ᒫᑦᓯ 28, 2022
ᐱᕙᓪᓕᐊᔪᑦ ᓴᖅᑭᑕᐅᔪᑦ
ᓄᓇᕗᑦ ᒐᕙᒪᒃᑯᖏᑦᑕ ᐱᔨᑦᑎᕋᐅᑎᖏᑦ ᐊᒃᑐᕐᑕᐅᔪᖅ ᐃᑭᑦᑐᒧᑦ ᐅᖅᓱᖅᑑᒥᑦ
ᐃᖃᓗᐃᑦ, ᓄᓇᕗᑦ (ᒫᑦᓯ 28, 2022) – ᐅᓪᓗᒥ, ᒥᓂᔅᑕ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᑕᐃᕕᑎ ᔪᐊᓇᓯ ᑭᐅᓚᐅᕐᐳᖅ ᔭᒐᑕᐅᓂᖓ NCC ᐃᒡᓗᖁᑎᐊᓂ ᐃᑭᑦᑐᒧᑦ ᒫᑦᓯ 26, 2022−ᒥᑦ, ᐃᓂᒋᔭᐅᓚᐅᕐᑐᖅ ᐊᒥᓱᓂ ᓄᓇᕗᑦ ᒐᕙᒪᒃᑯᖏᑦᑕ ᐱᔨᑦᑎᕋᐅᑎᓂ ᐅᖅᓱᖅᑑᒥᑦ.
“ᐱᓇᓱᐊᕈᓯᐅᑉ ᓄᙳᐊᓂ, ᐃᑭᑦᑐᒥ ᐅᖅᓱᖅᑑᒥ ᓱᕋᐃᓚᐅᕐᒪᑦ ᒐᕙᒪᒃᑯᑦ ᐃᒡᓗᖁᑎᐊᓂ ᐃᓗᓕᖏᓐᓂᓪᓗ," ᐅᖃᖅᑐᖅ ᒥᓂᔅᑕ ᔪᐊᓇᓯ. “NCC ᐃᒡᓗᖁᑖ ᑐᓴᐅᒪᔪᓕᕆᕝᕕᐅᓚᐅᕐᐳᖅ ᓄᓇᓕᖕᓂᑦ ᑎᑎᕋᕐᕕᒋᔭᐅᓪᓗᓂᓗ ᐊᒥᓱᓄ ᓄᓇᕗᑦ ᒐᕙᒪᒃᑯᖏᑕ ᐱᓕᕆᕝᕕᖏᓐᓂᑦ. ᖁᔭᓕᔪᒪᕙᒃᑲ ᐃᖅᑲᓇᐃᔭᖅᑎᓕᒫᑦ ᐃᖅᑲᓇᐃᔭᕐᑐᑦ ᐊᒃᓱᕈᕐᖢᑎᒃ ᐅᑎᕐᑎᑦᑎᓇᓱᒃᖢᑎᒃ ᐱᔨᑦᑎᕋᕆᐊᖃᓪᓚᕆᒃᑐᓂᑦ ᓄᓇᓕᖕᓄᑦ ᐊᒻᒪᓗ ᑕᐃᒃᑯᓄᖓ, ᐊᒃᑐᕐᑕᐅᔪᑦ ᐊᓯᔾᔨᕐᑕᐃᓐᓇᕐᓂᖏᓐᓄ ᒫᓐᓇ ᐊᒃᓱᕈᕐᓇᖅᑎᓪᓗᒍ."
ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᒃᑯᖏᑦᑕ ᖃᓄᐃᓕᐅᕐᓂᖕᒧᑦ ᐸᖕᓇᐅᑖᓂ, ᖃᐅᔨᓴᕐᑕᐅᓂᖓ ᐅᓗᐊᓂ ᓯᓚᑖᓂᓪᓗ ᐊᑦᑐᐃᓂᖓᓂ ᔭᒐᑕᓄ ᑲᔪᓯᕗᖅ. ᐃᖅᑲᓇᐃᔭᖅᑎᑦ ᐃᑲᔫᑎᒃᓴᐃᓪᓗ ᑎᑭᑎᑕᐅᓂᐊᕐᑐᖅ ᐅᓪᓗᓂ ᐊᒡᒋᖅᑐᓂ ᐅᖅᓱᖅᑑᒧᑦ ᐃᑲᔪᕆᐊᕐᓗᑎᒃ ᐋᖅᑭᒋᐊᒃᑲᓐᓂᕐᓗᓂᔾᔪᑦ ᐱᔨᑦᑎᕋᕆᐊᖃᓪᓚᕆᒃᑐᓂᑦ ᓄᓇᓕᖕᓄᑦ. ᐃᖅᑲᓇᐃᔭᕐᓂᐊᕐᑐᑦ−ᐊᐃᓯᒪᓗᑎᒃ ᐊᑐᓕᕐᑎᑕᐅᓂᐊᕐᑐᖅ ᐊᒃᑐᕐᑕᐅᔪᓄᑦ ᓄᓇᕗᑦ ᒐᕙᒪᒃᑯᖏᑦᑕ ᐃᖅᑲᓇᐃᔭᕐᑎᖏᑦ ᐊᔪᕐᓇᙱᒃᑳᖓᑦ.
NCC ᐃᒡᓗᖁᑖ ᓄᓇᕗᑦ ᒐᕙᒪᒃᑯᖏᓐᓄᑦ ᑐᓴᐅᒪᔪᓕᕆᕝᕕᓪᓗᐊᑕᐅᓚᐅᕐᑐᖅ ᓄᓇᓕᖕᓄᑦ, ᐃᓂᒋᔭᐅᓪᓗᓂ ᓴᕕᒐᐅᔭᐅᔮᕐᑐᓄᑦ ᑲᓱᕐᕕᖕᓄᑦ, ᐃᖅᑲᓇᐃᔭᕐᕕᑦ, ᐊᒻᒪᓗ ᐱᔨᑦᑎᕋᕐᑎᐅᓪᓗᑎᒃ ᓄᓇᓕᖕᓄᑦ ᓲᕐᓗ ᐅᖄᓚᐅᓄᑦ ᖃᕆᑕᐅᔭᒃᑯᓪᓗ ᑲᑎᒪᔾᔪᑎᓄᑦ.
ᑐᓴᖅᑎᑕᐅᒃᑲᓐᓂᖃᑦᑕᕐᓂᐊᕐᑐᑦ ᐊᒃᑐᐃᓂᐅᔪᓂᑦ ᓄᓇᕗᑦ ᒐᕙᒪᒃᑯᖏᑦᑕ ᐱᔨᑦᑎᕋᐅᑎᖏᓐᓄᑦ ᐃᓄᖕᓄᑦ ᐊᑐᐃᓐᓇᐅᓕᕌᖓᑕ. ᑎᑎᕋᕐᓯᒪᔪᓄ ᐊᒃᑐᕐᑕᐅᔪᓄᑦ ᐱᔨᑦᑎᕋᐅᑎᓄᑦ ᐅᖅᓱᖅᑑᒥᑦ, ᐅᕗᙵᐅᓗᑎᑦ www.gov.nu.ca.
