ᐅᖃᖅᑎᑦᑎᔩ, ᓇᖏᖅᓯᕗᖓ ᐅᓪᓗᒥ ᑐᓴᖅᑎᑦᑐᒪᓪᓗᒋ ᒪᓕᒐᓕᐅᕐᑎᐅᖃᑎᒃᑲ ᐅᑭᐅᖅᑕᖅᑐᒥ ᓯᕿᓃᓐᓇᖅᑑᑉ ᑭᒡᓕᖓᓂ ᑲᑎᒪᓂᐅᓚᐅᕐᑐᒥᑦ, ᐅᐱᒋᓚᐅᕐᑕᕋ ᐃᓚᐅᔭᕆᐊᒃᓴᖅ ᓅᒃ, ᑲᓛᖦᖠᑦ ᓄᓈᓐᓂᑦ.
ᐅᖃᖅᑎᑦᑎᔩ, ᔫᑳᓐ ᓯᕗᓕᖅᑎᐊ ᓵᓐ ᓯᐅᓪᕗ, ᓄᓇᑦᑎᐊᑉ ᓯᕗᓕᖅᑎᐊ ᑭᐅᕈᓚᐃᓐ ᑳᒃᕋᓐ ᐅᕙᖓᓗ ᐱᕕᖃᕐᑎᑕᐅᓚᐅᕐᐳᒍᑦ ᐅᖃᐅᓯᖃᕆᐊᒃᓴᖅ ᓴᙱᒃᑎᕆᓂᖕᒥᑦ ᓇᐅᑦᑎᕐᓱᕐᑎᓂᑦ ᓄᓇᖁᑎᐊᓂᓪᓗ ᑲᓇᑕᐅᑉ ᐅᑭᐅᖅᑕᖅᑐᖓᓂᑦ.
ᑲᑎᒪᓂᖕᒥᑦ ᐅᔾᔨᕈᓱᒃᑎᑦᑎᓚᐅᕐᐳᒍᑦ ᑮᓇᐅᔾᔭᒃᓴᕈᑕᐅᔪᑦ ᐱᔭᕆᐊᖃᓪᓚᕆᒃᑐᓂᑦ ᓄᓇᓖᑦ ᒪᑭᒪᔾᔪᑎᖏᓐᓂ ᑲᔪᓰᓐᓇᕈᓐᓇᖅᑐᓂᒃ ᐆᒻᒪᖅᑯᑎᖃᖅᑎᑦᑎᑦᑎᐊᕐᓗᑎᒃ, ᐊᑐᖅᑕᐅᑦᑎᐊᕈᓐᓇᖅᑐᓂᒃ ᐃᖏᕐᕋᔾᔪᑎᓂᒃ ᐊᒻᒪᓗ ᑐᓴᐅᒪᖃᑎᒌᖕᓂᑦ ᒪᕐᕉᖕᓂᒃ ᐱᔾᔪᑎᖃᕈᓐᓇᖅᐳᖅ ᓴᖅᑭᑎᑦᑎᕙᓪᓕᐊᓗᑎᒃ ᓴᐳᔾᔨᔾᔪᑎᓂᒃ ᓄᓇᓕᖕᓂᓪᓗ ᐱᔭᐅᔭᕆᐊᓕᖕᓂᒃ.
ᐅᖃᖅᑎᑦᑎᔩ, ᐅᓂᒃᑲᐅᓯᕆᔪᓐᓇᓚᐅᕐᑕᕗᑦ ᓄᓇᖁᑎᑦᑕ ᑕᐅᑐᖅᑰᖅᑕᖏᓐᓂᒃ ᐅᓗᕆᐊᓇᙱᑦᑐᒥ ᐅᑭᐅᖅᑕᖅᑐᒥᑦ ᓄᓇᓕᑦᑎᓐᓂᓪᓗ ᐱᕈᖅᓴᐃᓂᖅ ᐱᕚᓪᓕᕈᑎᒃᓴᑦ ᐋᓐᓂᐊᕐᑕᐃᓕᒪᔪᓕᕆᓂᖕᒥᑦ, ᓈᒻᒪᒃᑐᓂ ᐃᒡᓗᓂ, ᐃᓕᓐᓂᐊᕐᓂᖕᒥᑦ ᐊᒻᒪᓗ ᐱᕙᓪᓕᐊᔾᔪᑎᒃᓴᑦ ᐊᑐᐃᓐᓇᐅᔪᑦ.
ᐅᖃᐅᓯᖃᓚᐅᖅᐳᒍᑦ ᖃᓄᖅ ᐅᔭᕋᖕᓂᐊᕐᓂᖅ ᐱᕐᔪᐊᖑᑎᒋᖕᒪᖔᑦ ᐅᑭᐅᖅᑕᖅᑐᒥ ᑲᓇᑕᒥ ᐅᑭᐅᖅᑕᖅᑐᒥᐅᓪᓗ ᐱᒻᒪᕆᐅᔪᒥᒃ ᐱᓕᕆᐊᒃᓴᖃᕐᓂᐊᖅᐳᑦ ᑲᔪᓯᑦᑎᐊᖏᓐᓇᕈᓐᓇᖅᑐᓂᒃ ᐋᖅᑭᒃᓱᐃᓗᑎᒃ ᓯᕗᓂᒃᓴᑦᑎᓐᓄᑦ. ᓄᓇᕐᔪᐊᕐᒥᐅᑦ ᐅᑭᐅᖅᑕᖅᑐᒥ ᐊᑐᒐᒃᓴᖏᓐᓂᒃ ᕿᓂᖃᑦᑕᖅᐳᑦ ᓄᓇᕐᔪᐊᓕᒫᒥ ᓱᓇᒃᑯᑖᖃᖅᑎᑦᑎᕙᒃᑐᓂᑦ ᐊᑐᓗᐊᙱᓐᓂᖅᓴᐅᔪᒪᓪᓗᑎᒃ ᐊᕙᑎᑦᑎᓐᓂ ᐊᒻᒪᓗ ᐃᓅᖃᑎᒌᓄᑦ ᐊᑐᖅᑕᐅᔭᕆᐊᓕᖕᓂᑦ ᓄᓇᓕᒡᔪᐊᓂ ᐃᑲᔪᖅᑐᐃᙱᑦᑐᓂᒃ ᐊᒻᒪᓗ ᓂᐅᕕᖅᐸᒃᑐᓄᑦ ᐱᔭᐅᔭᕆᐊᓕᖕᓂᒃ.
ᐅᖃᖅᑎᑦᑎᔩ, ᓂᕆᐅᒃᐳᖓ ᐱᓕᕆᖃᑎᒌᓐᓇᕆᐊᒃᓴᖅ ᑲᓇᑕᐅᑉ ᐅᑭᐅᖅᑕᖅᑐᒥ ᓯᕗᓕᖅᑎᖏᓐᓂᑦ ᓄᓇᕐᔪᐊᒥᓪᓗ ᐱᓕᕆᖃᑎᑦ ᑕᐱᐳᓪᓗ ᓴᖅᑭᑦᑎᓂᐊᕐᓗᑎᒃ ᖃᓄᐃᙱᑦᑎᐊᕐᑐᒥ, ᑲᔪᓰᓐᓇᕈᓐᓇᕐᑐᒥᑦ ᐱᕈᕐᐸᓪᓕᐊᔪᒥᓪᓗ ᐅᑭᐅᖅᑕᖅᑐᒥᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.