ᓄᕙᕐᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᖅ - ᔭᓄᐊᕆ 11, 2022

ᓯᕗᓕᖅᑎᒥᑦ ᑐᓴᒐᒃᓴᑦ ᓄᑖᙳᕆᐊᖅᓯᒪᔪᑦ:

ᐅᓪᓛᒃᑯᑦ,

ᐅᓪᓛᖑᔪᖅ ᓄᓇᕗᑦ 192−ᓂ ᓄᕙᒡᔪᐊᕐᓇᖅ-19−ᖃᖅᑐᖃᓕᖅᑐᖅ.

13-ᓂᒃ ᓄᓇᓕᖕᓂᑦ ᓇᓗᓇᐃᖅᑕᐅᓯᒪᔪᖃᓕᖅᑐᖅ ᓄᕙᕐᔪᐊᕐᓇᓕᖕᓂᑦ:

• 21 ᐊᕐᕕᐊᓂ.
• 16 ᐃᖃᓗᒃᑑᑦᑎᐊᒥ.
• ᑎᓴᒪᑦ ᐃᒡᓗᓕᒑᕐᔪᖕᒥ.
• ᒪᕐᕉᒃ ᐃᒡᓗᓕᖕᒥ.
• 55 ᐃᖃᓗᖕᓂ.
• 22 ᑭᙵᕐᓂ.
• 8 ᐸᓐᓂᖅᑑᒥ.
• ᐊᑕᐅᓯᖅ ᒥᑦᑎᒪᑕᓕᖕᒥ.
• ᑎᓴᒪᑦ ᕿᑭᖅᑕᕐᔪᐊᕐᒥ.
• 35 ᑲᖏᖅᖠᓂᕐᒥ.
• ᐊᑕᐅᓯᖅ ᓴᓂᑭᓗᐊᕐᒥ.
• 8 ᓴᓂᕋᔭᖕᒥ.
• 7 ᑎᑭᕋᕐᔪᐊᕐᒥ.

ᐊᒻᒪᓗ, ᐊᑕᐅᓯᕐᒥ ᑲᖐᓇᖅᑐᖃᓕᕆᓪᓗᓂ ᑕᓗᕐᔪᐊᕐᒥ. ᐅᓪᓗᒥ 26−ᓂᑦ ᐱᔪᓐᓃᖅᓯᒪᔪᖃᓕᖅᑐᖅ. 165−ᓂᒃ ᑲᑎᖦᖢᒋᑦ ᐱᔪᓐᓃᖅᓯᒪᔪᖃᓕᖅᑐᖅ ᐅᓪᓗᒥᒧᑦ ᐊᐃᑦᑐᕐᓗᒃᑕᐅᓯᒪᔪᓂᒃ.

ᐱᐅᓂᖅᓴᒥ ᐅᖃᕐᓗᖓ, ᖁᕕᐊᓱᒃᐳᖓ ᑐᓴᖅᑎᑦᑎᔭᕆᐊᒃᓴᖅ ᐅᓄᖅᑐᓯᒍᑦ ᑲᐱᔭᐅᓯᒪᓕᕋᔅᓯ. ᒫᓐᓇᒧᑦ ᑎᑭᖦᖢᒍ, 89−ᐳᓴᓐ ᓄᓇᕗᒻᒥᐅᑦ ᑕᓪᓕᒪᓂᒃ ᐅᑭᐅᓖᑦ ᐅᖓᑕᓂᓪᓗ ᓯᕗᓪᓕᖅᐹᒥ ᑲᐱᔭᐅᓯᒪᓕᖅᐳᑦ, 71−ᐳᓴᓐ ᒪᕐᕉᖕᓂᒃ ᑲᐱᔭᐅᓯᒪᓕᖅᖢᑎᒃ. 39-ᐳᓴᓐ ᖃᓂᒋᔮᓂ ᓄᓇᕗᒻᒥᐅᑦ 18 ᐅᖓᑖᓂ ᐅᑭᐅᓖᑦ ᐱᖓᔪᖓᓂ ᑲᐱᔭᐅᓯᒪᓕᖅᐳᑦ.

ᑕᐃᒪᑐᖅ ᑕᒪᔅᓯ ᑲᐱᔭᐅᓂᐊᖅᐳᓯ−ᕿᑐᕐᙵᓯᑦᑕᐅᖅ ᑲᐱᔭᐅᑎᓐᓂᐊᕆᕙᓯᐅᒃ.

ᐃᑉᐸᒃᓴᖅ, ᐅᐸᒍᑎᓚᐅᖅᐳᖓ ᓯᕗᓪᓕᖅᐹᒥ ᒥᓂᔅᑕᐃᑦ ᑲᑎᒪᑎᓪᓗᒋᑦ ᑲᓇᑕᐅᑉ ᐊᖓᔪᖅᑳᓂ ᐃᒃᓯᕙᐅᑕᖃᖅᖢᑎᒃ, ᓄᕙᕐᔪᐊᕐᓇᖅ-19 ᖃᓄᐃᓕᖓᓕᕐᓂᖓᓂ ᑲᓇᑕᒥ ᐱᔾᔪᑎᖃᖅᖢᑎᒃ. ᑐᑭᓯᓇᖅᓯᕗᖅ ᓯᕗᓕᖅᑎᐅᑉ ᐅᓂᒃᑳᓕᐊᖓᓂ ᑲᓇᑕᓕᒫᒥ ᐱᕕᒡᔪᐊᖅᓯᐅᓕᕋᑦᑕ.  ᐃᑲᔫᑎᑦ ᓲᕐᓗ ᐃᖢᐊᖅᓴᐃᔨᑦ, ᖃᐅᔨᓴᕐᕕᖕᒥ ᐃᓂᒋᔭᐅᔪᓐᓇᖅᑐᑦ ᐊᒻᒪᓗ ᐋᓐᓂᐊᕐᕕᖕᒥ ᐃᖅᑲᓇᐃᔭᖅᑎᓂᑦ ᐊᑕᖏᐅᒪᙱᑉᐳ.ᑦ ᐋᓐᓂᐊᕖᑦ ᐅᓄᖅᑐᑦ ᖃᓪᓗᓈᓂ ᒫᓐᓇ ᐱᔭᒃᓴᖃᓗᐊᖅᑐᒻᒪᕆᐊᓘᓕᖅᐳᑦ ᓄᕙᕐᔪᐊᖅᑐᓂᑦ. ᐱᕕᖃᕈᓐᓇᖅᓯᓚᐅᖅᐳᖓ ᑲᑎᒪᑎᓪᓗᑕ ᓇᓗᓇᐃᖅᓯᒃᑲᓐᓂᕈᓐᓇᖅᓯᓪᓗᖓ ᑐᐊᕕᕐᓇᖅᑐᒥᒃ ᐋᓐᓂᐊᕐᕕᖕᒥ ᑲᒪᒋᔭᐅᔭᕆᐊᓕᖕᓂᒃ ᐱᔭᕆᐊᖃᕐᓂᑦᑎᓐᓂ.

ᒐᕙᒪᑐᖃᒃᑯᑦ ᖃᓄᖅᑑᓕᕇᓚᐅᖅᐳᑦ ᐅᑯᓂᖓ ᐊᑐᐃᓐᓇᕈᖅᑎᑦᑎᓪᓗᑎᒃ:

• ᓱᒃᑲᔪᒥᒃ ᖃᐅᔨᓴᕈᑎᑦ.
• N95 ᑮᓇᕐᒧᑦ ᒪᑐᐊᑦ.
• ᐃᑲᔪᖅᑐᐃᓪᓗᑎᒃ ᐃᓕᓐᓂᐊᕐᕕᑦᑎᓐᓂ ᐊᓂᐊᕝᕕᖃᑦᑎᐊᕐᓂᖅᓴᐅᓕᖁᓪᓗᒍ.

ᑭᓯᐊᓂᓕ, ᖃᐅᔨᓚᐅᖅᐳᖓ ᓄᓇᕗᒻᒥ ᓱᓕ ᐃᑲᔪᖅᑕᐅᔭᕆᐊᖃᕐᒪᑕ ᐃᖅᑲᓇᐃᔭᖅᑎᖏᓐᓂᒃ−ᐱᓗᐊᖅᑐᒥ ᐃᖢᐊᖅᓴᐃᔨᓂᑦ ᐊᒻᒪ ᖃᐅᔨᓴᕐᕕᖕᒥ ᐱᓕᕆᔨᓂᒃ. ᐊᒃᓱᕉᑎᖃᓚᐅᕆᕗᖓ ᐃᒡᓗᑭᒃᓴᓗᐊᕐᓂᕗᑦ ᑲᒪᒋᔭᐅᔭᕆᐊᖃᕐᓂᖓᓂ. ᐃᓄᒋᐊᓗᐊᖃᑦᑕᕐᓂᖅ ᐊᒃᑐᐃᓪᓚᕆᒃᐳᖅ ᓄᕙᕐᔪᐊᕐᓇᖅ-19−ᒥ ᐊᐃᑦᑐᐃᖃᑦᑕᐅᑎᔪᓄᑦ ᓄᓇᓕᑦᑎᓐᓂ. ᓄᓇᕗᑦ ᖃᓄᐃᓕᐅᓯᑲᐅᑎᒋᔭᕆᐊᖃᖅᐳᑦ ᐃᒡᓗᓕᕆᓂᖅ ᐱᔾᔪᑎᒋᓪᓗᒍ ᓄᓇᖅᑲᑎᕗᑦ ᐊᑦᑕᕐᓇᙱᑦᑐᒥᑦ ᐅᐸᒃᑕᐅᑦᑕᐃᓕᒪᕝᕕᖃᖁᓪᓗᒋᑦ.

ᐅᓗᑐᐃᓐᓇᒥ ᔮᓄᐊᕆ 7−ᒥ ᐱᒋᐊᕐᓗᓂ, ᒥᑦᑕᕐᕕᖕᒧᑦ ᐊᒡᔭᖅᑐᐃᕙᓪᓕᐊᓕᓚᐅᖅᐳᒍᑦ ᐊᖏᕐᕋᐅᑎᔭᒃᓴᓂᑦ ᓱᒃᑲᔪᒥᒃ ᖃᐅᔨᓴᕈᑎᓂᒃ ᐅᐃᓂᐹᖕᒧᑦ, ᐃᐊᑦᒪᓐᑕᓐᒧᑦ, ᐋᑐᕚᒧᑦ, ᓴᓂᑭᓗᐊᕐᒧᑦ, ᐃᖃᓗᖕᓄᑦ, ᑲᖏᖅᖠᓂᕐᒧᑦ ᐊᒻᒪ ᔭᓗᓇᐃᒧᑦ. ᓂᕆᐅᒃᐳᒍᑦ ᑖᒃᑯᐊ ᖃᐅᔨᓴᕈᑎᑦ ᐱᓕᕆᔾᔪᑕᐅᒃᑲᓐᓂᕐᓂᐊᕐᒪᑕ ᐊᐅᓚᑦᑎᓂᕐᒧᑦ ᓯᐊᒻᒪᒃᐸᓪᓕᐊᔪᓂ ᓄᓇᑦᑎᓐᓂᑦ.

