ᐅᖃᖅᑎᑦᑎᔩ,
ᓄᓇᕗᑦ ᒐᕙᒪᒃᑯᑦ ᐊᑦᓱᕉᑎᖃᐃᓐᓇᕐᓂᐊᖅᑐᑦ ᓴᐳᒻᒥᔭᐅᖁᓪᓗᒋᑦ ᓄᓇᕗᒻᒥ ᑮᓇᐅᔭᓕᐅᕈᑎᐅᒍᓐᓇᖅᑐᑦ ᓇᓗᓇᐃᖅᓯᓯᒪᓂᕐᒧᓪᓗ ᓂᐅᕕᐊᖑᕙᑦᑐᑦ ᐊᒥᒐᖅᓯᓕᖁᓇᒋᑦ ᐱᔾᔪᑎᒋᓪᓗᒋᑦ ᐊᑐᓕᖅᑎᑕᐅᕋᑖᑦ 25% ᒥᐊᓕᒐᐃᑦ ᓄᓇᖓᓐᓄᑦ ᐊᐅᓪᓚᖅᑎᑦᓯᓂᕐᒧᑦ ᑖᒃᓯᓂᒃ ᐊᑭᓖᒃᑲᓐᓂᕆᐊᖃᕈᑎᓂᒃ ᑲᓇᑕᒥ ᓴᓇᔭᐅᔪᒥᓂᕐᓂᒃ.
ᓄᓇᕗᒻᒥᒃ ᐊᐅᓪᓚᖅᑎᑦᓯᖃᑦᑕᖏᒃᑲᓗᐊᖅᑎᓪᓗᑕ ᒥᐊᓕᒐᐃᑦ ᓄᓇᖓᓐᓄᑦ, ᓄᓇᕗᒻᒥ ᑕᑎᖃᖅᐸᒃᑲᑦᑕ ᑎᑭᑎᑕᐅᖃᑦᑕᕆᐊᓕᓐᓂᒃ ᐱᑕᖃᕆᐊᖃᓪᓚᕆᑦᑐᓂᒃ ᓂᐅᕕᐊᑦᓴᓂᒃ, ᐊᑭᑐᔫᑎᓂᒃ, ᐱᔨᑦᓯᕋᐅᑎᓂᓪᓗ, ᐅᓗᕆᐊᓇᖅᑐᒦᓕᖃᑕᐅᓪᓗᑕ ᐊᑭᑦᑐᐸᓪᓕᐊᓂᐅᓂᐊᖅᑐᓂᒃ ᓂᐅᕕᐊᖑᕙᑦᑐᓂᓪᓗ ᐊᕝᕕᐊᕈᑎᑕᖃᓕᕐᓂᐊᕐᓂᖓᓂᒃ.
ᐊᑕᐅᓯᐅᖃᑎᒌᒋᐊᖃᓪᓚᕆᓕᖅᑐᒍᑦ. ᒐᕙᒪᒋᔭᕗᑦ ᓇᖏᖃᑎᖃᖅᑐᑦ ᐊᓯᖏᓐᓂᒃ ᐅᑭᐅᖅᑕᖅᑐᒥ ᖃᓪᓗᓈᓂᓗ ᐊᕕᑦᑐᖅᓯᒪᓂᐅᔪᓂᒃ ᐊᑭᕋᖅᑐᕐᓗᒋᑦ ᑕᐅᖅᓰᖃᑦᑕᓂᕐᒧᑦ ᐊᕝᕕᐊᕈᑎᐅᔪᑦ ᑲᓇᑕᒥ ᐊᖏᓂᖅᐹᒥᓪᓗ ᑕᐅᖅᓰᖃᑎᒋᕙᑦᑕᖏᓐᓄᑦ, ᒥᐊᓕᒐᐃᑦ ᓄᓇᖓᓐᓂᒃ.
ᐊᔭᐅᖅᑐᕆᐊᖅᑲᒃᑲ ᓄᓇᕗᒻᒥᐅᓕᒫᑦ ᐃᑲᔪᖅᓱᐃᖁᓪᓗᒋᑦ ᑲᓇᑕᒥ ᓇᒻᒥᓂᖃᖅᑎᐅᔪᓂᒃ ᓂᐅᕕᐊᑦᓴᓂᓗ ᑖᒃᑯᐊ ᐱᔾᔪᑎᒋᓪᓗᒋᑦ ᑖᒃᓰᑦ ᐊᑭᓖᒃᑲᓐᓂᕆᐊᖃᓕᕈᑕᐅᔪᑦ.
ᐅᖃᖅᑎᑦᑎᔩ ᑕᒪᓐᓇ ᐱᔾᔪᑎᒋᓪᓗᒍᑦ ᑖᑦᓯᓂᒃ ᐊᑭᓖᒃᑲᓐᓂᕆᐊᖃᓕᕐᓂᖅ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᓱᕐᕋᓇᖅᑐᓕᕆᓂᕐᒧᓪᓗ ᑲᑎᒪᔨᖏᑦ ᓂᐅᕕᖃᑦᑕᔾᔮᒍᓐᓃᖅᑐᑦ ᓂᐅᕕᐊᑦᓴᖃᔾᔮᒍᓐᓃᖅᑐᑎᓪᓗ ᐃᒥᐊᓗᓐᓂᒃ ᓴᓇᔭᒥᓂᕐᓂᒃ ᒥᐊᓕᒐᐃᑦ ᓄᓇᖓᓐᓂ.
