Uqaqtittijii, Fibjuali 8mi quviahuktunga atiliurama uumani Titiraqmik Tukihidjutimik (MOU) ukununga Kavamanganun Newfoundlandmun Labradormullu.
Piuraaqpakhimajuq pidjutikkut avikturhimadjutiptikni pihimajuq aajjikkiigutiqaqtuni uppidjutini, pitquhini ilitquhinilu, Ukiuqtaqtumilu nunami, atauttikkullu tariutigun qanga taimaa atuqhimanirni.
Atuqpaktugullu aajjikkiingniqaqtunik ajurnarhidjutivaktunik kavamautilluga, Uqaqtittijii. Una nutaanguqtirhimajuq paannariiguti ikajurniaqtaatigun imaatun atauttikkut hivumuudjutinik aallangajunik, pimmarigharlugin ihuaqtun piangaijarnikkut inungnullu pivallianiit, akhuurharlugillu
aallakkiidjutinik ilaupkaidjutiniklu piliuriami aulapkaijaamilu nakuujunik aullariktuniklu nunallaanik.
Uqaqtittijii, taimaatun hinaaniittuni avikturhimajiujuni, una paannariiguti pipkaqtitaatigun havaqatigiikluta angikliharnirnun piangaijaidjutinun imaatun iqaluliqinirnun, aquinirnun, ukunanilu ublumiutanun qaritaujakkuurutikkut atadjutinik. Atauttikkut hakugikhaqtaaqtavun ajuittuni havaktuni taimaatun paannariiknikkut iliharnikkut ajuirharnikkullu ihuaqtuq pijaaqtullu ungahiktunun nunallaaptiknun. Havaqatigiiktaaqtugun auladjutikhanik akhuuqtun naudjutikhanun iglukhanun aanniaqtailinirnullu-munaridjutainnun ikajuutaujuqlu Kanadaup aulapkainiqarvianun.
Kavamagijavut angiqhimajun piliuriami uuminnga Havaqatigiingnikkut Atuqtipkailirnirnunllu Katimavingmik. Katimajiit atauttikkut piliurniaqtun pidjutikhamik havaqatigiingnirnun ihuarhainirnullu kavamatkunni taapkunani atauttikkut pijumajainni.
Nanngarijaujuq Andrew Furey uvangalu atiliuqtaqqut una MOU uvani Northern Lights Katimarjuarnirmi Ottawami. Atiliuqatigijauhimajuq uvaptingnun uumannga Tuklirmin Hivuliqtimun Pamela Hakongak Gross-min uumungalu avikturhimanirmun talvannga Ministanganin Munarijuq Labradormun Qanuriliurutainnun, una Nanngarijaujuq Lisa Dempster.
Quana, Uqaqtittijii.