###
ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᑦ:
ᓰᐅᕋ ᓕᑉᓛᖕ
ᑐᑭᒧᐊᒃᑎᑦᑎᔨᐅᓚᐅᑲᒃᑐᖅ, ᑐᓴᐅᒪᖃᑦᑕᐅᑎᓕᕆᓂᕐᒧᑦ
ᒐᕙᒪᓕᕆᔨᒃᑯᑦ
867-975-6004
sleblanc@gov.nu.ca
ᓱᓕᑳ ᑑᕆᐅᓪ
ᑐᓴᐅᒪᔪᓕᕆᔨᒻᒪᕆᒃ
ᓄᓇᓕᖕᓂ ᒐᕙᒪᒃᑯᓂᓪᓗ ᐱᔨᑦᓯᕋᖅᑎᒃᑯᑦ
867-975-5406
Sduale1@gov.nu.ca
ᓄᓇᕗᑦ ᒐᕙᒪᒃᑯᖏᑦᑕ ᑐᓴᖅᑎᑦᑎᒋᐊᒃᑲᓐᓂᕈᑖ, ᐅᖅᓱᖅᑑᖅ
ᒫᑦᓯ 28, 2022
ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᑐᓴᖅᑎᑦᑎᒋᐊᒃᑲᓐᓂᕈᑖ:
- ᓄᓇᓕᖕᓂᑦ ᐸᖅᑭᕕᒃ ᐊᒃᑐᕐᑕᐅᙱᑦᑐᖅ.
- ᓄᓇᓕᖕᓂᑦ ᐋᓐᓂᐊᕕᒃ ᐊᐅᓚᓐᓂᐊᕐᑐᖅ ᐃᓚᖏᑦ ᐱᔨᑦᑎᕋᐅᑎᑦ ᓄᖅᑲᕐᓗᑎᒃ ᐱᔾᔪᑎᒋᓪᓗᒍ ᐅᖄᓚᐅᑎᖃᐅᑏᑦ, ᓱᑲᑦᑐᒃᑰᕈᑎᑦ, ᖃᕆᑕᐅᔭᓅᕐᑐᓪᓗ ᓲᕐᓗ Meditech ᐊᑐᐃᓐᓇᐅᙱᓐᓂᖏᓐᓄᑦ.
- ᐃᖅᑲᓇᐃᔭᕐᑎᑦ ᐱᔨᑦᑎᕋᐃᓐᓇᕐᓂᐊᕐᑐᑦ ᑲᒪᒋᔭᖃᕐᐸᒃᓗᑎᒃᓗ ᓄᓇᓕᑦ ᐱᔭᕆᐊᓕᖏᓐᓂᑦ ᐊᑐᕐᓗᑎᒃ ᐅᖄᓚᐅᑎᕋᓛᓂ ᑎᑎᕋᕐᕕᒃᓴᕐᔪᐊᓂᓪᓗ.
- ᐋᓐᓂᐊᕕᓕᐊᕐᕕᒃᓴᐃᑦ ᐃᓂᒃᓴᖏᑦ, ᑲᐱᔭᐅᓃᑦ ᐋᓐᓂᐊᕕᒃᓗ ᑲᔪᓯᓂᐊᕐᑐᑦ ᐅᓚᕕᑕᐅᙱᓪᓗᑎᒃ.
- ᑕᕐᕋᖅᑐᖅᑕᐅᕕᒃ ᑲᔪᓯᔪᖅ, ᑭᓯᐊᓂ ᑭᖑᕙᓯᑐᐃᓐᓇᕆᐊᓕᒃ ᓘᒃᑖᒥ ᕿᒥᕐᕈᓂᐊᕐᓗᓂ ᖃᕆᑕᐅᔭᓅᕐᑐᑦ ᐅᑎᓚᐅᕐᑎᓪᓗᒋᑦ.
- ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓇᒃᓯᐅᔾᔨᔪᑦ ᖃᕆᑕᐅᔭᓂ ᓴᕐᓕᐊᒐᓂ ᖃᕆᑕᐅᔭᕈᑎᓂᓪᓗ ᑲᓱᒃᑲᓐᓂᖁᓪᓗᒋᑦ ᐃᖅᑲᓇᐃᔭᕐᑎᑦ Meditech−ᒧᑦ ᐊᓯᖏᓐᓄᓪᓗ ᖃᕆᑕᐅᔭᓅᕐᑐᓄᑦ.
