ᐅᖃᖅᑎᑦᑎᔩ, ᑲᑐᔾᔨᓗᑕ ᓇᓗᓇᐃᖅᓯᖕᒪᑦ ᐃᓐᓇᐃᑦ ᐊᒻᒪ "ᐃᓐᓇᕈᖅᐸᓪᓕᐊᔪᑦ ᐃᓱᒪᒋᔭᐅᑦᑎᐊᕐᓗᑎᒃ ᓄᓇᕗᒻᒥ" ᓯᕗᓪᓕᐅᔾᔭᐅᔭᕆᐊᖃᓪᓚᕆᒃᖢᑎᒃ. ᐱᓕᕆᐊᒃᓴᕆᔭᕗᑦ ᐋᖅᑭᒃᓱᐃᓂᐊᕐᓂᕋᓪᓚᑦᑖᖅᖢᑕ ᓈᒪᔪᒥᒃ ᐃᓐᓇᕐᓂᑦ ᐃᓐᓇᑐᖃᕐᓂᓪᓗ ᑲᒪᒋᔭᖃᕐᓂᕐᒧᑦ ᐸᕐᓇᐅᑎᒥᒃ ᓇᑭᕈᓘᔭᖅ ᐅᖃᐅᓯᐅᑲᑕᒃᖢᓂ ᐃᓐᓇᕐᓂᑦ, ᐃᓚᒋᔭᐅᔪᓂᑦ, ᓄᓇᓕᖕᓂ, ᐱᓕᕆᖃᑎᒌᓂᓪᓗ.
ᐅᐱᒍᓱᒃᐳᖓ ᑐᓴᖅᑎᑦᑎᔪᓐᓇᕋᒪ, ᐅᖃᖅᑎᑦᑎᔩ, ᐱᓕᕆᕙᓪᓕᐊᓕᖅᐳᑦ ᖃᓄᖅᑑᕈᑎᒃᓴᓄᑦ ᐱᓕᕆᔾᔪᑎᒃᓴᓄᑦ ᐸᕐᓇᐅᑎᒥᒃ ᐃᓐᓇᕐᓄᑦ ᓄᓇᕗᒻᒥ. ᑳᓐᑐᕌᖅᑎᑦᑎᓯᒪᕗᒍᑦ ᐃᖃᓗᖕᓂ ᐅᖃᐅᔾᔨᒋᐊᖅᑎᒥᑦ ᒥᐊᓕ ᕕᐅᓪᒪᓐᒥᑦ ᐱᓕᕆᖃᑎᖃᖁᓪᓗᒍ ᐃᖃᓗᖕᓂ ᑲᒻᐸᓂᒥᑦ Lichen Consulting-ᑯᓐᓂ ᐅᖃᐅᔾᔨᒋᐊᖅᑎᓂᑦ ᕿᒥᕐᕈᖁᓪᓗᒍ. ᐱᔭᕇᕈᒪᕙᕗᑦ ᓄᑖᖅ ᐱᓕᕆᔾᔪᑕᐅᓂᐊᖅᑐᖅ ᑎᓯᐱᕆᒥ. ᐃᓐᓇᐃᑦ ᑲᑎᙵᔪᑦ ᐃᓚᐅᑎᑕᐅᓂᐊᖅᑐᑦ ᐊᕕᒃᑐᖅᓯᒪᔪᓂᑦ ᑲᑎᒪᓂᐅᔪᓂᒃ ᕿᑭᖅᑖᓘᑉ ᐅᐊᖕᓇᖓᓂ, ᕿᑭᖅᑖᓘᑉ ᓂᒋᐊᓂ, ᑭᕙᓪᓕᕐᒥᑦ, ᕿᑎᕐᒥᐅᓂ, ᐋᑐᕚᒥᓪᓗ. ᓯᕗᓪᓕᖅᐹᒥ ᑐᓴᕋᓱᓚᐅᖅᐳᑦ ᑲᖏᖅᖠᓂᕐᒥ, ᕕᕗᐊᕆ 14−ᒥ ᐊᒻᒪ 15-ᒥ.
ᐅᖃᖅᑎᑦᑎᔩ, ᑕᒪᓐᓇ ᐃᓚᐅᑎᑦᑎᓂᖅ ᑲᔪᓯᑎᑕᐅᕗᖅ ᐃᓄᒃᑐᑦ ᑲᔪᓯᑎᑕᐅᓪᓗᓂᓗ ᐃᑲᔪᖅᑐᖅᑕᐅᓪᓗᓂ ᐃᓐᓇᕐᓄᑦ ᐅᖃᐅᔾᔪᐃᔨᓄᑦ ᐃᓕᓴᐱ ᑕᐃᕕᑎ ᐊᓐᓂᕐᒥᐅᖅ, ᒥᐅᕆᐊᒻ ᐊᒡᓘᒃᑲᖅ, ᐊᒻᒪ ᐅᓘᓯᒥᐊᓕ ᓵᓐᑎ−ᒧᑦ.
ᑭᖑᓪᓕᕐᒥ ᑐᓴᕋᓱᖕᓂᖃᓛᖅᑐᑦ:
• ᒫᑦᓯ 8 ᐊᒻᒪ 9 ᐃᖃᓗᒃᑑᑦᑎᐊᒥ
• ᒫᑦᓯ 20−ᐅᑉ ᐱᓇᓱᐊᕈᓯᖓᓐᓂ ᒥᑦᑎᒪᑕᓕᖕᒦᓛᖅᖢᑎ
• ᐊᐃᕆᓕ 18-ᒥᑦ 19−ᒧᑦ ᐃᖃᓗᖕᓂ
• ᒪᐃ 8 ᐱᓇᓱᐊᕈᓯᐊᓂ ᐋᑐᕚᒥᑦ
ᐱᓕᕆᑎᓪᓗᑕ ᒪᑐᐃᖅᓯᓇᓱᒃᖢᑕ ᑲᒪᒋᔭᐅᖏᓐᓇᖅᑐᒃᑯᕕᖕᒥ ᐃᓐᓇᖁᑎᕗᑦ ᐊᖏᕐᕋᖅᓯᒪᖁᓪᓗᒋᑦ, ᖃᐅᔨᒪᔪᒍᑦ ᐱᔨᑦᑎᕋᐅᑎᑦ ᐊᒥᒐᕐᓂᖏᓐᓂᒃ ᐃᑲᔪᖅᑐᐃᔾᔪᑎᓪᓗ ᐃᓐᓇᖁᑎᑦᑎᓐᓄᑦ ᒫᓐᓇ ᑕᒫᓃᑦᑐᓄᑦ. ᑖᓐᓇ ᐅᐸᓗᖓᐃᔭᐅᑎ ᐊᐅᓚᑦᑎᔾᔪᑕᐅᓇᓱᖕᓂᐊᖅᑐᖅ ᐃᑲᔪᖅᑐᐃᔾᔪᑎᓂᒃ ᓄᓇᓕᖕᓂ ᐃᑲᔪᕐᓗᒋᓪᓗ ᐃᓐᓇᐃᑦ ᕿᒥᕐᕈᑎᓪᓗᒋᑦ ᐱᓕᕆᐊᒃᓴᓂᒃ ᐊᒻᒪ ᐱᔨᑦᑎᕋᐅᑎᓂᒃ ᓄᓇᕗᑦ ᒐᕙᒪᒃᑯᓐᓂ, ᐃᓄᐃᑦ ᑲᑐᔾᔨᖃᑎᒌᓂᒃ, ᕼᐋᒻᒪᓚᒃᑯᓐᓂ, ᐊᒻᒪ ᑮᓇᐅᔭᓕᐅᕋᓱᒃᑎᐅᙱᑦᑐᓂᒃ.
ᓄᓇᕗᒻᒥᐅᑦ ᐃᓐᓇᕈᖅᐸᓪᓕᐊᔪᑦ ᑕᑯᔭᕆᐊᖃᖅᐳᑦ ᐱᐅᓯᕙᓪᓕᐊᔪᓂᒃ ᖃᐅᑕᒫᑦ ᐊᑐᖃᑦᑕᖅᓯᒪᔭᖏᓐᓂᒃ. ᑕᒪᓐᓇ ᐱᒋᐊᓲᖑᕗᖅ ᐱᔭᕆᐊᖃᓕᓚᐅᖅᑳᖅᑎᓐᓇᒋᑦ ᑲᒪᒋᔭᐅᑦᑎᐊᕆᐊᓖᑦ. ᐊᐅᓚᑕᐅᓪᓗᓂ ᑲᑐᔾᔨᓗᑕ ᐱᓕᕆᐊᒃᓴᕆᔭᐅᔪᒥᑦ, ᒐᕙᒪᕗᑦ ᐱᓕᕆᐊᖃᕐᓂᐊᖅᐳᑦ ᐊᖓᔪᖅᑳᕗᑦ ᐃᑦᑐᕆᔭᐅᔪᓪᓗ/ᓂᖏᐅᕆᔭᐅᔪᑦ ᐃᓐᓇᕈᖁᓪᓗᒋᑦ ᐃᖢᕐᕆᑦᑎᐊᕐᓗᑎᒃ ᐊᑦᑕᕐᓇᙱᑦᑐᒦᓪᓗᑎᒡᓗ ᐊᖏᕐᕋᕆᔭᒥᓂ.
ᖁᔭᓐᓇᒦᒃ, ᐅᖃᖅᑎᑦᑎᔩ.