ᐃᖃᓗᐃᑦ, ᓄᓇᕗᑦ (ᑎᓯᐱᕆ 6, 2024) – ᓄᓇᕗᑦ ᒐᕙᒪᒃᑯᑦ, ᐱᓕᕆᖃᑎᖃᖅᖢᑎᒃ Microsoft−ᑯᓐᓂ, ᐅᐱᒍᓱᒃᖢᑎᒃ ᑐᓴᖅᑎᑦᑎᕗᑦ ᓴᖅᑭᑕᐅᓂᖓᓂᒃ ᐃᓄᒃᑎᑐᑦ ᑎᑎᕋᐅᓯᑦ ᐅᖃᐅᓯᐅᔪᒃᓴᓂᒃ ᐊᐅᓚᓂᖏᓐᓂᒃ AZure AI ᐅᖃᕆᐅᖅᓴᑎᑦᑎᔨᓂᒃ. ᑎᑎᕋᖃᑦᑕᐅᑎᓂᖅ ᐅᖃᓪᓚᖕᓂᐊᕐᓗᓂ ᒫᓐᓇ ᒪᓂᒪᓕᖅᐳᑦ Edge browser−ᑯᑦ, ᐊᑐᕐᓗᒍ Read Aloud, ᐊᒻᒪᓗ Microsoft Translator Bing−ᒥ, ᐊᒻᒪᓗ ᐃᓚᔭᐅᓗᐊᒃᑲᓐᓂᓛᖅᑐᑦ Microsoft−ᒧᑦ ᐊᑐᖅᑕᐅᕙᒃᑐᓂᒃ ᐃᓚᓕᐅᔾᔭᐅᔪᖃᓛᖅᖢᓂ 2025−ᒥ. ᑕᒪᓐᓇ ᐊᓂᒍᖅᑎᑕᐅᔪᖅ, ᐃᓚᒋᔭᐅᓪᓗᓂ ᔭᒐᑎᑦᑎᑦᑕᐃᓕᒪᓂᕐᒧᑦ ᐅᔾᔨᕐᓇᖅᓯᑎᑦᑎᓂᕐᒧᓪᓗ ᐃᓄᒃᑐᑦ ᐱᓕᕆᔾᔪᑕᐅᕙᒃᑐᓄᑦ ᐱᓕᕆᐊᖑᕙᒃᑐᑎᒍᑦ, ᑲᔪᓯᑎᑕᐅᓪᓗᓂ ᐃᓕᖅᑯᓯᓕᕆᔨᒃᑯᓐᓄᑦ, ᐊᒃᑐᐊᓂᖃᖅᐳᖅ ᐊᕐᕌᒍᒐᓴᕐᓄᑦ ᐱᓕᕆᐊᖃᓪᓚᕆᒍᒪᕙᖕᓂᖏᓐᓄᑦ, ᓄᓇᓕᖕᓂ−ᑲᔪᓯᑎᑕᐅᔪᓄᑦ ᐱᓇᔪᒃᑕᐅᔪᓄᑦ ᑕᒪᓐᓇ ᐅᖃᐅᓯᖅ ᒪᓂᒪᓂᖅᓴᐅᖁᓪᓗᒍ ᐃᓚᓕᐅᔾᔭᐅᓯᒪᓗᓂᓗ ᖃᐅᑕᒫᑦ ᐃᓅᓯᕆᔭᐅᔪᓄᑦ ᓄᓇᕘᓕᒫᒥ.
