ᓯᕗᓕᖅᑎᒥᑦ ᑐᓴᒐᒃᓴᑦ ᓄᑖᑦ:
ᐅᓪᓛᒃᑯᑦ,
ᓄᒫᓱᒍᑎᖃᖅᖢᖓ ᐱᒋᐊᕈᑎᖃᖅᐳᖓ ᐱᕐᔪᐊᒥᒃ ᑐᓴᖅᑎᑦᑎᓪᓗᖓ. ᐅᓐᓄᐊᖅ ᐊᑕᐅᓯᕐᒥᒃ ᓄᓇᕗᒻᒥᐅᑕᒥᒃ ᐃᓅᔪᓐᓃᖅᑐᖃᓚᐅᕐᒪᑦ ᓄᕙᕐᔪᐊᕐᓇᖅ-19−ᖃᕐᓂᖓᓄᑦ. ᓯᕗᓪᓕᖅᐹᒥ ᐃᓅᔪᓐᓃᖅᑐᖃᖅᐳᖅ ᓄᕙᕐᔪᐊᑲᑕᒃᑎᓪᓗᒋᑦ. ᖃᑕᙳᑎᖏᑦ ᓄᓇᖅᑲᑎᖏᓪᓗ ᐃᓱᒪᒋᕙᒃᑲ.
ᐅᓪᓛᖑᔪᖅ ᓄᓇᕗᑦ 177−ᓂ ᓄᕙᒡᔪᐊᕐᓇᖅ-19−ᖃᖅᑐᖃᓕᖅᑐᖅ. 17−ᓂᑦ ᓄᓇᓕᖕᓂ ᓄᕙᕐᔪᐊᕐᓇᖅᑐᓕᒃ−ᐅᑯᐊ ᐅᓄᕐᓂᖏᑦ:
- 32 ᐊᕐᕕᐊᓂ,
- 33 ᖃᒪᓂ'ᑐᐊᒥ,
- ᖁᓕᓪᓗ ᐊᑕᐅᓯᖅ ᐃᖃᓗᒃᑑᑦᑎᐊᒥ,
- ᐊᑕᐅᓯᖅ ᐃᒡᓗᓕᒑᕐᔪᖕᒥ,
- ᖁᓕᓪᓗ ᐱᖓᓱᑦ ᓴᓪᓕᕐᒥ,
- ᐃᒡᓗᓕᖕᒥ ᐱᑕᖃᙱᑦᑐᖅ
- ᖁᓕᓪᓗ ᐊᑕᐅᓯᖅ ᐃᖃᓗᖕᓂ,
- ᒪᕐᕉᒃ ᐅᖅᓱᖅᑑᕐᒥ,
- ᐊᕙᑎᓪᓗ ᐊᑕᐅᓯᖅ ᑭᙵᕐᓂ,
- ᒪᕐᕉᒃ ᑰᒑᕐᔪᖕᒥ,
- ᖁᓕᓪᓗ ᐊᑕᐅᓯᖅ ᓇᐅᔮᓂ,
- ᒪᕐᕉᒃ ᐸᓐᓂᖅᑑᒥ,
- ᐊᑕᐅᓯᖅ ᒥᑦᑎᒪᑕᓕᖕᒥ,
- ᕿᑭᖅᑕᕐᔪᐊᕐᒥ ᐱᑕᖃᙱᑦᑐᖅ,
- 17 ᑲᖏᖅᖠᓂᕐᒥ,
- ᐱᖓᓱᑦ ᓴᓂᕋᔭᖕᒥ,
- ᖁᓕᓪᓗ ᐊᑕᐅᓯᖅ ᓴᓂᑭᓗᐊᕐᒥ,
- ᑎᓴᒪᑦ ᑕᓗᕐᔪᐊᕐᒥ, ᐊᒻᒪᓗ
- ᒪᕐᕉᒃ ᑎᑭᕋᕐᔪᐊᕐᒥ.
ᐅᓪᓗᒥ ᐱᔪᓐᓃᖅᑐᓂᒃ ᐅᖃᐅᓯᐅᔪᖃᖅᑲᐅᙱᑦᑐᖅ. 370−ᓂᒃ ᑲᑎᖦᖢᒋᑦ ᐱᔪᓐᓃᖅᓯᒪᓕᖅᑐᖅ ᐊᐃᑦᑐᕐᓗᒃᑕᐅᓯᒪᔪᓂᑦ.
ᐅᓪᓗᒥ, ᐱᓕᕆᐊᖑᕙᓪᓕᐊᒃᑲᓐᓂᖅᑐᒥᒃ ᑐᓴᖅᑎᑦᑎᓕᕐᒥᔪᒍᑦ ᓄᓇᕗᑦ ᒐᕙᒪᒃᑯᑦ ᓄᕙᕐᔪᐊᕐᓇᖅ-19−ᒧᑦ ᖃᓄᐃᓕᐅᕈᑎᒋᔭᖓᓄᑦ ᐸᕐᓇᐅᒻᒧᑦ ᐃᓚᒋᔭᐅᓪᓗᓂ. $375,000−ᑲᓐᓂᕐᓂᒃ ᑮᓇᐅᔭᖅᑖᖅᑎᑕᐅᔪᑦ ᓄᓇᓕᖕᓂ ᓈᓚᐅᑎᖃᕐᕖᑦ ᓄᓇᕗᒻᒥ. ᐊᑐᓂ ᓄᓇᓕᖕᓂ ᓈᓚᐅᑎᖃᕐᕖᑦ $15,000−ᓂᒃ ᐱᓇᔪᒍᓐᓇᖅᑎᑕᐅᕗᑦ. ᓄᓇᓕᖕᓂ ᐅᖃᓪᓚᒡᕖᑦ ᑐᓴᐅᒪᔾᔪᑎᒋᕙᕗᑦ ᓄᓇᑦᑎᓐᓂ−ᑐᓴᐅᒪᔾᔪᑕᐅᓪᓗᓂ ᐱᒻᒪᕆᐅᒧᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑐᓴᒐᒃᓴᓂᑦ. ᑖᒃᑯᐊ ᑮᓇᐅᔭᐃᑦ ᐊᑐᖅᑕᐅᔪᓐᓇᕐᓂᐊᖅᐳᑦ ᐊᐅᓚᓂᕆᔭᖏᓐᓄᑦ ᐊᑭᓕᐅᑕᐅᓗᑎᒃ ᐊᒻᒪᓗ ᐱᖁᑎᓂᒃ ᓂᐅᕕᕈᑕᐅᓗᑎᒃ. ᑐᑭᓯᒋᐊᒃᑲᓐᓂᕈᒪᒍᕕᑦ, ᐃᓕᖅᑯᓯᓕᕆᔨᒃᑯᓐᓄᑦ ᖃᐅᔨᒋᐊᕐᓗᑎᑦ chfunds@gov.nu.ca−ᒧᑦ ᐊᑭᖃᙱᑦᑐᒧᓪᓘᓐᓃᑦ ᐅᖄᓚᓗᑎᑦ 1-866-934-2035−ᒧᑦ.
ᖁᔭᓐᓇᒦᒃ ᒥᓂᔅᑕ ᔪᐊᓇᓯ ᑕᒪᑐᒥᖓ ᐱᓕᕆᓚᐅᕐᒪᑦ.
ᒥᓂᔅᑕ ᑖᔅᓱᒪ ᐱᓕᕆᐊᖑᑎᑕᐅᔫᑉ ᒥᒃᓵᓄᑦ ᐊᐱᖅᑯᑎᒃᓴᓕᖕᓂᑦ ᑭᐅᔪᓐᓇᕐᓂᐊᖅᑐᖅ.
