ᐅᖃᖅᑎᑦᑎᔩ,
ᐅᓪᓗᒥ ᓇᓗᓇᐃᖅᓯᒍᒪᔪᖓ ᓄᓇᕗᒻᒥ ᐊᖏᕈᑎᒧᑦ ᐊᑐᓕᖅᑎᑦᓯᕙᓪᓕᐊᓂᕐᒧᑦ ᐊᖏᕈᑎ ᓄᑖᕐᖑᕆᐊᖅᑕᐅᓂᖓ ᐊᖏᖅᑕᐅᑦᑕᓯᓐᓇᓕᕐᖓᑦ.
ᐊᑐᓕᖅᑎᑦᓯᓂᕐᒧᑦ ᑳᓐᑐᕋ ᐊᑯᓐᓂᖓᓂ ᓄᓇᕗᑦ ᑐᙵᕕᒃ, ᓄᓇᕗᑦ ᒐᕙᒪᒃᑯᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ ᐊᑐᓕᖅᓯᒪᓂᐊᖅᑐᖅ ᐃᐳᕈ 1, 2024-ᒥᒃ ᒫᑦᓯ 31, 2034-ᒧᑦ.
ᑖᓐᓇ ᓯᕗᓪᓕᖅᐹᒥ ᓄᑖᕐᖑᕆᐊᖅᑕᐅᔪᖅ ᓄᓇᕗᒻᒥ ᐊᖏᕈᑎᒧᑦ ᑳᓐᑐᕋ 1993-ᒥᓂᑦ. ᐅᖃᖅᑎᑦᑎᔩ, ᑖᓐᓇ ᐊᖏᖅᑕᐅᓂᖓ ᓇᓗᓇᐃᕈᑕᐅᔪᖅ ᑮᓇᐅᔭᖅᑖᕐᓂᐊᕐᓂᖏᓐᓂᒃ $1.5B ᓄᓇᕗᑦ. $588 ᒥᓕᐊᓐᓂ ᑖᒃᑯᓇᖓᑦ ᑮᓇᐅᔭᓂᒃ ᑐᓂᔭᐅᓂᐊᖅᑐᑦ ᓄᓇᕗ ᒐᕙᒪᒃᑯᖏᓐᓄᑦ.
ᑖᒃᑯᐊ ᑮᓇᐅᔭᐃᑦ ᐊᑕᖏᖅᑐᒥᒃ ᐊᑐᖅᑎᓯᒍᑕᐅᒍᓐᓇᕐᓂᐊᖅᑐᑦ ᓄᓇᕗᑦ ᐊᖏᕈᑎᒥᒃ − ᓴᖅᑭᕈᑕᐅᓗᑎᒃ ᐃᓄᐃᑦ ᑕᑯᒍᒪᓯᒪᔭᖏᓐᓂᒃ ᓄᓇᕗᒻᒥ.
ᐅᖃᖅᑎᑦᑎᔩ, ᑖᓐᓇ ᐱᔾᔪᑎᒋᓪᓗᒍ ᐊᖏᕈᑎ ᐊᕐᕌᒍᑕᒫᑦ ᑮᓇᐅᔭᖃᖅᑎᑕᐅᖃᑦᑕᕐᓂᖏᑦ ᓄᓇᕗᑦ ᒐᕙᒪᒃᑯᑦ ᐃᓛᒃᑰᖅᑐᖅ 23 ᐱᓕᕆᐊᖑᓂᖓᓄᑦ ᐊᒥᓱᕐᖑᕆᐊᖅᑕᐅᓂᐊᖅᑐᑦ ᖁᓖᕋᕐᓗᒋᑦ, $4.5 ᒥᓕᐊᓐᓂᒃ $48 ᒥᓕᐊᓐᓄᑦ. $481 ᒥᓕᐊᓐᓂ ᐊᕐᕌᒎᓂᐊᖅᑐᓄᑦ ᖁᓕᓄᑦ.