ᐃᓕᓐᓂᐊᕐᓂᓕᕆᔨᒃᑯᑦ ᑐᓴᖅᑎᑦᑎᒋᐊᒃᑲᓐᓂᕈᑖ:
- ᑕᒪᖕᒥᒃ ᖁᖅᓲᓐ ᐃᓕᕼᐊᒃᕕᒃ ᐊᒻᒪᓗ ᕿᕿᕐᑕᖅ ᐃᓕᓐᓂᐊᕐᕕᐊᓗ ᐊᐅᓚᓂᐊᕐᑐᑦ ᐊᓯᔾᔨᕐᑐᖃᙱᓪᓗᓂ ᐊᐅᓚᓐᓂᖏᓐᓂᑦ.
- ᑭᓱᑯᓘᔭᐃᑦ ᓇᒃᓯᐅᔾᔭᐅᓚᐅᕐᑐᑦ ᐅᖅᓱᖅᑑᖅ ᐃᓕᓐᓂᐊᕐᕕᖏᑦᑕ ᐃᖅᑲᓇᐃᔭᕐᑎᖏᓐᓄᑦ ᐊᑐᕐᑕᐅᓚᐅᕐᑐᑦ ᓄᕙᒡᔪᐊᕐᓇᖅ-19 ᒪᑐᔭᐅᓯᒪᑎᓪᓗᒋᑦ ᐊᑐᐃᓐᓇᐅᓂᐊᕐᑐᑦ ᐃᖅᑲᓇᐃᔭᕐᑎᓄᑦ ᐊᑐᕈᓐᓇᖁᓪᓗᒋᑦ ᓄᓇᕗᑦ ᒐᕙᒪᒃᑯᖏᑦᑕ ᐃᕐᖐᓈᖅᑕᐅᑎᖏᓐᓄ ᐊᒻᒪᓗ ᐃᓕᓐᓂᐊᖅᑐᑦ ᐃᓕᓐᓂᐊᕈᑎᖏᓐᓄᑦ ᑐᑭᓯᒋᐊᕐᕕᖏᓐᓄᑦ.
- ᐅᖄᓚᐅᑎᑦ, ᐅᖃᓗᖁᔨᔾᔪᑎᓪᓗ ᐊᒻᒪᓗ CCTV ᐊᔪᙱᑦᑐᐃᑦ ᐊᒃᑐᕐᑕᐅᓇᑎᒃᓗ ᑕᒪᐃᓐᓂᒃ ᐃᓕᓐᓂᐊᕐᕕᖕᓂᑦ.
- ᐅᔾᔨᖅᓱᑦᑎᐊᕐᓂᖕᒧᑦ, ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᖃᑎᖃᕐᑐᐃᑦ ᐃᓕᓐᓂᐊᖅᑐᓕᕆᔨᒃᑯᓐᓂᑦ ᐋᖅᑭᒃᓯᓯᒪᑲᐃᓐᓇᕐᓂᐊᕐᓗᑎᒃ ᐃᑭᑦᑐᓂ ᓇᐅᑦᑎᕐᓱᕐᑎᓂ ᑕᒪᐃᓐᓄ ᐃᓕᓐᓂᐊᕐᕕᖕᓄᑦ, ᐱᒋᐊᕐᓗᓂ ᓇᒡᒐᔾᔭᒥ 5-ᒧᐊᕐᐸᑦ ᐅᓐᓄᒃᑯᑦ.