ᖁᕕᐊᓱᒃᑭᕗᖓ ᑐᓴᖅᑎᑦᑎᔭᕆᐊᒃᓴᖅ ᒐᕙᒪᑐᖃᒃᑯᓐᓂ ᑐᓴᖅᑎᑕᐅᓚᐅᕋᑦᑕ ᐱᔾᔪᑎᒋᓪᓗᒍ ᐱᖃᑖ ᓄᕙᕐᔪᐊᕐᓇᖅ-19−ᒧᑦ ᐊᐱᖅᑯᑕᐅᔪᖅ. ᑭᒃᑯᑐᐃᓐᓇᓂᒃ ᐊᑦᑕᕐᓇᖅᑕᐃᓕᒪᑎᑦᑎᔨ ᒥᓂᔅᑕᖓ ᐊᒻᒪ ᑐᐊᕕᕐᓇᖅᑐᓄᑦ ᐱᕙᒌᔭᖅᑎᑦ, ᐱᐅᓪ ᐱᓕᐅ, ᑭᐅᔾᔪᑎᖓᓂ ᑐᓂᓯᓚᐅᖅᐳᖅ ᑎᑎᕋᓚᐅᖅᑕᑦᑎᓐᓄᑦ ᐱᓇᓱᐊᕈᓯᐅᓚᐅᖅᑐᖅ.
ᒐᕙᒪᑐᖃᒃᑯᑦ ᐅᑯᓂᖓ ᐊᑐᐃᓐᓇᐅᑎᑦᑎᖕᓕᕐᒪᑕ ᓄᓇᕗᒻᒧᑦ:
- ᐱᖓᓱᒃᑲᓐᓂᕐᓂᒃ ᐃᖢᐊᖅᓴᐃᔨᓂᒃ, ᑕᒪᕐᒥᒃ ᓄᓇᕗᒻᒥ ᐱᓕᕆᖃᑦᑕᖅᓯᒪᓪᓗᑎᒃ; ᐊᒻᒪᓗ
- 9 ᖃᓂᒋᔭᐅᔪᕕᓂᕐᓂᒃ ᖃᐅᔨᓴᖅᑎᑦ−ᑖᒃᑯᐊ ᑭᒡᓕᓯᓂᐊᖅᑎᒃᑯᑦ ᑲᓇᑕᒥ ᐃᖅᑲᓇᐃᔭᖅᑎᒋᔭᐅᔪᑦ.
ᐃᒡᓗᑭᒃᓴᓗᐊᕐᓂᖅ ᐊᒻᒪ ᐃᒡᓗᒥ ᐃᓄᒋᐊᓗᐊᖃᑦᑕᕐᓂᖅ ᓄᓇᓕᑦᑎᓐᓂ, ᓱᓕ ᐱᕙᓪᓕᐊᑎᑦᑎᕗᖅ ᓄᕙᕐᔪᐊᕐᓇᖅ-19−ᒥ ᐊᐃᑦᑐᕐᓗᐃᕙᓪᓕᐊᔪᓂᑦ ᐊᒻᒪᓗ ᐳᕙᒡᓗᖕᓇᒥ ᓄᓇᕗᒻᒥ. ᒐᕙᒪᑐᖃᒃᑯᑦ ᐱᓕᕆᔨᖏᑦ ᑎᓕᐅᖅᐸᒃᑲ ᐅᕙᑦᑎᓐᓂ ᐱᓕᕆᖃᑎᖃᖁᓪᓗᒋᑦ ᐊᖅᑯᑎᒋᓂᐊᖅᑕᑦᑎᓐᓂ ᓇᓗᓇᐃᖅᓯᓇᓱᒡᓗᑕ ᓄᓇᒻᒥ ᐃᒡᓗᑖᕆᐊᓖᑦ ᑲᒪᒋᔭᐅᓗᑎᒃ.
ᓄᓇᕗᒻᒥᐅᑦ ᐃᖅᑲᐃᓯᔪᒪᕙᒃᑲ ᐅᔾᔨᖅᓱᑦᑎᐊᖏᓐᓇᖁᓪᓗᒋᑦ ᑎᑎᕋᕐᕕᑦᑎᓐᓄᑦ ᐅᑎᕐᓂᐊᓕᖅᑎᓪᓗᑕ ᑕᒪᑐᒪᓂ ᐱᓇᓱᐊᕈᓯᕐᒥ.
ᐅᑯᐊ ᐊᑐᐃᓐᓇᕐᓂᐊᖅᐸᓯᐅᒃ.
- ᐊᖏᕐᕋᖅᓯᒪᕙᒡᓗᑎᑦ ᐊᔪᕐᓇᙱᑦᑕᕌᖓᑦ.
- ᐃᓄᑮᓐᓇᖅᐸᒡᓗᓯ.
- ᑲᐱᔭᐅᓗᑎᑦ ᐋᓐᓂᐊᓕᕇᒃᑯᑎᒧᑦ.
- ᐱᖓᔪᖓᓂ ᑲᐱᔭᐅᓗᑎᓗ.
- ᒪᑐᐊᖅᓯᒪᓗᑎᑦ.
- ᓄᕙᕐᔪᐊᕐᓇᒧᑦ ᐅᖄᓚᕝᕕᒃᓴᖅ ᑐᓴᖅᑎᓪᓗᒍ ᐊᒻᒪ ᐊᓂᑦᑕᐅᓕᒪᓗᑎᑦ ᖃᓂᒪᑲᑕᓕᕈᕕᑦ.
ᓱᓕᒃᑲᓐᓂᖅ ᐱᑦᑎᐊᖃᑦᑕᕐᓗᑕ−ᐊᑕᐅᑦᑎᒃᑯᑦ ᑕᒪᓐᓇ ᐊᑐᕐᐸᕗᑦ. ᖁᔭᓐᓇᒦᒃ.
ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᑐᓴᒐᒃᓴᖏᑦ:
ᐅᓪᓛᒃᑯᑦ,
ᐃᑉᐸᒃᓴᖅ, ᓄᑖᓂᒃ ᐋᓐᓂᐊᖃᕐᓇᙱᑦᑐᓕᕆᔨᑦ ᐊᑐᓕᖅᑎᑦᑎᓚᐅᖅᐳᑦ. ᑲᑎᙵᖃᑦᑕᖅᑐᑦ ᐅᓄᖅᓯᒋᐊᖅᑎᑉᐸᕗᑦ, ᓇᖕᒥᓂᓖᑦ ᐅᒃᑯᐃᕈᓐᓇᖅᓯᓪᓗᑎᒃ ᐊᒻᒪ ᐊᐅᓪᓚᖃᑦᑕᖅᑐᓄᑦ ᑭᒡᓕᖃᖅᑎᑕᐅᔪᑦ ᐲᖅᑕᐅᓪᓗᑎᒃ ᓄᓇᓕᖕᓂ ᓄᓇᕗᒻᒥ. ᐃᓄᐃᑦ ᑎᓕᐅᖅᐸᒃᑲ ᒪᓖᓐᓇᖁᓪᓗᒋᑦ ᑭᒡᓕᖃᖅᑎᑕᐅᔪᓂᑦ, ᑲᐱᔭᐅᓗᑎᒃ ᐊᒻᒪᓗ ᐱᔭᕆᐊᖃᓪᓚᕆᒃᑯᑎᒃ ᑭᓯᐊᓂ ᐊᐅᓪᓚᖃᑦᑕᕐᓗᑎᒃ. ᐊᐃᑦᑐᕐᓗᐃᑲᑕᒃᑐᑦ ᓱᓕ ᐊᓂᒍᙱᑉᐳᖅ ᑕᒪᑦᑕᓗ ᐱᓕᕆᖃᑕᐅᔭᕆᐊᖃᖅᖢᑕ ᓄᕙᕐᔪᐊᖅᑐᑦ ᐅᓄᕈᓐᓃᖅᐸᓪᓕᐊᑦᑎᐊᖁᓪᓗᒋᑦ.
