Uqaqtittijii, ublumi uqautigigumajara ilaudjutiga uvani Ukiuqtaqtumi Katidjutimi Katimanirjuarmi uvani Anchorage, Alaskami.
April 7mi, 8milu, pivikhaqaqtunga ilaujaami uumani katimanirjuarmi uqautiqarhungalu uvani katimajuni atilikmi “Naammaktun Nunallaat, Mahulingaittun Nunallaat: Kangiqhihimadjutin Ukiuqtaqtumin.” Uqaqatigiigutimi uqautigivaktatka ajuirutit ajuiqtauhimajun COVID-19 qalagjuarnirmin nunarjuami-hiamihimajumi qanuqtullu hapkuat ajuiqhimadjutit atuqtauttaaqtun ajurnarnirnun hivunikhami, imaatun aulahimmaaqtumi qajangnarhittaaqtumi Ukiuqtaqtumi aulapkainiqarnikkut amirinikkullu.
Uqaqtittijii, una Ukiuqtaqtumi Katidjutimi Katimanirjuaq angitqijaujuq ukiuq tamaat Ukiuqtaqtumi atugakhani miitirvik United States-mi. Piliuqtauhimajuq 2013mi, katimanirjuaq turaanganiqatquq piumajainnin ihumaaluutigijainnillu nunarjuarmi nunallaarijaani mighaagun Ukiuqtaqtumi.
Katimanirjuami miitiqatigivaktatka amigaittun atanngujaujunik kavamatkunnin ilaujullu Nunatsiami Hivuliqti Caroline Cochrane, Kivganga Kanadamin United States-mun, Kirsten Hillman, Kanadaup hivulliqpaanga Consul General uvunga Pacific Northwest Alaska-mullu, Mia Yen, Ikajuqti Kaminisa uvani Ukiuqtaqtumi, Neil O’Rourke, una Nunarjuami Ikhivautalik uvani Inuit Ukiuqtaqtumi-nunarjuarmi Katimajiinni, Dr. Dalee Samgoo Dorough ukuallu amigaittun katimajaqtuqtun Kalaalliinmin.
Iglukhaitigun, aulapkaidjutikhanik, Ukiuqtaqtumi aulapkainiqarnikkut amirinikkullu uqautaulluaqpaktun amigaittuni uqaqatigiigutini katimanirjuami.
Uqaqtittijii, niriuktunga aulahimmaaqtirnikkut uqaqatigiigutinik katimajaqtuqtuni takuhimajamni katimanirjuami – ilihimajunga amigaittun Nunavunmi hivuliutijaujumaniit atuqtaujullu aallanin Ukiuqtaqtumi nunagijaujunin.
Quana, Uqaqtittijii.