ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᕗᖓ ᐃᓕᑕᖅᓯᔪᒪᓪᓗᖓ ᐊᑯᓂ ᒐᕙᒪᒃᑯᓐᓄᑦ ᐱᔨᑦᑎᕋᖅᓯᒪᔪᒥᒃ ᑲᒥᓴᓇᐅᑉ ᑐᖏᓕᐊ ᕇᐱᑲ ᐅᐃᓕᐊᒻᔅ.
ᒪᓕᒐᓕᐅᖅᑎᐅᓚᐅᖅᑐᖅ ᖁᑦᑎᒃᑐᒧᑦ 2000-ᒥᑦ 2004-ᒧᑦ, ᐅᓖᐱᑲ ᐃᖅᑲᓇᐃᔭᑯᑖᖕᓂᕐᒧᑦ ᓄᖅᑲᓚᐅᖅᑐᖅ ᐃᖅᑲᓇᐃᔮᖃᖅᖢᓂ ᓄᓇᕗᑦ ᒐᕙᒪᒃᑯᓐᓂ, ᓱᓕᓂᕋᕐᖢᓂᓗ ᐊᖏᖅᑎᑕᐅᓪᓗᓂ ᑲᒥᓯᓇᐅᑉ ᑐᒡᓕᐊᓄᑦ 2019-ᒥ.
ᐃᒃᐱᐊᕐᔪᒻᒥᐅᒃᓴᔭ, ᐅᓖᐱᑲ ᐃᖃᓗᒻᒥᐅᑕᐅᓪᓗᓂ ᐅᐃᖓᓗ ᒋᓕᐊᓐ, ᐊᒻᒪᓗ ᕿᑐᕐᖓᖏᓪᓗ, ᐃᕐᖑᑕᖏᓪᓗ.
ᐊᕐᕌᒍᒐᓴᖕᓄᑦ ᐃᖅᑲᓇᐃᔭᖅᓯᒪᔪᖅ ᐅᐸᒃᑕᐅᖅᑳᖅᐸᒃᖢᓂ ᓄᓇᓕᖕᓂ ᐃᓄᓕᕆᔨᐅᑎᓪᓗᒍ, ᐊᒻᒪ ᓄᓇᓕᖕᓂ ᐃᖅᑲᖅᑐᐃᔪᓕᕆᔨᐅᑎᓪᓗᒍ.
ᐅᖃᖅᑎᑦᑎᔩ, ᐊᕐᕌᒍᑦ 25 ᑭᖑᓂᑦᑎᓐᓂ, ᐅᓖᐱᑲ ᐅᐃᓕᐊᒻᔅ ᐊᐱᕆᔭᐅᓚᐅᖅᓯᒪᔪᖅ ᓄᓇᕘᑉ ᑲᒥᓯᓇᐅᓚᐅᑲᒃᑐᒧᑦ ᐃᑲᔪᖁᔭᐅᓪᓗᓂ ᓴᖅᑭᑎᑦᑎᓂᕐᒥ ᓄᓇᕘᑉ ᒪᓕᒐᓕᕆᔨᒃᑯᑦ ᐱᓕᕆᕝᕕᖓᓂ, ᐊᒻᒪ ᑎᒃᑯᐊᖅᑕᐅᓚᐅᖅᓯᒪᓪᓗᓂ ᐱᓕᕆᕝᕕᖕᒥ ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᖓᓂᒃ ᓄᓇᕗᑦ ᐱᙳᖅᑎᑕᐅᓕᖅᑎᓪᓗᒍ.
ᓄᖅᑲᓚᐅᙱᑎᓪᓗᒍ ᓄᓇᕗᒻᒥ ᒐᕙᒪᒃᑯᓐᓂ, ᒥᓂᔅᑕᐅᑉ ᑐᒡᓕᕆᓚᐅᖅᐹ ᐃᓄᓕᕆᔨᒃᑯᓐᓄᑦ ᒪᓕᒐᓕᕆᔨᒃᑯᓐᓄᓪᓗ.
ᐅᓖᐱᑲ ᐃᓚᒋᔭᐅᓚᐅᕐᒥᔪᖅ ᐊᓪᓚᓄᑦ ᐃᓕᓐᓂᐊᕆᐊᖅᐸᓚᐅᖅᓯᒪᔪᓄᑦ ᑲᑎᒪᔨᕋᓛᓄᑦ ᓱᓕᔪᕐᓂᐊᓂᕐᒧᑦ ᓴᐃᒻᒪᖃᑎᒌᖕᓂᕐᒧᓪᓗ ᑲᓇᑕᒥ ᐊᕐᕌᒍᓄᑦ ᑕᓪᓕᒪᓄᑦ, ᐃᓚᐅᖃᑕᐅᓪᓗᓂ ᑕᒪᐃᓐᓂᒃ 7-ᓂᒃ ᑲᓇᑕᒥ ᓈᓚᖕᓂᐅᔪᓂ ᐃᓕᓐᓂᐊᖅᑎᐅᖃᑦᑕᖅᓯᒪᔪᓄᑦ.
ᐅᖃᖅᑎᑦᑎᔩ, ᐅᓖᐱᑲ ᐅᐃᓕᐊᒻᔅ ᐃᖅᑲᓇᐃᔮᖓᓄᑦ ᐊᑯᓂᐅᑎᒋᔪᒃᓴᖓ ᑲᒥᓯᓇᐅᑉ ᑐᖏᓕᖓᓄᑦ ᐃᓱᓕᓚᐅᕐᒪᑦ ᑎᓯᐱᕆᒥ, ᐊᒻᒪᓗ ᐅᖃᓪᓚᒃᐳᖓ ᓄᓇᕗᒻᒥᐅᓕᒫᓄᑦ ᖁᔭᓐᓇᒦᕋᒪ ᐅᓖᐱᑲᒧᑦ ᐊᖏᖅᓯᒪᑦᑎᐊᕐᓂᖓᓄᑦ ᓄᓇᕗᒻᒧᑦ.
ᐅᖃᖅᑎᑦᓯᔩ, ᐅᐱᒍᓱᑉᐳᖓ ᐃᓕᑕᖅᓯᓂᕐᒧᑦ ᐅᓖᐱᑲᒥᒃ ᓯᕗᓕᖅᑎᐅᑦᓯᐊᕐᓂᖓᓄᑦ ᓄᓇᕐᔪᐊᕐᒥ ᐊᕐᓇᐃᑦ ᐅᓪᓗᖓᓂ.
ᖁᔭᓐᓇᒦᒃ, ᐅᖃᖅᑎᑦᑎᔩ.