ᑐᕌᓐᑐ, ᐋᓐᑎᐅᕆᐅ (ᐋᒡᒌᓯ 3, 2023) – ᓄᓇᕗᒻᒥ ᓯᕗᓕᖅᑎ P.J. ᐊᕿᐊᕈᖅ ᐊᒻᒪ ᐋᓐᑎᐅᕆᐅᒥ ᓯᕗᓕᖅᑎ ᑕᒡ ᕗᐊᑦ ᐅᓪᓗᒥ ᐊᑎᓕᐅᖅᑲᐅᕗᑦ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ (MOU) ᐱᓕᕆᖃᑎᒌᒃᑲᓐᓂᕈᒪᓪᓗᑎᒃ ᐊᔾᔨᒌᙱᑦᑐᓂᒃ ᓯᕗᓪᓕᐅᔾᔭᐅᔭᕆᐊᓕᖕᓂᒃ, ᐅᑯᓂᖓᓗ ᐋᓐᓂᐊᖅᑐᓕᕆᓂᖅ, ᐃᖏᕐᕋᔪᓕᕆᓂᖅ, ᓄᓇᓖᑦ ᐊᐅᓚᔪᓐᓇᐅᑎᖏᑦ ᐊᒻᒪ ᓄᓇᖃᖅᑳᖅᓯᒪᔪᑦ ᐱᓕᕆᖃᑎᒌᒃᐸᖕᓂᖏᑦ.
"ᓄᓇᕗᑦ ᐊᒻᒪ ᐋᓐᑎᐅᕆᐅ ᐊᑯᓂᐊᓗᒃ ᖃᓄᐃᓕᐅᖃᑦᑕᖅᓯᒪᓂᑰᕗᑦ ᐱᓕᕆᖃᑎᒋᔭᐅᓪᓗᑎᒃ ᖁᔭᒋᔪᒪᕙᕋᓗ ᓯᕗᓕᖅᑎ ᕗᐊᑦ ᐃᑲᔪᖅᑐᐃᑦᑎᐊᓚᐅᕐᓂᖓᓄᑦ ᐅᑭᐅᖅᑕᖅᑐᒥ ᐊᕕᒃᓯᒪᓂᑦᑎᓐᓂ," ᐅᖃᓚᐅᕐᑐᖅ P.J. ᐊᕿᐊᕈᖅ. "ᐊᒥᓱᓄᑦ ᓄᓇᕗᒻᒥᐅᓄᑦ, ᐋᓐᑎᐅᕆᐅ ᐊᐅᓪᓚᕐᕕᐅᓪᓗᐊᑕᖃᑦᑕᖅᑐᖅ. ᐃᓕᓐᓂᐊᕕᔾᔪᐊᒨᖓᒐᓗᐊᖅᑲᑦ, ᐊᔾᔨᐅᖏᑦᑐᒥᒃ ᐋᓐᓂᐊᖅᑐᓕᕆᓂᕐᒥᒃ, ᐅᕝᕙᓘᓐᓃᑦ ᓂᐅᕕᕐᓂᕐᒥᒃ ᐊᒻᒪᓗ ᐳᓚᕋᑦᑐᓕᕆᓂᕐᒥᒃ, ᑕᐅᓴᖏᓐᓃᑦᑐᑦ ᓄᓇᕗᒻᒥᐅᑦ ᐅᐸᖃᑦᑕᖅᑐᑦ ᓴᓂᓪᓕᑦᑎᓐᓄᑦ ᐊᕕᑦᑐᖅᓯᒪᔪᓄᑦ ᐊᕐᕌᒍᑕᒫᑦ.
