ᐅᖃᐅᓯᐅᔪᑦ
ᓄᓇᕗᒻᒥ ᓯᕗᓕᖅᑎ ᑭᐅᔭᖓ ᖁᑦᑎᒃᑐᒥ ᖃᖓᑕᑎᑕᐅᔪᖅ ᖁᑭᖅᑕᐅᑎᓪᓗᒍ ᔫᑳᓐ ᖁᓛᒎᖅᑎᓪᓗᒍ
ᐅᓪᓗᒥ, ᓄᓇᕗᒻᒥ ᓯᕗᓕᖅᑎ ᐸᐅᓗᓯ ᐊᕿᐊᕈᖅ ᓴᖅᑭᑦᑎᖅᑲᐅᕗᖅ ᐅᑯᓂᖓ ᐅᖃᐅᓯᒃᓴᓂᒃ:
"ᓇᓗᓇᐃᕈᒪᕙᕋ ᐱᒻᒪᕆᐅᓂᖓᓂ ᐊᑦᑕᕐᓇᖅᑐᒦᑎᑦᑕᐃᓕᓂᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ, ᕕᕗᐊᕆ 11−ᒥ ᑕᑯᔪᖃᓚᐅᖅᑎᓪᓗᒍ ᖁᑦᑎᒃᑐᒦᑦᑐᒥᒃ ᖃᖓᑕᔪᒥᒃ ᖁᑭᖅᑕᐅᔪᒥᒃ ᔫᑳᓐ ᖁᓛᒎᖅᑎᓪᓗᒍ. ᖁᔭᓐᓇᒦᒃ ᑲᓇᑕᐅᑉ ᐊᖓᔪᖅᑳᕐᔪᐊᖓ ᔭᔅᑎᓐ ᑐᕉᑑ ᐱᓕᕆᑲᐅᖅᑐᓚᐅᕋᕕᑦ ᓴᐳᔾᔨᓇᓱᒃᖢᑎᒃ ᐅᑭᐅᖅᑕᖅᑐᒥᒃ ᐊᒻᒪ ᑲᓇᑕᒥᐅᑕᐅᓂᑦᑎᓐᓂᒃ ᓇᓗᓇᐃᖅᑕᐅᓯᒪᙱᑦᑐᒥᒃ ᖃᖓᑕᑎᑕᐅᔪᖃᓚᐅᖅᑎᓪᓗᒍ ᑲᓇᑕᒥ ᓯᓚᐃᓐᓇᒃᑯᑦ. ᓄᓇᕗᑦ ᐃᑲᔪᖅᑐᐃᕗᖅ ᔫᑳᓐ−ᒥᑦ ᖃᓱᕚᓪᓕᖅᖢᑎᒡᓗ ᐅᓗᕆᐊᓇᖅᑐᖃᓚᐅᙱᒻᒪᑦ ᑭᒃᑯᑐᐃᓇᓄᑦ.
ᒐᕙᒪᕗᑦ ᑐᓴᖅᑎᑕᐅᓯᒪᕗᑦ ᑲᑐᔾᔨᔪᓄᑦ ᐱᓕᕆᔨᐅᖃᑎᒌᓄᑦ ᐅᑭᐅᖅᑕᖅᑐᒥ. ᐅᒃᐱᕈᓱᙱᓚᒍᑦ ᒫᓐᓇᑲᐅᑎᒋ ᐅᓗᕆᐊᓇᖅᑐᖃᕆᐊᖓ ᓄᓇᕗᒻᒧᑦ. ᑕᒪᓐᓇ ᓇᐅᑦᑎᖅᓱᐃᓐᓇᖅᑕᕗᑦ ᐊᒻᒪᓗ ᓄᓇᕗᒻᒥᐅᑦ ᑐᓴᐅᒪᑏᓐᓇᕋᓱᖕᓂᐊᖅᑕᕗᑦ ᑐᓴᒐᒃᓴᖅᑕᖃᓕᑐᐊᕌᖓᑦ.
ᑕᒪᓐᓇ ᓇᓗᓇᐃᖅᓯᔾᔪᑕᐅᕗᖅ ᐅᑭᐅᖅᑕᖅᑐᒥᐅᑦ ᐃᓚᐅᑦᑎᐊᕆᐊᖃᕐᓂᖏᓐᓂᑦ ᐅᖃᐅᓯᖃᖅᑎᓪᓗᒋᑦ ᐅᑭᐅᖅᑕᖅᑐᒥ ᐊᑦᑕᕐᓇᖅᑐᒦᑎᑕᐅᖁᓇᒍ ᓂᕆᐅᒃᐳᒍᓪᓗ ᐱᓕᕆᖃᑎᒌᒃᑲᓐᓂᕈᒪᓪᓗᑕ ᑖᒃᑯᐊ ᐱᖓᓱᑦ ᐅᑭᐅᖅᑕᖅᑐᒥ ᒐᕙᒪᐅᔪᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ ᐅᓇᑕᖅᑐᒃᓴᓕᕆᔨᒃᑯᑦ ᐊᖅᑯᑎᒋᓗᒋᑦ."