ᐅᖃᖅᑎᑦᑎᔩ, ᐊᓕᐊᓇᐃᒋᖃᑦᑕᖅᐸᕋ ᓴᖅᑭᔮᖅᑎᒃᑲᓐᓂᕆᐊᒃᓴᖅ ᖁᕕᐊᓱᖃᑎᒋᓪᓗᒋᓪᓗ ᓄᓇᕗᒻᒥᐅᑦ ᑕᑯᒃᓴᐅᑎᑦᑎᕙᒃᑐᑦ ᐱᓕᕆᑦᑎᐊᕐᓂᕐᒥᒃ, ᐃᓱᒪᒃᓴᖅᓯᐅᑦᑎᐊᕐᓂᕐᒥᒃ, ᓇᖕᒥᓂᖃᕐᓂᕐᒥᒃ, ᓴᓇᑐᔪᓐᓇᑦᑎᐊᕐᓂᕐᒥᒡᓗ. ᐅᐱᒍᓱᑦᑎᐊᖅᐳᖓ ᐅᓪᓗᒥ, ᐅᖃᖅᑎᑦᑎᔩ, ᖁᕕᐊᓱᖃᑎᒋᔪᒪᓪᓗᒋᑦ ᓄᓇᕗᒻᒥ ᐱᐅᒋᔭᐅᓛᖑᖃᑕᐅᔪᑦ ᓵᓚᒃᓴᓚᐅᖅᑐᓪᓗ ᐅᑭᐅᖅᑕᖅᑐᒥ ᑲᔪᖏᖅᓴᐃᓂᕐᒧᑦ ᓵᓚᒃᓴᐅᓯᐊᒥᒃ.
ᐅᖃᖅᑎᑦᑎᔩ, ᐅᑭᐅᖅᑕᖅᑐᒥ ᑲᔪᖏᖅᓴᐃᓂᕐᒧᑦ ᓵᓚᒃᓴᐅᓯᐊᖅ ᐅᔾᔨᕆᔭᐅᔭᕆᐊᖃᓪᓚᕆᒃᑐᓂᑦ ᑮᓇᐅᔭᖃᖅᑎᑕᐅᔭᕆᐊᓕᖕᓂᓪᓗ ᓴᖅᑭᑎᑦᑎᓲᑦ ᐱᓕᕆᐊᒃᓴᓂᑦ ᐱᐅᓯᒋᐊᕈᑕᐅᔪᓄᑦ ᓄᓇᑦᑎᓐᓂ ᐃᓄᐃᓪᓗ ᐃᓅᓯᖏᓐᓂ, ᖃᐅᔨᕚᓪᓕᕈᑕᐅᒃᑲᓐᓂᖅᖢᓂ, ᑲᔪᖏᖅᓴᐃᓪᓗᑎᒡᓗ ᐊᓯᔾᔩᔪᒪᓂᕐᒥᒃ ᐃᓕᓐᓂᐊᕐᓂᕐᒥᒃ, ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ, ᐃᓕᖅᑯᓯᑦᑎᓐᓂ, ᐊᕙᑎᑦᑎᓐᓂ ᑲᒪᑦᑎᐊᕐᓂᕐᒥᒃ, ᒪᑭᒪᔾᔪᑎᒃᓴᓂᓪᓗ.
ᐅᐸᒍᑎᓚᐅᖅᐳᖓ ᑕᒪᑐᒪᓂ ᐊᕐᕌᒍᒥ ᕕᕝᕗᐊᕆ 8-ᖑᑎᓪᓗᒍ ᐊᖅᓴᕐᓃᑦ ᑲᑎᒪᑎᓪᓗᒋᑦ ᐋᑐᕚᒥ, ᐱᖓᓱᑦ ᐱᐅᒋᔭᐅᓛᖑᔪᑦ ᓄᓇᕗᒻᒥᙶᖅᑐᑦ ᓵᓚᒃᓴᖃᑕᐅᔪᓐᓇᓚᐅᖅᑐᑦ, ᐅᑯᐊᖑᓪᓗᑎᒃ ᕿᑎᕐᒥᐅᑦ ᐃᑦᑕᕐᓂᓴᓕᕆᔨᖏᑦ, ᐃᓕᑕᖅᓯᓂᖅ, ᐊᒻᒪᓗ ᓄᓇᕗᒻᒥ ᒪᒃᑯᒃᑐᑦ ᐃᓱᒪᑐᔪᑦ ᑲᑐᔾᔨᖃᑎᒌᑦ.
ᐅᖃᖅᑏ, ᑖᒃᑯᓇᙵᑦ ᐱᖓᓱᓂᑦ ᑲᑎᙵᔪᓂᑦ, ᒪᕐᕉᒃ ᑮᓇᐅᔭᖅᑖᖅᑎᑕᐅᓚᐅᖅᐴᒃ.
ᐅᐱᒍᓱᓚᐅᖅᐳᖓ $100,000-ᒥᑦ ᑮᓇᐅᔭᒃᓴᒥᒃ ᑐᓂᓯᔭᕆᐊᒃᓴᖅ ᓄᓇᕗᒻᒥ ᒪᒃᑯᒃᑐᓄᑦ ᐃᓱᒪᑐᔪᓄᑦ ᑲᑐᔾᔨᖃᑎᒌᓄᑦ, ᐃᓄᖕᓄᑦ ᓇᖕᒥᓂᕆᔭᐅᓪᓗᓂ ᐃᓄᐃᑦ ᑭᒡᒐᖅᑐᐃᔨᑦ ᐅᓄᖅᓯᒋᐊᖁᓪᓗᒋᑦ ᒪᓂᓴᐅᑎᓂᒃ, ᑐᓴᐅᒪᔪᓕᕆᔾᔪᑎᓂᒃ ᐊᓯᖏᓐᓂᒡᓗ ᖃᕋᓴᐅᔭᒃᑰᖅᑐᓂᑦ ᐃᖅᑲᓇᐃᔭᖅᑎᑖᖅᖢᑎᒃ ᐊᔪᙱᑦᑎᐊᖅᑐᓂᒃ ᓄᓇᕗᒻᒥ ᒪᒃᑯᒃᑐᓂᒃ.
