᖃᑕᐅᓗᑎᒃ ᐳᕙᒡᓗᖕᓇᐅᑉ ᒥᒃᓵᓄᑦ ᐊᐃᓯᒪᓗᑎᒃ ᐱᓕᕆᖃᑎᒌᒡᓗᑎᒃ ᐊᒻᒪ ᐃᑲᔪᖅᓱᐃᓗᑎᒃ. ᐃᓚᒌᑦ ᐅᖃᖃᑎᒌᒍᓐᓇᖅᓯᑎᓪᓗᒋᑦ ᐃᑲᔪᖅᓱᐃᓗᑎᒃ ᐳᕙᒡᓗᒃᓵᓕᓐᓇᖅᑐᒥᒃ ᐅᔾᔨᕈᓱᒃᑎᑦᑎᓵᓕᓂᕐᒥᒃ ᐃᑲᔫᑕᐅᓂᐊᖅᐳᖅ ᒥᒃᖠᒋᐊᕈᑕᐅᓗᓂ ᑲᑉᐱᐊᓱᖕᓂᕐᒥᒃ ᐊᒻᒪ ᑲᙳᓱᒍᑕᐅᓲᓂᒃ ᐳᕙᒡᓗᖕᓇᒥ.
ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᒻᒪ ᓄᓇᕗᑦ ᒐᕙᒪᒃᑯᑦ ᐱᓕᕆᖃᑎᒌᖏᓐᓇᖅᐳᑦ ᓄᓇᕘᒥ ᐊᒻᒪ ᓄᓇᓕᖕᓂ ᐳᕙᒡᓗᖕᓇᖅ ᓄᖅᑲᖅᑎᓐᓇᓱᒡᓗᒍ ᓄᓇᕗᒻᒥ, ᐃᓚᒋᔭᐅᓪᓗᑎᒃ ᐃᓚᐅᕝᕕᐅᓲᑦ ᐊᒻᒪ ᐳᕙᒡᓗᒃᑐᑦ ᖃᐅᔨᓴᖅᑕᐅᖃᑦᑕᖅᑐᑦ ᓄᓇᓕᖕᓂ ᐳᕙᒡᓗᒃᑐᓄᑦ. ᑕᒪᕐᒥᒃ ᑲᑐᔾᔨᖃᑎᒌᒡᕖᑦ ᐃᑲᔪᖅᓱᐃᔾᔪᑎᓂᒃ ᓴᖅᑭᑎᑦᑎᓯᒪᕗᑦ ᒪᒥᓴᖅᑐᓄᑦ, ᑲᑎᖦᖢᒋᑦ ᓄᓇᕗᑦ ᑐᙵᕕᒃᑯᑦ ᓯᕗᓪᓕᖅᐹᒥ ᓂᕿᑦᑎᐊᕙᓕᕆᓂᕐᒧᑦ ᐱᓕᕆᐊᖏᑦ ᐊᒻᒪ ᐃᓕᖅᑯᓯᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᓕᒻᒪᒃᓴᖅᑎᑦᑎᓂᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓄᑦ ᓄᓇᕗᑦ ᒐᕙᒪᒃᑯᑦ ᑮᓇᐅᔭᑎᒍᑦ ᐃᑲᔪᖅᑕᐅᓪᓗᑎᒃ ᐃᓄᖕᓄᑦ ᐳᕙᒡᓗᒃᑐᒧᑦ ᑲᒪᒋᔭᐅᔪᓄᑦ. ᓄᓇᓖᑦ ᐊᒃᑐᖅᑕᐅᔪᑦ ᓯᐊᒻᒪᒃᐸᓪᓕᐊᔪᓄᑦ ᐱᖃᑦᑕᖅᑐᑦ ᑲᔪᓯᔪᒥᒃ, ᐋᖅᑭᒃᓱᖅᑕᐅᓯᒪᔪᒥᒃ ᐃᑲᔪᖅᑕᐅᓂᕐᒥᒃ ᐱᓕᕆᐊᕆᓂᐊᕐᓗᒋᑦ ᐱᔭᕆᐊᖃᓪᓗᐊᑕᖅᑕᖏᑦ.
"ᖃᐅᔨᒪᓗᒋᑦ ᖃᓄᐃᓕᐅᖅᐸᓚᐅᕈᓯᕗᑦ ᐳᕙᒡᓗᖕᓂᕐᒧᑦ ᓇᓗᓇᐃᖅᓯᖕᒪᑦ ᓯᕗᒻᒧᐊᒃᐸᓪᓕᐊᓂᕐᒥᒃ, ᐅᔾᔨᕈᓱᓕᒃᑲᓐᓂᕐᓗᑕ ᖃᓄᐃᓕᐅᕈᑕᐅᔪᓂᒃ, ᓱᓕᙱᑦᑐᓂᒃ, ᐊᒻᒪ ᐊᑕᐅᓯᐅᖃᑎᒌᖕᓂᕐᒥᒃ ᐱᑕᖃᕈᓐᓃᖅᑎᑦᑎᓇᓱᖕᓂᕐᒥᒃ ᐳᕙᒡᓗᖕᓇᒥᒃ ᓄᓇᕗᒻᒥ," ᐅᖃᓚᐅᖅᐳᖅ ᒪᓕᒐᓕᐅᖅᑎ ᔮᓐ ᒪᐃᓐ, ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ. "ᑕᒪᕐᒥᑦᑎᐊᖅ ᓄᓇᕗᒻᒥᐅᑦ ᐃᑲᔪᕈᓐᓇᖅᐳᑦ ᐅᔾᔨᕈᓱᓕᖅᑎᑦᑎᓗᑎᒃ, ᐅᖃᖃᑎᒌᒃᑎᑦᑎᓂᒃᑯᑦ, ᐊᒻᒪ ᓴᖅᑭᔮᖅᑎᑦᑎᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐆᒃᑐᕋᐅᑎᓂᒃ. ᐊᑕᐅᓯᐅᖃᑎᒌᖕᓂᖅ, ᒪᒥᓴᐃᑦᑎᐊᒃᑲᓐᓂᕈᓐᓇᖅᑐᒍᑦ ᐱᐅᓯᕚᓪᓕᖅᑎᓪᓗᒋᓪᓗ ᖃᓄᐃᙱᑦᑎᐊᕐᓂᖏᑦ ᓄᓇᕗᒻᒥᐅᓕᒫᑦ ᐳᕙᒡᓗᒃᑐᑦ.”
“ᓄᓇᕗᑦ ᐃᓄᐃᑦ ᐊᑯᓂᐊᓗᒃ ᑲᒪᒋᔭᖃᖃᑦᑕᖅᓯᒪᕗᑦ ᐳᕙᓪᓗᓐᓂᕐᒥᒃ.” ᐅᖃᖅᑐᖅ ᐊᓗᑭ ᑰᑦᑎᖅ, ᐊᖓᔪᖅᑳᖅ ᓄᓇᕗᑦ ᑐᙵᕕᒃᑯᑦ ᑎᒥᖓᓄᑦ. "ᐱᓕᕆᖃᑎᒌᓐᓂᐅᔪᑦ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᒻᒪ ᓄᓇᕗᑦ ᒐᕙᒪᒃᑯᑦ ᐱᒻᒪᕆᐅᕗᖅ ᖃᐅᔨᓇᓱᐊᕆᐊᖃᖅᓱᑎᒃ ᖃᓄᖅ ᑎᑭᐅᑎᔪᓐᓇᕐᒪᖔᑕ ᑐᕌᒐᑦᑎᓐᓄᑦ ᐳᕙᓪᓗᓐᓇᖅᓯᐅᙱᑦᑐᒧᑦ ᓄᓇᕗᒻᒥ, ᓄᖅᑲᖅᑎᑦᓯᓗᑎᓪᓗ ᓈᒻᒪᙱᑦᑐᓂᒃ ᐅᓄᕐᓂᖏᓐᓂᒃ ᓄᓇᕗᒻᒥ ᐃᓄᐃᑦ ᐊᑦᑐᖅᑕᐅᓯᒪᓂᖏᓐᓄᑦ ᑖᑦᓱᒧᖓ ᐋᓐᓂᐊᒧᑦ. ᒪᑐᐃᙶᕐᓂᖅ ᓱᓕᓂᕐᓗ, ᐅᖃᖃᑎᒌᑉᐸᓪᓗᓯ, ᓄᑕᖅᑲᕗᑦ ᐅᖃᖃᑎᒋᕙᓪᓗᒋᑦ, ᐃᓕᑦᑎᕙᓪᓕᐊᓂᖅ ᓱᓕᓪᓚᕆᒃᑐᓂᒃ ᐳᕙᓪᓗᓐᓂᕆᔭᐅᔪᓂᒃ ᐱᒻᒪᕆᐊᓘᕗᑦ ᐱᓕᕆᐊᖑᓪᓗᑎᒃ ᐱᕙᓪᓕᐊᑎᑦᓯᓂᕐᒧᑦ ᐱᑕᖃᕈᓐᓃᖅᑎᑦᓯᕙᓪᓕᐊᓂᐊᕐᓗᓂ ᓄᓇᕗᒻᒥᒃ.”
ᓄᓇᕗᒻᒥᐅᑦ ᑎᓕᐅᖅᑕᐅᕗᑦ ᐱᓕᕆᖃᑕᐅᖁᔭᐅᓪᓗᑎᒃ ᓄᓇᖏᑦ ᖃᓄᐃᙱᑦᑎᐊᕈᓯᖏᓐᓂᒃ ᑐᓴᐅᒪᑎᑕᐅᖏᓐᓇᕐᓗᑎᒃ, ᐃᓚᐅᕙᒡᓗᑎᒃ ᐳᕙᒡᓗᒃᑎᑦᑎᑦᑕᐃᓕᓂᕐᒧᑦ ᐱᓇᔪᒃᑕᐅᔪᓂᒃ, ᐊᑐᖅᐸᒡᓗᑎᒡᓗ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔫᑎᒃᓴᓂᒃ ᖃᐅᔨᓴᖅᑕᐅᕙᒡᓗᑎᒃ ᐊᒻᒪ ᐃᓅᓕᓴᖅᑕᐅᕙᒡᓗᑎᒃ. ᐊᑕᐅᑦᑎᒃᑯᑦ, ᓯᕗᒻᒧᐊᒃᐸᓪᓕᐊᔪᓐᓇᖅᐳᒍᑦ ᖃᓄᐃᙱᑦᑎᐊᕐᓂᖅᓴᒧᑦ, ᐳᕙᒡᓗᖕᓇᖅᑐᖃᙱᓪᓗᓂ ᓄᓇᕗᒻᒥ.
ᑐᓴᕆᐊᒃᑲᓐᓂᕈᑎᓄᑦ ᐳᕙᒡᓗᖕᓇᒧᑦ ᐱᓗᐊᖅᑕᐃᓕᑎᑦᑎᓂᕐᒥᒃ ᒪᒥᓴᐃᓂᕐᒥᒡᓗ, ᖃᐅᔨᔪᒪᒍᕕᓪᓘᓐᓃᑦ ᓄᓇᕐᔪᐊᒥ ᐳᕙᒡᓗᖕᓇᐅᑉ ᐅᓪᓗᖓᓂ ᐊᑐᓕᖅᑎᑕᐅᔪᓂᑦ, ᐅᐸᒡᓗᒍ ᓄᓇᕗᒻᒥ ᒐᕙᒪᒃᑯᑦ ᐃᑭᐊᖅᑭᕕᖓᑦ.