Uqaqtittiiji,
Qaitqujaugaangama nunallaanun, uqaqatigiraanginnahuaqpaktatka Inuit takuqattaqpaktatka. Imaatun ilitturivaktatka aallakkiidjutit tamainni nunallaani.
Uqaqtittijii, ilitarijumajatka havaqativun havakpiaqpaktun nunallaanun pulaaqhimajatka ukiakhaq – MLA uvunga Kinngarnun unalu Kimmirut, Minista David Joanasie; MLAt uvunga Kangiqlinirmun Minista Lorne Kusugak unalu Alexander Sammurtok; unalu MLA uvunga Qamanittuamun Craig Simailak.
Uqaqtittijii, nunallaamiitkaangama, uuktuqpiaqpaktunga miitiqatiginahuaqhugin haamlatkunni miijat katimajiillu, ilihaijinun, ukunanilu munaqhitkunni havaktiit, ukuallu Nunavut Kavamangani havaktiit. Uqaqatigivaktatka Inuit niuvvaavingni kaapiturvingnilu.
Quviahuktunga miitiqatigivakkapku Kangiqliniup Miijaa Harry Towtongie, Qamanittuap Miijaraluanga Richard Aksawnee unalu Kimmirutip Miijaa Maliktoo Lyta haamlatkunnilu katimajiit. Uqaqatigiigutivun turaangajun nakuudjutainni tamainni nunallaani humilu pimmarighautikhat ihariagijaujun.
Quviahuktunga uqaqatigigapkit ilihaqtun uvani Kimmirutip Qaqqalik Iliharviani uvanilu Kinngarmi Peter Pitseolak Angajukhiit Iliharviani. Hapkuat inulrammiit hivunikhaujun nunaptiknun.
Uvani Qamanittuap Nunavunmi Ilihariaqpaalivingmi nunallaami iliharviani, katimaqatigivaktatka ikittun ilihaijiunikkut ajuiqhaqtunik. Uqaqatigivaktatkalu inulrammiit angijunik piniaqhimadjutiqaqtun ilihaqtun uvani Inirninun Iliharutainni pinahuarutimi, piqpiaruti talvunga hivunikhami nakuudjutikhanun.
Uqaqtittijii, quviahuktunga tamainnun nunallaanun tunngahuktijunun uvamnik uqautigivaktaillu unipkaamingnik uvamnun.
Quana, Uqaqtittiiji.