ᓯᕗᓕᖅᑎ ᐲᔾᔭᐃ ᐊᕿᐊᕈᖅ ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᑯᓂᖓ ᐅᖃᐅᓯᒃᓴᓂᑦ ᐱᔾᔪᑎᒋᓪᓗᒍ Conservative−ᑯᑦ ᓯᕗᓕᐅᖅᑎᖓᓂ ᐱᐊᕆ ᐳᐃᓕᕗᕐ ᐱᓕᕆᔨᐅᕝᕕᖓᓂ ᐊᑐᐊᒐᖓᓂ ᑐᒃᓯᕋᐅᑎᓂᑦ:
"ᐅᓪᓛᖅ, ᖃᐅᔨᖅᑲᐅᒐᒪ Conservative-ᑯᑦ ᓯᕗᓕᐅᖅᑎᖓ ᐱᐊᕆ ᐳᐃᓕᕗᕐ ᐅᑭᐅᖅᑕᖅᑐᒥ ᐊᑐᐊᒐᖓᓂ ᐃᓚᒋᔭᐅᓪᓗᓂ ᐋᖅᑭᒃᓱᐃᓪᓚᑦᑖᕐᓂᐊᕐᓂᕋᖅᖢᑎᒃ ᐅᓇᑕᖅᑐᒃᓴᖃᕐᕕᖕᒥ ᑲᓇᑕᐅᑉ ᐅᑭᐅᖅᑕᖅᑐᖓᓂ.
ᖁᕕᐊᒋᒐᓗᐊᖅᖢᒍ ᒐᕙᒪᓕᕆᔨᑦ ᐅᑭᐅᖅᑕᖅᑐᒥ ᐅᔾᔨᕈᓱᖕᓂᖏᓐᓂ, ᐱᐊᕆ ᐳᐃᓕᕗᕐ ᐃᖅᑲᐃᓯᔪᒪᕙᕋ ᐱᓕᕆᔨᐅᕝᕕᖓᓗ ᐅᑭᐅᖅᑕᖅᑑᑉ ᒥᒃᓵᓄᑦ ᐃᓱᒪᓕᐅᕈᑎᖃᕈᓐᓇᙱᒻᒪᑕ ᐅᑭᐅᖅᑕᖅᑐᒥᐅᓂᒃ ᐅᖃᐅᓯᐅᓪᓚᕆᓚᐅᙱᓪᓗᓂ. ᓂᕆᐅᒃᐳᖓ ᐱᐊᕆ ᐳᐃᓕᕗᕐ ᐃᓕᓴᕆᔭᐅᑦᑎᐊᕐᓂᐊᕐᓂᖓᓂᒃ ᑲᓇᑕᒥ ᐊᖏᔪᖅᑳᕐᔪᐊᙳᕐᓂᖅᐸᑦ, ᐅᑭᐅᖅᑕᖅᑐᒧᑦ ᐸᕐᓇᐅᑎᖏᑦ ᐋᖅᑭᒃᑕᐅᓂᐊᖅᑐᑦ ᐱᓕᕆᖃᑎᖃᕐᓗᑎᒃ ᐅᑭᐅᖅᑕᖅᑐᒥᐅᓂᑦ ᓴᖅᑭᔮᖅᑎᑦᑎᖁᓪᓗᒋᑦ ᐱᔪᓐᓇᐅᑎᑦᑎᓐᓂᑦ, ᐱᔭᕆᐊᓕᑦᑎᓐᓂᑦ, ᐃᓱᒪᒋᔭᑦᑎᓐᓂᓪᓗ.