ᖁᕕᐊᓱᒃᐳᖓ ᑐᓴᖅᑎᑦᑎᔭᕆᐊᒃᓴᖅ ᐃᓐᓇᓕᒫᑦ ᓄᓇᕗᒻᒥ ᓄᕙᕐᔪᐊᕐᓇᖅ-19−ᖃᓕᓚᐅᖅᑐᑦ ᐋᑐᕚᒥ ᐃᓐᓇᒃᑯᕕᖕᒥ ᐱᔪᓐᓃᕐᒪᑕ. ᐃᑉᐸᒃᓴᕐᓂ ᐱᒋᐊᖅᖢᓂ, ᑎᓴᒪᓂᒃ ᐱᔭᕆᐊᖃᓪᓚᕆᒃᑐᓂᑦ ᑲᒪᔨᑕᖃᓕᓚᐅᖅᐳᖅ ᓄᓇᕗᒻᒥᙶᖅᑐᓂᑦ ᐃᓐᓇᒃᑯᕕᖕᒥ ᐋᑐᕚᒥ ᒪᕐᕉᖕᓂᓪᓗ ᖃᑕᙳᑎᒋᔭᐅᔫᖕᓂᒃ ᐋᑐᕚᒥᐅᑖᖕᓂᒃ ᐃᑲᔪᕆᐊᖅᓯᒪᔪᖃᓚᐅᖅᖢᓂ ᑲᒪᒋᔭᐅᔭᕆᐊᖃᓪᓚᕆᒃᑐᓂᑦ. ᑲᒪᔨᒃᑲᓐᓂᕐᒥᑦ ᓄᓇᕗᒻᒥᐅᑕᒥᑦ ᑕᐅᓄᙵᖅᑐᖃᕐᓂᐊᕐᒥᔪᖅ ᐱᓇᓱᐊᕈᓯᕐᒥ.
ᐃᓐᓇᐃᑦ ᐋᓐᑎ ᐊᐅᓚᑦᔪᑦᒥᑦ ᐊᕐᕕᐊᓂ ᓱᓕ ᓄᕙᕐᔪᐊᕐᓇᖅᑐᖃᙱᑦᑐᑦ ᐃᖅᑲᓇᐃᔭᖅᑎᖏᓐᓂᓪᓗ ᖃᓂᒻᒪᒃᑐᖃᓚᐅᙱᖦᖢᓂ. ᐃᓐᓇᒃᑯᕕᒃᑕᐅᖅ ᓴᐳᒻᒥᔾᔪᑎᒃᑲᓐᓂᕐᓂᒃ ᐱᑎᑕᐅᓚᐅᖅᐳᑦ ᓲᓗ N95 ᒪᑐᐊᕐᓂᒃ, ᑮᓇᒧᑦ ᒪᑐᐊᓂᒃ ᐊᓕᒎᔭᕐᓂᒃ ᐊᒻᒪᓗ ᐱᓚᒃᑐᐃᔨᑦ ᒪᑐᐊᖏᓐᓂᒃ ᖃᓂᒪᓐᓇᒧᑦ ᐊᐅᓚᑦᑎᔾᔪᑕᐅᓇᓱᒃᑐᓂᑦ.
ᔮᓄᐊᕆ 13−ᒥ, ᒪᕐᕉᒃ ᐃᖅᑲᓇᐃᔭᖅᑏᒃ ᐅᖅᓱᖅᑑᕐᒥ ᑲᒪᒋᔭᐅᖏᓐᓇᖅᑐᒃᑯᕕᐊᓂ ᓄᕙᕐᔪᐊᕐᓇᖅ-19−ᖃᕐᓂᕋᖅᑕᐅᔪᖃᓚᐅᖅᐳᖅ. ᒫᓐᓇᒧ ᑎᑭᖦᖢᒍ 9 ᐃᓐᓇᐃᑦ ᑕᐃᑲᓃᑦᑐᑦ ᖃᐅᔨᓴᖅᑕᐅᔾᔪᑎᖏᑦ ᐱᖃᙱᓐᓂᕋᖅᑕᐅᔪᑦ ᐊᒻᒪ ᖃᓂᒪᑲᑕᓕᓚᐅᙱᑦᑐᑦ. ᖃᐅᔨᓴᑲᑕᐃᓐᓇᕐᓂᐊᖅᐸᕗᑦ ᐊᒻᒪ ᓇᐅᑦᑎᖅᓱᐃᓐᓇᕐᓗᒋᑦ ᐃᓐᓇᐃᑦ.
ᐃᓐᓇᒃᑯᕕᖕᒥ ᐃᖅᑲᓇᐃᔭᖅᑎᒋᔭᐅᔪᑦ ᓱᓕ ᓈᒻᒪᒃᑐᑦ.
ᖁᔭᓐᓇᒦᒃ.
ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᒃᑯᑦ ᐱᓇᔪᒃᑕᖏᓐᓄᑦ ᓄᓇᕗᒥᐅᓂᒃ ᓴᐳᔾᔨᓯᒪᓇᓱᒃᖢᑎᒃ ᓄᕙᒃᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᔨᑦᑎᕋᖅᑎᖏᑦ
ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ:
https://www.gov.nu.ca/health/information/covid-19-novel-coronavirus
ᓄᑖᖑᓛᓂᒃ ᑐᓴᒐᒃᓴᓂᒃ ᐱᔪᒪᒍᕕᑦ ᒫᓐᓇ ᑭᒃᑯᑐᐃᓐᓇᓄᑦ ᖃᓄᐃᙱᑦᑐᓄᑦ ᐊᑐᖅᑕᐅᖁᔭᐅᔪᓂᒃ, ᐅᕗᙵᕐᓗᑎᑦ:
https://www.gov.nu.ca/health/information/nunavuts-path
ᑐᑭᓯᒋᐊᕈᒪᒍᕕᑦ ᑲᐱᔭᐅᓐᓇᐅᓛᖅᑐᓂᑦ ᐅᕗᙵᕐᓗᑎᑦ:
https://gov.nu.ca/health/information/covid-19-vaccination
ᓄᕙᒡᔪᐊᕐᓇᖅ−19−ᖃᖅᑐᑦ ᖃᓄᐃᓕᖓᓂᖏᑦ: ᔭᓄᐊᕆ 17, 2022
| ᑲᑎᖦᖢᒋᑦ ᖃᐅᔨᓴᖅᑕᐅᓯᒪᔪᑦ | ᑲᑎᖦᖢᒋᑦ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂᒃ | ᑲᑎᖦᖢᒋᑦ ᐆᒪᔪᒥᒃ ᐱᖃᕐᓂᖏᑦ | ᑲᑎᖦᖢᒋᑦ ᐊᓂᒍᐃᓯᒪᔪᑦ | ᐃᓅᔪᓐᓃᖅᑐᑦ | ᑲᑦᑎᓪᓗᒋᑦ ᐃᓄᐃᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᓕᖅᑐᑦ ᓯᕗᓪᓕᖅᐹᖓᓐᓂᑦ ᓄᓇᕗᒻᒥ | ᑲᑦᑎᓪᓗᒋᑦ ᐃᓄᐃᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᓕᖅᑐᑦ ᒪᕐᕉᓐᓂᒃ ᓄᓇᕗᒻᒥ |
| 27,614 | 1222 | 177 | 1040 | 5 | 31,623 | 52,197 |
ᓄᕙᒡᔪᐊᕐᓇᖅ-19−ᒧᑦ ᓄᓇᓕᖕᓂ ᖃᓂᒻᒪᒃᑐᑦ ᑭᒡᓕᓯᓂᐊᖅᑕᐅᓯᒪᔪᑦ: ᔭᓄᐊᕆ 17, 2022
| ᓄᓇᓕᒃ | ᓄᕙᒡᔪᐊᕐᓇᖅ-19 ᖃᓄᐃᓕᖓᓂᖓ | ᖃᖓᒃᑯᑦ | ᑭᒃᑯᑐᐃᓐᓇᐃᑦ ᓇᐃᓴᖅᑕᐅᓯᒪᔪᑦ ᐃᑉᐸᒃᓴᖅ (ᑲᑎᖦᖢᒋᑦ) |
ᑭᒃᑯᑐᐃᓐᓇᐃᑦ ᓇᐃᓴᖅᑕᐅᓯᒪᔪᑦ ᐅᓪᓗᒥ (ᑲᑎᖦᖢᒋᑦ) |
ᐊᓯᔾᔨᕐᑐᑦ ᐃᑉᐸᒃᓴᕐᓂᑦ (ᐱᖃᖅᑐᑦ) | ᑲᑎᖦᖢᒋᑦ ᖃᓄᐃᑦᑐᓐᓃᖅᑐᑦ |
ᐊᓯᔾᔨᖅᑐᑦ ᐃᑉᐸᒃᓴᕐᓂᑦ (ᐱᖃᖅᑐᑦ) |
ᑲᑎᖦᖢᒋᑦ ᐱᖃᕐᓂᖏᑦ |
| ᓇᐅᔮᑦ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 15 ᔭᓄᐊᕆ 2022−ᒥ | 5 | 11 | 6 | 0 | 0 | 11 |
| ᑰᒑᔪᒃ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 14 ᔭᓄᐊᕆ 2022−ᒥ | 2 | 2 | 0 | 0 | 0 | 2 |
| ᐅᖅᓱᖅᑑᖅ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 14 ᔭᓄᐊᕆ 2022−ᒥ | 2 | 2 | 0 | 0 | 0 | 2 |
