ᐄᐳᕈ 01, 2022
ᐅᖃᐅᓯᐅᔪᑦ
ᓯᕗᓕᖅᑎ ᐊᕿᐊᕈᕐᒧᑦ ᐃᒃᓯᕋᕐᔪᐊᕌᐱᒃ ᐃᓕᓐᓂᐊᕆᐊᖅᐸᓚᐅᖅᑐᓄᑦ ᒪᒥᐊᑎᓪᓗᒍ
ᓄᓇᕗᒻᒥ ᓯᕗᓕᖅᑎ, ᐸᐅᓗᓯ ᐊᕿᐊᕈᖅ, ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᑯᓂᖓ ᐅᖃᐅᓯᒃᓴᓂᑦ:
"ᐃᒃᐱᒋᓱᑦᑎᐊᖅᑲᐅᕗᖓ ᑐᓵᓪᓗᒍ ᐃᒃᓯᕋᕐᔪᐊᕌᐱᒃ ᕗᕋᓐᓯᔅ' ᒪᒥᐊᑎᓪᓗᒍ ᓄᓇᖃᖅᑳᖅᓯᒪᔪᓄᑦ, ᐃᓄᖕᓄᑦ ᐊᒻᒪ ᐊᓪᓚᖓᔪᓄᑦ ᐱᓕᕆᔭᖅᑐᖃᑕᐅᔪᓄᑦ ᐃᓚᖏᓐᓂ ᐃᒃᓯᕋᕐᔪᐊᕐᒥᐅᑦ ᑐᒃᓯᐊᕐᕕᖓᓂ ᐃᓚᒋᔭᐅᔪᓂᑦ ᑲᓇᑕᒥ ᐃᓕᓐᓂᐊᕆᐊᖅᐸᓚᐅᖅᑐᓄᑦ.
ᑲᓇᑕᒥ ᐃᓕᓐᓂᐊᕆᐊᖅᐸᓚᐅᖅᑐᓄᑦ ᐊᑐᖅᑕᐅᓚᐅᖅᑐᑦ ᑐᒃᓯᐊᕐᕕᖕᒥ ᐃᓚᒋᔭᐅᔪᓄᑦ ᐃᓕᓐᓂᐊᖅᑎᑦᑎᔨᓄᓪᓗ ᑕᐃᒪᐃᓕᐅᖅᑕᐅᓪᓗᑎᒃ ᓇᓗᓇᐃᖅᓯᕗᑦ ᑭᓯᐊᓂ ᐃᓕᖅᑯᓯᑐᖃᑦᑎᓐᓂ ᓱᕋᐃᓇᓱᖕᓂᐅᓚᐅᕐᒪᑦ.
ᖃᓄᑐᐃᓐᓇᖅ ᐅᖃᐅᓯᐅᔪᓐᓇᙱᓚᖅ ᐲᖅᑕᐅᓇᓱᒡᓗᓂ ᐊᒃᑐᖅᑕᐅᓯᒪᔪᑦ ᐱᑦᑎᐊᖅᑕᐅᖃᑦᑕᓚᐅᙱᑦᑐᑦ ᐃᓚᒌᑦ ᐃᓄᐃᑦ, ᐱᓗᐊᖅᑐᒥ ᓄᑕᖅᑲᑦ ᐊᖓᔪᖅᑳᒥᓂᑦ ᐊᖅᓵᖅᑕᐅᕙᓚᐅᖅᑐᑦ ᓄᓇᓕᖕᓂᓪᓗ ᐱᑦᑎᐊᖅᑕᐅᖃᑦᑕᕈᓐᓃᖅᖢᑎᒃ ᐋᓐᓂᖅᓱᖅᑕᐅᕙᒃᖢᑎᒡᓗ ᐃᓄᖕᓂᑦ ᑲᒪᔨᐅᑎᑕᐅᔪᓂᑦ ᐃᓕᓐᓂᐊᖅᑎᑦᑎᔪᓂᓪᓗ. ᑭᓯᐊᓂᓕ, ᒪᒥᐊᑎᓪᓗᒍ ᐋᖅᑭᒋᐊᕈᑕᐅᓂᐊᖅᐳᖅ ᐃᕐᙲᓐᓇᐅᙱᑦᑐᖅ ᐃᓱᒪᒋᔪᓐᓇᐃᖃᑎᒌᒃᐸᓪᓕᐊᓕᕐᓗᑎᒡᓗ.
