ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᔪᖓ, ᐃᒃᐸᒃᓴ ᓄᓇᕐᔪᐊᒥ ᐊᕐᓇᐃᑦ ᐅᓪᓗᕆᓛᖅᑕᖓᓂ, ᓇᓗᓇᐃᕈᒪᓪᓗᒍ ᐃᓕᓴᕆᒍᒪᓪᓗᒍᓗ ᐃᑲᔪᖅᓯᒪᔪᒻᒪᕆᐅᓂᖓ ᓯᕗᓕᖅᑎᐅᑦᓯᐊᖅᓯᒪᓂᖓᓗ ᕆᐱᑲ ᑲᓪᓗ, ᓄᖅᑲᕐᓂᐊᓕᖅᑐᖅ ᐸᐃᒃᑑᑎᒃᑯᓐᓄᑦ ᐊᖏᔪᖅᑳᖑᓂᕐᒧᑦ.
ᐅᖃᖅᑎᑦᑎᔩ, ᐅᐱᒍᓱᑦᑐᖓ ᖁᕕᐊᓲᑎᒋᒍᓐᓇᕋᒃᑯ ᑐᓂᓯᒪᓂᕆᓚᐅᖅᑕᖓ ᑕᖃᔫᔮᕈᓐᓇᕋᓂᓗ ᐊᑦᓱᕉᑎᖃᓚᐅᕐᓂᖓ ᒥᔅ ᑲᓪᓗ ᐊᔭᐅᖅᑐᐃᒍᑎᖃᖅᐸᑦᑐᓂ ᐃᓚᐃᓐᓈᖅᑕᐅᑦᑕᐃᓕᑎᑦᓯᓂᕐᒧᑦ ᐊᑐᐃᓐᓇᖃᖅᑎᑦᓯᓂᕐᒧᓪᓗ ᐱᑕᖃᕆᐊᖃᓪᓚᕆᑦᑐᓂᒃ ᐱᔨᑦᓯᕋᐅᑎᓂᒃ ᐃᓄᓐᓄᑦ ᐊᕐᓇᓄᑦ.
ᐃᒡᓗᓕᒃ, ᓄᓇᕗᒻᒥᐅᑦᓴᔭᐅᓪᓗᓂ, ᕆᐱᑲ ᑲᓪᓗ ᐱᔨᑦᓯᕋᓚᐅᖅᑐᖅ ᐱᖓᓱᐊᖅᑎ ᐃᓕᔭᐅᕙᑦᑐᓂ ᐸᐅᒃᑑᑎᒃᑯᓐᓄᑦ ᐊᖏᔪᖅᑳᖑᓂᕐᒧᑦ. ᑭᓯᐊᓂᓕ, ᒥᔅ ᑲᓪᓗ ᐊᔭᐅᖅᑐᐃᒍᑎᒋᖃᑦᑕᓚᐅᖅᑕᖏᑦ ᐱᒋᐊᓚᐅᖅᓯᒪᔪᑦ ᓯᕗᕐᖓᒍᑦ ᐸᐅᒃᑑᑎᒃᑯᓐᓅᓚᐅᕋᓂ, ᐊᕐᕌᒍᐃᑦ 36 ᐅᖓᑖᓄᑦ ᓴᖅᑭᔮᖅᑎᑦᓯᖃᑦᑕᓚᐅᖅᑐᖅ ᐊᑕᖏᖅᑐᒃᑯᑦ ᒪᒥᓴᕆᐊᖃᕐᓂᕐᒧᑦ, ᐊᔭᐅᖅᑐᐃᒍᑎᖃᕐᓂᕐᒧᑦ ᐃᓱᒪᓕᕆᓂᕐᒧᑦ ᐱᔨᑦᓯᕋᐅᑎᓂᒃ ᐱᓕᕆᔾᔪᑎᑦᓴᓂᓪᓗ, ᓇᓗᓇᐃᖅᓯᖃᑦᑕᓂᕐᒧᓪᓗ ᑮᓇᐅᔭᓂᒃ ᐊᑦᑕᓇᙱᑦᑐᓄᑦ ᕿᒫᕕᓐᓄᑦ ᐃᑲᔪᖅᑕᐅᒍᓐᓇᖁᓪᓗᒋᑦ ᐊᕐᓇᐃᑦ ᕿᒫᕙᑦᑐᑦ ᐋᓐᓂᖅᑎᖅᑕᒥᓂᐅᑎᓪᓗᒋᑦ.