ᑐᖔᓂᐊᕐᔪᑦ $250 ᒥᓕᐊᓐᓂ ᑮᓇᐅᔭᖅᑖᖑᓂᐊᖅᑐᑦ ᐊᑐᖅᑐᑦᓴᓕᐊᖑᓂᐊᖅᑐᑦ ᐃᓄᐃᑦ ᐃᖅᑲᓇᐃᔭᕆᐅᖅᓴᖅᑎᑕᐅᓂᖏᓐᓄᑦ ᐱᓕᒻᒪᑦᓴᐃᒍᑎᓅᖓᔪᓄᑦ, ᓇᓗᓇᐃᖅᑕᐅᓯᒪᒻᒪᑦ ᐊᕝᕕᐊᕈᑎᐅᓂᖅᐹᖑᓂᖓᓂᒃ ᐃᓄᐃᑦ ᐃᖅᑲᓇᐃᔭᕈᓐᓇᕐᓂᖏᓐᓄᑦ.
ᐅᖃᖅᑎᑦᑎᔩ, ᐱᓕᕆᐊᖑᒋᐊᖃᓪᓗᐊᑕᖅᑐᓄᑦ, ᐊᕐᕌᒍᑕᒫᑦ ᐊᑐᓕᖅᑎᑦᓯᓂᕐᒧᑦ ᑮᓇᐅᔭᖅᑖᖑᓂᐊᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᒪᕐᕈᐊᖅᑎᑲᓴᒃ ᐊᒥᓴᕐᖑᕆᐊᖅᑕᑦ, $5.5 ᒥᓕᐊᓐᓂᒃ $10.7 ᒥᓕᐊᓐᓄᑦ ᐊᕐᕌᒍᑕᒫᑦ. ᒐᕙᒪᒋᔭᕗᑦ ᐃᖅᑲᓇᐃᔭᖅᑎᑖᒃᑲᓐᓂᕈᓐᓇᕐᓂᐊᓕᖅᑐᑦ ᐃᖅᑲᓇᐃᔭᕆᐅᖅᓴᖅᑎᑦᓯᓂᕐᒧᓪᓗ ᐱᓕᒻᒪᑦᓴᐃᓂᕐᒧᑦ ᐱᓕᕆᐊᓄᑦ ᐃᓄᐃᓪᓗ ᐃᖅᑲᓇᐃᔭᖅᑎᑕᐅᒋᐊᖃᕐᓂᖏᓐᓄᑦ ᐸᕐᓇᐅᑎᓄᑦ.
ᐊᒥᓱᕐᖑᕆᐊᖅᑕᐅᓂᐊᕐᒥᔪᑦ ᐊᑐᓕᖅᑎᑦᓯᓂᕐᒧᑦ ᑮᓇᐅᔭᐃᑦ ᓄᓇᕗᑦ ᓯᓚᑦᑐᓴᕐᕕᒃᑯᓐᓄᑦ ᐃᑲᔪᖅᓴᐃᓂᕐᒧᑦ ᐃᓕᓐᓂᐊᕈᑎᑦᓴᓕᐅᕐᓂᕐᒧᑦ, ᑐᕌᒐᖃᕐᓗᑎᒃ ᐱᔪᓐᓇᕐᓂᖅᑖᖅᐸᓪᓕᐊᑎᑦᓯᓂᕐᒧᑦ ᐃᓄᓐᓂᒃ ᒐᕙᒪᒃᑯᓐᓂ ᐃᖅᑲᓇᐃᔭᕈᓐᓇᖅᓯᖁᓪᓗᒋᑦ.
ᐅᖃᖅᑎᑦᑎᔩ, ᑖᓐᓇ ᐊᖏᕈᑎ ᐱᔾᔪᑎᒋᓪᓗᒍ, ᓄᓇᕗᒻᒥ ᒐᕙᒪᒃᑯᓐᓃᖔᖏᑦᑐᑦ ᑎᒥᐅᔪᑦ: ᓄᓇᕗᒻᒥ ᐆᒻᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ, ᓄᓇᕗᒻᒥ ᐃᒪᓕᕆᔨᒃᑯᑦ ᑲᑎᒪᔨᖏᑦ, ᓄᓇᕗᒻᒥ ᓄᓇᐅᑉ ᖄᖓᒍᑦ ᐱᔪᓐᓇᐅᑎᓕᕆᔨᒃᑯᑦ ᑲᑎᒪᔨᖏᑦ, ᓄᓇᕗᒻᒥ ᐸᕐᓇᐃᔩᑦ ᑲᑎᒪᔨᖏᑦ ᐊᒻᒪᓗ ᓄᓇᕗᒻᒥ ᓄᓇᐃᑦ ᐊᑦᑐᖅᑕᐅᓂᖏᓐᓄᑦ ᕿᒥᕐᕈᔩᑦ ᑲᑎᒪᔨᖏᑦ ᐊᖏᓪᓕᒋᐊᕈᔾᔭᐅᒻᒪᕆᓐᓂᐊᖅᑐᑦ ᑮᓇᐅᔭᖃᖅᑎᑕᐅᓂᖏᓐᓂᒃ.