"ᑖᓐᓇ ᑲᑐᔾᔨᖃᑎᒌᖕᓂᖅ ᐅᖃᐅᓯᖃᖅᑐᖅ ᓴᙱᓂᖏᓐᓂᑦ ᑲᑐᔾᔨᖃᑎᒌᖕᓂᕐᒥᑦ ᐱᒻᒪᕆᐅᓂᖓᓂᓪᓗ ᑲᑎᑎᑦᑎᓂᕐᒥᑦ ᐱᖅᑯᓯᕐᓂᑦ ᐱᓕᕆᔾᔪᑎᓂᓪᓗ. ᐅᖃᐅᓯᕐᒧᑦ ᐱᔾᔪᑎᑦ ᐊᒻᒪᓗ ᐃᓄᐃᑦ ᐅᖃᐅᓯᖓ ᐆᒪᐃᓐᓇᖅᑎᑕᐅᓂᖅ ᐱᒻᒪᕆᐅᔪᖅ ᓴᐳᔾᔨᓂᕐᒧᑦ ᐊᒪᓗ ᐊᓯᐅᔨᑦᑕᐃᓕᓂᕐᒧᑦ ᐱᖅᑯᓯᑦᑎᓐᓂᒃ, ᐱᖅᑯᓯᑐᖃᕐᓂᒃ ᐊᒪᓗ ᐱᒻᒪᕆᐅᒋᔭᐅᔪᓂᒃ," ᐅᖃᖅᑐᖅ ᓯᕗᓕᖅᑎ P.J. ᐊᕿᐊᕈᖅ, ᒥᓂᔅᑕ ᐃᓕᖅᑯᓯᓕᕆᔨᒃᑯᓐᓄᑦ. "ᑖᓐᓇ ᐱᓕᕆᐊᒃᓴᖅ ᐊᔪᕐᓇᙱᑦᑐᖅ ᐱᓪᓗᒍ ᐊᒃᓱᕈᖅᖢᑎᒃ ᐃᖅᑲᓇᐃᔭᕐᓂᕐᒧᑦ ᑐᓂᓯᒪᑦᑎᐊᖅᖢᑎᒡᓗ ᓄᓇᕗᒻᒥᐅᓄᑦ ᓄᓇᕗᓕᒫᒥ, ᐅᓄᖅᑐᑦ ᑐᓂᓯᓪᓗᑎᒃ ᖃᐅᔨᒪᓂᕐᒧᑦ ᐊᔪᙱᓐᓂᖏᓐᓂᒡᓗ ᑖᓐᓇ ᐱᓇᔫᑎ ᐱᓪᓚᑦᑖᖑᖁᓪᓗᒍ. ᐱᓇᔪᖕᓂᕆᔭᓯ ᑐᑭᖃᕐᓂᐊᖅᐳᖅ ᐊᑐᐃᓐᓇᖃᐃᓐᓇᕐᓂᕐᒥᒃ ᐃᓄᒃᑐᑦ ᐱᓕᕆᔾᔪᑎᑦᑎᓐᓄᑦ−ᐱᕈᖅᓴᐃᓂᕐᒧᑦ ᑭᖑᕚᑦᑎᓐᓄᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ.”
ᐱᕈᖅᐸᓪᓕᐊᑎᑦᑎᓂᖅ ᑲᔪᓯᑦᑎᐊᕐᓂᕐᒥᒃ ᓯᕗᓂᐊᒍᑦ ᑲᔪᓯᑦᑎᐊᕐᓂᕐᒧᑦ−ᐃᓚᐅᓗᓂ ᖃᐅᔨᑎᑦᑎᓂᖅ ᑎᑎᕋᖅᓯᒪᔪᓂᒃ ᐃᓄᒃᑎᑐᑦ ᑎᑎᕋᐅᓯᑦ 2021−ᒥ ᐊᒻᒪ ᖃᓕᐅᔮᖅᐸᐃᑦ ᐊᒻᒪ ᐃᓄᐃᓐᓇᖅᑐᓐ 2022−ᒥ−ᐅᖃᓘᑎᒃᑯᑦ−ᐅᖃᓪᓚᒃᑕᐅᔪᒃᓴᓂᒃ ᐊᐅᓚᓂᕆᔭᖏᓐᓂᒃ ᐊᖏᒡᓕᒋᐊᖅᑎᑦᑎᕗᖅ ᐊᑐᕈᓐᓇᕐᓂᕐᒥᒃ ᐅᖃᐅᓯᕐᒧᑦ. ᐊᑐᖅᖢᑎᒃ ᓂᐱᓕᐅᖅᓯᒪᔪᓂᑦ ᐅᖃᓪᓚᒍᓐᓇᑦᑎᐊᖅᑐᓂᑦ ᓄᓇᓕᖕᓂᑦ, Microsoft's ᑎᑎᕋᐅᓯᑦ ᐅᖃᐅᓯᐅᔪᒃᓴᑦ ᐃᓕᓐᓂᐊᖅᑕᐅᓚᐅᖅᑐᖅ ᐃᓄᒃᑎᑐᑦ ᐅᖃᓪᓚᖕᓂᕐᒥᑦ. ᐊᑐᖅᖢᑎᒃ ᐱᐅᓯᒋᐊᖅᓯᒪᔪᓂᒃ AI ᐱᓕᕆᔾᔪᑎᓂᒃ, ᒪᕐᕉᒃ ᓂᐱᐅᔫᒃ ᓴᓇᔭᐅᓪᓗᑎᒃ Azure Speech AI ᖃᑕᙳᑎᖏᓐᓂ, ᓯᕿᓂᖅ (ᐊᕐᓇᖅ) ᐊᒻᒪᓗ ᑕᖃᖅ (ᐊᖑᑦ). ᓴᖅᑭᑕᐅᓂᐊᕐᓂᖓ ᑎᑎᕋᖅᓯᒪᔪᑦ ᐅᖃᐅᓯᐅᔪᒃᓴᑦ ᐊᐅᓚᓂᕆᔭᖏᑦ ᐃᓄᐃᓐᓇᖅᑐᓐ ᓂᕆᐅᓇᖅᓯᓛᖅᑐᑦ 2025-ᒥ.
"ᑖᓐᓇ ᑲᑐᔾᔨᖃᑎᒌᖕᓂᖅ, ᑲᑎᑎᑦᑎᔪᒍᑦ ᐃᓱᒪᒋᔭᐅᑦᑎᐊᖅᓯᒪᔪᑦ AI ᐱᓕᕆᔾᔪᑎᑦ ᐃᓕᖅᑯᓯᑦᑎᐊᕆᒃᑐᒻᒪᕆᐊᓗᐃᑦ ᐃᓄᐃᑦ ᐅᖃᐅᓯᖏᓐᓂᒃ," ᐅᖃᓚᐅᖅᐳᖅ ᑯᕆᔅ ᐱᐅᕆ, ᐊᖓᔪᖅᑳᖅ Microsoft Canada−ᑯᓐᓄᑦ. "ᑖᓐᓇ ᐱᓕᕆᐊᖅ ᓇᓗᓇᐃᖅᓯᔪᖅ ᓴᙱᓂᖃᑦᑎᐊᖅᑐᓂᑦ ᑲᑐᔾᔨᖃᑎᒌᖕᓂᕐᒥᑦ ᓴᖅᑭᑎᑦᑎᓂᕐᒥᑦ ᑐᑭᖃᑦᑎᐊᖅᑐᓂᑦ, ᐊᓯᔾᔨᖅᑐᐃᓂᕐᒧᑦ ᐋᖅᑭᒋᐊᕈᑎᒃᓴᓂᑦ. ᐅᐱᒍᓱᒃᐳᒍᑦ ᐱᓕᕆᖃᑎᖃᕆᐊᒃᓴᖅ ᓄᓇᕗᑦ ᒐᕙᒪᒃᑯᑦ ᓄᓇᓖᓪᓗ ᓴᓂᐊᓂ ᓄᓇᕗᒻᒥ ᐃᓄᒃᑐᑦ ᐅᖃᐅᓯᖅ ᐊᑐᐃᓐᓇᐅᖁᓪᓗᒍ ᖃᕋᓴᐅᔭᒃᑯᑦ."
