ᐅᐃᓂᐱᒃ, ᒫᓂᑑᐸ (ᐊᐃᕆᓕ 16, 2025) – ᓄᓇᕗᑦ ᒐᕙᒪᒃᑯᑦ ᐊᒻᒪ ᒫᓂᑑᐸᒥ ᐅᓪᓗᒥ ᐊᑎᓕᐅᖅᑲᐅᕗᑦ ᑲᑐᔾᔨᓪᓗᑎᒃ ᐅᖃᐅᓯᒃᓴᒥᒃ ᓇᓗᓇᐃᖅᓯᓪᓗᑎᒃ ᐊᖏᖅᓯᒪᓂᖏᓐᓂᒃ ᐱᐅᓯᒋᐊᖅᑎᑦᑎᔪᒪᓪᓗᑎᒃ ᑭᕙᓪᓕᕐᒥ ᐃᑯᒻᒪᖅᑯᑎᓄᑦ ᖃᕆᑕᐅᔭᒃᑰᕈᑎᓂᒃ ᑲᑎᑎᑦᑎᓂᕐᒥᒃ, ᐱᕐᔪᐊᖑᓪᓗᓂ ᐆᒻᒪᖅᑯᑎᓄᑦ ᐊᒻᒪ ᑐᓴᐅᒪᔪᓕᕆᔾᔪᑎᓄᑦ ᐊᖅᑯᑎᑦ ᒪᕐᕉᖕᓂ ᐊᕕᒃᑐᖅᓯᒪᔫᖕᓂᒃ ᑲᑎᑎᑦᑎᔪᓂᒃ. ᑖᓐᓇ ᖃᓄᖅᑑᕈᑎᓄᑦ ᐱᓕᕆᐊᖑᕙᓪᓕᐊᔪᒪᔪᖅ ᑐᕌᒐᖃᖅᑐᖅ ᐱᕙᓪᓕᐊᑎᑦᑎᔪᒪᓪᓗᑎᒃ, ᐃᑲᔪᖅᑐᐃᓗᑎᒃ ᐋᕿᒋᐊᕈᑎᖃᕐᓂᕐᒥᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᑦ ᖃᓄᖅᑑᖅᑎᑦᑎᓗᑎᒃ, ᑲᓇᑕᐅᑉ ᐅᑭᐅᖅᑕᖅᑐᖓᓂᓪᓗ ᐊᑦᑕᕐᓇᖅᑐᒦᑎᑦᑕᐃᓕᒪᒃᑲᓐᓂᕐᓗᑎᒃ.
ᓯᕗᓕᖅᑎ ᐲᔾᔭᐃ ᐊᕿᐊᕈᖅ ᑲᑎᖃᑎᑲᖅᑲᐅᔪᖅ ᓯᕗᓕᖅᑎ ᐅᐋᑉ ᑭᓅᒥᒃ, ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᑕ ᑐᒡᓕᐊ ᐹᓪ ᐃᕐᖓᐅᑦ ᐊᒻᒪ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓ ᑯᓄ ᑕᑦᑐᐃᓂ ᐊᑎᓕᐅᖅᑕᐅᑎᓪᓗᒍ ᐅᐃᓂᐹᒡᒥ. ᐃᓄᖕᓄᑦ−ᐊᐅᓚᑕᐅᔪᑦ, ᐃᓄᖕᓄᑦ ᐊᐅᓚᑕᐅᓪᓗᑎᒃ ᑭᕙᓪᓕᕐᒥ ᐃᑯᒻᒪᖅᑯᑎᓄᑦ ᖃᕆᑕᐅᔭᒃᑰᕈᑎᓂᒃ ᑲᑎᑎᑦᑎᓂᖅ ᐃᓚᒋᔭᐅᕗᑦ ᑎᓴᒪᓄᑦ ᑲᓇᑕᒥ−ᓴᓇᔭᐅᔪᓄᑦ ᐊᐅᓚᔪᓐᓇᐅᑎᓄᑦ ᐱᓕᕆᐊᓄᑦ ᓇᓗᓇᐃᖅᑕᐅᓯᒪᔪᑦ ᓯᕗᓪᓕᐅᔾᔭᐅᒋᐊᖃᕐᓂᖓᓂᒃ ᓄᓇᕗᑦ ᒐᕙᒪᒃᑯᓐᓄᑦ ᐊᒻᒪ ᓄᓇᕗᑦ ᑐᙵᕕᒃᑯᓐᓄᑦ. (NTI).