ᑮᓇᐅᔭᖃᖅᑎᑕᐅᓂᖏᑦ ᑖᒃᑯᐊ ᑎᒥᐅᔪᑦ ᒪᕐᕈᐊᖅᑎᑲᓴᒃ ᐊᒥᓱᕐᖑᕆᐊᖅᑕᐅᓂᐊᖅᑐᑦ, $35 ᒥᓕᐊᓐᓂᒃ $62.6 ᒥᓕᐊᓐᓄᑦ ᐊᕐᕌᒍᑕᒫᑦ. ᐱᕕᖃᕐᕕᐅᒍᓐᓇᖅᓯᓂᐊᖅᑐᑦ ᑖᒃᑯᓄᖓ ᑎᒥᐅᔪᓄᑦ ᐃᖅᑲᓇᐃᔭᖅᑎᑖᒃᑲᓐᓂᕈᓐᓇᖅᓯᓗᑎᒃ, ᐊᖏᓂᖅᓴᓂᒃ ᐱᓕᕆᐊᑦᓴᖃᕈᓐᓇᖅᓯᓗᑎᒃ ᐊᐅᓚᑦᓯᓂᕐᒧᑦ ᐆᒪᔪᓂᒃ ᐊᖑᓇᓱᑦᑐᓕᕆᓂᕐᒧᑦ ᓄᓇᓕᓐᓂ, ᕿᓚᒥᐅᓂᖅᓴᐅᖃᑦᑕᓕᕐᓗᑎᓪᓗ ᐱᓕᕆᐊᖑᒍᒪᔪᓄᑦ ᕿᒥᕐᕈᐅᓂᐅᕙᑦᑐᑦ.
ᐱᓕᕆᔾᔪᑎᑦᓴᖅᑖᒃᑲᓐᓂᖅᑎᑕᐅᓂᖏᑦ ᓇᓗᙱᓂᖅᓴᐅᓕᕈᑕᐅᓂᐊᖅᑐᑦ ᑮᓇᐅᔭᖃᖅᑎᑦᓯᔨᐅᔪᓄᑦ, ᐱᕕᑦᓴᖃᕐᕕᐅᓕᒃᑲᓐᓂᕐᓗᓂ ᓄᓇᕗᑦ ᑲᑐᔾᔨᖃᑕᐅᒍᒪᓕᒃᑲᓐᓂᕐᓂᖓᓄᑦ ᓯᕗᓂᑦᓴᑎᓐᓂ ᐱᓕᕆᐊᓄᑦ.
ᐅᖃᖅᑎᑦᑎᔩ, ᖁᔭᓐᓇᒦᕈᒪᔭᒃᑲ ᓄᓇᕗᑦ ᒐᕙᒪᒃᑯᑦ ᐋᔩᖅᑎᓄᑦ ᐊᖏᔪᖅᑳᖓᑦ ᐃᖅᑲᓇᐃᔭᖅᑎᖏᓪᓗ ᐊᑦᓱᕉᑎᖃᖅᓯᒪᓂᖏᓐᓄᑦ ᑕᒪᑐᒥᖓ ᑕᐃᒪᙵᓕᒫᖅ ᐃᖅᑲᐅᒪᓇᕐᓂᐊᓕᖅᑐᒥᒃ ᓄᓇᕗᒻᒥ. ᖁᔭᓐᓇᒦᒃ ᒌ ᑖᔭᓐᑯᐊ, ᓕᑎᐊ ᐅᐸᑦ ᐊᒻᒪᓗ ᐃᑐᕆᐊᓐ ᓯᐅᓪᒃ ᐊᑦᓱᕉᑎᖃᖅᓯᒪᓂᑎᑦᓯᓐᓄᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.