ᐅᖃᖅᑏ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᖁᕕᐊᓱᒃᑐᑦ ᑐᓴᖅᑎᑦᑎᔭᕆᐊᒃᓴᖅ ᑖᒃᑯᐊ ᐆᒻᒪᖅᑯᑎᓕᕆᔨᒃᑯᑦ ᓄᑖᖅ ᑎᑎᕋᕐᕕᐊ ᖃᒪᓂ'ᑐᐊᒥᑦ ᐅᒃᑯᐃᖓᓕᖕᒪᑦ ᐱᓕᕆᐊᒃᓴᓄᑦ. ᐆᒻᒪᖅᑯᑎᓕᕆᔨᒃᑯᑦ ᐊᒡᓚᕝᕕᓕᕆᔨᖏᑦ ᐃᖅᑲᓇᐃᔭᖅᑎᑦ ᐊᒻᒪ ᐱᔨᑦᑎᕋᐅᑎᖏᑦ ᒫᓐᓇ ᐊᑐᐃᓐᓇᐅᓕᖅᑐᑦ 30916-ᒥ ᐊᖅᑯᒻᒥ ᐊᑭᓕᖅᓱᐃᔨᓄᑦ ᐊᑭᓖᔪᒪᔪᓄᑦ ᐊᑭᓕᖅᓱᕆᐊᓕᖕᓂᒃ ᐅᕝᕙᓘᓐᓃᑦ ᓇᖕᒥᓂᖅ ᖃᐅᔨᒋᐊᕈᒪᔪᓄᑦ. ᓴᓇᔭᐅᓂᖓ ᓇᓗᓇᐃᖅᓯᔾᔪᑕᐅᕗᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐅᔾᔨᕐᓇᖅᑐᒥᒃ ᑮᓇᐅᔭᓕᐅᕐᓂᖏᓐᓂᒃ ᐱᔨᑦᑎᕋᑦᑎᐊᕐᓂᖅᓴᐅᖁᓪᓗᒋᑦ ᐊᑭᓕᖅᓱᐃᔨᑦ ᓄᓇᕘᓕᒫᒥ ᐊᒻᒪ ᐃᑲᔪᖅᑐᐃᓗᑎᒃ ᓄᓇᓕᖕᓂ.
ᑖᓐᓇ ᓄᑖᖅ ᐃᓪᓗ ᓇᓗᓇᐃᖅᓯᒻᒥᔪᖅ ᐱᒻᒪᕆᐅᔪᒥᑦ ᑎᑭᐅᑎᓯᒪᓂᖏᓐᓂᑦ ᑯᐊᐳᕇᓴᒃᑯᑦ ᐃᖅᑲᓇᐃᔭᖅᑎᖏᓐᓄᓪᓗ. ᓴᖅᑭᑎᑦᑎᔪᖃᓕᖅᑎᓪᓗᒍ ᐊᑕᐅᓰᓐᓇᓕᔪᒥᒃ ᐋᖅᑭᒃᓱᖅᑕᐅᓯᒪᔪᒥᒃᓗ ᐃᖅᑲᓇᐃᔭᕐᕕᒋᔭᐅᔪᒥᒃ, ᐱᐅᓂᖅᓴᒃᑯᑦ ᐱᕚᓪᓕᕈᑕᐅᓂᐊᖅᐳᖅ ᐃᖅᑲᓇᐃᔭᖅᑏᑦ ᐊᑐᖃᑦᑕᖅᓯᒪᔭᖏᓐᓄᑦ ᑕᑯᒃᓴᐅᑎᑦᑎᓗᓂᓗ ᐃᒡᓗᓕᕆᔨᕐᔪᐊᒃᑯᑦ ᐱᓕᕆᐊᖃᓪᓚᕆᒍᒪᕙᖕᓂᖓᓂᒃ ᐃᒡᓗᕐᔪᐊᓕᐅᕐᓂᐊᕐᓗᓂ ᐃᓂᓂᒃ ᐱᐅᓯᒋᐊᖅᑎᑦᑎᔪᓂᒃ ᖃᓄᐃᓕᖓᓂᕆᔭᐅᔪᓂᒃ ᐃᒃᐱᒋᔭᖃᑦᑎᐊᕐᓂᕐᒥᒡᓗ. ᐅᖃᖅᑎᑦᑎᔩ, ᐃᑲᔫᑎᑦ ᐃᓂᖃᑦᑎᐊᕐᓂᐊᕐᓗᓂ ᐊᑕᐅᓯᕐᒥᒃ ᐃᓂᒃᓴᒥᒃ ᖃᐅᔨᔭᐅᓯᒫᓂᓕᖅᑐᑦ ᐊᑲᐅᔪᒦᓪᓗᑎᒃ ᑎᑎᕋᕐᕕᖕᒥ ᐃᓂᖃᕐᕖᑦ ᐊᒻᒪ ᐆᒻᒪᖅᑯᑎᑐᓗᐊᙱᑦᑐᑦ ᐱᓕᕆᔾᔪᑎᑦ ᒥᒃᖠᒋᐊᕈᑕᐅᓇᓱᒃᖢᑎᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᕙᑎᒧᑦ ᐊᒃᑐᐃᔾᔪᑕᐅᓲᓄᑦ.