"ᑭᕙᓪᓕᕐᒥ ᐃᑯᒻᒪᖅᑯᑎᓄᑦ ᖃᕆᑕᐅᔭᒃᑰᕈᑎᓂᒃ ᑲᑎᑎᑦᑎᓂᖅ ᓴᓗᒪᔪᒥᒃ ᐆᒻᒪᖅᑯᑎᖃᖅᑎᑦᑎᓂᐊᖅᐳᖅ ᑭᕙᓪᓕᕐᒥ ᓄᓇᓕᖏᓐᓄᑦ ᒪᒃᐱᖅᐸᓪᓕᐊᓗᑎᒡᓗ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᐊᕕᒃᑐᖅᓯᒪᔪᓂ, ᓴᖅᑭᓪᓗᒋᑦ ᑲᓇᑕᒥ ᐊᑦᑕᕐᓇᕈᑕᐅᑐᐃᓐᓇᕆᐊᓖᑦ ᐅᑭᐅᖅᑕᖅᑐᒥ ᓯᕗᒻᒧᐊᒃᑎᓪᓗᒋᓪᓗ ᑲᓇᑕᒥ ᓇᖕᒥᓂᖃᕐᓂᖅ ᐊᒻᒪ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᑐᕌᒐᕆᔭᐅᔪᑦ," ᐅᖃᓚᐅᖅᐳᖅ ᓯᕗᓕᖅᑎ ᐊᕿᐊᕈᖅ. "ᑖᓐᓇ ᐱᓕᕆᖃᑎᒌᖕᓂᖅ ᒫᓂᑑᐸᒥ ᐱᒻᒪᕆᐅᕗᖅ ᐊᓪᓗᕆᐊᕈᑎᐅᓪᓗᓂ ᑲᑐᔾᔨᓪᓗᑕ ᐊᖏᖅᓯᒪᓂᑦᑎᓐᓄᑦ ᓴᙱᒃᑎᒋᐊᕐᓗᒍ ᒪᑭᒪᓇᓱᐊᕈᑎᓄᑦ ᐱᓕᕆᖃᑎᒌᖕᓂᖅ ᑲᓇᑕᒥ ᓂᐅᕕᕐᓂᒃᑯᑦ ᑲᓇᑕᒥ ᑮᓇᐅᔭᓕᐅᕋᓱᐊᕐᓂᕐᒥᒡᓗ ᐅᑭᐅᖅᑕᖅᑐᒥ."
ᓇᒡᒐᔾᔭᒥ, ᒫᓂᑑᐸᒥ ᐆᒻᒪᖅᑯᑎᓕᕆᔨᒃᑯᑦ ᑐᓴᖅᑎᑦᑎᓚᐅᖅᐳᑦ 50 megawatts-ᓂᒃ ᓴᓂᕐᕙᒃᑕᐅᓯᒪᔪᓂᒃ ᐱᔪᓐᓇᕐᓂᕆᔭᐅᔪᓂᒃ ᐃᑲᔪᖅᑐᐃᔾᔪᑎᒃᓴᓂᒃ ᐱᕙᓪᓕᐊᑎᑕᐅᔪᓄᑦ ᑭᕙᓪᓕᕐᒥ ᐃᑯᒻᒪᖅᑯᑎᓄᑦ ᖃᕆᑕᐅᔭᒃᑰᕈᑎᓂᒃ ᑲᑎᑎᑦᑎᓂᖅ.
"ᒫᓂᑑᐸᒥ ᐆᒻᒪᖅᑯᑎᓕᕆᔨᒃᑯᑦ 50 MW−ᒧᑦ ᐊᖏᖅᓯᒪᓂᖓ ᐊᓂᒍᖅᑕᐅᕐᔪᐊᖅᐳᖅ ᐊᖅᑯᑎᒋᓂᐊᖅᑕᑦᑎᓐᓄᑦ ᐃᖏᕐᕋᐃᓐᓇᕈᓐᓇᖅᑐᒥᒃ ᐆᒻᒪᖅᑯᑎᓕᕆᓂᕐᒥᒃ ᓯᕗᓂᒃᓴᑦᑎᓐᓄᑦ ᓄᓇᕗᒻᒧᑦ," ᐅᖃᓚᐅᖅᐳᖅ ᔮᓐ ᒪᐃᓐ, ᒥᓂᔅᑕ ᑲᒪᒋᔭᒃᓴᓕᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ. ᑭᕙᓪᓕᕐᒥ ᐃᑯᒻᒪᖅᑯᑎᓄᑦ ᖃᕆᑕᐅᔭᒃᑰᕈᑎᓂᒃ ᑲᑎᑎᑦᑎᓂᖅ ᓂᕆᐅᒋᔭᐅᕗᑦ ᓴᓗᒪᔪᒥᑦ ᐆᒻᒪᖅᑯᑎᖃᖅᑎᑦᑎᓂᐊᕐᓂᖓᓂ ᑕᓪᓕᒪᓄᑦ 7−ᖑᓪᓗᑎᒃ ᓄᓇᓖᑦ ᑭᕙᓪᓕᕐᒥᑦ ᓄᓇᓕᖕᓂᑦ, ᐊᑐᙱᓐᓂᖅᓴᒻᒪᕆᐅᓕᕐᓗᑎᒃ ᐊᕕᒃᑐᖅᓯᒪᔪᑦ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖓᓂ ᐊᓯᔾᔩᓗᑎᒃ ᐅᖅᓱᐊᓗᖕᒨᖅᑐᓂᑦ ᐊᐅᓚᐅᑎᓂᑦ."
