ᐅᓪᓗᒥ, ᐅᖃᖅᑎᑦᓯᔩ, ᓂᑯᕕᑉᐳᖓ ᖁᔭᓕᔪᒪᓪᓗᖓ ᒪᓕᒐᓕᐅᖅᑎᐅᖃᑎᓐᓂᒃ ᐊᒻᒪᓗ ᐱᓕᕆᖃᑎᓐᓂᒃ, ᐊᒻᒪ ᒐᕙᒪᑐᖃᒃᑯᓐᓂᓪᓗ ᓯᓚᑖᓃᑦᑐᓂᓪᓗ ᖃᕆᑕᐅᔭᒃᑯᑦ ᐊᑦᑕᓇᐃᖅᓯᒪᓂᕐᒧᑦ ᖃᐅᔨᒪᔪᒻᒪᕆᓐᓂᒃ, ᐃᑲᔪᖅᑐᐃᑦᓯᐊᓚᐅᕐᓂᖏᓐᓄᑦ ᑕᓯᐅᖅᑎᐅᓂᖏᓐᓄᓪᓗ ᓴᖅᑮᓂᕐᒧᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ ᑐᑭᓯᐅᒪᔾᔪᑎᖏᓐᓄᑦ ᐱᓕᕆᔾᔪᑎᓂᒃ ᐊᐅᓚᓂᖏᓐᓄᑦ ᐊᐅᓚᓂᖃᑦᓯᐊᕐᓂᖓᓄᑦ. ᐊᒥᓱᑎᒍᑦ ᖃᐅᔨᒪᒐᑦᑕ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᖃᕆᑕᐅᔭᒃᑯᑦ−ᓱᕋᑦᑕᐅᒐᓱᐊᓚᐅᕐᒪᑕ ᔭᓐᓄᐊᓕ 2023−ᒥ, ᓄᖅᑲᖅᑎᑕᐅᑦᓱᓂ ᐊᑐᕆᐊᒃᓴᖅ ᐱᕐᔪᐊᓂᑦ ᑎᑎᕋᖅᓯᒪᔪᑦ ᖃᐅᔨᓴᖅᑕᐅᓂᑯᐃᓂᑦ ᐱᓇᓱᐊᕈᑎᓂᓪᓗ. ᑭᐅᔪᒪᓪᓗᒍ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᒻᒪ ᓄᓇᕗᑦ ᒐᕙᒪᒃᑯᑦ ᓄᓇᓕᓐᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᑐᓴᕋᑦᓴᓕᕆᔨᒃᑯᑦ ᖃᕆᑕᐅᔭᓕᕆᔨᒃᑯᑦ ᐱᓕᕆᕝᕕᖓ ᓴᓇᓯᑦᓴᐅᑎᒋᓚᐅᖅᑐᑦ ᖃᕆᑕᐅᔭᓕᕆᔾᔪᑎᓄᑦ ᐊᐅᓚᔪᓐᓇᐅᑎᓂᒃ ᓴᓇᔭᐅᑲᓐᓂᖅᓱᑎᓪᓗ ᒫᓐᓇᓕᓵᑦ ᐊᒻᒪ ᐱᔭᐅᔾᔭᐃᖅᓯᒪᔪᑦ ᑐᓴᐅᒪᖃᑎᒌᒍᓯᖅ ᑎᒥᖁᑖᓄᑦ.
ᐱᕕᖃᕈᒪᒋᕗᖓ ᖁᔭᓕᔪᒪᓪᓗᒋᑦ ᐊᑭᖅᑐᐃᔨᓂᒃ, ᓂᐅᕕᖅᑎᑦᓯᔨᓄᑦ, ᐊᓯᖏᓪᓗ ᐱᖃᖅᑎᐅᖃᑕᐅᔪᓂᑦ ᕿᓄᐃᓵᕈᓐᓇᓐᓂᖏᓐᓄᑦ ᖃᕆᑕᐅᔭᓄᑦ ᐋᖅᑭᒋᐊᕈᑎᒃᓴᑦ ᐃᓕᔭᐅᑎᓪᓗᒋᑦ ᐊᑐᐃᓐᓇᐅᑎᑦᓯᖏᓐᓇᖁᓪᓗᒋᑦ ᐱᕐᔪᐊᓂᑦ ᐱᔨᑦᑎᕋᐅᑎᓂᑦ ᓄᓇᕗᒻᒥᐅᓄᑦ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐃᖅᑲᓇᐃᔭᖅᑎᖏᑦ ᐊᑦᓱᕈᖅᓱᑎᒃ ᐱᓕᕆᓚᐅᖅᐳᑦ ᖃᐅᑕᒫᑦ ᐊᐅᓚᑎᑦᓯᓂᕐᒧᑦ ᓂᕆᐅᓇᙱᑦᑐᒃᑯᑦ ᐊᑦᓱᕈᓐᓇᖅᑐᒥᓪᓗ ᖃᓄᐃᓐᓂᐅᔪᒥ ᐊᑐᓕᖅᑎᑦᓯᑦᓴᐅᑎᒋᓂᕐᒧᑦ ᐅᐸᓗᖓᐃᔭᐅᑎᓄᑦ ᐸᕐᓇᐅᑎᓂᒃ ᑲᔪᓯᑎᑦᓯᓂᕐᒧᑦ ᑎᒥᖁᑎᐅᑉ ᐱᓕᕆᐊᑦᓴᖏᓐᓂᒃ ᖃᕆᑕᐅᔭᓕᕆᔾᔪᑏᑦ ᑭᓪᓕᖃᕋᓗᐊᖅᑎᓪᓗᒋᑦ.
ᐱᓕᕆᖃᑎᒌᒋᐊᖃᓚᐅᖅᑐᑦ ᑲᑐᔾᔨᓗᑎᓪᓗ ᐱᓇᓱᐊᕐᓂᖃᕐᓂᕐᒧᑦ ᐅᑎᖅᑎᑦᑎᓇᓱᐊᖅᓱᑎᒃ ᐊᓪᓚᕝᕕᓕᕆᓂᕐᒧᑦ ᐊᐅᓚᓐᓂᐅᔪᓂᑦ, ᑭᓯᐊᓂᓕ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑲᔪᓰᓐᓇᕐᑐᓂᑦ ᖃᕆᑕᐅᔭᖃᕆᐊᖃᓐᓂᖏᓐᓂᑦ. ᑮᓇᐅᔭᓕᐅᕈᑕᐅᒃᑲᓂᕋᓱᐊᖅᑐᑦ ᐸᕐᓇᑕᐅᕙᓪᓕᐊᕗᑦ ᓄᑖᕈᕆᐊᖅᑕᐅᖁᓪᓗᒋᑦ ᐊᓯᔾᔨᖅᑕᐅᖁᓪᓗᒋᓪᓗ ᐃᓘᓇᖓᑎᒍᑦ ᖃᕆᑕᐅᔭᒃᑯᑦ ᐊᑐᖅᑕᐅᕙᑦᑐᖅ ᑎᒥᖁᑖ ᐱᖁᑎᖃᑦᓯᐊᓂᖅᓴᐅᓂᐊᕐᒪᑕ ᓴᐳᔾᔨᓗᑎᒃ ᐱᒻᒪᕆᐅᔪᓂᒃ ᑎᑎᕋᖅᓯᒪᔪᓂᑦ ᖃᐅᔨᓴᖅᑕᐅᓂᑯᐃᑦ ᐱᓇᓱᐊᕈᑎᓂᓪᓗ. ᑖᒃᑯᐊ ᓄᑖᑦ ᑮᓇᐅᔭᓕᐅᕈᑕᐅᓇᓱᒃᑐᑦ ᓴᖅᑭᑦᑎᓂᐊᖅᑐᑦ ᐊᑦᑕᕐᓇᙱᓐᓂᖅᓴᓂᒃ ᐊᕙᑎᖃᓕᕐᓗᑎᒃ ᓯᕗᓂᒃᓴᑦᑎᓐᓂ. ᐱᔭᕇᖅᑕᐅᖁᓪᓗᒍ ᓴᓇᔭᐅᒃᑲᓐᓂᕐᓂᖓ ᑲᔪᓯᑎᓪᓗᒍᓗ ᐊᐅᓚᓂᖓ, ᐃᓱᒪᓕᐅᕈᑕᐅᔪᖅ ᓅᑎᓪᓗᒍ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᖃᕆᑕᐅᔭᓕᕆᔾᔪᑎᖏᑦ ᓄᓇᕗᒻᒥ ᒐᕙᒪᒃᑯᑦ ᐱᓕᕆᔨᓄᑦ ᑐᓴᐅᒪᖃᑦᑕᐅᑎᖃᑎᒌᒍᑎᓂᒃ ᑕᐅᕗᖓᓕᒫᖅ.
