ᐅᖃᖅᑎᑦᑎᔩ, ᓇᖏᖅᓯᕗᖓ ᐅᓪᓗᒥ ᐅᖃᐅᓯᖃᕈᒪᓪᓗᖓ ᐅᐱᓐᓇᕐᑐᖅ ᐃᒃᓯᕋᕐᔪᐊᕌᐱᒃ ᕗᕌᓐᓯᔅ ᐳᓛᕐᓂᕆᓚᐅᕐᑕᖓᓂ ᔪᓚᐃ 29, 2022−ᒥᑦ.
ᓯᕗᓪᓕᕐᒥᑦ ᖁᔭᓕᔪᒪᕙᒃᑲ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᓯᕗᓕᖅᑎᐅᓚᐅᕐᓂᖏᓐᓂᑦ ᐋᖅᑭᒃᓱᐃᓪᓗᑎᒃ ᖃᓄᐃᓕᐅᕐᑕᐅᓂᐊᕐᑐᓂᑦ.
ᐅᖃᖅᑎᑦᑎᔩ, ᓄᓇᕗᑦ ᒐᕙᒪᒃᑯᖏᑦᑕ ᐱᓕᕆᐊᖓ ᐃᒃᓯᕋᕐᔪᐊᕌᐱᐅᑉ ᐳᓛᕐᓂᖓᓄ ᐃᓚᖃᓚᐅᕐᑐᖅ ᑐᙵᓱᒃᑎᑦᑎᓪᓗᓂ ᐅᐱᓐᓇᕐᑐᒥᑦ ᓄᓇᕗᒻᒧᑦ ᐊᐅᓪᓚᓕᕐᑎᓪᓗᒍᓗ ᑲᓇᑕᒥᑦ. ᐃᓚᐅᓂᕆᓚᐅᕐᑕᕗᑦ ᒪᓕᓚᐅᕐᑐᑦ ᓯᕗᓕᖅᑎᓂ ᑕᐅᑐᖅᑰᖅᑕᖏᓪᓗ ᐊᒥᓱᓂ ᐃᓕᓐᓂᐊᕆᐊᕐᐸᓚᐅᕐᓯᒪᔪᓂᑦ.
ᒪᓕᒃᖢᒋᑦ ᐃᓐᓇᐃᑦ ᐅᖃᐅᔾᔪᐃᓂᖏᓐᓂᑦ ᐱᓕᕆᐊᖃᒻᒪᕆᓚᐅᕐᐳᒍ ᐃᓕᖅᑯᓯᑦᑎᓐᓂᑦ, ᐅᖃᐅᓯᑦᑎᓐᓂᑦ ᐱᐅᓯᑦᑎᓐᓂᓪᓗ ᐳᓛᕆᐊᕐᓯᒪᑎᓪᓗᒍ.
ᐅᐱᑦᑎᐊᕐᑐᖓ ᐱᓕᒻᒪᕆᓚᐅᕐᓂᖏᑦ ᐃᓐᓇᐃᑦ ᐅᖃᐅᔾᔪᐃᔨᕗᑦ ᐅᔾᔨᕈᓱᒃᑎᑦᑎᓇᓱᒃᖢᑎᒃ ᓱᓕᔪᒥ ᐃᓄᐃᑦ ᐊᑐᓚᐅᕐᑕᖏᓐᓂᑦ ᐃᓕᓐᓂᐊᕐᕆᐊᕐᑎᑕᐅᓯᒪᑎᓪᓗᒋᑦ. ᖁᔭᓐᓇᒦᒻᒪᕆᐊᓗᒃ ᐊᓕᒃᓯᓈ ᑯᑉᓗ, ᐋᓐᑐᕆᐊ ᑕᐅᑐ, ᔮᒃ ᐊᓇᕈᐊᖅ ᐊᒻᒪᓗ ᐲᑕ ᐃᕐᓂᖅ ᐅᓂᒃᑳᕈᓐᓇᓚᐅᕐᒪᑕ ᐅᕙᓐᓄᑦ.
ᐅᖃᖅᑎᑦᑎᔩ, ᐊᖅᑯᑎ ᒪᒥᓴᕐᓂᖕᒧᑦ ᐃᒻᒥᒨᖓᕗ ᐊᓯᔾᔨᑲᑕᒃᐸᒃᖢᓂᓗ ᑕᒪᐃᓐᓄᑦ ᐃᓄᖕᒧᑦ. ᑭᓯᐊᓂᓕ, ᑐᓴᓚᐅᕐᐳᖓ ᐊᒥᓱᓂ ᐃᓐᓇᕐᓂ ᐃᒃᓯᕋᕐᔪᐊᕌᐱᐅᑉ ᐳᓛᕐᓂᕆᓚᐅᕐᑕᖓ ᒪᒥᐊᓐᓂᕆᓚᐅᕐᑕᖓᓄ ᐊᒃᑐᐃᓂᖃᓚᐅᕐᒪᑦ ᐃᒻᒥᓄᑦ ᒪᒥᓴᕐᓂᖏᓐᓄᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.