ᓇᓗᓇᐃᕈᑎ
ᓯᕗᓕᖅᑎ ᐊᕿᐊᕈᖅ ᓂᕆᐅᓐᓂᖃᑦᓯᐊᖅᑐᖅ ᑐᕌᖅᑕᐅᓂᐊᖅᑐᓂᒃ ᓇᓗᓇᐃᖅᑕᐅᔪᓂᒃ ᑯᐃᓐ ᐃᒃᓯᕙᐅᑕᖓᓂᒃ ᐅᖃᐅᓯᕐᖓᐅᑎᖓᓂᒃ ᓯᕗᓪᓕᖅᐹᒥ ᐃᓄᒻᒧᑦ ᑯᐃᓐ ᑭᒡᒐᖅᑐᖅᑎᖓᓂᒃ
ᓯᕗᓕᖅᑎ ᐱᔭᐃ ᐊᕿᐊᕈᖅ ᐅᓪᓗᒥ ᓴᖅᑭᖅᑎᑦᓯᖅᑲᐅᔪᖅ ᑖᑦᓱᒥᖓ ᓇᓗᓇᐃᕈᑎᒥᒃ:
“ᑐᙵᓱᑦᑎᑕᕋ ᑐᕌᖅᑕᐅᓂᐊᖅᑐᓂᒃ ᓇᓗᓇᐃᖅᑕᐅᔪᓂᒃ ᑯᐃᓐ ᑭᒡᒐᖅᑐᖅᑎᖓ ᒥᐊᓕ ᓴᐃᒪᓐ ᐅᖃᐅᓯᕐᖓᐅᑎᖓᓂ ᑯᐃᓐ ᐃᒃᓯᕙᐅᑕᖓᓂᒃ. ᐅᐱᓐᓇᖅᑲᐅᔪᖅ ᐅᓪᓗᒥ ᐃᖅᑲᐅᒪᓇᐃᓐᓇᕐᓂᐊᖅᑐᓂᓗ ᑲᓇᑕᒥ ᐃᓄᓐᓄᑦ ᑐᓴᖅᑎᓪᓗᒋᑦ ᓯᕗᓪᓕᖅᐹᒥ ᓄᓇᖃᖅᑳᖅᑐᒥᓂᕐᒥᒃ ᑯᐃᓐ ᑭᒡᒐᖅᑐᖅᑎᖓᓂᒃ ᐅᖃᐅᓯᖃᖅᑎᓪᓗᒍ ᐃᓚᖏᓐᓂᒃ ᐅᖃᐅᓯᕐᖓᐅᑎᖓᓂᒃ ᐃᓄᒃᑎᑑᖅᑐᓂ. ᐃᑉᐱᓐᓇᖅᑐᒻᒪᕆᐅᖅᑲᐅᔪᖅ ᑕᑯᓪᓗᒍ ᑯᐃᓐ ᑭᒡᒐᖅᑐᖅᑎᖓ ᐱᒋᐊᕈᑎᖃᖅᑎᓪᓗᒍ ᖃᓄᐃᓕᒋᐊᕈᑎᖃᕐᓂᕐᒥᒃ ᓴᐃᒻᒪᐸᓪᓕᐊᖃᑎᒌᓐᓂᕐᒧᑦ.
ᐃᓚᖏᑦ ᓯᕗᓪᓕᐅᔾᔭᐅᒍᒪᔪᑦ ᓇᓗᓇᐃᔭᖅᑕᐅᖅᑲᐅᔪᑦ ᐅᖃᐅᓯᕐᖓᐅᑎᖓᓂᒃ ᑯᐃᓐ ᐃᒃᓯᕙᐅᑕᖓᓂᒃ ᑐᕌᖓᑦᓯᐊᖅᑲᐅᔪᑦ ᐱᓗᐊᖑᐊᖅᑐᓄᑦ ᓴᖅᑭᔮᖅᑐᓄᑦ ᓄᓇᕗᒻᒥ. ᖁᕕᐊᖅᑲᐅᔪᖓ ᑐᓴᕋᒪ ᑐᕌᒐᖃᕐᓂᕐᒥᒃ ᖃᓄᐃᓕᒋᐊᕈᑎᖃᕐᓂᕐᒧᑦ ᓴᐃᒻᒪᐸᓪᓕᐊᖃᑎᒌᓐᓂᕐᒧᑦ, ᐃᓱᒪᓕᕆᓂᕐᒧᑦ, ᐃᓪᓗᓕᕆᓂᕐᒧᑦ, ᐊᑭᑐᔫᑎᓂᒃ ᐱᖁᑎᕐᔪᐊᓕᕆᓂᕐᒧᑦ ᐊᑭᑐᓗᐊᙱᑦᑐᓂᓪᓗ ᐸᐃᕆᕕᓕᕆᓂᕐᒧᑦ.