ᐱᓇᓱᐊᕈᓯᐅᓚᐅᖅᑐᒥᑦ ᑐᐊᕕᕐᓇᖅᑐᒥᑦ ᒥᓂᔅᑕᐅᖃᑎᒃᑲ ᑲᑎᒪᖃᑎᒋᓚᐅᖅᐸᒃᑲ ᐅᖃᐅᓯᖃᖅᖢᑕ ᐱᓕᕆᕝᕕᑦᑕ ᐸᕐᓇᐅᑎᖓᓂᒃ ᓴᖅᑭᑎᑦᑎᔪᒪᓪᓗᑕ ᑐᐊᕕᕐᓇᖅᑐᓄᑦ ᐱᓕᕆᐊᖑᓂᐊᖅᑐᓂᑦ ᓄᕙᕐᔪᐊᕐᓇᒧᑦ. ᓄᓇᕗᒻᒥᐅᑦ ᖃᐅᔨᒪᑦᑎᐊᖁᕙᒃᑲ ᐱᔭᕆᐊᓕᖏᓐᓂᒃ ᐃᑲᔪᖅᑐᐃᔾᔪᑎᓂᒃ ᐱᑎᑕᐅᓂᐊᕐᓂᖏᓐᓂᒃ ᐊᐃᑦᑐᕐᓗᐃᖃᑦᑕᐅᑎᔪᑦ ᐊᓂᒍᐃᖁᓪᓗᒋᑦ. ᖁᕕᐊᓱᒃᐳᖓ ᓄᑖᒥᒃ ᐸᕐᓇᐅᑎᒥᒃ ᒥᓂᔅᑕᓄᑦ ᐅᓂᒃᑲᐅᓯᐅᔪᒥᒃ ᓂᕆᐅᒃᐳᖓᓗ ᑐᓴᖅᑎᑦᑎᓂᐊᕆᐊᒃᓴᖅ ᐃᓚᖏᓐᓂ ᐱᓕᕆᐊᖑᑎᑕᐅᔪᓂᑦ ᖃᑯᒍᑦᑎᐊᖅ.

ᐊᑏ ᐱᓇᓱᐊᖃᑕᐅᑦᑎᐊᖅᑕ ᓄᓇᕗᑦ ᖃᓂᒪᓐᓇᒧᑦ Omicron-ᒥᑦ ᑎᑭᑕᐅᖁᓇᒍ.

• ᐊᖏᕐᕋᖅᓯᒪᐃᓐᓇᕆᑦ.
• ᑲᐱᔭᐅᓗᑎᑦ ᐋᓐᓂᐊᓕᕇᒃᑯᑎᒧᑦ.
  • ᐱᖓᔪᖓᓂ ᑲᐱᔭᐅᓗᑎᓗ.
• ᒪᑐᐊᖅᓯᒪᓗᑎᑦ.
• ᓄᕙᕐᔪᐊᕐᓇᒧᑦ ᐅᖄᓚᕝᕕᒃᓴᖅ ᑐᓴᖅᑎᓪᓗᒍ ᐊᒻᒪ ᐊᓂᑦᑕᐃᓕᒪᓗᑎᑦ ᖃᓂᒪᑲᑕᓕᕈᕕᑦ.

ᑕᒪᑦᑕ ᑕᐃᒪᐃᓕᐅᕆᐊᖃᖅᐳᒍᑦ ᓄᓇᖅᑲᑎᕗᑦ ᐊᑦᑕᕐᓇᖅᑐᒦᖁᓇᒋᑦ. ᖁᔭᓐᓇᒦᒃ.

 

ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᑐᓴᒐᒃᓴᖏᑦ:

ᐅᓪᓛᒃᑯᑦ,

ᐱᒋᐊᕈᑎᒋᓗᒍ, ᖃᐅᔨᒪᔪᖓ ᐊᕐᕕᐊᕐᒥᐅᑦ ᐅᓄᖅᑐᑦ ᐃᓐᓇᒃᑯᕕᖕᒥ ᖃᓄᐃᓕᖓᓕᕐᒪᖔᑦ ᐊᕐᕕᓂᓖᑦ ᐃᖅᑲᓇᐃᔭᖅᑎᑦ ᓇᓗᓇᐃᖅᑕᐅᓚᐅᖅᑎᓪᓗᒋᑦ ᖃᓂᒋᔭᐅᔪᕕᓃᑦ ᖃᐅᔨᓴᖅᑕᐅᑎᓪᓗᒋᑦ ᖃᐅᔨᔭᐅᓪᓗᑎᒡᓗ ᓄᕙᕐᔪᐊᕐᓇᖅ-19−ᖃᕐᓂᖏᓐᓂ. ᐃᓐᓇᕐᓂᑦ ᐃᓐᓇᒃᑯᕕᖕᒦᑦᑐᓂᒃ ᓇᓗᓇᐃᖅᑕᐅᔪᖃᓚᐅᙱᑦᑐᖅ ᐅᓗᕆᐊᓇᖅᑐᒦᓐᓂᖏᓐᓂᒃ ᖃᓂᒋᔭᐅᔪᕕᓂᕐᓂ ᖃᐅᔨᓴᖅᑕᐅᔾᔪᑎᖏᓪᓗ ᓄᕙᕐᔪᐊᕐᓇᖅ-19−ᒧᑦ ᐱᖃᙱᓐᓂᕋᖅᑕᐅᓚᐅᖅᖢᑎᒃ. ᖃᔅᓯᑲᓪᓚᖕᓂᑦ ᐃᖅᑲᓇᐃᔭᓚᐅᑲᒃᐸᒃᑐᓂᑦ ᐃᓇᖏᖅᑎᖃᖅᐳᒍᑦ ᐃᓐᓇᒃᑯᕕᖕᒥ ᐊᕐᕕᐊᓂ ᐃᖅᑲᓇᐃᔭᖅᑎᓪᓗ ᖃᔅᓯᐅᓂᖏᑦ ᓱᕐᕌᖏᖦᖢᑎᒃ. ᐃᓐᓇᕐᓄᑦᑕᐅᖅ ᐃᓂᒋᔭᐅᒋᕗᖅ, ᐃᑲᔪᖅᑕᐅᕙᒃᑐᑦ ᐃᒻᒥᒃᑰᕈᓐᓇᖅᖢᑎᒃ ᐃᖅᑲᓇᐃᔭᖅᑎᓄᓪᓗ ᐱᓕᕆᖃᑎᖃᓗᐊᕆᐊᖃᙱᖦᖢᑎᒃ ᐃᑲᔪᖅᑕᐅᓗᐊᕆᐊᖃᙱᖦᖢᑎᒡᓗ.

ᐱᓇᓱᐊᕈᓰ ᒪᕐᕉᒃ ᐊᓂᒍᖅᑑᒃ ᑕᐅᑐᒃᖢᒋᑦ, ᖁᔭᓐᓇᒦᕆᐊᖃᓪᓚᕆᒃᐳᖓ ᐋᓐᓂᐊᕐᕕᖕᒥ ᐃᖅᑲᓇᐃᔭᖅᑎᖏᓐᓂᒃ ᓄᓇᕗᒻᒥ. ᐊᒃᓱᐊᓗᒃ ᐱᔭᒃᓴᖃᖃᑦᑕᓚᐅᖅᐳᓯ ᐅᓄᖅᑐᓂᓪᓗ ᐊᓂᒍᐃᓇᓱᒋᐊᖃᖅᐸᒃᖢᓯ, ᑭᓯᐊᓂ ᐅᐱᒍᓱᑦᑎᐊᖅᐳᒍᑦ ᐱᓕᕆᐊᕆᓵᖅᑕᔅᓯᓐᓄᑦ. ᐃᖢᐊᖅᓴᐃᔨᕗᑦ ᐊᒻᒪ ᖃᐅᔨᓴᕐᕕᖕᒥ ᐃᖅᑲᓇᐃᔭᖅᑎᕗᑦ ᐅᓪᓗᓕᒫᑦᑎᐊᖅ ᐃᖅᑲᓇᐃᔭᖃᑦᑕᖅᐳᑦ ᓄᕙᕐᔪᐊᕐᓇᖃᖅᑐᓂᒃ ᖃᐅᔨᓴᖅᖢᑎᒃ, ᐊᒻᒪᓗ ᖃᓂᒋᔭᐅᓚᐅᖅᑐᓂᑦ ᖃᐅᔨᓴᑲᑕᒃᑎᓪᓗᒋᑦ ᖃᓂᒻᒪᓇᒥ ᖃᐅᔨᓇᓱᒃᖢᑎᒃ ᓄᖅᑲᖅᑎᑦᑎᓇᓱᒃᖢᑎᒡᓗ. ᐃᑲᔪᖅᑐᐃᔨᕗᑦ ᐃᖅᑲᓇᐃᔭᖅᑎᑦ ᐱᒻᒪᕆᐊᓗᖕᒥᑦᑕᐅᖅ ᐱᓕᕆᐊᒃᓴᖃᓚᐅᕆᕗᑦ ᑲᒪᓇᓱᒃᑎᓪᓗᑕ ᒫᓐᓇᒧᑦ ᑎᑭᖦᖢᒍ.

Omicron ᓄᓇᑦᑎᓐᓂ ᐊᐃᑦᑐᕐᓘᑕᐅᕗᖅ ᐅᓄᖅᓯᕙᓪᓕᐊᕌᓚᓴᖅᑐᓪᓗ ᓄᕙᕐᔪᐊᖅᑐᑦ ᓈᓴᖅᑕᐅᕙᓪᓕᐊᔪᑦ ᐋᓐᓂᐊᖅᑐᓕᕆᔨᓄᑦ ᐋᖅᑭᒋᐊᖅᓯᔭᕆᐊᖃᓕᓚᐅᖅᐳᑦ ᐊᐅᓚᓂᕆᔭᑦᑎᓐᓂ. ᐃᑲᔪᖅᑐᐃᔨᓄᑦ ᐱᔨᑦᑎᕋᖅᑎᑖᒃᑲᓐᓂᓚᐅᕐᒥᔪᒍᑦ ᒪᓕᒋᐊᓕᓪᓗ ᐋᖅᑭᒋᐊᖅᖢᒋᑦ. ᖃᕆᓴᐅᔭᒃᑯᑦ ᐃᑲᔪᖅᑐᐃᔾᔪᑎᓂᒃ ᐃᓚᒋᐊᓯᓚᐅᖅᐳᒍᑦ ᐅᖄᓚᕝᕕᒃᓴᒧᑦ ᐊᒻᒪᓗ ᖃᓂᒋᔭᐅᔪᕕᓂᕐᓂ ᖃᐅᔨᓴᕈᑎᒥᒃ.  ᐱᒋᐊᖅᑎᑦᑎᓚᐅᕆᕗᒍᑦ ᐱᓕᕆᖃᑕᐅᓂᐊᖅᑐᓂᒃ ᐋᓐᓂᐊᖅᑐᓕᕆᔨᑦ ᐃᖅᑲᓇᐃᔭᖅᑎᖏᓐᓂ ᐃᑲᔪᕐᓂᐊᖅᑐᓂᒃ ᓄᕙᕐᔪᐊᓕᖅᐸᓪᓕᐊᔪᓂᒃ ᖃᐅᔨᓴᖅᐸᓪᓕᐊᔪᓂᑦ. ᑖᒃᑯᐊ ᖃᓄᖅᑑᕈᑎᒋᔭᕗᑦ ᐋᓐᓂᐊᖅᑐᓕᕆᔨᒃᑯᓐᓄᑦ ᐱᔭᐅᔭᕆᐊᖃᓚᐅᖅᐳᑦ ᑲᒪᐃᓐᓇᖁᓪᓗᑕ ᓄᕙᕐᔪᐊᕐᓇᒧᑦ ᖃᓄᐃᓕᐅᕈᑎᓂᑦ ᐊᑑᑎᖃᖅᑐᓂᑦ ᐊᓯᖏᓐᓂᒡᓗ ᐱᔭᕆᐊᖃᓪᓚᕆᒃᑐᓂᑦ ᐋᓐᓂᐊᖅᑐᓕᕆᔨᑦ ᐱᔨᑦᑎᕋᐅᑎᖏᓐᓂᒃ ᐊᑐᐃᓐᓇᐅᑎᑦᑎᓗᑕ.

