ᓄᓇᕗᑦ ᑐᙵᕕᒃ ᑎᒥᖓ ᑮᓇᐅᔭᓂᒃ ᐊᑐᖅᑐᑦ $15 ᒥᓕᐊᓐ ᑮᓇᐅᔭᓂᒃ ᓄᓇᖃᖅᑳᖅᓯᒪᔪᑦ ᓄᓇᓕᖏᑦᑕ ᐱᖁᑎᕐᔪᐊᓕᕆᓂᖏᖕᓄᑦ ᑮᓇᐅᔭᖏᖕᓂᒃ ᐃᑲᔪᖅᑐᐃᓪᓗᑎᑦᒧ ᐊᒻᒪᓗ ᓄᑖᕈᕆᐊᖅᑎᑕᐅᓪᓗᑎᑦ ᐃᓐᓇᒃᑯᕖᑦ ᓄᓇᕗᒻᒥ.
ᓄᓇᕗᑦ ᑐᙵᕕᒃ ᑎᒥᖓ ᖃᐅᔨᒪᑦᑎᐊᖅᑎᑦᑎᔪᑦ ᓈᒻᒪᑦᑐᓂᑦ ᐃᓐᓇᒃᑯᕕᑕᖃᕐᓂᐊᕋᓗᐊᕐᒪᖔᕐᒥᒃ ᓴᓇᔭᐅᓗᑎᑦ ᐋᖅᑭᐅᒪᑎᑕᐅᓗᑎᓪᓗ ᓄᓇᕗᒻᒥ ᐃᓐᓇᒃᑯᕕᐅᔪᑦ, ᐱᖃᓯᐅᑎᓗᒋᑦ ᒥᑭᓐᓂᖅᓴᓂᒃ ᓄᓇᓕᓐᓂ. “ᐃᓐᓇᕐᓄᑦ ᐸᖅᑭᑦᑎᕕᑕᖃᓕᖁᓪᓗᒍ, ᐋᖅᑭᐅᒪᑎᑦᑎᔭᕆᐊᖃᕆᕗᒍᑦ ᒪᑭᒪᔪᓐᓇᖃᑦᑕᕇᕐᓂᖏᑦ ᐃᓐᓇᒃᑯᕖᑦ ᓄᓇᕗᒻᒥ. ᑖᒃᑯᐊ ᑮᓇᐅᔭᑦ ᐊᑐᖅᑕᐅᔪᑦ ᐃᑲᔪᕐᓂᐊᖅᑐᑦ ᓴᐳᒻᒥᐅᓯᖅᓯᒪᔭᕇᕐᓗᒋᑦ ᒪᑭᒪᔪᓐᓇᕐᓂᕗᑦ ᐃᓐᓇᒃᑯᕕᖃᕐᓗᑕ. ᖃᐅᔨᒪᑦᑎᐊᖅᑎᑦᑎᒍᑕᐅᓂᐊᕆᕗᖅ ᐃᓐᓇᒃᑯᕖᑦ ᐊᕐᕕᐊᓂ, ᐅᖅᓱᖅᑑᖅ ᐊᒻᒪᓗ ᐃᒡᓗᓕᖕᒥ ᐃᓄᒻᒪᕆᖕᓂᒃ ᐃᓐᓇᕐᓂᒃ ᐋᖅᑭᐅᒪᑦᑎᐊᖅᑕᑯᓗᓐᓂᒃ ᐊᖏᕐᕋᖃᕐᓂᕋᕈᓐᓇᕐᕕᒋᓂᐊᕐᒪᒋᑦ” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ.
$5 ᒥᓕᐊᓐ ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᓄᑖᕈᕆᐊᖅᑎᑕᐅᓗᓂ ᐊᕐᕕᐊᓂ ᐋᓐᑎ ᐊᐅᓚᑦᔪᑦ ᐃᓐᓇᒃᑯᕕᖓ, ᓴᓇᔭᐅᓚᐅᖅᓯᒪᔪᖅ 1990−ᐅᑎᓪᓗᒍ. ᐊᓯᖏᓐᓄᓪᓗ ᐊᑐᖅᑕᐅᓂᐊᕋᓗᐊᖅᑐᑎᑦ, ᑖᒃᑯᐊ ᑮᓇᐅᔭᑦ ᓄᓇᕗᑦ ᒐᕙᒪᖏᖕᓂ ᐃᓇᖐᑎᑦᑎᔪᓐᓇᕐᓂᐊᖅᑐᑦ ᑰᖃᕐᕕᒻᒥ ᐃᓕᔾᔨᕕᖏᑦ, ᓇᑎᖏᑦ, ᓴᓂᕋᖏᑦ ᐃᒡᓗᒥ, ᖃᑦᑕᑦ, ᖁᖁᐊᕈᑏᑦ, ᒥᓪᓗᐊᕈᑏᑦ ᐊᒻᒪᓗ ᐊᒥᐊᖅᑕᐅᑦᑎᐊᒃᑲᓐᓂᕐᓗᓂ.
