Uqaqtittijii, ublumi uqautigijumajara qangannuaq miitiqatigimnun unalu Angajuqqaarjuaq Trudeau uumuunga Katujjiluta Pidjutikhami.
May 12mi, miitiqatigijara Angajuqqaarjuaq pingahuanun talvannga Hivuliuqtiulirutimnin. Una miitirutit turaangajuq atauttikkut hivulliutijaujumajunik titiraqhimajuni pidjutikhaptikni.
Uqaqtittijii, miitirutiptikni uqaqtavun anginiqarnianik havaqatigiingnirnik ukunani Nunavunmi Kavamangani, Nunavunmi Tunngavitkunni, aallanilu Inuit timiqutainni taapkuani ihumagijaujuni imaatun igluqpakhaitigun Ukiuqtaqtumi. Angiajuqqaarjuaq uvangalu angiqhimajuguk amigarnaqtumi iglukhailliuqpiarnirmi Nunavunmi atadjutaanilu aallanun hivuliutiujumanirnun imaatun inungnut aanniaqtailinirmun Inirnikhanilu munaridjutikhainnun.
Ukiuqtaqtumi Qajangnaidjutimi Aulapkainiqarnikkullu uqautigivaktavullu ihiariaginirningalu pidjutilginik aulapkaidjutikhanik ihariagijaujun tamaani nunaptikni. Uqaqpiaqtara anginiqarniaq havaqatigiingnikkut inungni Ukiuqtaqtu hivunikhani maniliurutikhanun avikturhimaniptikni pipkaijaami pidjutait pimmarigharniaqtait inuuhiit Nunavunmiut.
Uqaqtittijii, Angajuqqaarjuaq uvangalu uqautigivaktaqqut nanmimirhuurniq Nunavunmi ihariaginirluq havaqatigiittiarutikhanik piliqtilluta kingulliqpaanun aivadjutini. Angiqatigiikhimajuguk anginiqaqpiarutaani nanminiqhuurnikkut nunaptiknun uqarhutalu niriugutimik angirutikhaq pijauttaaqtuq.
Kingulliqpaakkut, naunaijaffaaqtaqqut havagumajavun havaqatigiikhimmaarluta kiuniarhimanikkut aallat atauttikkut hivulliutijumajaptiknik, imaatun hilaup allanguqtirningani pinahuaqtirnikkullu piangaijarnikkut aallakkiigutainnik naudjutikhanilu Nunavunmi.
Niriuktunga aulahimmaaqtunik havaqatigiigutikhanik ukunani Angajuqqaarjuami Ministanginnilu.
Quana, Uqaqtittijii.