ᐊᑕᐅᑦᑎᒃᑯᑦ ᑕᒪᓐᓇ ᐊᑐᖅᐸᕗᑦ. ᓄᓇᕗᒻᒥᐅᓕᒫᑦ ᖁᔭᓕᔪᒪᕙᒃᑲ ᐃᑲᔪᓚᐅᖅᑐᑦ ᓄᕙᕐᔪᐊᕐᓇᖅ−19−ᒥ ᓄᖅᑲᖅᑎᑦᑎᓇᓱᒃᑎᓪᓗᑕ ᓄᖅᑲᖓᓐᓇᐅᑎᓪᓗᒍ. ᑕᐃᒃᑯᐊ ᐃᓱᒪᒋᔭᖃᑦᑎᐊᖅᑐᑦ, ᐃᒃᐱᒍᓱᑦᑎᐊᖅᑐᓪᓗ ᐃᓄᐃᑦ, ᐃᒡᓘᑉ ᐃᓗᐊᓂ ᑲᑎᙵᑲᑕᓚᐅᙱᑦᑐᑦ, ᓂᕆᕕᒡᔪᐊᕐᓇᓂ ᓄᖅᑲᖅᑎᑦᑎᓚᐅᖅᑐᑦ ᐊᒻᒪᓗ ᐊᐅᓪᓚᕐᕕᒋᓂᐊᖅᑕᒥᓂᒃ ᓄᖅᑲᖅᑎᑦᑎᓚᐅᖅᑐᑦ, ᑲᐱᔭᐅᓚᐅᖅᑐᓪᓗ ᓄᖅᑲᖓᓐᓇᐅᑎᓪᓗᒍ. ᒥᑭᑦᑑᑯᓘᖅᑰᔨᔪᖅ, ᑭᓯᐊᓂ ᐊᑐᓂ ᐊᑕᐅᓯᑯᓗᖕᒥ ᖃᓄᐃᓕᐅᖅᑐᑦ ᓄᕙᕐᔪᐊᕐᓇᒥᒃ ᓄᖅᑲᖅᑎᑦᑎᓇᓱᒃᑎᓪᓗᑕ ᐱᒻᒪᕆᐅᕗᖅ ᐃᓚᕗᑦ, ᐱᖃᓐᓇᕆᔭᕗᑦ ᐊᒻᒪ ᓄᓇᖅᑲᑎᕗᑦ ᓴᐳᑎᓇᓱᒃᑎᓪᓗᒋᑦ.

ᐋᓐᓂᐊᖃᕐᓇᙱᑦᑐᓕᕆᔨᑦ ᐊᑐᖁᔭᖏᑦ ᒪᓕᒡᓗᒋᑦ, ᑲᐱᔭᐅᓗᑕ, ᐱᔭᕆᐊᖃᓪᓚᕆᙱᑦᑐᑦ ᐊᐅᓪᓚᑲᑕᙱᓪᓗᑎᒃ, ᐊᒻᒪᓗ ᒪᑐᐊᖅᓯᒪᖃᑦᑕᕐᓗᑕ−ᐅᓗᕆᐊᓇᖅᑐᒦᑎᑦᑎᓗᐊᕈᓐᓃᕈᓐᓇᖅᐳᒍᑦ ᓄᕙᕐᔪᐊᕐᓇᖅ-19−ᒥ, ᐊᐃᑦᑐᕐᓗᐃᖃᑦᑕᐅᑎᔪᑦ ᒥᒃᖠᒋᐊᖅᑎᓪᓗᒋᑦ ᓄᓇᑦᑎᓐᓂ, ᐊᒻᒪᓗ ᒥᒃᖠᒋᐊᖅᑎᑦᑎᖕᒥᓗᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᖅᑕᐅᖁᔭᖏᓐᓂᒃ.

ᖁᔭᓕᑦᑎᐊᖅᐸᒃᑲ ᐋᓐᓂᐊᖅᑐᓕᕆᔨᑦ ᐃᖅᑲᓇᐃᔭᖅᑎᖏᑦ ᐱᓇᔪᑦᑎᐊᓚᐅᖅᑐᑦ ᐅᓄᖅᑐᒻᒪᕆᐊᓗᐃᓪᓗ ᓄᓇᕗᒻᒥᐅᑦ ᐱᓕᕆᖃᑎᒌᓚᐅᖅᑐᑦ ᐱᓇᓱᐊᕈᓰᖕᓂ ᒪᕐᕉᖕᓂᒃ ᐊᓂᒍᖅᑐᓂᒃ. ᐊᔪᕐᓇᖅᑐᖅᓯᐅᕋᓗᐊᖅᑎᓪᓗᑕ, ᑐᕌᑦᑎᐊᖅᐳᒍᑦ. ᐊᑏ, ᑲᔪᓰᓐᓇᖅᑕ.

ᖁᔭᓐᓇᒦᒃ.

 

ᒥᓂᔅᑕᐅᑉ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᑐᓴᒐᒃᓴᖏᑦ:

ᐅᓪᓛᒃᑯᑦ,

ᖁᔭᓕᕗᖓ ᐱᕕᖃᖅᑎᑕᐅᒐᒪ ᐅᓪᓛᖅ ᐃᓕᔅᓯᓐᓄᑦ ᐅᖃᓪᓚᒍᓐᓇᖅᓇᖅᖢᖓ.

ᑐᑭᓯᔪᖓ ᐃᓚᒋᔭᐅᔪᑦ, ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑎᐅᔪᑦ, ᐊᒻᒪ ᓄᓇᖅᑲᑎᕗᑦ ᐃᓱᒫᓘᑎᖃᕐᓂᖏᓐᓂ ᐃᓕᓐᓂᐊᖅᑎᕗᑦ ᖃᓄᐃᙱᑦᑎᐊᖏᓐᓇᖁᓪᓗᒋᑦ ᐊᑦᑕᕐᓇᖅᑐᒦᖁᙱᖦᖢᒋᓪᓗ ᐅᒃᑯᐃᖅᐸᓪᓕᐊᓂᐊᓕᖅᑎᓪᓗᒋᑦ ᐃᓕᓐᓂᐊᕐᕖᑦ ᐊᒻᒪ ᐸᐃᕆᕝᕖᑦ. ᐃᓱᒫᓘᑎᖃᕆᕗᖓ, ᐊᒻᒪ ᓄᕙᕐᔪᐊᕐᓇᖅ ᐱᒋᐊᖅᓯᒪᓕᖅᑎᓪᓗᒍ, ᐱᓕᕆᕝᕕᒋᔭᒃᑲ ᐃᓕᓐᓂᐊᖅᑎᑦᑎᓐᓂ ᖃᓄᐃᙱᖁᔨᓪᓗᑎᒃ ᐊᑦᑕᕐᓇᖅᑕᐃᓕᒪᖁᓪᓗᒋᓪᓗ ᓯᕗᓪᓕᐅᔾᔨᔪᒪᕗᑦ.

ᐊᔾᔨᒌᒃᑎᑦᑎᔭᕆᐊᖃᖅᐳᒍᑦ ᓄᕙᕐᔪᐊᕐᓇᖅ-19−ᒥ ᓯᐊᒻᒪᒃᐸᓪᓕᐊᑐᐃᓐᓇᕆᐊᓕᖕᒥᒃ ᐅᓗᕆᐊᓇᕐᓂᖓᓂᓪᓗ ᐃᓕᓐᓂᐊᕐᕕᑦ ᒪᑐᔭᐅᓯᒪᔪᑦ ᐅᖓᕙᕆᐊᖅᑕᐅᒃᐸᑦ. ᖃᐅᔨᒪᑎᓪᓗᑕ ᒫᓐᓇ ᓄᕙᕐᔪᐊᕐᓇᖅ-19 ᐃᓂᖓᓂ ᐃᓱᒫᓘᑎᒋᔭᐅᓗᐊᕐᒪᑦ, ᐱᓕᕆᕝᕕᒋᔭᒃᑲ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖕᒥᒃ ᐱᓕᕆᖃᑎᖃᖅᐳᑦ ᐃᓕᓐᓂᐊᖅᑏᑦ ᐊᒻᒪ ᐃᖅᑲᓇᐃᔭᖅᑏᑦ ᐅᑎᕈᓐᓇᖁᓪᓗᒋᑦ ᐃᓕᓐᓂᐊᕐᕕᖕᒧᑦ ᐊᑦᑕᕐᓇᙱᑦᑐᒃᑯᑦ, ᓈᒻᒪᒃᓯᒃᐸᑦ.

ᑭᓯᐊᓂ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ ᑎᓕᓯᒃᐸᑦ, ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑎᑦ ᐅᑎᕐᕕᒃᓴᖃᕐᓂᐊᓕᖅᐳᑦ ᔮᓄᐊᕆ 17−ᒥ ᖃᕆᓴᐅᔭᒃᑯᑦ ᐃᓕᓴᐃᔾᔪᑎᒃᓴᓂᒃ ᐋᖅᑭᐃᓱᖁᓪᓗᒋᑦ ᐱᕙᒌᔭᕐᓗᑎᒡᓗ ᐃᓕᓐᓂᐊᖅᑎᑦ ᐅᑎᕐᕕᒃᓴᖓᓄᑦ ᔮᓄᐊᕆ 24−ᖑᓕᖅᐸᑦ. ᖃᕆᓴᐅᔭᒃᑯᑦ ᐃᓕᓐᓂᐊᖅᑎᑦᑎᒐᓗᐊᖅᐸᑕ  Edsby−ᑯᑦ, ᐅᕝᕙᓘᓐᓃᑦ ᐊᖏᕐᕋᐅᔾᔨᓗᑎᒃ ᐃᓕᓐᓂᐊᕈᑎᒃᓴᓂᒃ, ᖃᕆᓴᐅᔭᒃᑯᑦ ᐃᓕᓐᓂᐊᖅᑎᑦᑎᓛᖅᑐᑦ ᔮᓄᐊᕆ 17−ᒥ ᖃᐅᔨᓴᖅᑕᐅᓛᖅᐳᖅ, ᖁᕝᕙᕆᐊᕈᑎᖃᖅᐸᓪᓕᐊᓂᐊᖅᐳᓪᓗ ᑭᖑᓪᓕᖅᐹᒥ ᐊᔪᙱᓐᓂᖓᓄᑦ.

ᐳᐃᒍᖅᑕᐃᓕᔭᕆᐊᖃᓪᓚᕆᒃᐳᒍᑦ ᐊᑐᖅᑕᕗᑦ ᐊᓯᔾᔨᕈᓐᓇᕐᒪᑦ ᖃᖓᑐᐃᓐᓇᑦᑎᐊᖅ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖕᒧᑦ ᑎᓕᐅᕈᑎᖏᑦ ᒪᓕᒡᓗᒋᑦ.

