Uqaqtittiiji,
Naittuni havainirni, Nunavut Kavamanga naunaiqhiniaqtut an’ngijuamik tikkiutijumik – 25 ni ukiuni.
Quviagiqpiaqtara nunakput. Ukiuq tamaat, talvanga piliurninggatigun inuutivunnut kavamaliqidjutit, uvagut hakugiqhijuummiktuguq. Ihumagupta kavamavut iglutut ittuq, apunmik atuqhuta piliuqpaktuguq kiqkariqtunik upalun’ngaijaqhimajait kin’ngulipta, pipluni tun’ngaviqhamik, havaqhugit igluliurnikkut.
Nunakput aulapkaihimajuq an’ngiqatigiiqtuni kavamani hivuliqtigijauplutik Inuit Qaujimatuqanggitnit. Ihumaliurhimajuq kavamaliqidjutijaami nunakput haffuumatigut ihumaliuqtavut. PIdjutigiplugit nan’ngariplugit qaujimajait Inirniqhaavut talvuuna ukpirijainnik pidjutijait uvaptingnut. Kavamaliqidjutivut havauhiit hivuliqtigijaujuq nuatqatigiitiarniagutigun Aajiiqatigiinniq, ihumaqhaliurnikkut talvuuna uqaqhutik an’ngiqatigiingnikkutlu.
Nunallaavut an’ngiqlivalliajut pian’ngailiqhutiklu havaktilluta talvunamun aadlatkiiqtutigut nunallaami maniliurutit. Inuuhuktuutivut arnagutitlu tikiutiliqtait hivuniqhaliuqtamingnik pidjutillutik havaarijaqhani havaagiqtuni ajuittiarniqhatigunlu taapkuatut havauhidjutiliqidjutinut maligaqhanutlu. Hivuniqharijavut.
Nakuujumik iniktirutit talvani piutiptingni 25 ni ukiulgit, taimaaluli, sainiutaa Nunavut Nunainnut Ikajuutinutlu Nanminiqhuurnikkut An’ngirutaa, tapkupkaqtitaujuqlu Iidjirurvia 14 mi Inunnguqsaivik: Ajuiqharniq hulidjutikhamun. Piliurtaat GN kut, NTI, Kanatap Kavamaitalu, una nutaaq ajuirhanikkut ikajuutiqhaq piumania ikajuutauniaqtuq imaa pijaami Nunavut Inuit munarijaamingnik hivuliqtirinirmun Nunavutim nunainnik, imait, ikajuutitlu — havaaqhat munarijaqarniitlu nuutiqtauqpata kavamatuqainnit GN kunnut.
An’ngiqlivallialiqtilluta nunaptingni kavamauplutalu, ihariagijavut amigaittumik inuulrammiit Nunavunmiutat ilauqulutik inungnut kivraqtuqlugit. Nunavut Kavamanga havaktiqhaqhiuginnaktut havaliqtiliqhugit. Takulugu GN qaritaujakkuuguta nalvaaqhijaami havaaqhamik naammarijarniq ilingnut. Inungnut kivraqtuinikkut pijariaqaqtuq apqutimun hivumut. Ikajuutiluta naupkaqlugu Nunavut, kiqkariqtumin kiqkariqtumun, imaa 25 ni ukiuni amigaittumik quviahuutiginiaqtuguq.
Kingulikpamik, niriuktunga 25nik itqaumavidjutia quviahuutaujuq tamaani nunaptingni. Ilauqujatka Nunavunmiut ilaulutik puiguqtailiplugu una ikpingnaktuq tikiutihimajuq, kihimi ikajuqluhilu naupkariami hivuniqhami.
Quana, Uqaqtittiiji.