ᓄᓇᕗᑦ ᒐᕙᒪᒃᑯᖏᑦ ᐅᔾᔨᖅᓱᑦᓯᐊᖅᑐᑎᒃ ᖃᓄᐃᓕᐅᖅᐸᓪᓕᐊᔪᑦ ᐃᑲᔪᖅᓱᐃᓂᕐᒧᑦ ᑲᓇᑕᒥ ᓂᐅᕕᕐᕕᐅᕙᑦᑐᓂᒃ ᓴᐳᔾᔨᓂᕐᒧᓪᓗ ᐊᑭᑦᑐᓗᐊᑦᑕᐃᓕᖁᓪᓗᒋᑦ ᐊᑐᐃᓐᓇᐅᖁᓪᓗᒋᓪᓗ ᓂᐅᕕᐊᑦᓴᐃᑦ ᓄᓇᕗᒻᒥᐅᓄᑦ.
ᓄᓇᕗᑦ ᒐᕙᒪᒃᑯᑦ ᖃᓄᐃᓕᐅᕈᑎᖃᖅᐸᓪᓕᐊᒻᒥᔪᑦ ᐊᑭᖏᓐᓂᒃ ᐊᑦᑐᐃᓂᖃᓗᐊᑦᑕᐃᓕᖁᓪᓗᒋᑦ ᓂᐅᕕᖃᑦᑕᓂᕐᒧᑦ ᐊᑭᑐᔫᑎᓄᓪᓗ ᐱᓕᕆᐊᓄᑦ. ᓄᓇᕗᑦ ᑕᑎᖃᕐᓂᖓᓄᑦ ᑎᑭᑎᑕᐅᖃᑦᑕᕆᐊᓕᓐᓂᒃ ᓂᐅᕕᐊᑦᓴᓂᒃ, ᓄᓇᓕᓐᓂ ᒐᕙᒪᒃᑯᓂᓪᓗ ᐱᔨᑦᓯᕋᖅᑎᒃᑯᑦ ᖃᐅᔨᓴᖅᐸᓪᓕᐊᖏᓐᓇᖅᑐᑦ ᓂᐅᕕᐊᑦᓴᐃᑦ ᐊᒥᒐᖅᓯᓗᐊᓕᖏᒃᑲᓗᐊᕐᒪᖔᑕ ᐱᓕᕆᖃᑎᖃᖅᑐᑎᓪᓗ ᑳᓐᑐᕌᑖᖅᓯᒪᔪᓂᒃ ᓂᐅᕕᕐᕕᒋᕙᑦᑕᖏᓐᓂᓪᓗ ᐱᓕᕆᐊᑦ ᐊᐅᓚᑕᐅᖏᓐᓇᕈᓐᓇᖁᓪᓗᒋᑦ.
ᓄᓇᕗᑦ ᒐᕙᒪᒃᑯᖏᑦ ᕿᒥᕐᕈᒻᒥᔪᑦ ᖁᔭᓈᖅᑕᐅᓯᒪᒍᓐᓇᖅᑐᓂᒃ ᒪᓕᑦᑐᒍ ᑲᓇᑕᒥ ᑕᐅᖅᓰᖃᑦᑕᓂᕐᒧᑦ ᐊᖏᕈᑎ. ᒐᕙᒪᒋᔭᕗᑦ ᕿᒥᕐᕈᔪᑦ ᓇᓗᓇᐃᖅᓯᓯᒪᒍᒪᓪᓗᑎᒃ ᓇᓕᒧᒌᖃᑎᖃᕐᓂᕐᒧᑦ ᐊᓯᖏᓐᓂᒃ ᐊᕕᑦᑐᖅᓯᒪᓂᐅᔪᓂᒃ ᑲᓇᑕᒥᓗ ᑕᐅᖅᓰᖃᑦᑕᖅᑐᓕᕆᓂᕐᒧᑦ ᑐᕌᒐᕆᔭᐅᓕᕐᓂᐊᖅᑐᓂᒃ.
ᐅᖃᖅᑎᑦᑎᔩ, ᒐᕙᒪᒋᔭᕗᑦ ᐃᓚᐅᖃᑕᐅᖏᓐᓇᕐᓂᐊᖅᑐᑦ ᐅᖃᖃᑎᖃᕐᓂᕐᒧᑦ ᒐᕙᒪᑐᖃᒃᑯᓐᓂᒃ ᐊᓯᖏᓐᓂᓪᓗ ᐊᕕᑦᑐᖅᓯᒪᓂᐅᔪᓂᒃ ᑲᓇᑕᒥ ᑕᐅᖅᓰᔪᓕᕆᓂᕐᒧᑦ ᖃᓄᐃᓕᐅᕐᓂᐊᕐᓂᖏᑦ ᐱᕙᓪᓕᐊᓂᖏᓐᓂ. ᓇᓗᓇᐃᖅᓯᓯᒪᓗᑎᒃ ᓄᓇᕗᒻᒥ ᑮᓇᐅᔭᓕᕆᓂᕐᒨᖓᔪᑦ ᑭᒡᒐᑐᖅᑕᐅᑦᓯᐊᖁᓪᓗᒋᑦ, ᓂᐅᕕᐊᖑᕙᑦᑐᐃᓪᓗ ᐊᒥᒐᖅᓯᓕᖁᓇᒋᑦ ᐱᒻᒪᕆᐅᓂᐊᖅᑐᑦ ᓯᕗᓪᓕᐅᔾᔭᐅᓗᑎᒃ ᐱᓇᓱᐊᕈᓯᒐᓚᐅᓂᐊᖅᑐᓂ.
ᖁᔭᓐᓇᒦᒃ, ᐅᖃᖅᑎᑦᑎᔩ.