ᖄᒃᑲᓐᓂᖓᒍᑦ ᐃᑲᔪᖃᑦᑕᓂᕐᒧᑦ ᐊᓐᓇᒃᓯᒪᔪᓂᒃ ᐊᐃᑉᐸᕐᒥᓄᑦ ᐋᓐᓂᖅᑎᖅᑕᐅᖃᑦᑕᖅᑐᓂᒃ, ᒥᔅ ᑲᓪᓗ ᐱᓕᕆᐊᖃᓚᐅᕐᒥᔪᖅ ᐊᑐᐃᓐᓇᐅᑎᑦᓯᓂᕐᒧᑦ ᐱᓕᕆᔾᔪᑎᑦᓴᓂᒃ ᐃᑲᔫᑎᑦᓴᓂᓪᓗ ᑭᒃᑯᑐᐃᓐᓇᕐᓄᑦ ᐋᓐᓂᖅᑎᕆᖃᑦᑕᖅᑐᓄᑦ. ᖃᐅᔨᒪᓚᐅᖅᑐᖅ ᐋᓐᓂᖅᑎᕆᕙᑦᑐᑦ ᐊᓐᓇᒃᓯᒪᒻᒪᑕᑦᑕᐅᖅ ᑭᖑᕚᕇᓂ ᖁᐊᖅᓵᕐᓇᖅᑐᒃᑰᖅᓯᒪᓂᕐᒧᑦ.
ᐅᖃᖅᑎᑦᑎᔩ, ᕕᕝᕗᐊᓕ 10, 2022-ᒥ, ᓱᓕ ᐊᖏᔪᖅᑳᖑᑎᓪᓗᒍ ᐸᐅᒃᑑᑎᒃᑯᓐᓄᑦ, ᕆᐱᑲ ᑲᓪᓗ ᑐᓂᔭᐅᓚᐅᖅᑐᖅ ᐊᕐᓇᓄᑦ, ᓴᐃᒪᖃᑎᒌᓐᓂᕐᒧᑦ, ᐃᓅᖃᑎᒌᓄᓪᓗ ᓯᕗᓕᖅᑎᐅᓂᕐᒧᑦ ᐃᓕᓴᕆᔭᐅᔾᔪᑎᒥᒃ ᐱᓕᕆᐊᖃᖅᓯᒪᓂᖓᓄᑦ ᓴᐳᒻᒥᔭᐅᖁᓪᓗᒋᑦ ᓴᖅᑭᔮᖅᑎᑕᐅᖁᓪᓗᒋᓪᓗ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖃᕐᓂᖏᓐᓂᒃ ᐃᓄᐃᑦ ᐊᕐᓇᐃᑦ. ᐃᓕᓴᕆᔭᐅᔾᔪᑎᖓ ᐱᒋᐊᖃᖅᓯᒪᓪᓚᕆᑦᑕᖓ.
ᐅᖃᖅᑎᑦᑎᔩ, ᐱᕕᖃᕐᓂᓐᓂ ᐱᒃᑯᒋᕙᒌᕈᒪᔭᕋ ᕆᐱᑲ ᑲᓪᓗ ᐃᑲᔪᖅᓯᒪᓂᖓᓄᑦ ᐱᓕᕆᐊᖃᑦᓯᐊᖅᓯᒪᓂᖓᓄᓪᓗ. ᐃᔾᔪᐊᕋᑦᓴᐅᑦᓯᐊᖅᑐᖅ ᒪᒃᑯᑦᑐᓄᑦ ᐊᕐᓇᓄᑦ ᓂᕕᐊᖅᓯᐊᓄᓪᓗ.
ᖁᔭᓐᓇᒦᒃ, ᐅᖃᖅᑎᑦᑎᔩ.