ᓄᓇᕗᑦ ᒐᕙᒪᒃᑯᑦ ᓂᕆᐅᒃᐳᑦ ᐱᓕᕆᖃᑎᖃᕈᒪᓪᓗᑎᒃ ᑲᓇᑕᒥ ᐊᖓᔪᖅᑳᖅᑖᕆᔭᐅᓛᖅᑐᒥᒃ ᐱᒻᒪᕆᐅᔪᒥᒃ ᑲᓇᑕᒥ−ᐱᕈᖅᓴᐃᓂᕐᒧᑦ ᑮᓇᐅᔭᓕᐅᕈᑕᐅᓇᓱᒃᑐᓂᒃ ᐅᑭᐅᖅᑕᖅᑐᒥ ᐅᑭᐅᖅᑕᖅᑐᖅ ᓇᖕᒥᓂᕆᔭᑦᑎᓐᓄᑦ ᐊᒻᒪ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᑐᕌᒐᖏᓐᓂ ᒪᓕᒃᑐᓂᒃ, ᓴᖅᑭᓪᓗᒋᑦ NATO 2% ᑮᓇᐅᔭᓂᒃ ᐊᑐᕐᓂᐊᕐᓂᕋᖅᓯᒪᔭᕗᑦ, ᐊᑐᐃᓐᓇᐅᓕᖅᑎᓪᓗᒋᓪᓗ ᑮᓇᐅᔭᓕᐅᕈᑕᐅᔪᓐᓇᑐᐃᓐᓇᕆᐊᓖᑦ.
ᓄᓇᕗᑦ ᑎᑭᐅᑎᓯᒪᓕᕋᓗᐊᖅᑎᓪᓗᒍ ᐊᕐᕌᒍᓂ 25−ᓂ ᐊᓂᒍᖅᑐᓂ, ᓇᓗᓇᕈᓐᓃᖅᑐᖅ ᑐᑭᓯᐅᒪᑦᑎᐊᕆᐊᖃᖅᑐᒍᑦ ᑮᓇᐅᔭᓕᐅᕈᑕᐅᔪᓐᓇᖅᑐᓂᑦ ᓄᓇᕗᒻᒥ ᐱᔪᓐᓇᕐᓂᓕᒫᑦᑎᓐᓄᑦ. ᐱᕕᒃᓴᐅᓕᖅᐳᖅ ᑲᓇᑕᒥ ᐱᕈᖅᐸᓪᓕᐊᑎᑦᑎᓂᖅ ᐱᖓᔪᒋᔭᖓᓄᑦ ᑕᑭᓂᖅᐹᒧᓪᓗ ᓯᒡᔭᑦᑎᓐᓄᑦ. ᓄᓇᕐᔪᐊᒥ ᓄᓇᐅᑉ ᑕᐅᑦᑐᖓ ᒪᓕᒃᖢᒍ ᕿᑎᐊᓃᓐᓂᖓᓗ ᐅᑭᐅᖅᑕᖅᑐᒥᐅᓕᒫᓂᑦ ᐱᔾᔪᑎᓖᑦ, ᐊᒃᑐᐊᓂᖃᕐᓂᖅᓴᐅᕗᖅ ᐊᑭᑐᔪᓂᑦ ᑮᓇᐅᔭᓕᐅᕈᑎᖃᕆᐊᒃᓴᖅ ᐅᑭᐅᖅᑕᖅᑐᒥ ᓄᓇᓕᖕᓂ ᐱᔭᐅᔭᕆᐊᓕᖕᓂᒃ ᒪᓕᒃᑐᓂᑦ, ᓯᕗᒻᒧᐊᒃᐸᓪᓕᐊᓗᑎᒃ ᐱᓕᕆᐊᒃᓴᓂᑦ ᐱᕙᓪᓕᐊᔪᓕᕆᓂᕐᒧᑦ, ᑲᒪᒋᓗᒋᑦ ᐋᖅᑭᒋᐊᕈᑎᖃᕐᓂᖅ ᐊᒻᒪᓗ ᑲᓇᑕᒥ ᒐᕙᒪᐅᔪᓂᑦ ᐃᓱᒪᒋᔭᐅᔪᑦ ᐅᑭᐅᖅᑕᖅᑑᑉ ᓄᓇᖁᑎᖓᓂ ᐊᒻᒪᓗ ᓴᐳᒻᒥᔭᐅᓂᖓᓂ.