ᑕᒪᒃᑯᐊ ᑮᓇᐅᔭᖃᖅᑎᑦᓯᒍᑕᐅᔪᑦ ᐱᒻᒪᕆᐅᔪᑦ ᑲᒪᒋᔭᖃᕐᓂᕐᒧᑦ ᓄᓇᕗᒻᒥ ᐊᑭᑐᔫᑎᓂᒃ ᐃᓪᓗᓂᓪᓗ ᐊᒥᒐᖅᓯᓂᑦᑎᓐᓄᑦ ᐊᑦᑐᐃᓂᖃᑦᓯᐊᕐᓂᐊᖅᑐᑎᓪᓗ ᓄᓇᕗᒻᒥ ᐃᒻᒥᓃᖃᑦᑕᖅᑐᑦ ᑐᐊᕕᕐᓇᖅᑑᓕᕐᓂᖓᓄᑦ. ᐱᒻᒪᕆᐅᓂᐊᕐᒥᔪᖅ ᑐᙵᕕᓕᐅᕐᓂᕐᒧᑦ ᖁᕕᐊᓇᖅᑐᓂᒃ ᕿᑐᕐᖓᑎᓐᓄᑦ.
ᓯᕗᓪᓕᐅᔾᔭᐅᓂᐊᕐᓂᖓᓂᒃ ᓇᓗᓇᐃᖅᑕᐅᖅᑲᐅᒻᒥᔪᖅ ᑯᐃᓐ ᐃᒃᓯᕙᐅᑕᖓᓂᒃ ᐅᖃᐅᓯᕐᖓᐅᑎᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᓱᑲᑦᑐᒥᓪᓗ ᐆᓇᖅᓯᕙᓪᓕᐊᓂᖓ ᐅᑭᐅᖅᑕᖅᑐᖅ. ᓄᓇᕗᒻᒥ ᐅᐱᓐᓇᖅᑐᒥᒃ ᑲᑐᔾᔨᖃᑎᖃᖃᑦᑕᖅᓯᒪᔪᑦ ᒐᕙᒪᑐᖃᒃᑯᓐᓂᒃ ᑲᒪᒋᔭᖃᕐᓂᕐᒧᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ, ᐃᓚᒋᔭᐅᓪᓗᓂ ᐋᖅᑭᑦᑕᐅᓯᒪᓂᖓ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᐃᒪᕕᒻᒥ ᓴᐳᒻᒥᔭᐅᓂᖓᓂᒃ, ᑲᓇᑕᒥ ᐊᖏᓂᖅᐹᖑᓪᓗᓂ ᐃᒪᕕᒻᒥ ᓴᐳᒻᒥᔭᐅᕕᐅᔪᖅ.
ᓄᓇᕗᒻᒥ ᑲᔪᖏᑦᓯᐊᖅᑐᑦ ᐱᓕᕆᐊᖃᕐᓂᕐᒥᒃ ᓴᐳᒻᒥᔭᐅᓂᖓᓄᑦ ᓴᓗᒪᔪᒥᒃ ᐅᑭᐅᖅᑕᖅᑐᒥ ᐊᕙᑎᑦᑎᓐᓂᒃ ᐆᒪᔪᐃᓪᓗ ᓇᔪᒐᖏᓐᓂᒃ ᐱᕕᖃᖅᑎᑦᓯᓯᓐᓈᕐᓗᑎᒃ ᓄᓇᕗᒻᒥᐅᓂᒃ ᑮᓇᐅᔭᖃᖅᑎᑦᓯᓂᒃᑯᑦ ᐃᒪᕕᒻᒥ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ ᐊᕙᑎᑦᑎᓄᓪᓗ ᓴᓗᒪᔪᓂᒃ ᐃᖅᑲᓇᐃᔮᓂᒃ.
ᑲᔪᖏᑦᓯᐊᖅᑐᖓ ᑐᙵᕕᐅᖅᐸᓪᓕᐊᑲᓐᓂᓂᕐᒥᒃ ᑭᖑᓂᑦᑎᓐᓂ ᑲᑐᔾᔨᖃᑎᒌᓐᓂᕆᓯᒪᔭᑦᑎᓐᓂᒃ ᐊᖏᔪᖅᑳᕐᔪᐊᖅ ᑐᕈᑐ ᒐᕙᒪᖏᓐᓂᒃ ᓯᕗᒧᒋᐊᖅᑎᑦᓯᓂᕐᒧᑦ ᑲᑐᔾᔨᓗᑕ ᓯᕗᓪᓕᐅᑎᒍᒪᔭᑦᑎᓐᓂᒃ ᑐᕌᒐᑦᑎᓂᓪᓗ.”
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:
ᓯᒪ ᓴᕼᐊ ᔨᑭᕼᐃ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ, ᓯᕗᓕᖅᑎᐅᑉ ᐊᓪᓚᕝᕕᖓ
867-975-5059
szerehi6@gov.nu.ca