Iqaluit, Nunavut (Aakassi 23, 2023) – Nunavut Kavamanga havaktun aitturiami $250,000 uvunga United Way Nunatsiami (NWT) Amigarnarnikkut Kiudjutikkut Maniliqtuutikhanik ikajutikhat inungnun hulaqutihimajun ikualaarnirnin.
Amigaittun Nunatsiamiutat qimaaqujauhimajun talvannga qajangnarnirmin qanittunin ikualaarutinin, tadjalu qajangnarniq qaangiutihimangittuq. Ikajuriami taapkunanik hulaqutauhimajun hulaqutauhimmaaqtullu qimaahimajullu, hapkuat maniliqtuutikhat tuniuqhaktauniaqtun tahamanirmiutanun ukunungalu aallakkiingnun timiqutinun tuniuqhaktut ikajurutikhanik aturutikhaniklu qimaahimajunun.
Una Ukiuqtaqtumi Amigarnikkut Munaridjutikkut Timiquti havaqatigijait hulaqutihimajun ukuallu qajangnaqhittaaqtun nunallaat pihimmaaqtullu unniudjutinik tamainnin avikturhimanirnin. Nunatsiap Kavamanga (GNWT) havaqatigihimmaaqtait kavamatuqatkut, nunallaani ukuallu Nunaqaqqaaqtuni kavamait ikajuutikkut ikajuriamilu munarinikkut uminnga amigarnirnikkut kiudjutimik.
Una United Way timiqutiujuq pivakhimajuq aittuutinik naliinnin pivikhanin tuniuhaliqpakhutillu maniliqtuutikhat aallanun timiqutinun ilaujun kiudjutikku hapkunani piliqhimajuni. Una aittuuti tunijuq ilaujunik ikajuutiknik nunallaanun ihariahuktunun, avataani tadja aturutikhani atuqtauhimajuni tujuqtaujun ajuqhautiuliqtunun ikajuutikhat.
Uqautaujut
"Akhuurnaqtun amigharnarhijuni havagutit ihariagijauhimmaaqtun ikajuriami qimaktuidjutainni amigaittuni inungni Nunatsiami unalu Nunavut Kavamanga quviahuktuq tunijaami $250,000 uvunga United Way NWTmun. Hapkuat maniliqtuutikhat pidjutiuniaqtun havagutainnun timiqutin tunngahuktittijun ikajuqtullu amigaittunun inungnun qimaaliqtun NWTmi ikualaaqtuni, ilaujullu ilagijait piqpagijaillu Nunavunmiutanin.”
- P.J. Akeeagok, Nunavutim Hivuliqtia
"Taamna United Way NWT’p ikajuutaa nunallaanun tamaani ukiuqtaqtumi ihariagijauqpiaqtuq uvani ikualaarnirmi ukunanilu amigaittuni aallani pidjutini. Nunavut Kavamanganin aittuuta pipkarniaqtaa United Way NWT tuniqhaiffaaqhimmaarninganik maniliqtuutikhanik uvani ajurnaqtumi, qujagijumajaralu Hivuliqti Akeeagok kavamangalu tuniqhaidjutainnik.”
- Caroline Cochrane, Hivuliqti NWTmun
"Ukiuqtaqtumiu ikajuraanginnaqtun aallanun Ukiuqtaqtumiinnun, unalu quvianaqpiaqtuq ihariagilirnirmilu naunaitkutaujuq taimaatun. Tuniuqhakhimajavun avatquhimajumik $750,000 timiqutinun ikajuuqtun qimaajunun uvani ikualaarnirmi. Pidjutaujuqlu angijunik aittuutinin imaatun uumannga Nunavut Kavamanganin. Una angijuq aittuuti havagutauqpiarniaqtuq kiudjutikkut amigaitpiaqtunun tukhirutinin tujuqtaujun uvaptiknun timiqutinin qiniqhiajun ikajuutikhanik ikajuriami qimaajunik.”
- David Connelly, Ikhivautalik United Way NWT Amigarnarnikkut Kiudjutikkut Katimajiit
Itquumajut
Una Nunavut Kavamatkut tuklirijaa aittuutaanik uvunga United Way NWTmun 2023mi, hivulliqpaaq una $25,000 ikajuutikkut ikualaaqtunin qimaajunun Hay River-min ukunanilu Kátł’odeeche First Nation-min.
Kitkullikaak aitturumajun uvunga NWT Ikualaarnikkut Kiudjutimun pijaaqtun haamni: https://www.canadahelps.org/en/dn/82499?v2=true.
Pidjutiqaqtun Atadjutit