ᒪᓕᒐᓕᕆᔨᒃᑯᑦ ᑐᓴᖅᑎᑦᑎᒋᐊᒃᑲᓐᓂᕈᑖ:
- ᒪᓕᒐᓕᕆᓂᕐᒧᑦ ᑲᑎᒪᔩᑦ ᐊᐅᓚᑕᖏᑦ ᓂᕆᐅᒋᔭᐅᔪᑦ ᐊᐅᓚᐃᓐᓇᕐᓂᐊᕐᒪᑕ ᐅᓚᕕᑕᐅᙱᓪᓗᑎᒃ. ᑭᖑᕙᓯᑐᐃᓐᓇᕆᐊᓕᑦ ᐃᓚᖏᑦ ᐱᔨᑦᑎᕋᐅᑦ, ᐃᓚᐅᓪᓗᓂ ᑮᓇᐅᔭᓕᕆᓂᑦ, ᒪᓕᒐᓄᑦ ᐃᑲᔪᖅᑕᐅᔪᒪᔾᔪᑎᑦ, ᐊᒻᒪᓗ ᒪᓕᒐᓄ ᐃᑲᔪᖅᑕᐅᔪᒪᔪᓄᑦ ᐊᖏᕐᑕᐅᔭᕆᐊᓕᓕᕆᓂᑦ.
- ᓄᓇᓕᖕᓂ ᐃᖅᑲᖅᑐᖅᑕᐅᓚᐅᕐᑐᓂᑦ ᑲᒪᔨ ᐅᖅᓱᖅᑑᒥ ᑲᔪᓰᓐᓇᕐᓂᐊᕐᑐᖅ ᐅᖓᓯᒃᓗᓂ ᖃᐅᔨᒋᐊᕐᐸᒃᓗᓂ ᑭᓯᐊᓂ ᐋᖅᑭᒃᓯᒃᐸᑕ ᑲᑎᕝᕕᒃᓴᒥ. ᐊᒃᑐᕐᑕᐅᔪᖃᔾᔮᙱᑦᑐᖅ ᐱᔨᑦᑎᕋᕐᑕᐅᔪᓂ ᐱᕋᔭᒃᑕᐃᓕᒪᔪᓂᑦ.
- ᒪᓕᒐᓂ ᑐᑭᓯᒋᐊᕐᕕᒃ ᑲᔪᓰᓐᓇᕐᓂᐊᕐᑐᑦ, ᓈᒻᒪᒃᑐᒃᑯᑦ ᐊᑑᑎᓕᖕᓂᓪᓗ ᐊᑐᐃᓐᓇᐅᓗᑎᒃ ᒪᓕᒐᓕᕆᔨᒃᑯᑦ ᐱᔨᑦᑎᕋᐅᑎᖏᑦ ᓄᓇᕗᒻᒥᐅᓄᑦ.
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᑐᓴᖅᑎᑦᑎᒋᐊᒃᑲᓐᓂᕈᑖ:
- ᐅᐸᒍᓐᓇᙱᑲᓚᐅᕐᑐᑦ ᓄᓇᒃᑰᕈᑎᓕᕆᔨᒃᑯᓐᓄᑦ ᒫᓐᓇᐅᔪᖅ, ᐃᓚᐅᓪᓗᓂ ᐊᖁᑦᑐᓐᓇᐅᑎᓕᕆᓃᑦ ᓇᓗᓇᐃᒃᑯᑕᑐᐃᓐᓇᕐᓂᓪᓗ, ᐊᒻᒪᓗ ᐊᖁᓐᓂᕐᒧᑦ ᖃᐅᔨᓴᕐᓃᑦ.
- ᐅᖅᓱᖅᑑᖕᒥᐅᑕᐃᑦ ᐅᕗᙵᐅᔪᓐᓇᕐᑐᑦ www.gov.nu.ca/motorvehicles ᐃᕐᖐᓈᖅᑕᐅᑎᒃᑯᓪᓘᓐᓃᑦ ᑎᑎᕋᕐᓗᑎᒃ MotorVehicles@gov.nu.ca ᐊᑐᕐᓂᐊᕐᓗᑎᒃ ᐅᑯᓂᖓ ᐱᔨᑦᑎᕋᐅᑎᓂᑦ:
- ᐊᖁᑦᑐᓐᓇᐅᑎᓄᑦ ᓄᑖᙳᕆᐊᖅᑎᑦᑎᓂᖅ.