ᓄᕙᕐᔪᐊᕐᓇᖅ-19−ᑖᖅᐸᓪᓕᐊᔪᑦ ᐅᓄᖅᓯᕙᓪᓕᐊᓗᐊᕐᓂᖏᓐᓄᑦ ᓄᓇᕗᒻᒥ, ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ ᐊᔪᕆᖅᓲᔾᔨᓯᒪᒃᑲᓐᓂᖅᑐᓂᒃ ᑐᓂᓯᓂᐊᖅᐳᑎᑦ ᐱᓇᓱᐊᕈᓯᐅᓂᐊᖅᑐᒥᒃ ᖃᖓᓪᓚᑦᑖᖅ ᐃᓕᓐᓂᐊᕐᕖᑦ ᐅᒃᑯᐃᓛᕐᒪᖔᑕ ᓄᓇᓕᖕᓂ.

ᐊᑐᖅᑕᐅᕗᑦ ᐊᓯᔾᔨᖅᐸᓪᓕᐊᑲᑕᒃᑎᓪᓗᒋᑦ, ᑖᒃᑯᓂᖓ ᐊᒃᓱᕈᕐᓇᖅᑐᓂᒃ ᑲᒪᒋᔭᖃᓚᐅᖅᓯᒪᔪᒍᑦ. ᖃᐅᔨᒪᔪᒍᑦ ᖃᓄᖅ ᐃᓕᓐᓂᐊᖃᑎᒌᒍᓐᓇᕐᓂᑦᑎᓐᓂ, ᓇᓗᓇᐃᖅᓯᓚᐅᖅᐳᒍᓪᓗ ᖃᓄᖅ ᐅᕙᑦᑎᓐᓂ ᑲᒪᒋᖃᑦᑕᐅᑎᔪᓐᓇᕐᓂᑦᑎᓐᓂ.

ᐃᓕᓐᓂᐊᕐᕖᑦ ᓱᓕ ᖃᐅᔨᒪᔾᔪᑎᖃᕐᓂᐊᖅᐳᑦ ᑎᑎᕋᖅᓯᒪᔪᓂᑦ ᑐᓂᔭᐅᓚᐅᖅᑐᓂᑦ ᐃᓕᓐᓂᐊᕐᓇᖅ ᐊᕐᕌᒍ ᐱᒋᐊᓕᓵᖅᑎᓪᓗᒍ, ᐊᒻᒪᓗ ᓇᖕᒥᓂᖅ ᐊᑐᖅᓯᒪᔭᖏᓐᓂᒃ ᐃᓕᓐᓂᐊᕐᕖᑦ ᒪᑐᔭᐅᓯᒪᓚᐅᖅᑎᓪᓗᒋᑦ. 

ᒫᓐᓇ ᓄᕙᕐᔪᐊᕐᓇᖅ-19 ᖃᓄᐃᓕᖓᓂᖓ ᒪᓕᒃᖢᒍ, ᖄᒃᑲᓐᓂᐊᒍᑦ ᐊᕝᐋᓐᓂᐊᖅᑐᓕᕆᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐊᑐᐊᒐᖏᓐᓂᒃ ᑐᓂᐅᖅᑲᐅᑕᐅᓯᒪᔪᖃᖅᐳᖅ ᐃᓕᓐᓂᐊᕐᕕᖕᓄᑦ. ᐃᓕᓐᓂᐊᕐᕖᑦᑕᐅᖅ ᐱᑎᑕᐅᓚᐅᕐᒥᔪᑦ ᐅᓄᖅᓱᒻᒪᕆᐊᓗᖕᓂᑦ ᐃᒋᑦᑕᕆᐊᓕᖕᓂ ᒪᑐᐊᕐᓂᒃ ᓄᑕᖅᑲᓄᑦ ᐃᓐᓇᕐᓄᓪᓗ. 

ᐃᓕᓐᓂᐊᕐᕕᓕᒫᑦ ᐱᓕᕆᔾᔪᓯᕆᓂᐊᖅᑕᖏᓐᓂᒃ ᐋᖅᑭᒃᓯᓯᒪᓕᖅᐳᑦ ᐃᓕᓐᓂᐊᕈᑎᒃᓴᓂᒃ ᐊᒻᒪᓗ/ᐅᕝᕙᓗᓃᑦ ᖃᕆᓴᐅᔭᕋᓛᓂᒃ ᐊᑦᑕᕐᓇᙱᑦᑐᒃᑯᑦ ᐊᒡᔭᖅᑐᐃᖁᓪᓗᒋᑦ ᖃᕆᓴᐅᔭᒃᑯᑦ ᐃᓕᓐᓂᐊᕈᑎᒃᓴᓂᒃ. ᖃᕆᓴᐅᔭᕋᓛᑦ ᐱᓕᕆᕝᕕᑦᑎᓐᓂ ᓂᐅᕕᖅᑕᐅᓚᐅᖅᑐᑦ ᐊᕐᕌᓂ ᓱᓕ ᐊᖓᔪᒃᖡᑦ ᐃᓕᓐᓂᐊᕐᕕᖓᓃᑉᐳᑦ ᐊᒡᔭᖅᑐᖅᑕᐅᑐᐃᓐᓇᕆᐊᖃᓕᖅᖢᑎᒡᓗ. ᐱᓕᕆᔨᒃᑲ ᐅᔾᔨᖅᓱᖅᖢᑎᒃ ᐱᓕᕆᑲᑕᒃᐳᑦ ᖃᕆᓴᐅᔭᕋᓛᑦ ᐊᑐᕈᓐᓇᖅᓯᑎᑕᐅᑦᑎᐊᕋᓗᐊᕐᒪᖔᑦ ᐊᒡᔭᖅᑐᖅᑕᐅᑐᐃᓐᓇᕆᐊᖃᓕᕐᓗᑎᒡᓗ. ᓄᓇᓕᓕᒫᑦ ᓄᓇᕗᒻᒥ ᖃᕆᓴᐅᔭᕋᓛᓂᒃ ᐱᑎᑕᐅᓚᐅᖅᐳᑦ ᖃᕆᓴᐅᔭᒃᑯᑦ ᐃᓕᓐᓂᐊᕐᓂᐊᖅᑐᓂᒃ ᐃᑲᔪᖅᑐᐃᓪᓗᑎᒃ, ᐃᓕᓐᓂᐊᕐᕖᓪᓗ ᐃᓱᒪᖅᓱᖅᑎᑕᐅᓚᐅᖅᐳᑦ ᖃᕆᓴᐅᔭᕋᓛᓂᒃ ᑐᓂᐅᖅᑲᐃᔪᒪᒍᑎᒃ ᐊᑑᑎᖃᕐᓂᖅᐹᖑᓗᑎᒃ.

ᔭᓄᐊᕆᒥ ᐱᔭᕇᕈᓯᐊᕐᒧᑦ ᖃᐅᔨᓴᕈᑎᖏᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᓄᖅᑲᖅᑎᑕᐅᓯᒪᓕᖅᑐᑦ ᓄᕙᒡᔪᐊᕐᓇᖅ-19 ᓴᖅᑭᑉᐸᓪᓕᐊᓂᖓᓄᑦ ᓄᓇᕘᓕᒫᒥ. ᐃᓱᒪᓕᐅᕈᑕᐅᔪᖅ ᐊᑐᖅᑕᐅᓂᐊᖅᑐᑐᐊᖅ ᔭᓄᐊᕆ 2022−ᒥ ᖃᐅᔨᓴᕈᑎᑐᐊᓄᑦ. ᐃᓱᒪᓕᐅᕈᑕᐅᔪᑦ ᐊᐃᕆᓕᒥ ᐊᒻᒪ ᔫᓂᒥ ᐱᔭᕇᕈᓯᐊᓄᑦ ᖃᐅᔨᓴᕈᑎᑦ ᐋᖅᑭᒃᑕᐅᓛᖅᑐᑦ ᖃᑯᒍᒃᑲᓐᓂᖅ.

ᐃᓕᓐᓂᐊᖅᑎᑦ ᑎᑎᕋᕆᐊᖃᓚᐅᖅᑐᑦ ᐱᔭᕇᕈᓯᐊᖏᑦᑕ ᖃᐅᔨᓴᕈᑎᓂᒃ ᔭᓄᐊᕆ 2022−ᒥ ᐱᑎᑕᐅᖔᓛᖅᑐᑦ ᐃᓱᒪᖅᓲᑎᒃᓴᒥᓂᒃ ᐃᓕᓐᓂᐊᕐᕕᖕᒥᓪᓗ ᓇᓗᓇᐃᒃᑯᑕᖏᑦ ᐋᖅᑭᒃᑕᐅᓯᒪᖃᑦᑕᕐᓂᐊᖅᖢᑎᒃ 100%−ᒧᑦ ᐊᑕᖏᖅᑕᐅᓗᑎᒃ ᓇᓗᓇᐃᒃᑯᑕᖅᑖᕆᖃᑦᑕᕐᓂᐊᖅᑕᖏᑦ.  ᐃᓕᓐᓂᐊᖅᑎᑦ ᖃᑕᙳᑎᖏᓪᓗ ᐃᓕᓐᓂᐊᕐᕕᖕᒧᑦ ᖃᐅᔨᒋᐊᕆᐊᓖᑦ ᐊᐱᖅᑯᑎᒃᓴᖃᕈᑎᒃ.

ᐱᓇᓱᐊᕈᓯᐅᓚᐅᖅᑐᒥᑦ, ᓯᕗᓕᐅᖅᑎ ᐊᕿᐊᕈᖅ ᐅᕙᖓᓗ ᐸᐃᕆᕝᕕᖕᓂ ᐅᒃᑯᐃᒃᑲᓐᓂᖁᔨᓕᓚᐅᕋᑦᑕ ᓴᓇᔭᕆᐊᖃᓪᓚᕆᒃᑐᑦ ᐃᑲᔪᖅᑕᐅᖁᓪᓗᒋᑦ ᐸᐃᕆᔨᖃᕆᐊᓖᑦ. ᑕᐃᒃᑯᐊ ᖁᔭᓐᓇᒦᕈᒪᕙᒃᑲ ᐱᓕᕆᕝᕕᑦᑎᓐᓄᑦ ᖃᐅᔨᒋᐊᓚᐅᖅᑐᑦ ᐅᒃᑯᐃᒃᑲᓐᓂᖅᖢᑎᒡᓗ ᓄᑕᖅᑲᓂᓪᓗ ᐸᐃᕆᔪᓐᓇᖅᓯᓪᓗᑎᒃ.

ᑐᑭᓯᐅᒪᔪᒍᑦ ᐃᓚᖓᓂ ᑲᑉᐱᐊᓇᕐᒪᑦ ᐃᓱᒫᓗᖕᓇᖅᖢᓂᓗ ᐃᖅᑲᓇᐃᔭᖅᑎᑦ ᓄᑕᖅᑲᓪᓗ ᐊᑦᑕᕐᓇᙱᑦᑐᒦᖁᓪᓗᒋᑦ ᐸᐃᕆᕝᕖᑦ ᐅᒃᑯᐃᒃᑲᓐᓂᕐᓂᖅᐸᑕ. ᐱᓕᕆᕝᕕᒋᔭᒃᑲ ᐸᐃᕆᕝᕕᖕᓂ ᐱᓕᕆᖃᑎᖃᕐᓂᐊᖅᐳᑦ ᐃᑲᔪᖅᑐᐃᔾᔪᑎᓂᒃ ᐊᑐᐃᓐᓇᐅᑎᑦᑎᓗᑎᒃ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐊᑐᐃᓐᓇᐅᓗᑎᒡᓗ ᐊᐱᖅᑯᑎᒃᓴᖃᖅᑐᖃᖅᐸᑦ ᑭᐅᔪᓐᓇᕐᓗᑎᒃ.

