ᐊᐅᖓᐃ ᐅᖃᖅᑎᑦᑎᔩ,
ᖃᐃᖅᑯᔭᐅᔭᕌᖓᒪ ᓄᓇᓕᖕᓄᑦ, ᐱᕕᖃᕐᓂᓕᒫᓐᓂᒃ ᐃᓚᐅᓇᓱᖃᑦᑕᖅᑐᖓ ᐅᖃᖃᑎᖃᕋᓱᒃᖢᖓ ᐃᓄᖕᓂᒃ ᑲᑎᖃᑦᑕᖅᑕᓐᓂᒃ. ᑕᐃᒫᒃ ᐃᓕᑉᐸᒃᑐᖓ ᐊᔾᔨᒌᖏᓐᓂᖏᓐᓂᑦ ᐊᑐᓂᑦ ᓄᓇᓕᐅᔪᑦ.
ᐅᖃᖅᑎᑦᑎᔩ, ᓇᓗᓇᐃᕈᒪᕙᒃᑲ ᒪᓕᒐᓕᐅᖅᑎᐅᖃᑎᕗᑦ ᐊᒃᓱᕈᐊᕆᔭᖃᓲᑦ ᓄᓇᓕᖕᓂᑦ ᐳᓚᕋᓵᖅᑕᑦᑎᓐᓂᒃ ᐅᑭᐊᒃᓵᖑᔪᖅ − ᒪᓕᒐᓕᐅᖅᑎ ᑭᙵᓄ ᑭᒻᒥᕈᒻᒧᓪᓗ, ᒥᓂᔅᑕ ᑕᐃᕕᑎ ᔪᐊᓇᓯ; ᒪᓕᒐᓕᐅᖅᑏᑦ ᑲᖏᖅᖠᓂᕐᒧᑦ ᒥᓂᔅᑕ ᓗᐊᓐ ᑯᓱᒐᖅ ᐊᒻᒪᓗ ᐊᓕᒃᓵᓐᑐ ᓴᒻᒧᖅᑐᖅ; ᐊᒻᒪᓗ ᒪᓕᒐᓕᐅᖅᑎ ᖃᒪᓂ'ᑐᐊᕐᒧᑦ ᑯᕋᐃᒡ ᓯᒪᐃᓚᒃ.
ᐅᖃᖅᑎᑦᑎᔩ, ᓄᓇᓕᖕᓃᓕᕌᖓᑦᑕ, ᐅᐸᒐᓱᐊᖃᑦᑕᖅᐳᖓ ᕼᐋᒻᒪᓚᒃᑯᑦ ᒪᐃᔭᖏᓐᓄᑦ ᑲᑎᒪᔨᖏᓐᓄᓪᓗ, ᐃᓕᓴᐃᔨᓄᑦ, ᐋᓐᓂᐊᓯᐅᖅᑎᓄᑦ, ᓄᓇᕗᑦ ᒐᕙᒪᐅᓪᓗ ᐃᖅᑲᓇᐃᔭᖅᑎᖏᓐᓄᑦ. ᐅᖃᖃᑎᖃᖃᑦᑕᖅᐳᖓ ᐃᓄᖕᓂᒃ ᓂᐅᕕᕐᕕᓐᓂ ᑳᐱᕐᕕᖕᓂᓗ.
ᐊᓕᐊᓇᐃᒋᓚᐅᖅᐸᕋ ᑕᑯᒐᒃᑯᑦ ᑲᖏᖅᖠᓂᐅᑉ ᒪᐃᔭᖓ ᕼᐃᐅᕆ ᑕᐅᑐᙱ, ᖃᒪᓂ'ᑐᐊᑉ ᒪᐃᔭᒋᓚᐅᖅᑕᖓ ᕆᑦᓱᑦ ᐊᖅᓴᕐᓂᖅ ᐊᒻᒪᓗ ᑭᒻᒥᕉᑉ ᒪᐃᔭᖓ ᒪᓕᒃᑑ ᓚᐃᑕ ᑲᑎᒪᔨᖏᓪᓗ. ᐅᖃᖃᑎᒌᖕᓂᕗᑦ ᑐᕌᒐᖃᓚᐅᖅᑐᑦ ᓇᓗᓇᐃᖅᑕᐅᓯᒪᔪᓂᑦ ᐊᑐᓂᑦ ᓄᓇᓕᖕᓂᑦ ᐱᐅᓯᕚᓪᓕᖅᑎᑦᑎᒋᐊᖃᕐᓂᐅᔪᓂᓪᓗ.
ᐊᓕᐊᓇᐃᒋᓚᐅᖅᐸᕋ ᐅᖃᓪᓚᖃᑎᒋᓪᓗᒋᑦ ᑭᒻᒥᕈᒻᒥ ᖃᖅᑲᓕᒃ ᐃᓕᓐᓂᐊᕐᕕᖓᑕ ᐃᓕᓐᓂᐊᖅᑎᖏᑦ ᐊᒻᒪᓗ ᑭᙵᐃᑦ ᐲᑕ ᐱᑦᓯᐅᓛᖅ ᐊᖓᔪᒃᖡᑦ ᐃᓕᓐᓂᐊᖅᑎᖏᑦ. ᑕᒪᒃᑯᐊ ᒪᒃᑯᒃᑐᑦ ᓯᕗᓐᓂᒃᓴᕆᕙᕗᑦ ᓄᓇᕗᒻᒥ.
ᖃᒪᓂᑦᑐᐊᑉ ᓄᓇᕗᒻᒥ ᓯᓚᑦᑐᖅᓴᕐᕕᖓᑦᑕ ᐃᓕᓐᓂᐊᕐᕕᖓᓂ, ᐃᓕᓴᐃᔩᑦ ᐱᓕᒻᒪᒃᓴᖅᑐᑦ ᑕᑯᔪᓐᓇᓚᐅᖅᑕᒃᑲ. ᐅᖃᖃᑎᖃᓚᐅᕐᒥᔪᖓ ᒪᒃᑯᒃᑐᓂ ᑕᐅᑐᖅᑰᖅᑕᖃᖅᑐᓂᑦ ᐃᓐᓇᕐᓄᑦ ᐃᓕᓐᓂᐊᕈᑎᒧᑦ, ᐊᓪᓗᕈᑎᑦᑎᐊᕙᒃ ᓯᕗᓂᒃᓴᒥᖕᓄᑦ.
ᐅᖃᖅᑎᑦᑎᔩ, ᖁᔭᒋᕙᒃᑲ ᓄᓇᓕᐅᔪᑦ ᑐᙵᓱᒃᑎᑦᑎᓚᐅᖅᑐᑦ ᐅᓂᒃᑳᖅᐸᒃᖢᑎᒡᓗ ᐅᕙᓐᓄ.
ᖁᔭᓐᓇᒦ, ᐅᖃᖅᑎᑦᑎᔨ.