ᓄᓇᕗᒻᒥ ᓯᕗᓕᖅᑎ ᐸᐅᓗᓯ ᐊᕿᐊᕈᖅ ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᑯᓂᖓ ᐅᖃᐅᓯᒃᓴᓂᒃ:
"ᐋᔩᖃᑎᖃᖅᐸᓪᓕᐊᖏᓐᓇᖅᑎᓪᓗᒋᑦ ᑲᓇᑕᒥ, ᒐᕙᒪᒃᑯᑦ ᓄᓇᕗᒻᒥ ᑭᒡᒐᖅᑐᐃᕗᑦ ᐅᓄᖅᓯᒋᐊᖁᔨᓪᓗᑎᒃ ᐊᑐᕈᓐᓇᑦᑎᐊᖅᑐᓂᑦ ᑕᑎᒋᔭᐅᔪᓐᓇᖅᑐᓂᒃ ᐋᓐᓂᐊᖅᑐᓕᕆᓂᕐᒥᑦ ᓄᓇᕗᒻᒥᐅᓄᑦ.
"ᕕᐅᓪᓗᐊᓕ 15-ᖑᑎᓪᓗᒍ, ᑐᙵᓱᑦᑎᓚᐅᖅᐸᕋ ᐃᖃᓗᓐᓄᑦ ᒐᕙᒪᑐᖃᒃᑯᑦ ᒥᓂᔅᑕᖓᑦ ᒐᕙᒪᓕᕆᔨᒃᑯᓐᓄᑦ ᑖᒥᓂᒃ ᓚᑉᓛᖕᒃ, ᒥᓂᔅᑕᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔩᓐ−ᐄᕝᔅ ᑑᒃᓗᔅ. ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ ᐊᒻᒪ ᑮᓇᐅᔭᓕᕆᔨᒃᑯᑦ ᒥᓂᔅᑕᖓ ᖁᐊᓴ ᑯᓱᒐᖅ ᐅᖃᖃᑎᒌᖃᑕᐅᓚᐅᖅᐳᑦ. ᑖᓐᓇ ᑲᑎᒪᓂᖅ ᑲᔪᖏᖅᓴᐃᓂᐅᕗᖅ.
"ᓱᓕ, ᐋᔩᖃᑎᒌᑉᐸᓪᓕᐊᑎᓪᓗᑕ ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓅᑕᐅᔪᓂᒃ (CHT) ᐊᓯᖏᓐᓂᓪᓗ ᑕᒪᐃᓐᓄᑦ ᐊᖏᖃᑎᒌᒍᑎᓂᒃ ᐋᓐᓂᐊᖅᑐᓕᕆᓂᕐᒧᑦ ᑮᓇᐅᔭᓂᒃ, ᓇᓗᓇᐃᖅᓯᔭᕆᐊᖃᖅᐳᖓ ᐱᔭᕆᐊᖃᕐᓂᖏᓐᓂᒃ ᑮᓇᐅᔭᓕᐅᕈᑕᐅᓇᓱᐊᖅᑐᓂᒃ ᓄᓇᕘᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑮᓇᐅᔭᓕᐅᕈᑕᐅᓯᒪᔪᑦ ᑮᓇᐅᔭᑦ ᐊᑐᕐᓗᒋᑦ (THIF). ᓄᓇᕗᑦ ᑕᑎᖃᕐᒪᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᑮᓇᐅᔭᓕᐅᕋᓱᐊᕈᑎᓂᒃ ᐊᑐᖅᑕᐅᔪᓂᒃ ᐊᑭᑐᓗᐊᕐᓂᖏᓐᓄᑦ ᑲᔪᓯᑎᑦᓯᓂᕐᒧᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᔨᑦᓯᕈᑕᐅᔪᑦ ᓇᓗᓇᐃᖅᑕᐅᓯᒪᙱᑦᑐᑦ ᐊᑐᓂᑦ ᐃᓗᖃᕐᓂᖏᑎᒍᑦ ᓅᑕᐅᔪᑦ.