| ᑕᓗᕐᔪᐊᖅ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 11 ᔭᓄᐊᕆ 2022−ᒥ | 3 | 4 | 1 | 0 | 0 | 4 |
| ᓴᓪᓕᖅ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 9 ᔭᓄᐊᕆ 2022−ᒥ | 13 | 14 | 1 | 1 | 1 | 13 |
| ᑎᑭᕋᕐᔪᐊᖅ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 7 ᔭᓄᐊᕆ 2022−ᒥ | 12 | 12 | 0 | 9 | 8 | 2 |
| ᓴᓂᑭᓗᐊᖅ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 4 ᔭᓄᐊᕆ 2022−ᒥ | 13 | 13 | 0 | 2 | 2 | 11 |
| ᑭᙵᐃᑦ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 1 ᔭᓄᐊᕆ 2022−ᒥ | 47 | 47 | 0 | 26 | 18 | 21 |
| ᒥᑦᑎᒪᑕᓕᒃ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 1 ᔭᓄᐊᕆ 2022−ᒥ | 1 | 1 | 0 | 0 | 0 | 1 |
| ᐃᒡᓗᓕᒑᕐᔪᒃ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 1 ᔭᓄᐊᕆ 2022−ᒥ | 6 | 6 | 0 | 5 | 5 | 1 |
| ᐃᖃᓗᒃᑑᑦᑎᐊᖅ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 30-ᑎᓯᐱᕆ | 34 | 41 | 7 | 30 | 22 | 11 |
| ᐃᒡᓗᓕᒃ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 29-ᑎᓯᐱᕆ | 18 | 18 | 0 | 18 | 0 | 0 |
| ᖃᒪᓂ'ᑐᐊᖅ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 29-ᑎᓯᐱᕆ | 26 | 34 | 8 | 1 | 0 | 33 |
| ᐊᕐᕕᐊᑦ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 29-ᑎᓯᐱᕆ | 114 | 114 | 0 | 82 | 24 | 32 |
| ᓴᓂᕋᔭᒃ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 29-ᑎᓯᐱᕆ | 19 | 20 | 1 | 17 | 5 | 3 |
| ᕿᑭᖅᑕᕐᔪᐊᖅ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 28-ᑎᓯᐱᕆ | 7 | 7 | 0 | 7 | 1 | 0 |
| ᑲᖏᖅᖠᓂᖅ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 23-ᑎᓯᐱᕆ | 71 | 71 | 0 | 54 | 10 | 17 |
| ᐸᓐᓂᖅᑑᖅ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 23-ᑎᓯᐱᕆ | 26 | 26 | 0 | 24 | 3 | 2 |
| ᐃᖃᓗᐃᑦ |
ᐱᓕᕆᐊᖑᐃᓐᓇᖅᑐᖅ |
ᑕᐃᒪᙵᓂ 04-ᓄᕕᐱᕆ | 102 | 105 | 3 | 94 | 18 | 11 |
| ᑲᑎᖦᖢᒋᑦ | 521 | 548 | 27 | 370 | 117 | 177 |
*ᖃᐅᔨᒪᖁᔭᐅᕗᑎᑦ: ᖃᔅᓯᐅᓂᖏᑦ ᐊᓯᔾᔨᖅᑕᖃᑦᑕᖅᐳᑦ. ᖃᓄᑐᐃᓐᓇᓕᒫᑦᑎᐊᖅ ᐱᓇᔪᒃᑐᖃᖃᑦᑕᖅᐳᖅ ᑖᒃᑯᐊ ᑎᑎᕋᖅᑕᐅᕙᓪᓕᐊᕙᒃᑐᑦ ᓄᑖᖑᐃᓐᓇᖁᓪᓗᒋᑦ ᐱᐊᓂᑦᑎᐊᖅᓯᒪᖁᓪᓗᒋᓪᓗ, ᑭᓯᐊᓂ ᑕᒪᐃᓂᒃ ᐃᓄᖕᓂᒃ ᒪᓕᒃᑕᐅᔪᓂᑦ ᖃᐅᔨᓴᖅᑕᐅᓯᒪᔪᓂᓪᓗᓐᓂᑦ ᓴᖅᑭᔭᖅᑎᑦᑎᙱᑐᐃᓐᓇᕆᐊᓕᒃ.
**ᓇᓗᓇᐃᖅᑕᐅᓯᒪᔪᑦ ᐊᒻᒪ ᑕᐃᒪᐃᑦᑐᖃᑐᐃᓐᓇᕆᐊᓕᑦ ᐱᖃᓯᐅᔾᔨᕗᑦ ᑲᓇᑕᓕᒫᒥ ᖃᓂᒪᓇᓱᒋᔭᐅᔪᑦ ᖃᐅᔨᓴᖅᑕᐅᓯᒪᔪᓂᑦ.
***ᑭᖑᕙᓯᒃᑐᖃᑐᐃᓐᓇᕆᐊᓕᒃ ᐅᖃᐅᓯᖃᕐᓂᐊᕐᓗᓂ ᖃᓄᐃᓕᖓᓂᖏᓐᓄᑦ ᑭᒡᓕᓯᓂᐊᖅᑕᐅᓯᒪᔪᓂᓪᓗ ᐱᔭᐅᔪᓂᑦ ᖃᓪᓗᓈᑦ ᓄᓇᖓᓐᓂᑦ ᑲᓇᑕᒥᑦ. ᖁᓕᓪᓗ ᒪᕐᕉᒡᓗ ᓄᕙᒡᔪᐊᖅᑐᑦ ᖃᐅᔨᔭᐅᓚᐅᖅᑐᑦ ᓄᓇᕗᑦ ᓯᓚᑖᓂ ᓇᓗᓇᐃᖅᑕᐅᓚᐅᖅᐳᑦ ᓄᓇᕗᒥᐅᑕᐅᓂᕋᖅᑕᐅᓪᓗᑎᒃ. ᐱᖓᓱᑦ ᐃᓅᔪᓐᓃᖅᑐᑦ ᐱᖃᓯᐅᔾᔭᐅᓪᓗᑎᒃ. ᓄᓇᕗᒥᐅᑦ ᓄᕙᒡᔪᐊᕐᓇᖅ-19−ᖃᖅᑐᑦ ᓄᓇᕗᑦ ᓯᓚᑖᓂ ᖃᐅᔨᔭᐅᔪᑦ ᓇᓗᓇᐃᖅᑕᐅᔪᐃᓐᓇᐅᔾᔮᙱᑉᐳᑦ ᓄᓇᕗᒻᒧᑦ.
ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᔪᑦ ᖃᓄᐃᓕᖓᓂᖏᑦ: ᔭᓄᐊᕆ 17, 2022
ᑐᑭᓯᒋᐊᒐᒃᓴᑦ/ᑭᒡᓕᒋᑎᑕᐅᔪᑦ:
ᐅᑯᐊ ᑐᑭᓯᒋᐊᒐᒃᓴᑦ ᑕᑯᒃᓴᐅᑎᑦᑎᕗᑦ ᓈᓴᐅᑎᓂᒃ ᓄᓇᖅᑲᑎᒌᑦ ᑲᐱᔭᐅᔪᑦ ᓇᓗᓇᐃᖅᑕᐅᕙᓪᓕᐊᔪᓂᒃ ᐱᒋᐊᖅᖢᒍ ᔭᓄᐊᕆ 17, 2022. ᐳᓴᓐᑎᖓ ᐋᓐᓂᐊᓕᕇᒃᑯᑎᓂ ᐊᐅᓚᑕᐅᓂᕆᔭᖓ ᐃᒪᐃᑉᐳᖅ ᐋᓐᓂᐊᓕᕇᒃᑯᑎᓂ ᐊᐅᓚᑕᐅᓂᕆᔭᖓ ᐊᕕᒃᓯᒪᓪᓗᑎᒃ ᓄᓇᕗᒥᐅᑦ ᐃᓄᒋᐊᓐᓂᖏᑕ ᓇᓚᐅᑦᑖᖅᑕᐅᓯᒪᓂᖏᑦ 18-ᓂ ᐅᖓᑖᓂᓪᓗ ᐅᑭᐅᓖᑦ.
ᓄᓇᕘᓕᒫᒥ ᑲᑎᖦᖢᒋᑦ ᑲᐱᔭᐅᔪᑦ ᑕᒻᒪᖅᓯᒪᙱᖦᖢᑎᒃ ᓇᐃᒡᓕᒋᐊᖅᓯᒪᔪᑦ. ᓄᓇᓖᑦ ᖃᕆᑕᐅᔭᒃᑯᑦ ᑎᑎᕋᖅᓯᒪᔪᑦ ᕿᒥᕐᕈᔭᐅᕙᓪᓕᐊᑐᐃᓐᓇᖅᐳᑦ ᖃᐅᔨᒪᔪᒪᓪᓗᑎᒃ ᓈᒻᒪᒃᑲᓗᐊᕐᒪᖔᑕ ᓇᓗᓇᐃᖅᓯᔾᔪᑎᑦ. ᓄᓇᓕᖕᓂ ᑲᑎᖦᖢᒋᑦ ᐋᖅᑭᒋᐊᖅᑕᐅᖃᑦᑕᕐᓂᐊᖅᐳᑦ ᐱᔭᕆᐊᖃᕌᖓᑦ. ᑐᕌᖓᑐᐃᓐᓇᕆᐊᖃᖅᑐᖅ ᐊᓯᔾᔨᒐᓚᒋᐊᖃᕋᔭᖅᑐᓄᑦ ᐳᓴᓐᑎᖏᑦ ᓄᓇᓖᑦ ᒪᓕᒡᓗᒋᑦ.
ᑲᐴᑎᑦ ᓇᓗᓇᐃᖅᑕᐅᖃᑦᑕᖅᐳᑦ ᓄᓇᓕᖕᓄᑦ ᐊᐅᓚᑦᑎᕝᕕᒋᔭᐅᔪᓄᑦ.
ᑲᑎᖦᖢᒋᑦ ᑲᐱᔭᐅᔪᑦ ᐅᑯᐊᖑᓂᐊᖅᐳᑦ ᓄᓇᖃᖅᑐᑦ ᓄᓇᖃᙱᑦᑑᒐᓗᐊᓪᓗ, ᐃᓚᓕᐅᔾᔭᐅᓪᓗᑎᒃ ᐅᓐᓄᐊᖅᓯᐅᑕᐅᓕᖅᐸᒃᑐᑦ ᐃᖅᑲᓇᐃᔭᖅᑏᑦ.
ᖃᔅᓯᑲᓪᓚᑦ ᓄᓇᓖᑦ ᐃᓄᒃᑕᖃᖅᑐᑦ ᑲᐱᔭᐅᓂᑯᓂᒃ ᒪᕐᕉᖕᓂ ᐊᔾᔨᒌᙱᑦᑑᖕᓂ ᓄᓇᓕᖕᓂ, ᐅᕝᕙᓘᓐᓃᑦ ᓄᓇᒋᙱᑕᒥᓂᒃ ᑲᐱᔭᐅᖃᑕᐅᓯᒪᔪᖃᖅᑐᖅ.
ᐃᓄᖕᒥᒃ ᑲᐱᔭᐅᓯᒪᔪᖃᑐᐃᓐᓇᕆᐊᖃᖅᐳᖅ ᓯᕗᓪᓕᕐᒥᒃ ᐊᒻᒪ/ᐅᕝᕙᓘᓐᓃᑦ ᐊᐃᑉᐸᖓᓂᒃ ᓄᓇᒋᙱᑕᒥᓂᒃ ᑲᐱᔭᐅᔪᓂᒃ.
ᑖᓐᓇ ᐱᔾᔪᑎᖃᙱᑦᑐᖅ ᐃᓄᖕᓄᑦ ᑲᐱᔭᐅᓚᐅᖅᑐᓄᑦ ᐃᓚᐃᓐᓇᖓᓂᒃ ᑕᒪᐃᓐᓂᒡᓘᓐᓃᑦ ᓄᓇᕘᑉ ᓯᓚᑖᓂ.
ᖁᑦᑎᒃᐸᑦ ᐳᓴᓐᑎᖓ ᐊᑕᐅᓯᕐᒥᒃ ᓄᓇᓕᖕᓂ ᓇᓕᒧᙱᒻᒪᑦ ᐃᓄᒐᓴᒡᔪᐊᓄᑦ ᑲᐳᖅᓴᖅᑕᐅᔪᓄᑦ. ᐋᖅᑭᒃᑕᐅᔪᖃᖅᓯᒪᙱᑦᑐᖅ ᓇᓗᓇᐃᖅᑕᐅᓯᒪᔪᖃᙱᑦᑐᕐᓘᓐᓃᑦ ᐳᓴᓐᑎᖓᓐᓂᒃ ᖃᓄᖅ ᐃᓄᒐᓴᒡᔪᐊᑦ ᑲᐳᖅᓴᖅᑕᐅᔪᓂᒃ ᓄᕙᕐᔪᐊᕐᓇᖅ-19−ᒧᑦ. ᖃᓄᒥᐊᖅ ᐃᓄᒐᓴᒡᔪᐊᑦ ᑲᐳᖅᓴᖅᑕᐅᒐᓗᐊᖅᐸᑕ ᒫᓐᓇ ᑲᐴᑎᓄᑦ ᐊᖏᖅᑕᐅᓯᒪᔪᓄᑦ (ᓲᕐᓗ ᓄᑕᖅᑲᑦ 12 ᑐᖔᓂ ᐅᑭᐅᖃᑐᐊᖅᐸᑕ ᑲᐱᔭᐅᔪᓐᓇᙱᑦᑐᑦ).
ᓇᑭᙶᕐᓂᖏᑦ:
ᑲᓇᑕᒥ ᑭᒡᓕᓯᓂᐊᖅᑎᒃᑯᑦ, ᓄᓇᓖᑦ ᐃᓄᖏᑦᑕ ᖃᓄᐃᓕᕙᓪᓕᐊᓂᖏᓐᓄᑦ ᐱᓕᕆᕝᕕᒃ, ᑎᑎᖅᑲᙳᖅᑎᑕᐅᔪᒃᓴᑦ. ᐱᕙᒌᔭᖅᑕᐅᔪᖅ ᐅᑯᓄᖓ: ᓄᓇᕗᒻᒥ ᑭᒡᓕᓯᓂᐊᖅᑎᒃᑯᑦ, ᔭᓄᐊᕆ 27, 2021.
ᑲᐱᔭᐅᓯᒪᔪᑦ ᖃᔅᓯᐅᓂᖏᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐋᓐᓂᐊᕕᓕᐊᖅᑐᓄᑦ ᖃᕆᓴᐅᔭᒃᑯᑦ ᑎᑎᖅᑭᕆᔾᔪᑎᓃᖔᖅᑐᖅ.