ᑭᖑᕚᕇᓄᑦ ᐊᒃᓱᕈᕐᓇᖅᑐᒃᑰᕈᑕᐅᑎᓪᓗᒍ ᐃᓕᓐᓂᐊᕆᐊᖅᐸᓚᐅᖅᑐᓄᑦ ᓱᓕ ᐃᓱᒫᓘᑕᐅᖃᑦᑕᖅᐳᖅ ᓄᓇᑦᑎᓐᓂ, ᐃᓄᐃᑦ ᓱᓕ ᓴᐱᓕᖅᑕᐃᓕᒪᕗᑦ ᑕᒪᒃᑯᓂᖓ ᐅᖃᒐᒃᓴᐅᙱᑦᑐᓂᒃ ᐊᒃᓱᕈᕐᓇᖅᑐᒃᑰᕈᑎᒋᓯᒪᔭᖏᓐᓂᒃ. ᐃᓄᐃᑦ ᓱᓕ ᐃᓕᖅᑯᓯᑦᑎᓐᓂ ᐅᖃᐅᓯᑦᑎᓐᓂᓗ ᐊᓯᐅᔨᑦᑕᐃᓕᒪᐃᓐᓇᖅᐳᑦ ᓴᐳᔾᔨᓯᒪᓪᓗᑎᒡᓗ ᐊᒻᒪᓗ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ ᐅᒃᐱᕆᔭᖏᓐᓂᒡᓗ ᐅᑎᖅᑎᑦᑎᓇᓱᒃᖢᑎᒃ.
ᖁᔭᓕᔪᒪᔭᒃᑲ ᐃᓄᐃᑦ ᑕᐱᕇᑦ ᑲᓇᑕᒥ ᑭᒡᒐᖅᑐᐃᖕᒪᑕ ᑕᒪᓐᓇ ᖁᕕᐊᓇᙱᑦᑐᐊᓗᒃ ᐱᔾᔪᑎᒋᓪᓗᒍ ᑲᓇᑕᒥ ᐱᐅᓯᕆᔭᐅᕙᓚᐅᖅᑐᖅ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓕᒫᓪᓗ ᑐᓴᖅᑎᑦᑎᔪᓐᓇᑦᑎᐊᓚᐅᖅᑐᑦ ᓱᓕᔪᓂᒃ ᐊᕐᕌᒍᒐᓴᖕᓄᑦ ᓇᓗᓇᐃᖅᓯᔪᓐᓇᖅᓯᓪᓗᑎᒃ ᒪᒥᐊᑦᑐᓐᓇᖅᓯᓪᓗᑎᒡᓗ.
ᓱᓕ ᐱᔭᒃᓴᖃᖅᐳᒍᑦ ᑭᓯᐊᓂ ᓱᓕᔪᒥᒃ ᒪᒥᓴᕈᓐᓇᖅᓯᒍᑦᑕ ᐃᓱᒪᒋᔪᓐᓇᐃᖃᑎᒌᒡᓗᑕᓗ ᐅᑯᓂᖓᓗ ᓇᓗᓇᐃᖅᓯᓗᑕ ᓱᓕ ᐃᓅᔪᑦ ᑐᒃᓯᐊᕐᕕᖕᒧᑦ ᐃᓚᒋᔭᐅᓚᐅᖅᓯᒪᔪᑦ ᓄᑕᖅᑲᓂᒃ ᐋᓐᓂᖅᓯᕆᕙᓚᐅᖅᑐᑦ ᐃᖅᑲᖅᑐᐃᕕᖕᒦᓛᕐᒪᑕ.
ᓂᕆᐅᒃᐳᖓ ᐃᒃᓯᕋᕐᔪᐊᕌᐱᒃ ᑲᓇᑕᒧᐊᓛᕐᓂᖓᓂ, ᓄᓇᕗᒻᒧᓗ ᐳᓛᕆᐊᓛᖁᓪᓗᒍ ᓂᕆᐅᒃᐳᖓ ᐃᓄᖕᓂᑦ ᐊᓂᒍᐃᓯᒪᔪᓂᑦ ᐃᓕᓐᓂᐊᕆᐊᖅᐸᓚᐅᖅᑐᓂᑦ ᑲᑎᒪᖃᑎᖃᕆᐊᖅᑐᕐᓗᓂ."
###
ᑐᓴᒐᒃᓴᓕᕆᔨᓄᑦ ᖃᐅᔨᒋᐊᕐᕕᒃᓴᖅ:
ᓰᒪ ᓴHᐊᐅ ᔨᕆHᐃ,
ᐱᕙᓪᓕᐊᔪᓂᒃ ᑐᓴᒐᒃᓴᓕᐅᖅᑏᑦ
ᑎᑎᕋᕐᕕᐊᓂᑦ ᓯᕗᓕᖅᑎ ᐊᕿᐊᕈᖅ
867-975-5059
szerehi6@gov.nu.ca