ᐅᓐᓄᒃᑲᓐᓂᖅᑎᓪᓗᒍ, ᖁᑦᑎᓛᖅ ᓵᓚᖃᖅᑐᑦ $1 ᒥᓕᐊᓂᒃ ᑐᓂᔭᐅᓪᓗᑎᒃ ᓄᓇᕗᒻᒥ ᐱᓕᕆᐊᒃᓴᓂᑦ, ᐃᓕᑕᖅᓯᓂᖅ ᐱᓕᒻᒪᒃᓴᐃᔪᓕᕆᓂᖅ ᐱᓕᕆᐊᒃᓴᑦ.
ᑖᓐᓇ ᐱᓕᕆᐊᒃᓴᖅ ᐃᓄᖕᓄᑦ−ᐋᖅᑭᒃᓱᖅᓯᒪᔪᖅ ᐊᐅᓚᑕᐅᓪᓗᓂᓗ ᑲᓇᑕᒥ ᐃᓄᖕᓂᑦ ᐃᓅᓯᕐᒥᓂ ᑭᐱᓯᑎᑦᑎᑦᑕᐃᓕᒪᓂᕐᒧᑦ ᐸᕐᓇᒍᑎᒥᒃ, ᐃᓅᓯᕗᑦ ᐊᓐᓂᓇᖅᑐᖅ ᓄᓇᕗᒻᒥ ᐃᓅᓯᕐᒥ ᑭᐱᓯᑎᑦᑎᑦᑕᐃᓕᒪᓂᕐᒧᑦ ᐸᕐᓇᒍᑎ ᐊᒻᒪ ᐊᓕᐊᓇᐃᑦ ᐃᓄᐃᑦ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒧᑦ ᖃᓄᖅᑑᕈᑎᑦ ᐸᕐᓇᐅᑎ. ᐱᓕᕆᐊᒃᓴᖅ ᑐᕌᒐᖃᖅᑐᖅ ᐋᖅᑭᒃᓱᐃᕙᓪᓕᐊᖁᓪᓗᒋᑦ ᐃᓱᒪᒃᑯᑦ ᖃᓄᐃᙱᓐᓂᕐᒧᑦ ᐱᔪᓐᓇᖅᓯᕙᓪᓕᐊᑎᑦᑎᓂᖅ, ᓴᐱᓕᖅᓴᕋᐃᙱᓐᓂᖅ ᐊᒻᒪ ᐃᓄᐃᑦ ᐃᓅᓯᖃᑦᑎᐊᖁᓪᓗᒋᑦ ᐱᖅᑯᓯᑐᖃᑦᑎᓐᓂ ᐃᓕᓐᓂᐊᖅᑎᑦᑎᕙᒡᓗᑎᒃ ᓇᓂᑐᐃᓐᓇᖅ ᐃᓄᐃᑦ ᓄᓇᖓᓐᓂ.
ᐅᖃᖅᑎᑦᑎᔩ, ᓄᓇᕗᑦ ᒐᕙᒪᒃᑯᑦ ᐅᐱᒍᓱᒃᐳᑦ ᑭᒡᒐᖅᑐᖅᑎᐅᔪᓐᓇᕐᒪᑕ ᐱᓕᕆᖃᑕᐅᔪᓐᓇᖅᖢᑎᒡᓗ ᐅᑭᐅᖅᑕᖅᑐᒥ ᑲᔪᖏᖅᓴᐃᓂᕐᒧᑦ ᓵᓚᒃᓴᐅᓯᐊᒥᒃ, ᖁᕕᐊᓱᒃᐳᒍᓪᓗ ᓄᓇᕗᒻᒥ ᐱᓕᕆᐊᒃᓴᑦ ᐃᓕᓴᕆᔭᐅᔪᓐᓇᕐᒪᑕ ᐃᑲᔪᖅᓱᖅᑕᐅᓪᓗᑎᒡᓗ.
ᐅᖃᖅᑎᑦᑎᔩ, ᓄᓇᕗᒻᒥᐅᓕᒫᑦ ᑎᓕᐅᖅᐸᕗᑦ ᑲᔪᖏᖅᓴᐃᓗᑎᒃ ᐊᓯᔾᔩᔪᒪᓇᔭᖅᑐᓂᑦ ᓄᓇᖏᓐᓂᒃ ᐱᓇᔪᖁᓪᓗᒋᑦ ᑮᓇᐅᔭᓂᒃ ᐱᕈᖅᓴᖅᑕᐅᔪᓂᑦ ᐅᑭᐅᖅᑕᖅᑐᒥ ᑲᔪᖏᖅᓴᐃᓂᕐᒧᑦ ᓵᓚᒃᓴᐅᓯᐊᒃᓴᓂᒃ ᐱᓕᕆᐊᕆᕙᓪᓕᐊᔭᖏᓐᓄᑦ ᐊᒻᒪ ᐱᓕᕆᐊᒃᓴᖏᓐᓄᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.