ᓄᓇᕗᑦ ᐱᓕᕆᔪᒪᓪᓚᑦᑖᖅᐳᑦ ᑲᓇᑕᒥ ᐊᑦᑕᕐᓇᙱᑦᑐᒦᖁᓪᓗᒋᑦ ᓴᐳᒻᒥᔭᐅᓗᑎᒡᓗ, ᐃᓚᒋᔭᐅᓗᓂ ᐅᑭᐅᖅᑕᖅᑐᒥᐅᑦ, ᓴᐳᔾᔨᓂᕐᒥᓪᓗ ᐱᔪᓐᓇᕐᓂᖏᓐᓂᑦ ᑲᓇᑕᒥ ᓴᐳᒻᒥᔭᐅᓗᑎᒃ ᑕᒪᐃᓐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓ ᐊᒥᐊᓕᒐᐃᑦ ᐅᐊᖕᓇᖓᓂᓪᓗ.
ᐅᓄᖅᑐᓂᒃ ᐱᕕᒃᓴᖅᑕᖃᖅᐳᖅ ᑲᓇᑕᐅᑉ ᐊᖓᔪᖅᑳᕆᓛᓕᖅᑕᖓᓂ ᐱᓕᕆᖃᑎᖃᕐᓂᐊᕐᓗᓂ ᓄᓇᕗᒻᒥ ᐊᓯᔾᔨᖅᐸᓪᓕᐊᓂᕐᒧᑦ ᐱᓕᕆᐊᖑᔪᓄᑦ ᐅᑭᐅᖅᑕᖅᑐᒥ.
ᓄᓇᕗᑦ ᓇᓗᓇᐃᖅᓯᓯᒪᑦᑎᐊᕐᒪᑦ ᓯᕗᓪᓕᐅᑎᔪᒪᔭᑦᑎᓐᓂᒃ ᐅᑭᐅᖅᑕᖅᑐᒥ ᓄᓇᖁᑎᖓᓂ ᓴᐳᒻᒥᔭᐅᓂᖓᓂᓪᓗ ᐊᒻᒪᓗ ᐊᑐᐃᓐᓇᐅᓕᖅᑎᓪᓗᒋᑦ ᓄᓇᕗᒻᒥ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᖃᓄᖅᑑᕈᑎᑎᒍᑦ ᓲᕐᓗ ᐅᔭᕋᐃᑦ ᐊᒻᒪᓗ ᐆᒪᖅᑯᑎᖃᑦᑎᐊᕐᓂᖅ.
ᐅᑭᐅᖅᑕᖅᑐᒥ ᓴᐳᒻᒥᔭᐅᓂᖓᓄᑦ ᐊᖅᑯᑎ, ᐅᕝᕙᓘᓐᓃᑦ ᖁᕐᓗᖅᑐᐊᕐᔪᒃ ᐊᖅᑯᑎᖓ ᐊᒻᒪ ᑐᓚᒃᑕᕐᕕᒃ, ᐃᓄᖕᓄᑦ−ᐊᐅᓚᑕᐅᓪᓗᓂ ᐱᓕᕆᐊᖑᖃᑕᐅᕗᖅ ᐃᑲᔪᖅᓱᖅᑕᐅᓪᓗᓂ ᓄᓇᕗᑦ ᒐᕙᒪᒃᑯᓐᓄᑦ. ᑖᓐᓇ ᑲᓇᑕᒥ−ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᖑᕙᓪᓕᐊᔪᖅ ᓴᙱᒃᑎᒋᐊᕈᑕᐅᓂᐊᖅᐳᖅ ᓄᓇᐅᑉ ᑲᑎᙵᓂᕆᔭᖓᓄᑦ ᐅᑭᐅᖅᑕᖅᑑᑉ ᑕᕆᐅᕐᔪᐊᖓᓄᑦ ᐱᓕᕆᐊᒃᓴᖅᑕᖃᓕᕐᓗᓂ ᐅᔭᕋᖕᓂᐊᕐᓂᕐᒥᑦ ᐅᔭᕋᖕᓂᐊᒐᒃᓴᐃᑦ ᐱᔭᐅᔭᕆᐊᖃᓪᓚᕆᒃᑐᑦ ᑕᒪᐃᓐᓄᑦ ᑲᓇᑕᒥ ᒪᑭᒪᔾᔪᑎᓄᑦ ᐊᒻᒪ ᐅᓇᑕᖅᑐᒃᓴᑦ ᐱᔭᕆᐊᓕᖏᓐᓄᑦ. ᑖᓐᓇᑐᐊᑦᑎᐊᖅᑕᐅᖅ ᐃᑎᔪᒥ ᑐᓚᒃᑕᕐᕕᐅᓂᐊᖅᐳᖅ ᐱᖓᓐᓇᖅᐸᓯᐊᓂ ᕿᑭᖅᑕᖏᓐᓂ ᐅᕝᕙᓘᓐᓃᑦ ᓱᓪᓗᐊᓗᒃ ᐅᐊᓕᓂᕐᒥ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᑕ ᖃᓂᒋᔮᓂ, ᐅᔾᔨᕐᓇᖅᓯᕙᓪᓕᐊᓂᐊᖅᑐᖅ ᐊᕐᕌᒍᓂ ᐊᒡᒋᖅᑐᓂ ᐅᑭᐅᖅᑕᖅᑐᒥ ᑕᕆᐅᖓᓂ ᓯᑯᖃᙱᓐᓂᖅᓴᐅᖃᑦᑕᓕᖅᐸᑦ ᐊᒻᒪ ᐅᒥᐊᕐᔪᐊᑦ ᐅᓄᖅᓯᕙᓪᓕᐊᑎᓪᓗᒋᑦ.