ᑖᓐᓇ ᓄᑖᖅ ᐊᐅᓚᓂᖅ ᑐᕌᒐᖃᖅᑎᓪᓗᒍ ᐱᐅᓯᒋᐊᕐᓗᒍ ᖃᐅᑕᒫᑦ ᖃᓄᐃᓕᐅᖃᑎᒌᖕᓂᕐᒧᑦ ᐱᑎᑦᑎᓗᓂᓗ ᐊᑐᓚᐅᖅᓯᒪᙱᑦᑐᒥᒃ ᐱᔪᓐᓇᕐᓂᕐᒥᒃ, ᐃᓇᖐᙱᑦᑐᖅ ᐱᓕᕆᔨᒻᒪᕆᖕᓂᒃ ᑐᓵᔨᓂᒃ ᑐᑭᓕᐅᕆᔨᓂᒡᓘᓐᓃᑦ. ᐃᒪᓐᓇᖔᕐᓕ, ᐃᑲᔫᑕᐅᔪᓐᓇᖅᐳᖅ ᑐᓴᐅᒪᔪᓕᕆᔾᔪᑎᓄᑦ, ᐱᕚᓪᓕᖅᑎᓪᓗᒍ ᐃᓄᒃᑐᑦ ᐅᖃᐅᓯᖅ ᐊᔾᔨᒌᙱᕈᓘᔭᖅᑐᓄᑦ ᐋᖅᑭᒃᓯᒪᔪᓄᑦ ᐊᔪᕐᓇᙱᓐᓂᖅᓴᐅᑎᖦᖢᒍᓗ ᐃᓚᓕᐅᑎᒋᐊᒃᓴᖅ ᖃᐅᑕᒫᑦ ᐃᓅᓯᕆᔭᐅᔪᒧᑦ.
ᐊᑐᖅᑏᑦ ᒫᓐᓇ ᐊᑐᕈᓐᓇᖅᓯᕗᑦ ᐃᓄᒃᑎᑐᑦ ᐃᑲᔪᖅᑐᐃᓗᑎᒃ ᐅᓂᒃᑳᖅᑐᐊᕐᓂᕐᒥᒃ, ᐃᓕᖅᑯᓯᑐᖃᕐᓂᒃ ᑐᓴᐅᒪᖃᑎᖃᕐᓂᕐᒥᒃ, ᐱᓕᕆᔨᓪᓚᕆᐅᓂᕐᒧᓪᓗ ᑐᓴᐅᒪᑎᑦᑎᓂᕐᒥᒃ. ᓄᑕᖅᑲᑦ ᑐᓵᔪᑦ ᐱᖅᑯᓯᑐᖃᕐᓂᑦ ᐅᓂᒃᑳᓂᑦ ᐅᖃᐅᓯᑐᖃᖏᓐᓂᑦ, ᐃᓐᓇᕐᓄᑦ ᖃᐅᔨᒪᖃᑎᖃᕐᓂᕐᒧᑦ ᒪᒃᑯᖕᓂᖅᓴᓄᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᖅᑎᓄᑦ ᐃᓄᒃᑎᑐᑦ ᐊᑐᖅᑐᓄᑦ ᐱᒻᒪᕆᐅᔪᓂᑦ ᑐᓴᐅᒪᖃᑦᑕᐅᑎᓂᕐᒥᑦ, ᑖᓐᓇ ᐱᓕᕆᔾᔪᑎ ᐃᑲᔪᖃᑦᑕᖅᑐᖅ ᑭᖑᕚᕇᓄᑦ ᐱᓕᕆᕝᕕᐅᔪᓄᓪᓗ.
ᑐᑭᓯᒋᐊᒃᑲᓐᓂᕈᒪᒍᕕᑦ ᐱᓕᕆᐊᑉ ᒥᒃᓵᓄᑦ ᐅᕝᕙᓘᓐᓃᑦ ᑕᕐᕆᔭᕈᒪᒍᕕᑦ, ᐅᕗᙵᕐᓗᑎᑦ: ᐅᖃᐅᓯᕐᒥᒃ ᐊᓯᐅᔨᑦᑕᐃᓕᓂᖅ ᐊᒻᒪ ᓴᖅᑭᔮᖅᑎᑦᑎᓂᖅ ᐱᓕᕆᔾᔪᑎᑎᒍᑦ: MS Translator ᐱᓕᕆᐊᖅ | ᓄᓇᕗᑦ ᒐᕙᒪᖓ.