ᑯᐊᐳᕇᓴᒃᑯᑦ ᑐᕌᒐᖃᐃᓐᓇᖅᐳᑦ ᐆᒻᒪᖅᑯᑎᑐᓗᐊᕐᓇᙱᑦᑐᓂᒃ ᐃᒡᓗᕐᔪᐊᓂᒃ ᐃᓕᑕᕆᔭᐅᔾᔪᑎᑖᖅᑎᑦᑎᔪᒪᓪᓗᑎᒃ ᒫᓐᓇ ᐊᑐᖅᑕᐅᔪᒥᒃ ᐃᒡᓗᕐᔪᐊᒥᒃ. ᑲᔪᓯᑦᑎᐊᖅᐸᑦ 12-ᓄᑦ ᑕᖅᑭᓄᑦ ᖃᐅᔨᓴᖅᑕᐅᓚᐅᖅᑎᓪᓗᒋᑦ, ᓯᕗᓪᓕᖅᐹᖑᓂᐊᖅᑐᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑕᒪᓐᓇ ᑲᔪᓯᑎᓐᓂᐊᕐᓗᒍ. ᐅᖃᖅᑏ, ᑖᓐᓇ ᐃᒡᓗᕐᔪᐊᖅ ᐅᔾᔨᖅᓱᑦᑎᐊᖅᖢᓂ, ᓴᓇᑐᔫᓪᓗᓂ, ᐊᒻᒪᓗ ᓴᓇᑦᑎᐊᖅᓯᒪᓪᓗᓂ ᑎᑎᕋᐅᔭᖅᓯᒪᓂᖓ ᐊᔾᔨᐅᖏᑦᑐᓂᒃ ᐊᑐᖅᖢᓂ ᐊᑭᑐᓗᐊᖏᑦᑐᓂᒃ ᐃᒡᓗᓕᐅᕈᑎᓂᒃ ᓱᓇᒃᑯᑖᓂᓪᓗ. ᐊᑯᓂᐅᔪᒃᑯᑦ ᐊᕙᑎᒧᑦ ᐊᒻᒪ ᑮᓇᐅᔭᑎᒍᑦ ᐃᑲᔫᑎᑦ ᐃᓚᖃᖅᐳᑦ ᒥᒃᖠᒋᐊᖅᑎᑦᑎᓂᕐᒥᒃ ᓯᓚᒧᑦ ᐅᖅᑰᓯᕙᓪᓕᐊᓐᓇᖅᑐᓄᑦ ᐳᔪᕐᓗᖕᓄᑦ ᐃᓯᐊᕿᔪᓄᑦ ᐊᒻᒪ ᐊᑐᙱᓐᓂᖅᓴᐅᓕᕐᓗᑎᒃ ᐃᒡᓗᖅᔪᐊᑦ ᐊᐅᓚᑦᑎᔾᔪᑎᖏᓐᓄᑦ ᐊᒻᒪ ᐋᖅᑭᐅᒪᔾᔪᑎᖏᓐᓄᑦ ᐊᑭᖏᓐᓄᑦ.
ᐆᒻᒪᖅᑯᑎᓕᕆᔨᒃᑯᑦ ᖁᔭᓕᔪᒪᔪᑦ ᖃᒪᓂ'ᑐᐊᒥᐅᓂᑦ ᐅᑕᖅᑭᑦᑎᐊᕈᓐᓇᖕᓂᖏᓐᓄᑦ ᐊᖓᔪᖅᑳᖃᕐᕕᖕᒥᑦ ᑎᑎᕋᕐᕕᓕᐅᖅᑎᓪᓗᒋᑦ ᑐᙵᓱᒃᑎᑦᑎᓪᓗᑎᒡᓗ ᐱᒻᒪᕆᐅᔪᒥᑦ ᐃᒡᓗᕐᔪᐊᒥᑦ, ᐱᒻᒪᕆᖕᒥᑦ ᐱᔨᑦᑎᕋᑦᑎᐊᖕᓂᖕᒥᑦ. ᖁᔭᓕᓂᕗᑦ ᐅᖓᕙᕆᐊᖅᑕᐅᖕᒥᔪᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐃᖅᑲᓇᐃᔭᖅᑎᖏᓐᓄᑦ ᐃᑲᔪᐃᓐᓇᕐᓂᖏᓐᓄᑦ ᑖᓐᓇ ᓅᑉᐸᓪᓕᐊᓂᖅ ᐊᔪᕐᓇᕈᓐᓃᖅᑎᖦᖢᒍ. ᓂᕆᐅᒋᔭᖃᑦᑎᐊᖅᐳᖓ ᒪᑐᐃᖅᑕᐅᓪᓚᕆᖕᓂᐊᕐᓂᖓᓂᒃ ᖁᕕᐊᓱᒍᑎᖃᕐᓂᐊᕐᓂᕐᒥᒡᓗ ᐊᑐᖅᑕᐅᕙᒃᑐᑐᖃᕐᒥᒃ ᖃᒪᓂ'ᑐᐊᕐᒥ, ᑕᒪᓐᓇᓗ ᐊᑯᓂᐊᓗᒃ ᐊᒃᑐᖅᓯᓂᐊᖅᖢᓂ ᓄᓇᓕᖕᓂ ᐅᑭᐅᖅᑕᖅᑐᒥᓗ ᐊᕕᒃᓯᒪᓂᕐᒥ ᐊᑐᖅᑎᐅᕙᒃᑐᓂᒃ.
ᖁᔭᓐᓇᒦᒃ, ᐅᖃᖅᑎᑦᑎᔩ.