ᑭᕙᓪᓕᕐᒥ ᐃᒐᓚᐅᔭᙳᐊᖅ ᐆᒻᒪᖅᑯᑎᒧᑦ ᐊᑦᑕᑕᕐᕕᒃ ᓄᓇᒥ ᐆᒻᒪᖅᑯᑎᐅᕗᖅ ᐊᒻᒪ ᑐᓴᐅᒪᔪᓕᕆᔾᔪᑎᓄᑦ ᐊᑦᑕᑕᕐᕕᐅᓪᓗᓂ ᓄᓇᕗᒻᒥ ᐊᒻᒪ ᖃᓪᓗᓈᑦ ᓄᓇᖓᓐᓂ ᓄᓇᕗᒻᒥ ᐊᑐᙱᓐᓂᖅᓴᐅᓕᕐᓗᑎᒃ ᐃᒐᓯᐅᑎᒨᖅᑐᓂᒃ ᐆᒻᒪᖅᑯᑎᓂᒃ ᑭᕙᓪᓕᕐᒥ ᐱᐅᓯᒋᐊᕈᑕᐅᓗᓂᓗ ᐃᑭᐊᖅᑭᕕᒃᑯᑦ ᐊᑦᑕᑕᕐᕕᐅᓲᓂᒃ. ᑖᓐᓇ ᐊᑦᑕᑕᕐᕕᒃ ᑲᑎᑎᑦᑎᓂᐊᕆᕗᖅ ᐃᓚᖏᓐᓂ ᓄᓇᕗᒻᒥ ᑲᓇᑕᒥ ᐆᒻᒪᖅᑯᑎᓕᕆᓂᕐᒧᑦ ᐅᐊᔭᓂᑦ, ᐆᒻᒪᖅᑯᑎᖃᑦᑎᐊᕐᓂᖅᓴᐅᓕᕐᓗᑎᒃ ᓴᙱᒃᑎᒋᐊᕐᓗᓂᓗ ᑲᓇᑕᐅᑉ ᓄᓇᖁᑎᖓᓂ ᐅᑭᐅᖅᑕᖅᑐᒥᑦ. ᓄᓇᕗᑦ ᒐᕙᒪᒃᑯᑦ ᐱᓕᕆᖃᑎᖃᐃᓐᓇᖅᐳᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᑦ ᓄᑭᒃ ᑲᑐᔾᔨᖃᑎᒌᓂᑦ ᑭᕙᓪᓕᕐᒥ ᓄᓇᓖᑦ ᑲᑎᙵᓕᕐᓗᑎᒃ ᒫᓂᑑᐸᒥ ᐃᒪᕐᒨᖅᑐᒧᑦ ᐆᒻᒪᖅᑯᑎᖃᑦᑎᐊᓕᖁᓪᓗᒋᑦ, ᐅᑭᐅᖅᑕᖅᑐᒥ ᓄᓇᖁᑎᖓᓂ, ᐊᒻᒪ ᒪᑭᒪᔪᓐᓇᕐᓂᖅ.