ᐃᓕᓴᕆᔪᒪᓪᓗᒋᑦ ᐸᐃᕆᕝᕖᑦ ᐅᒃᑯᐃᒃᑲᓐᓂᕐᓂᐊᓕᖅᑐᑦ, ᐱᓕᕆᕝᕕᒋᔭᒃᑲ ᖃᐅᔨᓇᓱᒃᐳᑦ ᑮᓇᐅᔭᓂᒃ ᐃᑲᔪᖅᓱᐃᔪᓐᓇᕐᒪᖔᑦ ᐸᐃᕆᕝᕕᖕᓄᑦ ᐃᖅᑲᓇᐃᔭᖅᑎᖏᓐᓄᓪᓗ.  ᖃᐅᔨᒪᔪᒍᑦ ᐃᑲᔪᖅᑐᐃᙱᒃᑯᔅᓯ, ᐱᔨᑦᑎᕋᕆᐊᖃᓪᓚᕆᒃᑐᑦ ᐅᓗᕆᐊᓇᖅᑐᒦᓪᓚᕆᖕᓂᐊᕐᒪᑕ.

ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᑎᓄᑦ, ᖁᕕᐊᓱᒃᐳᖓ ᑐᓴᖅᑎᑦᑎᔪᓐᓇᕋᒪ ᓄᕙᕐᔪᐊᕐᓇᖅ-19−ᒧᑦ ᑭᖑᕙᕆᐊᕈᑕᐅᓚᐅᙱᒻᒪᑦ ᑮ/ᓇᐅᔭᓂᒃ ᐃᑲᔫᓯᐊᖅᐸᒃᑐᓄᑦ ᐃᓕᓐᓂᐊᖅᑎᑦ ᐊᒻᒪᓗ FANS−ᑯᓐᓂ ᔮᓄᐊᕆᒥ ᐊᑭᓕᖅᑕᐅᓂᐊᓚᐅᖅᑐᑦ ᑐᓂᔭᐅᓯᒪᓕᖅᖢᑎᒃ ᐋᖅᑭᒃᑕᐅᓯᒪᔪᖅ ᒪᓕᒃᖢᒍ.

ᑭᐅᔭᐅᓇᓵᖃᑦᑕᑐᐃᓐᓇᕆᐊᖃᕐᓂᐊᖅᐳᓯ ᑎᑎᕋᕐᕕᖕᒥ ᓄᕙᒡᔪᐊᕐᓇᖅ-19−ᒧᑦ ᖃᓂᒪᔪᖃᐅᕐᓂᖓᓄᑦ ᐊᕐᕕᐊᓂ, ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᑦ ᐅᖓᕙᕆᐊᖅᓯᒪᙱᑦᑐᑦ. ᑭᓇᑐᐃᓐᓇᖅ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᑎ ᐊᐱᖅᑯᑎᒃᓴᖃᖅᑐᖅ ᐊᑭᓕᖅᑕᐅᔾᔪᑎᖓᑕ ᒥᒃᓵᓄᑦ FANS−ᑯᑦ ᑎᑎᕋᕐᕕᖓᓄᑦ ᐊᐱᕆᓪᓗᐊᖅᐳᖅ ᐅᕙᓂ FANS@gov.nu.ca.

ᑭᖑᓪᓕᖅᐹᒥ, ᑕᒪᔅᓯᑦᑎᐊᖅ ᐊᐱᕆᔪᒪᕙᔅᓯ, ᖃᓄᐃᓕᐅᕆᐊᖃᕈᔅᓯ ᐃᑲᔪᖅᑐᐃᖁᓪᓗᓯ ᐃᓕᓐᓂᐊᖅᑎᔅᓯᓐᓂ ᐊᒻᒪ ᐃᓕᓐᓂᐊᕐᕕᔅᓯᓐᓂ. ᓄᓇᕗᒻᒥᐅᓕᒫᑦ ᐃᑲᔪᖅᑎᒌᒋᐊᖃᖅᐳᑦ ᐃᓕᓐᓂᐊᕐᕕᖕᒧᑦ ᐅᑎᕐᓂᐊᓕᕈᑎᒃ ᐊᑦᑕᕐᓇᙱᑦᑐᒃᑯᑦ ᑲᐱᔭᐅᓗᑎᒃ, ᖃᓂᒪᓕᕈᑎᒃ ᐊᖏᕐᕋᖅᓯᒪᐃᓐᓇᕐᓗᑎᒃ, ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᖅᑕᐅᖁᔭᖏᓐᓂᒃ ᒪᓕᒡᓗᑎᒃ.

ᖁᐊᓇ.

 

 

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᒃᑯᑦ ᐱᓇᔪᒃᑕᖏᓐᓄᑦ ᓄᓇᕗᒥᐅᓂᒃ ᓴᐳᔾᔨᓯᒪᓇᓱᒃᖢᑎᒃ ᓄᕙᒃᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᔨᑦᑎᕋᖅᑎᖏᑦ

ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ:
https://www.gov.nu.ca/health/information/covid-19-novel-coronavirus

ᓄᑖᖑᓛᓂᒃ ᑐᓴᒐᒃᓴᓂᒃ ᐱᔪᒪᒍᕕᑦ ᒫᓐᓇ ᑭᒃᑯᑐᐃᓐᓇᓄᑦ ᖃᓄᐃᙱᑦᑐᓄᑦ ᐊᑐᖅᑕᐅᖁᔭᐅᔪᓂᒃ, ᐅᕗᙵᕐᓗᑎᑦ: 
https://www.gov.nu.ca/health/information/nunavuts-path

ᑐᑭᓯᒋᐊᕈᒪᒍᕕᑦ ᑲᐱᔭᐅᓐᓇᐅᓛᖅᑐᓂᑦ ᐅᕗᙵᕐᓗᑎᑦ:
https://gov.nu.ca/health/information/covid-19-vaccination

 

ᓄᕙᒡᔪᐊᕐᓇᖅ−19−ᖃᖅᑐᑦ ᖃᓄᐃᓕᖓᓂᖏᑦ: ᔭᓄᐊᕆ 11, 2022

ᑲᑎᖦᖢᒋᑦ ᖃᐅᔨᓴᖅᑕᐅᓯᒪᔪᑦ	ᑲᑎᖦᖢᒋᑦ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂᒃ	ᑲᑎᖦᖢᒋᑦ ᐆᒪᔪᒥᒃ ᐱᖃᕐᓂᖏᑦ	ᑲᑎᖦᖢᒋᑦ ᐊᓂᒍᐃᓯᒪᔪᑦ	ᐃᓅᔪᓐᓃᖅᑐᑦ	ᑲᑦᑎᓪᓗᒋᑦ ᐃᓄᐃᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᓕᖅᑐᑦ ᓯᕗᓪᓕᖅᐹᖓᓐᓂᑦ ᓄᓇᕗᒻᒥ	ᑲᑦᑎᓪᓗᒋᑦ ᐃᓄᐃᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᓕᖅᑐᑦ ᒪᕐᕉᓐᓂᒃ ᓄᓇᕗᒻᒥ
27,061	1031	192	835	4	31,227	24,998

ᓄᕙᒡᔪᐊᕐᓇᖅ-19−ᒧᑦ ᓄᓇᓕᖕᓂ ᖃᓂᒻᒪᒃᑐᑦ ᑭᒡᓕᓯᓂᐊᖅᑕᐅᓯᒪᔪᑦ: ᔭᓄᐊᕆ 11, 2022

ᓄᓇᓕᒃ	ᓄᕙᒡᔪᐊᕐᓇᖅ-19 ᖃᓄᐃᓕᖓᓂᖓ	ᖃᖓᒃᑯᑦ	ᑭᒃᑯᑐᐃᓐᓇᐃᑦ ᓇᐃᓴᖅᑕᐅᓯᒪᔪᑦ ᐃᑉᐸᒃᓴᖅ (ᑲᑎᖦᖢᒋᑦ)	ᑭᒃᑯᑐᐃᓐᓇᐃᑦ ᓇᐃᓴᖅᑕᐅᓯᒪᔪᑦ ᐅᓪᓗᒥ (ᑲᑎᖦᖢᒋᑦ)	ᐊᓯᔾᔨᕐᑐᑦ ᐃᑉᐸᒃᓴᕐᓂᑦ (ᐱᖃᖅᑐᑦ)	ᑲᑎᖦᖢᒋᑦ ᖃᓄᐃᑦᑐᓐᓃᖅᑐᑦ	ᐊᓯᔾᔨᖅᑐᑦ ᐃᑉᐸᒃᓴᕐᓂᑦ (ᐱᖃᖅᑐᑦ)	ᑲᑎᖦᖢᒋᑦ ᐱᖃᕐᓂᖏᑦ
ᓴᓪᓕᖅ	ᑲᔫᓰᓐᓇᖅᑐᖅ	ᑕᐃᒪᙵᓂ 9 ᔭᓄᐊᕆ 2022−ᒥ	6	8	2	0	0	8
ᑎᑭᕋᕐᔪᐊᖅ	ᑲᔫᓰᓐᓇᖅᑐᖅ	ᑕᐃᒪᙵᓂ 7 ᔭᓄᐊᕆ 2022−ᒥ	7	7	0	0	0	7
ᓴᓂᑭᓗᐊᖅ	ᑲᔫᓰᓐᓇᖅᑐᖅ	ᑕᐃᒪᙵᓂ 4 ᔭᓄᐊᕆ 2022−ᒥ	1	1	0	0	0	1
ᑭᙵᐃᑦ	ᑲᔫᓰᓐᓇᖅᑐᖅ	ᑕᐃᒪᙵᓂ 1 ᔭᓄᐊᕆ 2022−ᒥ	23	23	0	1	0	22
ᒥᑦᑎᒪᑕᓕᒃ	ᑲᔫᓰᓐᓇᖅᑐᖅ	ᑕᐃᒪᙵᓂ 1 ᔭᓄᐊᕆ 2022−ᒥ	1	1	0	0	0	1
ᐃᒡᓗᓕᒑᕐᔪᒃ	ᑲᔫᓰᓐᓇᖅᑐᖅ	ᑕᐃᒪᙵᓂ 1 ᔭᓄᐊᕆ 2022−ᒥ	4	4	0	0	0	4
ᐃᖃᓗᒃᑑᑦᑎᐊᖅ	ᑲᔫᓰᓐᓇᖅᑐᖅ	ᑕᐃᒪᙵᓂ 30-ᑎᓯᐱᕆ	18	18	0	2	1	16
ᐃᒡᓗᓕᒃ	ᑲᔫᓰᓐᓇᖅᑐᖅ	ᑕᐃᒪᙵᓂ 29-ᑎᓯᐱᕆ	18	18	0	16	0	2
ᖃᒪᓂ'ᑐᐊᖅ	ᑲᔫᓰᓐᓇᖅᑐᖅ	ᑕᐃᒪᙵᓂ 29-ᑎᓯᐱᕆ	1	1	0	1	0	0
ᐊᕐᕕᐊᑦ	ᑲᔫᓰᓐᓇᖅᑐᖅ	ᑕᐃᒪᙵᓂ 29-ᑎᓯᐱᕆ	64	64	0	43	7	21
ᓴᓂᕋᔭᒃ	ᑲᔫᓰᓐᓇᖅᑐᖅ	ᑕᐃᒪᙵᓂ 29-ᑎᓯᐱᕆ	17	17	0	9	0	8
ᕿᑭᖅᑕᕐᔪᐊᖅ	ᑲᔫᓰᓐᓇᖅᑐᖅ	ᑕᐃᒪᙵᓂ 28-ᑎᓯᐱᕆ	7	7	0	3	0	4
ᑲᖏᖅᖠᓂᖅ	ᑲᔫᓰᓐᓇᖅᑐᖅ	ᑕᐃᒪᙵᓂ 23-ᑎᓯᐱᕆ	64	37	3	32	11	35
ᐸᓐᓂᖅᑑᖅ	ᑲᔫᓰᓐᓇᖅᑐᖅ	ᑕᐃᒪᙵᓂ 23-ᑎᓯᐱᕆ	26	26	0	18	0	8
ᐃᖃᓗᐃᑦ	ᑲᔫᓰᓐᓇᖅᑐᖅ	ᑕᐃᒪᙵᓂ 04-ᓄᕕᐱᕆ	95	95	0	40	7	55
ᑲᑎᖦᖢᒋᑦ			352	357	5	165	23	192

ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᔪᑦ ᖃᓄᐃᓕᖓᓂᖏᑦ: ᔭᓄᐊᕆ 10, 2022

ᑐᑭᓯᒋᐊᒐᒃᓴᑦ/ᑭᒡᓕᒋᑎᑕᐅᔪᑦ:

ᐅᑯᐊ ᑐᑭᓯᒋᐊᒐᒃᓴᑦ ᑕᑯᒃᓴᐅᑎᑦᑎᕗᑦ ᓈᓴᐅᑎᓂᒃ ᓄᓇᖅᑲᑎᒌᑦ ᑲᐱᔭᐅᔪᑦ ᓇᓗᓇᐃᖅᑕᐅᕙᓪᓕᐊᔪᓂᒃ ᐱᒋᐊᖅᖢᒍ ᔭᓄᐊᕆ 11, 2022. ᐳᓴᓐᑎᖓ ᐋᓐᓂᐊᓕᕇᒃᑯᑎᓂ ᐊᐅᓚᑕᐅᓂᕆᔭᖓ ᐃᒪᐃᑉᐳᖅ ᐋᓐᓂᐊᓕᕇᒃᑯᑎᓂ ᐊᐅᓚᑕᐅᓂᕆᔭᖓ ᐊᕕᒃᓯᒪᓪᓗᑎᒃ ᓄᓇᕗᒥᐅᑦ ᐃᓄᒋᐊᓐᓂᖏᑕ ᓇᓚᐅᑦᑖᖅᑕᐅᓯᒪᓂᖏᑦ 18-ᓂ ᐅᖓᑖᓂᓪᓗ ᐅᑭᐅᓖᑦ.

ᓄᓇᕘᓕᒫᒥ ᑲᑎᖦᖢᒋᑦ ᑲᐱᔭᐅᔪᑦ ᑕᒻᒪᖅᓯᒪᙱᖦᖢᑎᒃ ᓇᐃᒡᓕᒋᐊᖅᓯᒪᔪᑦ. ᓄᓇᓖᑦ ᖃᕆᑕᐅᔭᒃᑯᑦ ᑎᑎᕋᖅᓯᒪᔪᑦ ᕿᒥᕐᕈᔭᐅᕙᓪᓕᐊᑐᐃᓐᓇᖅᐳᑦ ᖃᐅᔨᒪᔪᒪᓪᓗᑎᒃ ᓈᒻᒪᒃᑲᓗᐊᕐᒪᖔᑕ ᓇᓗᓇᐃᖅᓯᔾᔪᑎᑦ. ᓄᓇᓕᖕᓂ ᑲᑎᖦᖢᒋᑦ ᐋᖅᑭᒋᐊᖅᑕᐅᖃᑦᑕᕐᓂᐊᖅᐳᑦ ᐱᔭᕆᐊᖃᕌᖓᑦ.  ᑐᕌᖓᑐᐃᓐᓇᕆᐊᖃᖅᑐᖅ ᐊᓯᔾᔨᒐᓚᒋᐊᖃᕋᔭᖅᑐᓄᑦ ᐳᓴᓐᑎᖏᑦ ᓄᓇᓖᑦ ᒪᓕᒡᓗᒋᑦ.

ᑲᐴᑎᑦ ᓇᓗᓇᐃᖅᑕᐅᖃᑦᑕᖅᐳᑦ ᓄᓇᓕᖕᓄᑦ ᐊᐅᓚᑦᑎᕝᕕᒋᔭᐅᔪᓄᑦ.

ᑲᑎᖦᖢᒋᑦ ᑲᐱᔭᐅᔪᑦ ᐅᑯᐊᖑᓂᐊᖅᐳᑦ ᓄᓇᖃᖅᑐᑦ ᓄᓇᖃᙱᑦᑑᒐᓗᐊᓪᓗ, ᐃᓚᓕᐅᔾᔭᐅᓪᓗᑎᒃ ᐅᓐᓄᐊᖅᓯᐅᑕᐅᓕᖅᐸᒃᑐᑦ ᐃᖅᑲᓇᐃᔭᖅᑏᑦ.

ᖃᔅᓯᑲᓪᓚᑦ ᓄᓇᓖᑦ ᐃᓄᒃᑕᖃᖅᑐᑦ ᑲᐱᔭᐅᓂᑯᓂᒃ ᒪᕐᕉᖕᓂ ᐊᔾᔨᒌᙱᑦᑑᖕᓂ ᓄᓇᓕᖕᓂ, ᐅᕝᕙᓘᓐᓃᑦ ᓄᓇᒋᙱᑕᒥᓂᒃ ᑲᐱᔭᐅᖃᑕᐅᓯᒪᔪᖃᖅᑐᖅ.

ᐃᓄᖕᒥᒃ ᑲᐱᔭᐅᓯᒪᔪᖃᑐᐃᓐᓇᕆᐊᖃᖅᐳᖅ ᓯᕗᓪᓕᕐᒥᒃ ᐊᒻᒪ/ᐅᕝᕙᓘᓐᓃᑦ ᐊᐃᑉᐸᖓᓂᒃ ᓄᓇᒋᙱᑕᒥᓂᒃ ᑲᐱᔭᐅᔪᓂᒃ.

ᑖᓐᓇ ᐱᔾᔪᑎᖃᙱᑦᑐᖅ ᐃᓄᖕᓄᑦ ᑲᐱᔭᐅᓚᐅᖅᑐᓄᑦ ᐃᓚᐃᓐᓇᖓᓂᒃ ᑕᒪᐃᓐᓂᒡᓘᓐᓃᑦ ᓄᓇᕘᑉ ᓯᓚᑖᓂ.

ᖁᑦᑎᒃᐸᑦ ᐳᓴᓐᑎᖓ ᐊᑕᐅᓯᕐᒥᒃ ᓄᓇᓕᖕᓂ ᓇᓕᒧᙱᒻᒪᑦ ᐃᓄᒐᓴᒡᔪᐊᓄᑦ ᑲᐳᖅᓴᖅᑕᐅᔪᓄᑦ.  ᐋᖅᑭᒃᑕᐅᔪᖃᖅᓯᒪᙱᑦᑐᖅ ᓇᓗᓇᐃᖅᑕᐅᓯᒪᔪᖃᙱᑦᑐᕐᓘᓐᓃᑦ ᐳᓴᓐᑎᖓᓐᓂᒃ ᖃᓄᖅ ᐃᓄᒐᓴᒡᔪᐊᑦ ᑲᐳᖅᓴᖅᑕᐅᔪᓂᒃ ᓄᕙᕐᔪᐊᕐᓇᖅ-19−ᒧᑦ. ᖃᓄᒥᐊᖅ ᐃᓄᒐᓴᒡᔪᐊᑦ ᑲᐳᖅᓴᖅᑕᐅᒐᓗᐊᖅᐸᑕ ᒫᓐᓇ ᑲᐴᑎᓄᑦ ᐊᖏᖅᑕᐅᓯᒪᔪᓄᑦ (ᓲᕐᓗ ᓄᑕᖅᑲᑦ 12 ᑐᖔᓂ ᐅᑭᐅᖃᑐᐊᖅᐸᑕ ᑲᐱᔭᐅᔪᓐᓇᙱᑦᑐᑦ).

ᓇᑭᙶᕐᓂᖏᑦ:

ᑲᓇᑕᒥ ᑭᒡᓕᓯᓂᐊᖅᑎᒃᑯᑦ, ᓄᓇᓖᑦ ᐃᓄᖏᑦᑕ ᖃᓄᐃᓕᕙᓪᓕᐊᓂᖏᓐᓄᑦ ᐱᓕᕆᕝᕕᒃ, ᑎᑎᖅᑲᙳᖅᑎᑕᐅᔪᒃᓴᑦ. ᐱᕙᒌᔭᖅᑕᐅᔪᖅ ᐅᑯᓄᖓ: ᓄᓇᕗᒻᒥ ᑭᒡᓕᓯᓂᐊᖅᑎᒃᑯᑦ, ᔭᓄᐊᕆ 27, 2021.

ᑲᐱᔭᐅᓯᒪᔪᑦ ᖃᔅᓯᐅᓂᖏᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐋᓐᓂᐊᕕᓕᐊᖅᑐᓄᑦ ᖃᕆᓴᐅᔭᒃᑯᑦ ᑎᑎᖅᑭᕆᔾᔪᑎᓃᖔᖅᑐᖅ.

ᐊᔪᙱᑦᑐᑦ ᐃᓐᓇᐃᑦ ᓄᓇᓕᖕᓂ ᓇᓗᓇᐃᖅᑕᐅᓯᒪᕗᑦ ᖃᔅᓯᐅᓂᖏᓐᓄᑦ ᐃᓄᐃᑦ ᐅᑭᐅᓖᑦ 18-ᓂᒃ ᐅᖓᑖᓂᓪᓗ ᒪᓕᒡᓗᒍ 2020-ᒥ ᐃᓄᐃᑦ ᖃᔅᓯᐅᓇᓱᒋᔭᐅᓂᖏᑦ.

ᓄᓇᖅᑲᑎᒌᑦ ᐃᓄᒋᐊᖕᓂᖏᑦ ᒥᒃᓴᐅᑦᑎᓯᒪᔪᑦ "ᐊᒃᑐᐊᓂᖃᙱᑦᑐᑦ" ᑐᙵᕕᖃᙱᓐᓂᖏᓐᓄᑦ ᐃᓗᓕᖅᑕᓄᑦ ᐃᓄᒋᐊᒃᓯᕙᓪᓕᐊᔪᓄᑦ (ᐃᓅᕙᓪᓕᐊᔪᑦ, ᑐᖁᕙᓪᓕᐊᔪᑦ ᐊᒻᒪ ᐊᓯᐊᓂᒃ ᓄᓇᓂᙶᖅᑐᑦ ᓄᒃᑕᖅᐸᒃᑐᑦ).  ᑲᒪᒋᔭᐅᑦᑎᐊᕐᓗᑎᒃ ᐊᑐᖅᑕᐅᔭᕆᐊᓖᑦ.