ᐊᔪᙱᑦᑐᑦ ᐃᓐᓇᐃᑦ ᓄᓇᓕᖕᓂ ᓇᓗᓇᐃᖅᑕᐅᓯᒪᕗᑦ ᖃᔅᓯᐅᓂᖏᓐᓄᑦ ᐃᓄᐃᑦ ᐅᑭᐅᓖᑦ 18-ᓂᒃ ᐅᖓᑖᓂᓪᓗ ᒪᓕᒡᓗᒍ 2020-ᒥ ᐃᓄᐃᑦ ᖃᔅᓯᐅᓇᓱᒋᔭᐅᓂᖏᑦ.
ᓄᓇᖅᑲᑎᒌᑦ ᐃᓄᒋᐊᖕᓂᖏᑦ ᒥᒃᓴᐅᑦᑎᓯᒪᔪᑦ "ᐊᒃᑐᐊᓂᖃᙱᑦᑐᑦ" ᑐᙵᕕᖃᙱᓐᓂᖏᓐᓄᑦ ᐃᓗᓕᖅᑕᓄᑦ ᐃᓄᒋᐊᒃᓯᕙᓪᓕᐊᔪᓄᑦ (ᐃᓅᕙᓪᓕᐊᔪᑦ, ᑐᖁᕙᓪᓕᐊᔪᑦ ᐊᒻᒪ ᐊᓯᐊᓂᒃ ᓄᓇᓂᙶᖅᑐᑦ ᓄᒃᑕᖅᐸᒃᑐᑦ). ᑲᒪᒋᔭᐅᑦᑎᐊᕐᓗᑎᒃ ᐊᑐᖅᑕᐅᔭᕆᐊᓖᑦ.
ᐊᓂᑦᑕᐃᓕᕕᖕᒦᑦᑐᑦ ᐃᓄᐃᑦ:
| ᐊᐅᓪᓚᕐᓂᐊᖅᑐᖅ ᖃᓄᐃᑦᑑᓂᖓ | ᑐᔪᕐᒥᑎᑕᐅᔪᑦ ᐊᓂᑦᑕᐃᓕᒪᔪᓂ ᔭᓄᐊᕆ 17-ᖑᓕᕐᑎᓪᓗᒍ |
| ᐋᓐᓂᐊᕐᕕᓕᐊᖅᑐᑦ | 48 |
| ᑭᒃᑯᑐᐃᓐᓇᑦ | 8 |
| ᑐᐊᕕᕐᓇᖅᑐᒃᑯᑦ ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖅᑐᑦ ᐊᓂᑦᑕᐃᓕᓂᕐᓗ | 4 |
| ᐃᒡᓗᓕᐅᕐᑎᑦ | 0 |
| ᑲᑎᖦᖢᒋᑦ | 56 |
ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᓇᐃᓈᕐᓯᒪᔪᖅ:
| ᐊᐅᓪᓚᕐᕕᒃᓴᖓᑕ ᐅᓪᓗᐊ | ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐊᓂᑦᑕᐃᓕᕕᖕᒥᙶᖅᑐᑦ |
| ᔭᓄᐊᕆ 18 2022 | 0 |
| ᔭᓄᐊᕆ 19 2022 | 3 |
| ᔭᓄᐊᕆ 20 2022 | 5 |
| ᔭᓄᐊᕆ 21 2022 | 0 |
| ᔭᓄᐊᕆ 22 2022 | 0 |
| Total | 8 |
ᓄᑖᑦ ᐱᓕᕆᐊᒃᓴᓂᒃ ᐱᕙᓪᓕᐊᑎᑕᐅᔪᑦ/ᐱᔨᑦᑎᕋᐅᑎᓂᒃ: ᕿᑎᕐᒥᐅᓂ
- ᖁᕐᓗᖅᑑᕐᒥ ᐋᓐᓂᐊᕐᕕᒃ ᑐᐊᕕᕐᓇᖅᑐᓄᑦ ᑭᓯᐊᓂ (ᐃᖅᑲᓇᐃᔭᖅᑎᖃᑦᑎᐊᙱᓐᓂᖏᓐᓄᑦ).
- ᐅᖅᓱᖅᑑᖅ, ᐃᖃᓗᒃᑑᑦᑎᐊᖅ ᐊᒻᒪ ᑰᒑᕐᔪᒃ ᐋᓐᓂᐊᕕᖏᑦ ᑐᐊᕕᕐᓇᖅᑐᓄᑦ ᑭᓯᐊᓂ ᓄᕙᕐᔪᐊᕐᓇᖅ-19−ᖃᖅᑐᖃᕐᓂᖓᓄᑦ ᓄᓇᓕᖕᓂ.
ᐱᔨᑦᑎᕋᖅᑕᐅᖏᓐᓇᖅᑐᑦ:
- ᑭᓱᓕᕆᔨᓄᑦ ᐋᓐᓂᐊᕐᕕᒃ, MD ᐳᓛᕆᐊᖅᓯᒪᔪᖅ ᐊᒻᒪ ᑭᒍᑎᓕᕆᔨᑦ.
ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:
- ᑭᒍᑎᙳᐊᓕᕆᔨ ᓵᑕᖅᑕᐅᓂᐊᓚᐅᖅᑐᖅ ᐅᖓᕙᕆᐊᖅᑕᐅᔪᖅ ᓄᕙᕐᔪᐊᕐᓇᖅ-19 ᐱᔾᔪᑎᒋᓪᓗᒍ.
- ᐃᓚᖏᑦ ᑐᐊᕕᕐᓇᙱᑦᑐᑦ ᐋᓐᓂᐊᕐᕕᖕᒧᑦ ᐊᐅᓪᓚᕐᓂᐊᓚᐅᖅᑐᑦ ᑕᑯᔭᐅᕝᕕᒃᓴᓖᑦ ᐅᖓᕙᕆᐊᖅᑕᐅᕗᑦ.
- ᐃᓚᖏᑦ ᔭᓗᓇᐃᒥ ᐱᓚᒃᑕᐅᓂᐊᓚᐅᖅᑐᑦ ᓄᖅᑲᖅᑎᑕᐅᕗᑦ ᐅᖃᐅᓯᐅᒃᑲᓐᓂᓚᐅᙱᓐᓂᖓᓂ.
ᒪᑐᔭᐅᔪᑦ/ᓄᖅᑲᖅᑎᑕᐅᔪᑦ/ᐊᑐᕈᓐᓃᖅᑎᑕᐅᔪᑦ ᐱᔨᑦᑎᕋᐅᑎᑦ:
- ᐱᓕᒻᒪᒃᓴᖅᑎᑦᑎᔨᑦ ᓄᓇᓕᖕᓂ ᓄᓇᓕᖕᓄᐊᕐᓂᐊᓚᐅᖅᑐᑦ ᓄᖅᑲᖅᑎᑕᐅᔪᑦ ᐅᖃᐅᓯᐅᒃᑲᓐᓂᓚᐅᙱᓐᓂᖓᓂ.
ᐱᓕᕆᐊᖑᔪᓂᒃ ᐊᐅᓚᑦᑎᕕᒃ
ᓄᑖᑦ ᐱᓕᕆᐊᒃᓴᓂᒃ ᐱᕙᓪᓕᐊᑎᑕᐅᔪᑦ/ᐱᔨᑦᑎᕋᐅᑎᓂᒃ:
- 'Swab-Air' ᐱᒋᐊᖅᑎᑕᐅᒃᑲᓐᓂᖅᑐᑦ ᐃᑲᔪᖅᑐᐃᓪᓗᑎᒃ ᖃᐅᔨᓴᖅᑕᐅᓂᐊᖅᑐᑦ ᐱᐊᓂᒃᑕᐅᖁᓪᓗᒋᑦ.
- ᐱᖓᔪᖓᓂ ᑲᐱᓯᑲᑕᓯᒋᐊᖅᑐᑦ ᐅᑭᐅᓕᖕᓂ 12−ᒥᑦ 17−ᒧᑦ.