ᓄᓇᕗᒻᒥ ᓴᓂᕐᕙᒃᑕᐅᓯᒪᔪᑦ ᐋᓐᓂᐊᖅᑐᓕᕆᓂᕐᒧᑦ ᑮᓇᐅᔭᓕᐅᕈᑕᐅᔪᑦ ᐊᑯᓂᐊᓗᒃ 50%−ᒦᖃᑦᑕᖅᓯᒪᕗᑦ, ᒫᓐᓇ $13.5 ᒥᓕᐊᓐ ᐊᕐᕌᒍᑕᒫᑦ, ᓄᓇᕗᒻᒥ ᓴᖅᑭᑎᑦᑐᒪᓪᓗᒍ ᐊᖏᔪᐊᓗᒃ ᐊᒻᒪ ᐊᔾᔨᒋᔭᐅᙱᑦᑐᖅ ᐊᑲᐅᙱᓕᐅᕈᑕᐅᔪᑦ ᐱᔪᓐᓇᕐᓂᖃᕐᕕᑦᑕ ᐅᖓᑖᓅᖅᑐᓂᑦ ᑲᓇᑕᒥ, ᐃᓚᒋᔭᐅᓪᓗᓂ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᑦ.
“ᐊᑕᐅᑦᑎᒃᑯᑦ ᓄᓇᑦᓯᐊᖅ ᐊᒻᒪ ᔫᑳᓐ, ᒐᕙᒪᕗᑦ ᑎᑎᕋᖅᓯᒪᕗᑦ ᑲᓇᑕᐅᑉ ᐊᖓᔪᖅᑳᕐᔪᐊᖓᓄᑦ ᑐᕉᑑᒧᑦ, ᒐᕙᒪᑐᖃᒃᑯᓐᓂ ᐃᓱᒪᑦᓴᖅᓯᐅᒃᑲᓐᓂᖁᔨᓪᓗᑎᒃ ᑐᑦᓯᕋᐅᑕᐅᔪᒥᒃ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᑐᓂᓯᓯᒪᔪᑦ ᓅᕙᐃᒻᕙᒥ. ᑖᓐᓇ ᑐᑦᓯᕋᐅᑦ ᐋᖅᑭᑦᓯᓂᐊᖅᐳᖅ ᐊᕕᑦᑐᖅᓯᒪᔪᓂ ᐋᓐᓂᐊᖅᑐᓕᕆᓂᕐᒧᑦ ᑮᓇᐅᔭᓕᐅᕈᑕᐅᔪᓂᑦ $75 ᒥᓕᐊᓂᒃ ᐊᕐᕌᒍᒧᑦ ᐊᑕᐅᓯᕐᒧᑦ – 50% ᓄᓇᕗᒻᒧᑦ, 26% ᓄᓇᑦᓯᐊᒧᑦ, ᐊᒻᒪ 24% ᔫᑳᓐᒧᑦ.
"ᑕᒪᕐᒥᑦᑎᐊᖅ ᑲᓇᑕᒥ ᓯᕗᓕᖅᑏᑦ ᐃᓕᓴᖅᓯᕗᑦ ᐊᔾᔨᖃᙱᑦᑐᓂᒃ ᐊᑐᖅᑕᖏᓐᓂᒃ ᐊᕕᑦᑐᖅᓯᒪᔪᓂ, ᐅᖃᐅᓯᖃᖅᓯᒪᓪᓗᑎᓪᓗ ᐃᑲᔪᖅᑐᐃᔪᒪᓪᓚᕆᓐᓂᖏᓐᓂᒃ ᐱᐅᓯᒋᐊᖅᓯᒪᔪᒥᒃ ᐊᕕᑦᑐᖅᓯᒪᔪᓄᑦ ᐊᑐᐃᓐᓇᐅᑎᑦᓯᔪᒪᓪᓗᑎᒃ ᑮᓇᐅᔭᑦ ᐊᕐᕌᒍᖓᓂ ᓇᓗᓇᙱᑦᑎᐊᖅᑐᒥ.
"ᓂᕆᐅᑉᐳᖓ ᒐᕙᒪᑐᖃᒃᑯᓐᓂ ᐱᓕᕆᖃᑎᖃᕐᓂᐊᕐᓂᓐᓂ ᓄᑖᙳᕆᐊᖅᓯᒪᔪᒥᒃ ᐊᖏᖃᑎᒌᒍᑎᒧᑦ ᑎᑭᐅᑎᖁᓪᓗᑕ ᐃᑲᔪᖅᑐᐃᔪᒥᒃ ᓄᓇᕗᒻᒥᐅᓂᑦ ᐱᔭᐅᔭᕆᐊᓕᖕᓂᑦ ᑐᑭᓯᓇᑦᓯᐊᖅᑐᑎᒍᑦ ᐊᑐᖅᑕᐅᑦᑎᐊᕈᓐᓇᖅᑐᒃᑯᓪᓗ ᐋᓐᓂᐊᖅᑐᓕᕆᓂᕐᒧᑦ ᑮᓇᐅᔭᖅᑖᖅᑎᑕᐅᔪᑦ."