ᐃᖃᓗᖕᓂ ᐃᒪᒃᑯᑦ ᐊᐅᓚᔪᓐᓇᐅᑦ ᐱᓕᕆᐊᒃᓴᖅ ᐱᓕᕆᐊᖑᕙᓪᓕᐊᒋᕗᖅ ᑐᕌᒐᖃᖅᑐᓂ ᐆᒻᒪᖅᑯᑎᖃᑦᑎᐊᕐᓂᕐᒥᒃ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂᑦ−ᐊᐅᓚᑕᐅᔪᖅ ᐱᓕᕆᐊᒃᓴᖅ ᐊᑯᓂᐅᔪᒥᑦ ᐸᕐᓇᐅᑕᐅᕗᖅ ᑲᔪᓰᓐᓇᕈᓐᓇᖅᑐᒥᑦ, ᐊᑭᑐᓗᐊᙱᑦᑐᒥᑦ ᓈᒻᒪᒃᑐᒥᓪᓗ ᐆᒻᒪᖅᑯᑎᖃᖅᑎᑦᑎᓗᑎᒃ ᓄᓇᕘᑉ ᓄᓇᓕᐸᐅᔭᖓᓂᑦ. ᑲᓇᑕᒥ−ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᒃᓴᑦ ᓄᓇᕗᒻᒥ ᓯᓚᒧᑦ ᐃᓯᐊᕿᙱᓐᓂᖅᓴᐅᓕᕋᔭᖅᐳᖅ, ᓄᓇᕗᒻᒥ ᐆᖅᓱᐊᓗᖕᒨᖅᑐᓂᑦ ᐊᑐᙱᓂᖅᓴᐅᓕᕐᓗᓂ, ᐊᒻᒪᓗ ᓄᓇᕗᒻᒥ ᐊᖓᔪᖅᑳᖃᕐᕕᖓ ᑭᖑᕝᕕᖅᑕᕈᓐᓇᖅᑐᒥᑦ ᓄᓇᒥᖔᖓᔪᒥᑦ ᐆᒻᒪᖅᑯᑎᖃᕈᓐᓇᖅᓯᓗᓂ. ᐃᖃᓗᖕᓂ ᐃᒥᕐᒨᖅᑐᖅ ᐆᒻᒪᖅᑯᑎ ᐱᒋᐊᕈᑕᐅᒐᔭᖅᑐᖅ ᓴᓗᒪᓂᖅᓴᒥ ᐊᑐᖅᐸᓪᓕᐊᖔᕐᓂᕐᒧᑦ ᐊᒻᒪᓗ ᓇᖕᒥᓂᖅᓱᕈᓐᓇᖅᓯᓂᕐᒧᑦ ᓄᓇᕗᒻᒥ.
ᐃᒪᕕᖕᒥ ᑐᓚᒃᑕᕐᕕᒃ ᕿᑭᖅᑕᕐᔪᐊᕐᒥ ᐊᑯᓂᐊᓗᒃ ᓯᕗᓪᓕᐅᔾᔭᐅᓯᒪᕗᖅ ᓄᓇᕗᑦ ᒐᕙᒪᒃᑯᓐᓄᑦ. ᑖᓐᓇ ᑐᓚᒃᑕᕐᕕᒃ ᐱᕐᔪᐊᒻᒪᕆᐊᓗᖕᓂᒃ ᐅᑭᐅᖅᑕᖅᑐᒥ ᒪᑭᒪᔾᔪᑎᖃᖅᑎᑦᑎᕗᖅ ᐃᑲᔪᖅᑐᐃᖁᓪᓗᒋᑦ ᑲᓇᑕᒥ ᐊᑦᑕᕐᓇᖅᑐᒦᑎᑦᑕᐃᓕᓂᕐᒥᒃ, ᐱᖏᖕᓇᖅᑐᓕᕆᓂᕐᒥᒃ ᐊᒻᒪ ᓴᐳᔾᔨᓂᕐᒥᒃ. ᐊᑐᙱᓐᓂᖅᓴᐅᓕᖅᑎᑦᑎᒋᕗᖅ ᑲᓇᑕᐅᑉ ᓯᓚᑖᓂᙶᖅᑐᓂᒃ ᑐᓚᒃᑕᕐᕕᖕᓂᒃ ᓄᓇᕘᑉ ᐱᔭᕆᐊᖃᖅᑐᓄᑦ ᐱᖁᑎᓄᑦ. ᑖᓐᓇ ᑐᓚᒃᑕᕐᕕᒃ ᐱᕕᒃᓴᐅᓕᕐᓂᐊᖅᑐᖅ ᐊᖏᒡᓕᒋᐊᖅᑕᐅᓗᓂ ᐃᖃᓗᓕᕆᓂᐅᔪᖅ ᓄᓇᕗᒻᒥ ᐱᐅᓯᒋᐊᖅᑕᐅᓗᑎᒡᓗ ᐃᑎᔪᒥ ᑐᓚᒃᑕᕐᕕᒃ ᐅᑭᐅᖅᑕᖅᑑᑉ ᑲᓇᖕᓇᖓᓂ. ᒫᓐᓇᒧᑦ ᑎᑭᖦᖢᒍ, ᐃᓚᖏᑦ ᑮᓇᐅᔭᑦ ᐋᖅᑭᒃᓯᒪᓕᖅᑐᑦ, ᐊᒻᒪ ᐋᖅᑭᒃᓯᒪᓂᒃᓴᖓᓄᑦ ᐱᓕᕆᐊᖅ ᐊᒻᒪ ᓄᓇᓕᖕᓂ ᐃᓚᐅᑎᑦᑎᓂᖅ ᐱᒋᐊᖅᓯᒪᓕᖅᑐᖅ. ᑭᓯᐊᓂ, ᖄᒃᑲᓐᓂᐊᒍᑦ ᑮᓇᐅᔭᓂᒃ ᐊᑐᕆᐊᖃᕐᒪᑕ ᐱᓕᕆᐊᖅ ᐱᐊᓂᒐᓱᖕᓂᐊᕐᓗᒍ.
ᑲᓇᑕᐅᑉ ᓄᓇᓕᕆᓂᕐᒧᑦ ᐱᔪᒪᓂᕆᔭᖓ ᐅᑭᐅᖅᑕᖅᑐᒥ ᐱᔪᒥᒋᔭᐅᕐᔪᐊᖅᐳᖅ ᓄᓇᕗᑦ ᒐᕙᒪᒃᑯᓐᓄᑦ ᓄᓇᕗᒻᒥᐅᓄᓪᓗ. ᐅᓄᖅᑐᑦ ᓄᓇᓕᕗᑦ ᓴᖅᑭᑎᑕᐅᓚᐅᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᑐᐊᒐᑎᒍᑦ ᓲᕐᓗ ᓄᒃᑎᖅᑕᐅᓂᒃᑯᑦ ᑎᓕᐅᖅᑕᐅᓪᓗᑎᒃ. ᐅᓪᓗᒥ, ᐱᕕᖃᖅᑐᒍᑦ ᑕᒻᒪᖅᑕᐅᓯᒪᔪᓂᒃ ᐋᖅᑭᒋᐊᖅᑎᑦᑎᓂᕐᒥᒃ ᐊᒻᒪ ᑮᓇᐅᔭᓂᒃ ᐊᑐᕐᓗᑕ ᐅᑭᐅᖅᑕᖅᑐᒥ, ᐃᑲᔪᕈᓐᓇᖅᑐᖅ ᑲᓇᑕᒥ ᓴᙱᒃᑎᒋᐊᕐᓗᒍ ᐅᑭᐅᖅᑕᖅᑐᒥ ᓄᓇᓖᑦ, ᐆᒻᒪᖅᑎᑦᑎᒃᑲᓐᓂᕋᓱᖕᓂᖅ ᒪᑭᒪᔾᔪᑎᒃᓴᓂᒃ, ᐊᒻᒪ ᓴᐳᔾᔨᓂᖅ ᑲᓇᑕᒥ ᐱᓕᕆᐊᒃᑯᒥᒋᔭᐅᔪᓂᒃ.