 

ᖃᐅᔨᓴᕐᓂᒧᑦ ᑭᒡᓕᓯᓂᐊᖅᑕᐅᓯᒪᔪᑦ ᒫᓐᓇᒧᑦ ᑎᑭᖦᖢᒍ ᑕᒪᐃᓐᓂᒃ ᓄᓇᓕᖕᓂ: ᔭᓄᐊᕆ 11, 2022

ᓄᓇᓕᒃ	ᖃᐅᔨᓴᖅᑕᐅᕌᓂᒃᓯᒪᔪᑦ	ᖃᐅᔨᓴᖅᑕᐅᒐᒥ ᐱᖃᓪᓚᕆᖕᓂᕋᖅᑕᐅᔪᑦ	ᖃᐅᔨᓴᖅᑕᐅᒐᒥ ᐱᖃᙱᓐᓂᕋᖅᑕᐅᔪᑦ
ᓴᓪᓕᖅ (ᑕᐃᒪᙵᑦ 9 ᔮᓄᐊᕿ 2022−ᒥ)	42	8	34
ᑎᑭᕋᕐᔪᐊᖅ (ᑕᐃᒪᙵᑦ ᔮᓄᐊᕆ 7, 2022−ᒥ)	18	7	11
ᓴᓂᑭᓗᐊᖅ (ᑕᐃᒪᙵᑦ ᔮᓄᐊᕆ 4, 2022−ᒥ)	12	1	11
ᑭᙵᐃᑦ (ᑕᐃᒪᙵᓂ 2 ᔭᓄᐊᕆ 2022−ᒥ)	70	23	47
ᒥᑦᑎᒪᑕᓕᒃ (ᑕᐃᒪᙵᓂ 1 ᔭᓄᐊᕆ 2022−ᒥ)	42	1	41
ᐃᒡᓗᓕᒑᕐᔪᒃ (ᑕᐃᒪᙵᓂ 1 ᔭᓄᐊᕆ 2022−ᒥ)	34	4	30
ᐃᖃᓗᒃᑑᑦᑎᐊᖅ (ᑕᐃᒪᙵᓂ 30 ᑎᓯᐱᕆ 2021−ᒥ)	107	18	154
ᐃᒡᓗᓕᒃ (ᑕᐃᒪᙵᓂ 29 ᑎᓯᐱᕆ 2021−ᒥ)	172	18	154
ᖃᒪᓂ'ᑐᐊᖅ (ᑕᐃᒪᙵᓂ 29 ᑎᓯᐱᕆ 2021−ᒥ)	44	1	43
ᐊᕐᕕᐊᑦ (ᑕᐃᒪᙵᓂ 29 ᑎᓯᐱᕆ 2021−ᒥ)	247	64	183
ᓴᓂᕋᔭᒃ (ᑕᐃᒪᙵᓂ 29 ᑎᓯᐱᕆ 2021−ᒥ)	122	17	105
ᕿᑭᖅᑕᕐᔪᐊᖅ (ᑕᐃᒪᙳᙵᓂ 28 ᑎᓯᐱᕆ 2021−ᒥ)	89	7	82
ᑲᖏᖅᖠᓂᖅ (ᑕᐃᒪᙵᓂ 23 ᑎᓯᐱᕆ 2021−ᒥ)	609	68	541
ᐸᖕᓂᖅᑑᖅ (ᑕᐃᒪᙵᓂ 23 ᑎᓯᐱᕆ 2021−ᒥ)	387	26	361
ᐃᖃᓗᐃᑦ (ᑕᐃᒪᙵᓂ 23 ᑎᓯᐱᕆ 2021−ᒥ)	1283	95	1188

*ᖃᐅᔨᒪᖁᔭᐅᕗᑎᑦ: ᖃᔅᓯᐅᓂᖏᑦ ᐊᓯᔾᔨᖅᑕᖃᑦᑕᖅᐳᑦ. ᖃᓄᑐᐃᓐᓇᓕᒫᑦᑎᐊᖅ ᐱᓇᔪᒃᑐᖃᖃᑦᑕᖅᐳᖅ ᑖᒃᑯᐊ ᑎᑎᕋᖅᑕᐅᕙᓪᓕᐊᕙᒃᑐᑦ ᓄᑖᖑᐃᓐᓇᖁᓪᓗᒋᑦ ᐱᐊᓂᑦᑎᐊᖅᓯᒪᖁᓪᓗᒋᓪᓗ, ᑭᓯᐊᓂ ᑕᒪᐃᓂᒃ ᐃᓄᖕᓂᒃ ᒪᓕᒃᑕᐅᔪᓂᑦ ᖃᐅᔨᓴᖅᑕᐅᓯᒪᔪᓂᓪᓗᓐᓂᑦ  ᓴᖅᑭᔭᖅᑎᑦᑎᙱᑐᐃᓐᓇᕆᐊᓕᒃ.

**ᓇᓗᓇᐃᖅᑕᐅᓯᒪᔪᑦ ᐊᒻᒪ ᑕᐃᒪᐃᑦᑐᖃᑐᐃᓐᓇᕆᐊᓕᑦ ᐱᖃᓯᐅᔾᔨᕗᑦ ᑲᓇᑕᓕᒫᒥ ᖃᓂᒪᓇᓱᒋᔭᐅᔪᑦ ᖃᐅᔨᓴᖅᑕᐅᓯᒪᔪᓂᑦ.

***ᑭᖑᕙᓯᒃᑐᖃᑐᐃᓐᓇᕆᐊᓕᒃ ᐅᖃᐅᓯᖃᕐᓂᐊᕐᓗᓂ  ᖃᓄᐃᓕᖓᓂᖏᓐᓄᑦ ᑭᒡᓕᓯᓂᐊᖅᑕᐅᓯᒪᔪᓂᓪᓗ ᐱᔭᐅᔪᓂᑦ ᖃᓪᓗᓈᑦ ᓄᓇᖓᓐᓂᑦ ᑲᓇᑕᒥᑦ. ᖁᓕᓪᓗ ᒪᕐᕉᒡᓗ ᓄᕙᒡᔪᐊᖅᑐᑦ ᖃᐅᔨᔭᐅᓚᐅᖅᑐᑦ ᓄᓇᕗᑦ ᓯᓚᑖᓂ ᓇᓗᓇᐃᖅᑕᐅᓚᐅᖅᐳᑦ ᓄᓇᕗᒥᐅᑕᐅᓂᕋᖅᑕᐅᓪᓗᑎᒃ. ᐱᖓᓱᑦ ᐃᓅᔪᓐᓃᖅᑐᑦ ᐱᖃᓯᐅᔾᔭᐅᓪᓗᑎᒃ. ᓄᓇᕗᒥᐅᑦ ᓄᕙᒡᔪᐊᕐᓇᖅ-19−ᖃᖅᑐᑦ ᓄᓇᕗᑦ ᓯᓚᑖᓂ ᖃᐅᔨᔭᐅᔪᑦ ᓇᓗᓇᐃᖅᑕᐅᔪᐃᓐᓇᐅᔾᔮᙱᑉᐳᑦ ᓄᓇᕗᒥᐅᑕᐅᓂᖏᓐᓂᒃ.

ᐊᓂᑦᑕᐃᓕᕕᖕᒦᑦᑐᑦ ᐃᓄᐃᑦ:

ᐊᐅᓪᓚᕐᓂᐊᖅᑐᖅ ᖃᓄᐃᑦᑑᓂᖓ	ᑐᔪᕐᒥᑎᑕᐅᔪᑦ ᐊᓂᑦᑕᐃᓕᒪᔪᓂ ᔭᓄᐊᕆ 10-ᖑᓕᕐᑎᓪᓗᒍ
ᐋᓐᓂᐊᕐᕕᓕᐊᖅᑐᑦ	25
ᑭᒃᑯᑐᐃᓐᓇᑦ	7
ᑐᐊᕕᕐᓇᖅᑐᒃᑯᑦ ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖅᑐᑦ ᐊᓂᑦᑕᐃᓕᓂᕐᓗ	4
ᐃᒡᓗᓕᐅᕐᑎᑦ	0
ᑲᑎᖦᖢᒋᑦ	36

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᓇᐃᓈᕐᓯᒪᔪᖅ:

ᐊᐅᓪᓚᕐᕕᒃᓴᖓᑕ ᐅᓪᓗᐊ	ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐊᓂᑦᑕᐃᓕᕕᖕᒥᙶᖅᑐᑦ
ᔭᓄᐊᕆ 11 2022	3
ᔭᓄᐊᕆ 12 2022	2
ᔭᓄᐊᕆ 13 2022	0
ᔭᓄᐊᕆ 14 2022	3
ᔭᓄᐊᕆ 15 2022	0
Total	7

 

 

ᓄᓇᕗᒻᒥ ᓯᓚᑦᑐᖅᓴᕐᕕᒃ

ᐅᑯᐊ ᐃᓕᓐᓂᐊᖅᑕᐅᔪᒃᓴᑦ ᐱᒋᐊᕐᕕᒃᓴᓕᑦ ᔮᓄᐊᕆ 10, 2022−ᒥ (ᖃᕆᓴᐅᔭᒃᑯᑦ ᐃᓕᓐᓂᐊᕐᓂᖅ)*:

• ᐱᔭᕇᖅᓯᔾᔪᓯᐊᖅ  ᐃᓅᓯᓕᕆᔨᐅᓂᕐᒧᑦ  ᐃᓕᓐᓂᐊᒐᕐᒥᒃ.
• ᐃᓕᓐᓂᐊᓪᓚᕆᒃᓯᒪᔪᑦ ᖃᐅᔨᓴᕐᓂᕐᒥᑦ (ᐅᑭᐅᖅᑕᖅᑐᒥᑦ ᐃᓗᐊᖅᓴᐃᔨᒃᓴᑦ) (ᐅᑭᐅᑦ ᐊᑕᐅᓯᕐᒥᑦ ᑎᓴᒪᓄᑦ ᐃᖃᓗᖕᓂ).
• ᓯᓚᑦᑐᖅᓴᕐᕕᖕᒥ ᐃᓕᓐᓂᐊᒃᑲᓐᓂᕈᑎᒃᓴᖅ (ᐅᖅᓱᖅᑑᖅ ᐊᒻᒪ ᑰᒑᕐᔪᒃ).
• ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐃᓕᓐᓂᐊᕐᓂᖅ (ᑲᖏᖅᖠᓂᕐᒥ ᐊᒻᒪ ᐃᖃᓗᖕᓂ).
• ᐊᒡᓚᕝᕕᓕᕆᓂᖅ (ᐃᖃᓗᖕᓂ ᐊᒻᒪ ᓴᓂᑭᓗᐊᕐᒥᑐᐊᖅ).

ᐅᑯᐊ ᐃᓕᓐᓂᐊᖅᑕᐅᔪᒃᓴᑦ ᐱᒋᐊᕐᕕᒃᓴᓕᑦ ᔮᓄᐊᕆ 17, 2022−ᒥ (ᖃᕆᓴᐅᔭᒃᑯᑦ ᐃᓕᓐᓂᐊᕐᓂᖅ)*:

• ᐊᕙᑎᓕᕆᓂᕐᒥᑦ ᐃᓕᓐᓂᐊᕐᓂᖅ (ᐅᑭᐅᑦ ᐊᑕᐅᓯᖅ ᐊᒻᒪ ᒪᕐᕉᒃ, ᐃᖃᓗᖕᓂ).
• ᓄᓇᕗᒻᒥ ᐃᓕᓴᐃᔨᒃᓴᐅᓂᕐᒧᑦ ᐃᓕᓐᓂᐊᕐᓂᖅ − ᐊᕐᕌᒍ ᐊᑕᐅᓯᕐᒥᒃ ᑎᓴᒪᓄᑦ, ᑕᒪᕐᒥᒃ ᓄᓇᓖᑦ:  ᐊᕐᕕᐊᑦ (ᐅᑭᐅ ᐊᑕᐅᓯᖅ ᐊᒻᒪ ᑎᓴᒪᑦ), ᖃᒪᓂ'ᑐᐊᖅ, ᐃᖃᓗᒃᑑᑦᑎᐊᖅ, ᓴᓪᓕᖅ, ᐅᖅᓱᖅᑑᖅ, ᐃᒡᓗᓕᒃ, ᐃᖃᓗᐃᑦ, ᓇᐅᔮᑦ, ᐸᓐᓂᖅᑑᖅ ᑲᖏᖅᖠᓂᕐᓗ)**.
• ᐃᓄᓕᕆᔨᐅᓂᕐᒧᑦ ᐃᓕᓐᓂᐊᒐᒃᓴᑦ.
• ᐊᐅᓚᑦᑎᔨᐅᓂᖕᒧᑦ ᐃᓕᓐᓂᐊᕐᓂᖅ  (ᐅᑭᐅᑦ 1 ᐊᒻᒪ 2, ᑲᖏᖅᖠᓂᕐᒥ)*.
• ᐊᒡᓚᕝᕕᓕᕆᔨᐅᓂᖅ (ᐊᕐᕕᐊᑦ).
• ᓯᓚᑦᑐᖅᓴᕐᕕᖕᒥ ᐃᓕᓐᓂᐊᒃᑲᓐᓂᕐᓂᖅ (ᓴᓪᓕᖅ).