ᓄᓇᕗᑦ ᒐᕙᒪᒃᑯᑦ ᐊᑐᓕᕐᓂᐊᖅᑐᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᖃᕆᓴᐅᔭᓕᕆᔾᔪᑎᖏᓐᓂᒃ ᐊᑲᐅᓛᖑᕗᖅ ᓄᓇᕘᒥ ᐊᓯᔾᔨᖅᐸᓪᓕᐊᖏᓐᓇᖁᓪᓗᒍ ᐱᔭᐅᒋᐊᓖᑦ ᐱᔭᐅᔾᔭᐃᖅᓯᒪᓂᖅᓴᓂᒃ ᐊᒻᒪ ᒫᓐᓇᓕᓴᕐᓂᒃ ᖃᕆᑕᐅᔭᓕᕆᔾᔪᑎᓂᒃ ᐊᐅᓚᔪᓐᓇᐅᑎᓂᒃ. ᓄᓇᕗᑦ ᒐᕙᒪᒃᑯᑦ ᐅᖓᕙᕆᐊᖅᑎᑦᓯᔪᓐᓇᖅᓯᕗᑦ ᐋᖅᑭᒃᓯᒪᔭᖏᓐᓂᒃ ᐱᓕᕆᔾᔪᑎᖏᓐᓂᒃ ᐃᑲᔫᑕᐅᓗᑎᒃ ᐱᐅᓯᒋᐊᕈᑎᒃᓴᓂᒃ ᐱᕐᔪᐊᓂᒃ ᐱᔨᑦᑎᕋᐅᑎᓂᒃ ᓄᓇᓕᑦᑎᓐᓂᑦ. ᐃᓚᒋᔭᐅᖃᑕᐅᓗᓂ ᓄᓇᕗᑦ ᒐᕙᒪᒃᑯᑦ ᐱᓕᕆᐊᖏᓐᓄᑦ ᐃᑲᔫᑎᖃᕐᓂᐊᖅᐳᖅ ᖃᐅᑕᒫᑦ ᐊᐅᓚᓂᕆᔭᐅᔪᓄᑦ ᐊᒻᒪ ᐱᓕᕆᑎᑦᓯᕙᓪᓗᑎᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐱᓕᕆᐊᒃᓴᖏᓐᓂᒃ ᐊᑦᑕᕐᓇᙱᑦᑐᓂᒃ ᑕᑎᒋᔭᒃᓴᓂᓪᓗ ᐆᒻᒪᖅᑯᑎᖃᖅᑎᑦᓯᕙᓪᓗᑎᒃ ᓄᓇᕗᒥᐅᓄᑦ.
ᓇᑯᕐᒦᒃ, ᐅᖃᖅᑎᑦᓯᔩ.