- ᐱᖃᑖᓂ ᑲᐃᓯᑲᑕᓕᕐᓂᐊᖅᑐᑦ ᐱᓇᓱᐊᕈᓯᐅᓂᐊᖅᑐᖅ ᐅᑭᐅᓕᖕᓄᑦ 5−ᒥᑦ 11−ᒧᑦ.
- ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᐱᓕᕆᔨᖏᓐᓂᒃ ᐱᓕᕆᖃᑎᖃᖅᑐᑦ 250,000−ᓂᒃ ᖁᑦᑎᖕᓂᖓ 3 ᒪᑐᐊᕐᓂᒃ ᑐᓂᐅᖅᑲᐃᓪᓗᑎᒃ ᕼᐋᒪᓚᒃᑯᓐᓄᑦ. ᒪᑐᐊᑦ RFA−ᑯᓐᓂ ᓴᓇᔭᐅᓯᒪᔪᑦ ᑎᓯᐱᕆ−ᒥ ᑐᓐᓂᖅᑯᑕᐅᓚᐅᖅᑐᑦ.
ᐱᔨᑦᑎᕋᖅᑕᐅᖏᓐᓇᖅᑐᑦ:
- ᑲᐱᔭᐅᔪᒪᔪᑦ ᑕᑯᔭᐅᕝᕕᒃᓴᓕᐅᑲᑕᐃᓐᓇᖅᑐᑦ ᐅᑭᐅᓕᖕᓄᑦ 12−ᒥᑦ ᐅᖓᑖᓂᓪᓗ ᓄᓇᕘᓕᒫᒥ.
ᐃᓄᓕᕆᔨᒃᑯᓐᓄᑦ
ᓄᑖᑦ ᐱᓕᕆᐊᒃᓴᓂᒃ ᐱᕙᓪᓕᐊᑎᑕᐅᔪᑦ/ᐱᔨᑦᑎᕋᐅᑎᓂᒃ:
ᑕᒪᕐᒥᒃ DFS−ᑯᑦ ᐱᔨᑦᑎᕋᖅᑎᖏᑦ/ᐃᓚᒌᓂᑦ ᖃᓄᐃᙱᑦᑎᐊᖅᑐᓕᕆᔨᑦ ᓱᓕ ᐅᓪᓗᓕᒫᖅ ᐊᑐᐃᓐᓇᐅᖃᑦᑕᖅᐳᑦ. ᑐᐊᕕᕐᓇᙱᑦᑐᓄᑦ ᐃᑲᔪᖅᑐᐃᔨᑦ ᐅᖃᓘᑎᒃᑯᑦ ᖃᕆᓴᐅᔭᒃᑯᓪᓗ ᐊᑐᐃᓐᓇᐅᕗᑦ. ᑐᐊᕕᕐᓇᖅᑐᑦ ᑲᒪᒋᔭᐅᖃᑦᑕᖅᐳᑦ ᐅᐸᒍᑎᓪᓗᑎᒃ, ᓄᕙᕐᔪᐊᕐᓇᖅ−19−ᒥ ᐊᑐᖅᑕᐅᒋᐊᓖᑦ ᒪᓕᒃᖢᒋᑦ.
ᐱᔨᑦᑎᕋᖅᑕᐅᖏᓐᓇᖅᑐᑦ:
ᓱᓕ ᒪᓕᒋᐊᓕᖕᓂᑦ ᒪᓕᒃᑐᑦ ᐱᔨᑦᑎᕋᖅᑎᑦ ᐅᓪᓗᓕᒫᑦᑎᐊᖅ ᐅᖄᓚᕝᕕᐅᓪᓗᑎᒃ.
ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:
ᐅᐸᒍᑎᔪᑦ ᐃᓯᑐᐃᓐᓇᖃᑦᑕᖅᑐᑦ ᓄᖅᑲᖅᑎᑕᐅᓯᒪᓕᖅᑐᑦ ᑐᐊᕕᕐᓇᙱᑦᑐᓄᑦ.
ᒪᑐᔭᐅᔪᑦ/ᓄᖅᑲᖅᑎᑕᐅᔪᑦ/ᐊᑐᕈᓐᓃᖅᑎᑕᐅᔪᑦ ᐱᔨᑦᑎᕋᐅᑎᑦ:
ᐊᒡᓚᒡᕖᑦ ᒪᑐᓯᒪᔪᑦ.
ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ
ᐱᔨᑦᑎᕋᖅᑕᐅᖏᓐᓇᖅᑐᑦ:
ᑮᓇᐅᔭᖅᑎᒍᑦ ᐃᑲᔫᑏᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ
ᐊᐱᖅᑯᑎᑦ ᓄᓇᕗᒻᒥ ᐃᓕᓐᓂᐊᖅᑎᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᐃᑲᔫᑎᑦ ᐱᔾᔪᑎᒋᓗᒋᑦ ᓇᒃᓯᐅᔾᔭᐅᔪᓐᓇᖅᑐᑦ ᐅᕗᖓ fans@gov.nu.ca. ᐃᓕᓐᓂᐊᖅᑎᑦ ᐊᐱᖅᑯᑎᒃᓴᓕᑦ ᑮᓇᐅᔭᖅᑎᒍᑦ ᐃᑲᔫᑎᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᖃᖓᑦᑕᐅᓯᖅᑕᐅᔪᓐᓇᕐᒪᖔᑦ ᖃᐅᔨᒋᐊᕈᓐᓇᖅᑐᑦ ᐅᕗᖓ fanstravel@gov.nu.ca ᑐᑭᓯᒋᐊᒃᑲᓐᓂᒐᒃᓴᓂ.
ᐃᓕᓐᓂᐊᕆᐅᖅᓴᔪᑦ ᐸᐃᕆᕕᓪᓗ
ᐸᐃᕆᕝᕖᑦ ᒪᒃᐱᒃᑲᓐᓂᕈᓐᓇᖅᑎᑕᐅᕗᑦ ᔮᓄᐊᕆ 17−ᒥ ᓄᑕᖅᑲᓄᑦ ᑕᒪᐃᓐᓄᑦ.
ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᕐᕕᒻᒥ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐸᕐᓇᐅᑏᑦ ᐃᑲᔪᖅᑐᖅᑕᐅᓂᕐᒧᓪᓗ ᓇᓂᔭᐅᔪᓐᓇᖅᑐᖅ ᐅᕙᙵᑦ: https://gov.nu.ca/education/information/2021-22-opening-plan-nunavut-sch...
ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:
ᑭᐅᔭᐅᓇᓵᖃᑦᑕᑐᐃᓐᓇᕆᐊᖃᕐᓂᐊᖅᐳᓯ ᑎᑎᕋᕐᕕᖕᒥ ᓄᕙᒡᔪᐊᕐᓇᖅ-19−ᒧᑦ ᖃᓂᒪᔪᖃᐅᕐᓂᖓᓄᑦ ᐊᕐᕕᐊᓂ.
ᒪᑐᔭᐅᔪᑦ/ᓄᖅᑲᖅᑎᑕᐅᔪᑦ/ᐊᑐᕈᓐᓃᖅᑎᑕᐅᔪᑦ ᐱᔨᑦᑎᕋᕐᓂᕆᔭᐅᔪᑦ:
ᐃᓕᓐᓂᐊᓕᓵᖅᑐᓂᒃ ᖁᕝᕙᓯᖕᓂᓕᖕᓄᑦ 12−ᒧᑦ ᐃᓕᓐᓂᐊᕐᕖᑦ
ᐃᓕᓐᓂᐊᓕᓵᖅᑐᑦ ᐊᔪᙱᓐᓂᓕᖕᓄᑦ 12−ᒧᑦ ᑎᑭᓪᓗᒍ ᑕᒪᕐᒥᒃ ᐃᓕᓐᓂᐊᕐᕕᖏᑦ ᒪᑐᓯᒪᓂᐊᖅᐳᑦ ᔮᓄᐊᕆ 24−ᖑᕋᓱᖕᓂᖓᓄᑦ 2022, ᐅᕝᕙᓘᓐᓃᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖕᒧᑦ ᐅᖃᐅᔾᔭᐅᒃᐸᑕ.