ᓄᓇᕗᑦ ᑐᙵᕕᒃ ᑎᒥᖓ ᐃᑲᔪᕐᓂᐊᕐᒥᔪᑦ ᐃᒪᓐᓇᓂᒃ $500,000 ᐃᒡᓗᑉ ᖃᓄᐃᓕᖓᓕᕐᓂᖏᓐᓂᒃ ᖃᐅᔨᓵᖑᓗᓂ ᒫᓐᓇᒫᖑᓂᖅᓴᓂᒃ ᓴᓇᔭᐅᓯᒪᔪᑦ ᐃᓐᓇᒃᑯᕕᓂᑦ ᐅᖅᓱᖅᑑᕐᒥ ᐃᒡᓗᓕᖕᒥᓗ, ᓯᕗᓂᐊᒍᑦ ᖃᓄᐃᑦᑐᖃᓗᐊᓚᐅᙱᓐᓂᖓᓂᒃ ᐱᓕᕆᐊᖃᖁᓪᓗᒋᑦ ᓇᓗᓇᐃᖅᓯᓗᑎᑦ ᑭᓱᑐᐃᓐᓇᕐᓂᒃ ᐊᓯᔾᔨᖅᑕᐅᔭᕆᐊᓕᓐᓂᒃ. ᑮᓇᐅᔭᑦ ᐊᑐᖅᑕᐅᓂᐊᕐᒥᔪᑦ ᐊᔪᕐᓇᕋᔭᙱᒻᒪᖔᖅ ᐱᓕᕆᐊᖃᕐᓗᓂ ᖃᐅᔨᓴᕆᐊᙵᐅᑎᓗᑎᑦ ᐊᖏᓪᓕᒋᐊᖅᑕᐅᓗᑎᑦ ᑕᒪᒃᑯᐊ ᐃᓐᓇᕐᓄᑦ ᐸᖅᑭᕖᑦ ᐃᓐᓇᒃᑯᕖᑦ. ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᓄᓇᕗᑦ ᒐᕙᒪᖏᑦ ᐅᐊᑦᑎᓂᐊᖅᑐᑦ ᑕᒪᒃᑯᓂᖓ ᑲᑐᔾᔨᓗᑎᒃ ᖃᐅᔨᓵᕆᔭᐅᔪᓂᑦ ᐋᖅᑮᖃᑎᒌᓛᕐᒥᓗᑎᒃ ᑮᓇᐅᔭᑦ ᐊᑐᖅᑕᐅᓂᖏᖕᓄᑦ ᐸᕐᓇᐅᑎᓂᒃ ᐊᒥᐊᒃᑯᓂᒃ $9.5 ᒥᓕᐊᓐ ᑮᓇᐅᔭᓂᑦ.
“ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᖁᕕᐊᓱᑦᑐᒻᒪᕆᐅᕗᑦ ᐱᓕᕆᖃᑎᖃᕐᓂᐊᕐᓂᑦᑎᓐᓂᒃ ᐃᖅᑲᓇᐃᔭᖃᑎᒌᓱᑦᑎᓐᓂᒃ ᓄᓇᕗᑦ ᑐᙵᕕᒃ ᑎᒥᖓᓂᒃ ᓯᕗᒧᐊᑦᑎᑕᐅᓗᓂ ᑲᑐᔾᔨᓗᑕ ᐱᓇᓱᐊᒐᕗᑦ ᐃᓐᓇᒻᒪᕇᑦ ᐸᖅᑭᔭᐅᖃᑦᑕᕐᓕᕐᓗᑎᑦ ᐊᖏᕐᕋᑦᑎᓐᓂ.” ᐅᖃᖅᑐᓂ ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐋᕐᓗᒃ ᒪᐃᓐ. “ᑕᒪᓐᓇ ᐱᓕᕆᐊᕆᔭᕗᑦ ᐊᔾᔨᖃᖅᑐᖅ ᐱᓕᕆᖃᑎᒌᖕᓂᕐᒥᒃ, ᑲᑐᔾᔨᓪᓗᑕ ᑲᒪᒋᔭᖃᕐᓂᐊᕐᓂᕋᕐᓂᕗᑦ ᖃᐅᔨᒪᑦᑎᐊᕐᓗᑕ ᐃᓐᓇᖁᑎᕗᑦ ᐃᑲᔪᖅᑐᖅᑕᐅᓂᐊᕐᒪᑕ ᐊᒻᒪᓗ ᐱᔨᑦᑎᖅᑕᐅᓗᑎᑦ ᐱᔭᕆᐊᓕᖏᑦ ᒪᓕᓪᓗᒋᑦ ᓄᓇᕗᒻᒥ, ᐃᓅᖃᑎᒋᔭᐅᓗᑎᑦ ᐃᓚᒥᓄᑦ, ᐃᓕᖅᑯᓯᖓᓂᓪᓗ ᐊᑐᖅᑕᐅᔪᒥᒃ, ᐊᖅᒪᓗ ᖃᐅᔨᒪᔭᖏᓐᓃᓪᓗᑎᑦ. ᑕᒪᓐᓇ ᑮᓇᐅᔭᓂᑦ ᐊᑐᕐᓂᕗᑦ ᓴᙵᑦᑎᕆᓂᑐᐃᓐᓇᐅᙱᓚᖅ ᐋᓐᓂᐊᖃᕐᓇᙱᑦᑐᓕᕆᕙᓐᓂᑦᑎᓐᓂᒃ ᑭᓯᐊᓂᓕ ᑲᑐᔾᔨᓗᑕ ᑲᒪᒋᔭᖃᐃᓐᓇᕐᓂᐊᕐᓂᕋᖅᓯᒪᓂᕗᑦ ᐊᑐᓪᓚᕆᓕᖅᑕᕗᑦ ᐱᐅᓯᕚᓪᓕᖅᑎᓪᓗᒋᑦ ᐃᓐᓇᒻᒪᕆᑦᑕ ᐃᓅᓯᖏᑦ ᐃᓚᖏᓪᓗ ᓄᓇᕗᓗᒃᑖᕐᒥ.”
ᑖᒃᑯᓂᖓ ᑮᓇᐅᔭᓂᒃ ᐊᑐᕐᓂᕗᑦ ᓴᙵᑦᑎᑦᑎᕗᖅ ᓄᓇᕗᑦ ᑐᙵᕕᒃ ᑎᒥᖓᓂᒃ ᐊᒻᒪᓗ ᓄᓇᕗᑦ ᒐᕙᒪᖓᓂᒃ ᐃᖅᑲᓇᐃᔭᖃᑎᒌᓐᓂᕆᔭᑦᑎᓐᓂᒃ ᐃᓐᓇᒻᒪᕇᑦ ᐸᖅᑭᔭᐅᑦᑎᐊᓕᖁᓪᓗᒋᑦ, ᑲᔪᓯᓂᖃᐃᓐᓇᕐᓂᐊᖅᑐᓂ ᐃᖅᑲᓇᐃᔭᖃᑎᒌᓐᓂᑦᑎᓐᓂᒃ ᐋᖅᑭᒃᓱᐃᓗᑕ ᐊᑯᓂᐅᔪᒧᑦ ᐸᕐᓇᐅᑎᓕᐅᖅᑎᓪᓗᑕ ᐃᓐᓇᒃᑯᕕᓕᐅᒃᑲᓐᓂᕋᔭᕐᓂᑦᑎᓐᓂᒃ ᐊᒻᒪᓗ ᐃᓂᒃᓴᖏᑦ ᓄᓇᓕᕗᑦ ᓯᕗᓂᒃᓴᖃᖅᑎᓪᓗᑕ ᐃᓐᓇᕈᓛᖅᑐᓂᒃ ᐃᓱᒪᒋᓪᓗᒍ; ᑲᒪᒋᓂᐊᕐᓂᕋᖅᓯᒪᔭᕗᑦ ᐃᓐᓇᕈᖅᐸᓪᓕᐊᓂᖅ ᑲᒪᒋᔭᐅᑦᓯᐊᕐᓗᑕ − ᐃᓐᓇᒻᒪᕇᑦ ᐊᒻᒪᓗ ᐃᓐᓇᐃᑦ ᐱᓪᓗᒋᑦ ᖃᓄᖅᑑᕈᑎ.