ᐅᑯᐊ ᐃᓕᓐᓂᐊᖅᑕᐅᔪᒃᓴᑦ ᐱᒋᐊᕐᕕᒃᓴᓕᑦ ᔮᓄᐊᕆ 17, 2022−ᒥ (ᐃᓕᓐᓂᐊᕐᕕᖏᓐᓂᑐᐊᖅ ᐃᓕᓐᓂᐊᕐᓂᖅ)*:

ᐅᑯᐊ ᐃᓕᓐᓂᐊᖅᑕᐅᔪᒃᓴᑦ ᒫᓐᓇ ᖃᕆᑕᐅᔭᒃᑯᑦ ᐃᓕᓐᓂᐊᒐᒃᓴᙳᖅᑎᑕᐅᓯᒪᙱᑦᑐᑦ, ᑕᐃᒪᐃᓐᓂᖓᓄᑦ ᐱᒋᐊᕐᕕᒃᓴᖏᑦ ᒪᓕᖕᓂᐊᖅᐳᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑎᓕᐅᕆᔾᔪᑎᖏᓐᓄᑦ. ᐃᓕᓐᓂᐊᖃᑕᐅᔪᑦ ᑖᒃᑯᓇᓂ ᐱᕙᒌᔭᖅᓯᒪᖃᑦᑕᕆᐊᖃᕐᓂᐊᖅᐳᑦᐅᖓᕙᕆᐊᖅᑕᐅᑐᐃᓐᓇᖃᑦᑕᖦᖤᓛᕐᒪᑕ, ᓄᕙᒡᔪᐊᕐᓇᖅ-19−ᒧᑦ ᖃᓂᒻᒪᒃᐸᓪᓕᐊᑐᓐᓇᖅᑎᓪᓗᒋᑦ ᓄᓇᕗᒻᒥ ᐊᒻᒪᓗ/ᐅᕝᕙᓘᓐᓃᑦ ᓄᓇᓕᖕᒥᓂᒃ.

• ᑐᓵᔨᑦ/ᑐᑭᓕᐅᕆᔨᑦ (ᐅᑭᐅᑦ 1 ᐊᒻᒪ 2, ᐱᔭᕇᕈᓯᐊᓂᒃ ᐃᓕᑕᕆᔭᐅᔾᔪᑎᑖᕋᓱᒃᑐᑦ, ᐃᖃᓗᖕᓂ).
• ᐃᓄᐃᑦ ᐃᓕᖅᑯᓯᖏᓐᓂᑦ ᐃᓕᓐᓂᐊᕐᓂᖅ (ᐅᑭᐅᑦ 1 ᐊᒻᒪ 2, ᐃᖃᓗᖕᓂ).
• ᐊᒥᓕᕆᓂᖅ/ᕿᓯᓕᕆᓂᖅ (ᐅᑭᐅᖅ 1, ᐃᖃᓗᖕᓂ).
• ᑕᑯᒥᓇᖅᓴᐅᑏᑦ ᓴᕕᕋᔭᓕᕆᔨᐅᓂᕐᒧᓪᓗ (ᐅᑭᐅᖅ 1, ᐃᖃᓗᖕᓂ).
• ᐃᓐᓇᕐᓄᑦ ᐃᓕᓐᓂᐊᕐᓂᕐᒧᑦ ᑐᙵᕕᖏᑦ ᐊᒻᒪ ᐃᓐᓇᕐᓄᑦ ᐃᓕᓐᓂᐊᕐᓂᖅ ᐊᔪᖅᑕᐅᒋᐊᖃᙱᑦᑐᑦ (ᐊᑐᐃᓐᓇᕈᖅᑎᑕᐅᓚᐅᖅᐳᑦ ᓄᓇᓕᖕᓂ ᐃᓐᓇᐃᑦ ᐃᓕᓐᓂᐊᕐᕕᖏᓐᓂᒃ).
• ᐊᒡᓚᕝᕕᓕᕆᓂᖅ (ᑭᙵᐃᑦ).
• ᓴᓇᔨᙳᕆᐅᖅᓴᓂᖅ − ᑲᖏᖅᑐᒑᐱᒃ, ᐃᒡᓗᓕᒡᓗ.

ᓇᓗᓇᐃᖅᑕᐅᓛᖅᑐᑦ (ᐅᐸᒍᑎᓗᑎᑦ ᑭᓯᐊᓂ ᐃᓕᓐᓂᐊᓛᖅᑐᑦ)

• ᓴᓇᔨᐅᓂᕐᒧᑦ ᐃᖅᑲᓇᐃᔭᕆᐅᖅᓴᔪᖅ ᐃᓕᓐᓂᐊᓯᓐᓈᑦ.
  • ᓴᓇᑐᓕᖅᓴᕐᕕᒃ ᐃᓄᓕᕆᔨᒃᑯᓐᓂ ᐱᓕᕆᖃᑎᖃᖅᐳᑦ ᑭᖑᓪᓕᖅᐹᖅᓯᐅᑎᒥᒃ ᐋᖅᑭᒃᓱᐃᓪᓗᑎᒃ ᐋᖅᑭᒋᐊᖅᓯᒪᔪᓂᒃ ᐃᓕᓐᓂᐊᖅᑕᐅᓂᐊᖅᑐᑦ ᐅᓪᓗᖏᓐᓂᒃ ᐸᕐᓇᒃᑕᐅᓯᒪᔪᓄᑦ ᐃᖅᑲᓇᐃᔭᖅᑎᙳᕆᐅᖅᓴᓂᖅ (ᐅᖅᑰᓴᐅᑎᓕᕆᓂᖅ ᐊᒻᒪ ᐃᒡᓗᓕᕆᔨᒃᑯᓐᓂ ᓱᕋᒃᓯᒪᔪᓕᕆᓂᖅ) ᐊᒻᒪ ᓴᓇᑐᓕᖅᓴᕐᕕᖕᒥ ᐊᓂᒍᐃᔾᔪᑎᒥᒃ ᐃᓕᓐᓂᐊᕐᓂᖅ.  ᐋᖅᑭᒃᑕᐅᕌᓂᒃᐸᑦ, ᐃᓕᓐᓂᐊᖅᑏᑦ ᑐᓴᖅᑎᑕᐅᓂᐊᖅᐳᑦ ᐋᖅᑭᒃᑕᐅᔪᒥᒃ ᐅᓪᓗᖏᓐᓂᒃ.
• ᐱᖅᑯᓯᓕᕆᕝᕕᒃ
  • ᐱᖅᑯᓯᓕᕆᕝᕕᒃᑯᑦ ᐅᑭᐅᒃᑯᑦ ᐃᓕᓐᓂᐊᖅᑎᑕᐅᓂᐊᖅᑐᑦ ᕕᕝᕗᐊᕆ 1−ᒥ ᐱᒋᐊᕐᕕᒃᓴᖃᓚᐅᖅᑐᑦ, ᖃᖓᑦᑕᐅᑎᒃᓴᖏᑦ ᐱᖅᑯᓯᓕᕆᕝᕕᒃᑯᓐᓂ ᐋᖅᑭᒃᓱᖅᑕᐅᓗᑎᒃ ᔮᓄᐊᕆ 17 ᖃᓂᒋᔮᓂ.  ᐊᐅᓪᓚᕈᔾᔭᐅᕙᒃᑐᑦ ᒪᓕᒃᖢᒋᑦ, ᐃᓐᓇᕐᓂᒃ ᐃᓕᓐᓂᐊᖅᑎᑕᐅᕙᒃᑐᑦ, ᐱᒋᐊᕐᕕᒃᓴᖓᑕ ᐅᓪᓗᐊ ᐋᖅᑭᒃᑕᐅᓛᖅᐳᖅ ᓯᕗᓂᑦᑎᓐᓂ ᐋᓐᓂᐊᖃᕐᓇᙱᑦᑐᓕᕆᔨᑦ ᐊᑐᖅᑕᐅᖁᔭᖏᑦ ᒪᓕᒡᓗᒋᑦ, ᐱᓗᐊᖅᑐᒥ ᐊᐅᓪᓚᖃᑦᑕᖅᑐᑦ ᑭᒡᓕᖃᖅᑎᑕᐅᓂᖏᑦ.

*ᐱᓕᕆᐊᖑᓂᐊᖅᑐᓂᒃ ᐱᓕᕆᔪᑦ ᖃᕆᓴᐅᔭᒃᑯᑦ ᐃᑲᔪᖅᑐᐃᔾᔪᑎᒃᓴᓂᒃ ᐋᖅᑭᒃᓱᐃᓪᓗᑎᒃ ᐃᓕᓐᓂᐊᖅᑎᓄᑦ ᓯᕗᓪᓕᕐᒥ ᐊᕐᕌᒍᒥ ᐃᓕᓐᓂᐊᒐᒃᓴᒥᑦ.

**ᐅᓪᓗᖏᑦ ᐋᖅᑭᒃᑕᐅᔪᑦ ᓇᓗᓇᐃᖅᑕᐅᓛᖅᐳᑦ ᓄᓇᕗᒻᒥ ᐃᓕᓴᐃᔨᙳᕆᐅᖅᓴᔪᑦ ᐃᖅᑲᓇᐃᔭᖅᑎᖏᓐᓄᑦ. ᓄᓇᕗᒻᒥ ᐃᓕᓴᐃᔨᙳᕆᐅᖅᓴᔪᑦ ᐃᖅᑲᓇᐃᔭᖅᑎᖏᑦ ᑕᒪᑐᒪᓂ ᐱᓇᓱᐊᕈᓯᕐᒥ ᐱᓕᕆᓕᕐᓂᐊᖅᐳᑦ ᖃᐅᔨᓇᓱᒡᓗᑎᒃ ᓇᖕᒥᓂᖅ NAC/MUNL−ᑯᑦ ᖃᕆᓴᐅᔭᒃᑯᑦ ᐊᐅᓚᑦᑎᔾᔪᑎᖏᓐᓂ.

 

 

ᓄᓇᕗᒥᐅᑦ ᖃᓄᐃᙱᑦᑎᐊᖅᑐᑦ ᑕᒪᑦᑕᑦᑎᐊᖅ ᑲᑐᔾᔨᓪᓗᑕ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᐅᖓᓯᒌᒃᑕᖅᐸᒡᓗᓯ, ᐃᓗᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᓯᓗ ᖃᓂᒪᒍᔅᓯ.