ᔭᓄᐊᕆᒥ ᐱᔭᕇᕈᓯᐊᕐᒧᑦ ᖃᐅᔨᓴᕈᑎᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᓄᖅᑲᖅᑎᑕᐅᓯᒪᓕᖅᑐᑦ. ᐃᓕᓐᓂᐊᖅᑎᑦ ᑎᑎᕋᕆᐊᖃᓚᐅᖅᑐᑦ ᐱᔭᕇᕈᓯᐊᖏᑦᑕ ᖃᐅᔨᓴᕈᓯᖏᓐᓂᒃ ᔭᓄᐊᕆ 2022−ᒥ ᐱᑎᑕᐅᖔᓛᖅᑐᑦ ᐃᓱᒪᖅᓲᑎᒃᓴᒥᓂᒃ ᐃᓕᓐᓂᐊᕐᕕᖕᒥᓪᓗ ᓇᓗᓇᐃᒃᑯᑕᖏᑦ ᐋᖅᑭᒃᑕᐅᓯᒪᖃᑦᑕᕐᓂᐊᖅᖢᑎᒃ 100%−ᒧᑦ ᐊᑕᖏᖅᑕᐅᓗᑎᒃ ᓇᓗᓇᐃᒃᑯᑕᖅᑖᕆᖃᑦᑕᕐᓂᐊᖅᑕᖏᓐᓄᑦ.
ᐃᓕᓐᓂᐊᕆᐅᖅᓴᔪᑦ ᐸᐃᕆᕕᓪᓗ
ᓄᓇᕗᑦ ᒐᕙᒪᒃᑯᑦ ᐸᐃᕆᕝᕕᓕᕆᔨᓂᑦ ᒪᒃᐱᒃᑲᓐᓂᖁᔨᓪᓗᑎᒃ ᐊᐱᕆᓚᐅᖅᐳᑦ ᓄᑕᖅᑲᓄᑦ ᒪᑐᐃᒃᑲᓐᓂᖁᓪᓗᒋᑦ ᓴᓇᔭᕆᐊᖃᓪᓚᕆᒃᑐᖅ ᐱᓕᕆᔨᑦ ᐱᔾᔪᑎᒋᓪᓗᒋᑦ.
ᐱᕐᔪᐊᕌᓗᖕᓂ ᐃᖅᑲᓇᐃᔮᓖᑦ ᐅᑯᐊᖑᓪᓗᑎᒃ ᑕᐃᒃᑯᐊ ᐃᓄᐃᑦ ᐃᖅᑲᓇᐃᔮᓖᑦ ᐱᕐᔪᐊᓂᒃ ᖃᓄᐃᙱᑦᑎᐊᕐᓇᖅᑐᓂᒃ ᐊᑦᑕᕐᓇᙱᑦᑐᓂᒡᓗ ᓄᓇᕗᒥᐅᓄᑦ, ᑕᐃᒃᑯᐊᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᖅᑲᓇᐃᔭᖅᑎᐅᖃᑕᐅᔪᑦ, ᕼᐋᒻᒪᓚᒃᑯᓐᓂ, ᓂᐅᕕᕐᕕᖕᓂ, ᐊᒻᒪ ᖃᖓᑕᓲᓕᕆᔨᓂᒃ.
ᐃᖅᑲᓇᐃᔭᖅᑐᓕᕆᔨᒃᑯᑦ
ᓄᑖᑦ ᐱᓕᕆᐊᒃᓴᓂᒃ ᐱᕙᓪᓕᐊᑎᑕᐅᔪᑦ/ᐱᔨᑦᑎᕋᐅᑎᓂᒃ:
ᐃᑉᐸᒃᓴᖅ, ᓄᓇᕗᑦ ᒐᕙᒪᒃᑯᑦ ᑎᑎᕋᕐᕕᖏᑦ ᐃᖅᑲᓇᐃᔭᖅᑎᖏᓐᓄᑦ ᒪᑐᐃᒃᑲᓐᓂᓚᐅᖅᐳᑦ. ᓄᓇᕗᑦ ᒐᕙᒪᒃᑯᑦ ᑎᑎᕋᕐᕕᖏᑦ ᓱᓕ ᒪᑐᓯᒪᓂᐊᖅᑐᑦ ᑭᒃᑯᑐᐃᓐᓇᓄᑦ.
ᔮᓄᐊᕆ 17−ᒥ 31−ᒧᑦ, ᐃᑲᔪᖅᑐᐃᓪᓗᑎᒃ ᐊᑦᑕᕐᓇᙱᑦᑐᒥᒃ ᖃᓄᐃᓐᓇᙱᑦᑐᒥᓪᓗ ᐃᖅᑲᓇᐃᔭᕐᕕᖃᖁᓪᓗᒋᑦ ᐊᒻᒪᓗ ᓄᕙᕐᔪᐊᕐᓇᖅ-19−ᒥ ᐊᐃᑦᑐᕐᓗᐃᖏᓐᓂᖅᓴᐅᖁᓪᓗᒋᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᓕᒫᖏᑦ ᓱᓕ ᐊᖏᕐᕋᒥᓂ ᐱᓕᕆᑲᑕᖁᔭᐅᔪᑦ ᐊᔪᕐᓇᙱᓐᓂᓕᒫᖓᓂ ᐃᖅᑲᓇᐃᔭᕐᕕᓕᐊᖅᐸᒡᓗᑎᒡᓗ ᐱᔭᕆᐊᖃᕌᖓᑕ. ᐊᖓᔪᖅᑳᑦ ᐊᓯᔾᔩᖃᑦᑕᕈᓐᓇᖁᔭᐅᕗᑦ ᐊᔪᕐᓇᙱᑐᐊᕌᖓᑦ ᐊᐅᓚᓂᕆᔭᕆᐊᓕᖏᓂᒡᓗ ᐊᙳᒻᒪᑎᓗᑎᒃ.
ᐱᔨᑦᑎᕋᖅᑕᐅᖏᓐᓇᖅᑐᑦ:
ᑕᒪᕐᒥᒃ ᒫᓐᓇ ᐃᖅᑲᓇᐃᔭᖅᑎᓂᒃ ᐱᓇᓱᐊᖅᑕᐅᕙᒃᑐᑦ ᐱᓕᕆᐊᖑᐃᓐᓇᕐᓂᐊᖅᐳᑦ ᐊᒻᒪ ᐃᖅᑲᓇᐃᔮᒧᑦ ᐱᔪᒥᓴᐅᑎᑦ ᐃᖅᑲᓇᐃᔭᓚᐅᑲᖕᓂᐊᖅᑐᓄᑦ ᐊᒻᒪ ᒫᓐᓇᓕᓴᐃᑦ ᐱᓇᓱᐊᖅᑕᐅᔪᓐᓇᖅᑐᑦ ᓇᒃᓯᐅᔾᔭᐅᖏᓐᓇᕈᓐᓇᖅᐳᑦ ᐃᕐᖐᓐᓈᖅᑕᐅᒃᑯᑦ, ᑭᓯᐊᓂ ᐃᖅᑲᓇᐃᔭᖅᑎᓴᖅᓯᐅᖅᑎᓄᑦ ᑎᑎᕋᕐᕖᑦ ᒪᑐᓯᒪᔪᑦ ᐃᓄᖕᓄᑦ.
ᓄᓇᕗᒥᐅᑦ ᖃᓄᐃᙱᑦᑎᐊᖅᑐᑦ ᑕᒪᑦᑕᑦᑎᐊᖅ ᑲᑐᔾᔨᓪᓗᑕ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᐅᖓᓯᒌᒃᑕᖅᐸᒡᓗᓯ, ᐃᓗᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᓯᓗ ᖃᓂᒪᒍᔅᓯ.