Hivuliqti P.J. Akeeagok ublumi tunijaa una uqauti mighaagun Angijuqqaarjuami Justin Trudeau-p taimaaqtirniaqhimadjutaani:
“Qujagijumajara Angijuqqaarjuaq Justin Trudeau tuhimadjutaani Nunavunmun tamaanullu Kanadamun.
Angijuqqaarjuaq Trudeau taimunga ilitarijauniaqtuq hivulliuqtiujuq sainiqhimajuq Nunavunmi Nunainnun Piqutainnullu Naminiqhuqharutikkut Angirutimi, nuutiqhugin avatquhimajun malruungni millionni square kilometersnik nunanik imainnilu Nunavunmiunnun, pipkainikkut ihumaliurutit ukunani nunamin piqutikhat imiqtaaqtullu imait piliuqtauhimajaaqtun aihimaviptingni.
Hivuliqtiuplunga Nunavunmun, quviahuutiqaqtunga havaqagtigivakkapku Angijuqqaarjuaq Trudeau kavamangalu ukunani qaffiujuni piniaqhimadjutini, talvanga $10-ublumi nutaqqiqivingnun umunga Ukiuqtaqtumi atanniqtuidjutaanun amirinianullu.
Angijuqqaarjuaq Trudeau taututihimajaa havakpiarumanirnia Ukiuqtaqtumun; pulaaqpakhugu Nunavutim ataniqarvia ukuallu ungahiktun nunallaat qaffiuqtaqhuni, ilaani ilaujun nutarait.
Talvanga niruaqtauninganin 2015mi, Angijuqqaarjuaq Trudeau hivulliutihimavaktait ihariaginiit Inuinnarni nunaptingni, piqaqhuni akhuurutimik mamiharutikhanun. Quviahukpiarutigijara ikajuuraanginnarutaa ilitarinikkut akhuurnaqtumi havagutinik uvani Qikiqtani Itquumanikkut Havagutini tuniudjutaanullu mamianaarutinik pidjutigiplugu Kanada ukununga ajuqhautidjutinik atuqtauvaktunin Inuinnarnin.
Ataani Angijuqqarjuap Trudeau hivulliurutaanin, Nunavut iliqtuq pivikkut uumunga Tallurutiup Imanga Kanadami Imakkut Tammaqtailinirnun Inia uvanilu Tuvaijuittuq Imakkut Hapummijaujuq Inia, atauttikkut amirijait avatquhimajun 425,000 square kilometers-nik imarni hinaanilu nunami.
Pigaluaqhuta ilaani aallakkiigutikkut qanuqtun kiujaami ihumagijaujuni, pidjutiqatigiiktugun amigaittuni aajjikkiiktuni hivulilutiujumajaptingnik, imaatun havagutigiplugin igluhatigun ajuqhautiqarnia.
Tujuutigijara Angijuqqaarjuaq Trudeau nakuaqqutinik hivunikhani niriuktungalu havaqatigijaami himmautikhaa ukunani Nunavutim hivulliutiujumajainni. Pidjutiplugin tamaita Nunavunmiutat, tujuqtatka quivahuutitka Angijuqqaarjuamun Trudeau-mun ukununga qaffini ukiuni hivuliqtiudjutainni, havagutainni, ikajuutainni akhuurutainnilu Ukiuqtaqtumun.”