ᐊᓯᔾᔩᓗᑎᒃ ᐃᒐᓯᐅᑎᒨᖅᑐᓂᑦ, ᑐᒃᓯᕋᐅᑕᐅᓯᒪᔪᖅ ᑭᕙᓪᓕᕐᒥ ᐃᑯᒻᒪᖅᑯᑎᓄᑦ ᖃᕆᑕᐅᔭᒃᑰᕈᑎᓂᒃ ᑲᑎᑎᑦᑎᓂᕐᒧᑦ ᐱᓕᕆᐊᖑᔪᖅ ᐋᖅᑭᑦᑎᐊᖅᓯᒪᔾᔪᑕᐅᓂᐊᖅᐳᖅ ᐆᒻᒪᖅᑯᑎᑦ ᐊᑭᖏᓐᓂᑦ ᐊᑯᓂᐅᔪᒧᑦ ᐅᓄᖅᓯᒋᐊᕐᓗᑎᒡᓗ ᓄᓇᕗᒻᒥ ᐆᒻᒪᖅᑯᑎᓂᑦ ᓇᖕᒥᓂᖅ ᒪᑭᒪᔪᓐᓇᖅᑐᑦ.
"ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᓕᐊᓇᐃᒍᓱᒃᑐᑦ ᑖᓐᓇ ᐊᓯᔾᔩᓂᕐᒧᑦ ᐱᓕᕆᐊᒃᓴᖅ ᓯᕗᒧᐊᒃᓯᒪᖕᒪᑦ ᑭᖑᓪᓕᕐᒧᑦ ᐃᑲᔪᖅᑕᐅᓪᓗᑎᒃ ᒫᓂᑑᐸᒥᑦ ᐆᒻᒪᖅᑯᑎᓕᕆᔨᒃᑯᑦ," ᐅᖃᖅᖢᓂ ᐆᕐᓂᔅ ᑕᒡᓚᔅ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᖓᔪᖅᑳᖓᑦ ᐊᐅᓚᑦᑎᔨᒻᒪᕆᒡᓗ. "ᓯᕗᓪᓕᐅᔾᔨᕗᑦ ᑲᔪᓯᑎᑦᑎᔪᒪᓪᓗᑕ ᐊᑦᑕᕐᓇᙱᑦᑐᒥᒃ, ᐊᑐᕈᓐᓇᑦᑎᐊᖅᑐᒥᒃ ᐊᑭᑐᓗᐊᙱᑦᑐᒥᒡᓗ ᐆᒻᒪᖅᑯᑎᒥᒃ ᓄᓇᕗᒻᒥᐅᓄᑦ, ᐃᓚᓕᐅᔾᔨᓗᑎᒡᓗ ᓴᓗᒪᔪᒥᒃ ᐆᒻᒪᖅᑯᒻᒥᒃ ᑭᕙᓪᓕᕐᒥ ᐃᑯᒻᒪᖅᑯᑎᓄᑦ ᖃᕆᑕᐅᔭᒃᑰᕈᑎᓂᒃ ᑲᑎᑎᑦᑎᓂᒃᑯᑦ ᒥᒃᖠᒋᐊᕈᑕᐅᓪᓚᕆᖕᓂᐊᖅᐳᖅ, ᐊᑐᐃᓐᓇᕆᐊᖃᖅᑕᑦᑎᓐᓂᑐᐊᖑᙱᑦᑐᖅ ᐅᖅᓱᐊᓗᖕᒥᒃ, ᑭᓯᐊᓂ ᓴᖅᑭᔮᖅᑐᒧᑦ ᐊᓯᔾᔨᖅᑕᖅᑐᓂᒃ ᓄᓇᕐᔪᐊᓕᒫᒥ ᓂᐅᕐᕈᑎᒃᓴᓄᑦ. ᖁᔭᓕᕙᕗᑦ ᐱᓕᕆᖃᑎᒋᔭᐅᔪᓕᒫᑦ ᑲᑐᔾᔨᖃᑎᖃᕐᒪᑕ ᓂᕆᐅᒃᐳᒍᓪᓗ ᑕᒪᓐᓇ ᓴᓗᒪᔪᖅ ᐆᒻᒪᖅᑯᑎᖃᕐᓂᕐᒧᑦ ᑕᐅᑐᖅᑰᖅᑕᐅᔪᖅ ᓴᖅᑭᓪᓚᑦᑖᖁᓪᓗᒍ."