ᑖᓐᓇ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᐊᑐᕐᓗᒍ, ᒐᕙᒪᕗᑦ ᐋᖅᑭᒃᓯᔪᓐᓇᖅᑐᑦ ᑖᔅᓱᒥᖓ ᐊᔾᔨᐅᙱᑦᑐᒥᒃ ᐊᑯᓂᐅᔪᒃᑯᓪᓗ ᐱᓕᕆᖃᑎᒌᖕᓂᕐᓂ ᑲᑐᔾᔨᖃᑎᒌᒃᓗᑎᒃᓗ ᐱᕈᖅᐸᓪᓕᐊᓗᑎᒃ ᐱᕕᒃᓴᓂᑦ ᓯᕗᓂᒃᓴᒧᑦ. ᑲᑐᔾᔨᖃᑎᒌᓐᓂᖅ ᓯᕗᓪᓕᐅᔾᔭᐅᓯᒪᓪᓚᕆᑦᑐᖅ ᑲᑐᔾᔨᖃᑎᒌᓐᓂᕐᒧᑦ ᐱᓕᕆᐊᑦᓴᑎᓐᓄᑦ ᐅᑉᐱᕈᓱᓪᓚᕆᑦᓱᖓᓗ ᐋᓐᑎᐅᕆᐅ ᐃᓚᒋᔭᐅᓚᕆᒍᓐᓇᕆᐊᖓᓂᑦ ᑲᓇᑕᒥ-ᐱᕈᖅᓴᐃᓂᕐᒧᑦ ᐱᓇᓱᐊᕐᓂᕐᒥᑦ ᐅᑭᐅᖅᑕᖅᑐᒥᑦ."
"ᐃᓱᒪᒌᓐᓇᐅᔭᖅᑕᕋ ᐋᓐᑎᐅᕆᐅ ᐊᔾᔨᐅᙱᑦᑐᒥᒃ ᐱᓕᕆᐊᖃᓪᓗᐊᕐᓂᖓᓂᒃ ᐃᑲᔪᖅᓱᐃᓗᓂ ᑲᓇᑕᐅᑉ ᐊᕕᒃᑐᖅᓯᒪᓂᖏᓐᓂ," ᐅᖃᖅᑐᖅ ᓯᕗᓕᖅᑎ ᑕᒡ ᕗᐊᑦ. "ᑖᓐᓇ ᐊᖏᖃᑎᒌᒍᑎ ᓴᙱᒃᑎᒋᐊᕈᑕᐅᓂᐊᖅᐳᖅ ᑲᑎᙵᓂᑦᑎᓐᓄᑦ ᐱᕚᓪᓕᖅᑎᓪᓗᒋᓪᓗ ᐱᕕᒃᓴᐃᑦ ᑲᑐᔾᔨᖃᑎᒌᒍᑕᐅᓗᑎᒃ ᖃᔅᓯᑲᓪᓚᖕᓄᑦ ᐱᒻᒪᕆᐅᔪᓄᑦ, ᐃᑲᔫᑕᐅᓗᑎᒃ ᓄᓇᕗᒥᐅᓄᑦ ᐊᒻᒪ ᐋᓐᑎᐅᕆᐅᒥᐅᓄᑦ. ᖁᔭᓕᔪᒪᕙᕋ ᓯᕗᓕᖅᑎ ᐊᕿᐊᕈᖅ ᐱᓕᕆᖃᑎᖃᓚᐅᕐᓂᖓᓄᑦ ᐱᖃᓐᓇᕆᔭᒥᓂᒡᓗ, ᐱᓕᕆᖃᑎᒌᒃᑎᓪᓗᑕ ᓴᙱᓂᖅᓴᒥᑦ ᑮᓇᐅᔭᓕᐅᕈᑎᖃᕋᓱᐊᖅᖢᑕ ᖃᓄᐃᙱᑦᑎᐊᕐᑐᓂᒡᓗ ᓄᓇᓕᖕᓂᑦ."
ᑕᒪᐃᓐᓄᑦ ᐃᑲᔫᑎᖃᖅᑐᒃᑯᑦ ᐱᓕᕆᖃᑎᒌᖕᓂᒃᑯᑦ, ᓄᓇᕗᑦ ᐱᑎᑦᑎᓲᖅ ᒪᑭᒪᐅᑎᒃᓴᓄᑦ ᐱᕕᒃᓴᓂᑦ ᐋᓐᑎᐅᕆᐅᒧᑦ ᑕᐅᖅᓰᓗᑎᒃ ᐱᖁᑎᓂᒃ ᑭᒃᑯᑐᐃᓐᓇᕐᓄᓪᓗ ᐱᔨᑦᑎᕋᐅᑎᓂᒃ ᐊᑐᐃᓐᓇᐅᙱᑦᑐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᐊᕐᕌᒍᑕᒫᑦ ᑕᐅᖅᓰᖃᑦᑕᕐᓂᖅ ᓄᓇᕗᒻᒥ ᐋᓐᑎᐅᕆᐅᓗ ᐊᑭᖃᖅᐳᖅ $1 ᐱᓕᐊᓐ ᐅᖓᑖᓂ.
ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᐱᕈᖅᐸᓪᓕᐊᑎᑦᑎᕗᖅ ᑕᒪᑐᒥᖓ ᐊᑯᓂᐊᓗᒃ ᐱᓕᕆᖃᑎᒌᖕᓂᕐᒥᒃ ᒪᑐᐃᖅᓯᓪᓗᓂᓗ ᐊᖏᒡᓕᒋᐊᖅᓯᒪᔪᒥᒃ ᐱᓕᕆᖃᑎᒌᖕᓂᕐᒥᒃ ᐱᒋᐊᖅᑕᐅᓯᒪᔪᓄᑦ ᐊᒃᑐᐊᓂᓕᖕᓄᑦ ᓴᓇᕝᕕᐊᓗᖕᓄᑦ ᓄᓇᓕᖕᓂᓗ ᓇᑉᐸᖅᑎᖅᑕᐅᓯᒪᔪᓄᑦ, ᐃᓕᓐᓂᐊᕐᓂᕐᒧᑦ ᐊᔪᕈᓐᓃᖅᓴᕐᓂᕐᒧᓪᓗ ᐊᔪᕈᓐᓃᖅᑕᐅᕙᒃᑐᓄᑦ ᐃᖅᑲᓇᐃᔭᖅᑎᒋᔭᐅᔪᓄᑦ, ᐊᒥᖅᑳᕈᑕᐅᔪᓪᓗ ᐃᓱᒪᒋᔭᐅᕙᒃᑐᑦ ᑲᔪᓰᓐᓇᕈᓐᓇᖅᑐᓂᒃ ᐊᑐᕈᓐᓇᕐᓂᕐᒥᒃ ᓄᓇᒥᐅᑕᓄᑦ ᐊᑐᖅᑕᐅᔪᓐᓇᖅᑐᓄᑦ, ᑕᐃᒪᐃᓕᐅᕐᓂᕐᒥᓂᓗ ᓴᙱᒃᑎᒋᐊᖅᑎᑦᑎᐅᔮᕐᔪᒃᖢᑎᒃ ᐃᓕᖅᑯᓯᑐᖃᕐᓄᑦ ᐊᑕᓂᕆᔭᐅᔪᓂᒃ ᐅᑯᖕᓄᙵ, ᐋᓐᑎᐅᕆᐅᒥ ᓄᓇᕗᒻᒥᓗ.
ᐃᓚᒋᔭᐅᓪᓗᓂ ᐊᖏᖃᑎᒌᒍᑎᒧᑦ ᐱᓕᕆᖃᑎᒌᖕᓂᐊᖅᑐᑦ ᐊᑐᓕᖅᑎᑦᑎᓂᕐᒧᓪᓗ ᑲᑎᒪᔨᕋᓛᑦ ᓴᖅᑭᑕᐅᓗᑎᒃ ᓯᕗᒻᒧᐊᒃᑎᑦᑎᓗᑎᒃ ᑲᑐᔾᔨᖃᑎᒌᒡᓗᑎᒃ ᓯᕗᓪᓕᐅᔾᔭᐅᔭᕆᐊᓕᖕᓂᒃ. ᑲᑎᒪᔨᕋᓛᑦ ᓯᕗᒃᑲᖅᑕᖅᑕᐅᓂᐊᖅᑐᑦ ᐊᖓᔪᖅᑲᐅᑎᓄᑦ ᑎᒃᑯᐊᖅᑕᐅᔪᓄᑦ ᐊᑐᓂ ᓯᕗᓕᖅᑎᓄᑦ.
Document(s):
2023-08 Backgrounder (GN Ontario) Premiers of Nunavut and Ontario sign MOU - INUK
2023-08 (GN Ontario) MOU - INUK