- ᓄᓇᕗᒻᒥ ᓇᓗᓇᐃᒃᑯᑕᕐᓄᑦ ᓄᑖᙳᕆᐊᖅᑎᑦᑎᓂᖅ
- ᓄᓇᒃᑰᕈᑎᓄᑦ ᐊᑎᓕᐅᕐᕕᖕᒧᑦ ᓄᑖᙳᕆᐊᖅᑎᑦᑎᓂᖅ
- ᑐᒃᓯᕋᐅᑏᑦ ᐊᖁᑦᑐᓐᓇᐅᑎᓂᑦ, ᓄᓇᑰᕈᑎᓯᐅᕐᓂᖅ, ᐊᒻᒪᓗ ᐱᕐᕈᓗᐊᕿᔪᓂ ᐅᓂᑳᕐᓂᖅ
ᐃᓄᓕᕆᔨᒃᑯᑦ ᑐᓴᖅᑎᑦᑎᒋᐊᒃᑲᓐᓂᕈᑖ:
- ᐊᑐᕈᒪᓗᓂ ᐃᓚᒌᓄᑦ ᖃᓄᐃᖏᑦᑎᐊᕐᑐᓕᕆᔨᒃᑯᓐᓂ ᐅᖅᓱᖅᑑᒥ, ᐅᖄᓚᓗᑎᑦ:
- 867-222-3906 ᐃᓄᓕᕆᔨᒧᑦ ᐅᖄᓚᕕᐅᔪᓐᓇᕐᑐᑦ ᐅᖅᓱᖅᑑᒥᑦ.
- 1-844-392-4453 ᓄᓇᕗᓕᒫᒧ ᖃᐅᔨᒋᐊᕐᕕᒃᓴᖅ.
- ᐃᑲᔫᓯᐊᖅᑐᓕᕆᔨᒧᑦ ᐅᖅᓱᖅᑑᒥ, ᐅᖄᓚᓗᑎᑦ:
- 867-202-4194 ᐅᖃᖃᑎᖃᕐᓂᐊᕐᓗᑎᑦ ᐃᑲᔫᓯᐊᖅᑐᓕᕆᔨᒥ ᐅᖃᓗᒡᕕᒃᓴᒥᑦ.
- 1-800-661-0845 ᐊᕕᑦᑐᖅᓯᒪᓂᐅᔪᒧᑦ ᐊᓪᓚᕝᕕᐊᓄᑦ.
- ᐊᐃᕆᓕ ᐱᒋᐊᕐᓂᖓᓂ, ᐃᑲᔫᓯᐊᖅᑐᓕᕆᔨᒃᑯᑦ ᐅᑎᕐᓂᐊᕐᑐᑦ ᖃᐅᔨᓴᑐᐃᓐᓇᕐᐸᒃᑕᒥᓂᒃ. ᐱᔨᑦᑎᕋᕐᑕᐅᔪᑦ ᐃᑲᔫᓯᐊᖅᑐᓕᕆᔨᐅᑉ ᑎᑎᕋᕐᕕᐊᓄᐊᕈᓐᓇᕐᑐᑦ ᐅᖃᖃᑎᖃᕐᓂᐊᕐᓗᑎᒃ ᐃᑲᔫᓯᐊᖅᑐᓕᕆᔨᒥᑦ ᑎᑎᕋᕐᓗᑎᒃᓗ ᐱᔭᐅᔭᕆᐊᓕᖕᓂᑦ ᑎᑎᖅᑲᓂᑦ. ᐊᑭᓕᐅᑎᓕᐅᖃᑦᑕᕐᓂᐊᕐᑐᑦ ᐅᖓᓯᒃᓗᑎᒃ ᐊᕕᒃᑐᖅᓯᒪᔪᑦ ᑎᑎᕋᕐᕕᐊᓂ, ᐊᑐᐃᓐᓇᐅᓕᕐᓗᑎᒃᓗ ᓂᐅᕕᕐᕕᒃᑯᑲᐅᑎᒋ.