ᐅᖃᖅᑎᑦᑎᔩ,
ᑕᒪᑐᒪᓂ ᐊᕐᕌᒍᒥ, ᓄᓇᕗᑦ ᐅᓪᓗᖓᓂ ᖃᐅᒪᔪᖅ ᐅᐃᓂᐸᐃᖕᒥ ᓴᓇᙳᐊᒐᓄᑦ ᑕᑯᔭᒐᖃᕐᕕᖕᒥ. ᓄᑖᖅ ᑕᑯᔭᒐᖃᕐᕕᒃ ᐊᖏᕐᕋᕆᔭᐅᕗᖅ ᐊᖏᓛᖑᓪᓗᓂ ᐃᓄᖕᓂᙶᖅᑐᓂᒃ ᓄᐊᑕᐅᓯᒪᔪᓄᑦ ᐃᓄᐃᑦ ᓴᓇᙳᐊᒐᖏᓐᓂᒃ ᓄᓇᕐᔪᐊᕐᒥ.
ᓄᓇᕗᑦ, ᐱᓗᐊᖅᑐᒥᑦ ᑭᕙᓪᓕᕗᑦ, ᐊᒃᑐᐊᖕᒪᑦ ᒫᓂᑑᐸᒧᑦ. ᖃᐅᔨᓐᓇᖅᑐᒻᒪᕆᐅᓚᐅᖅᐳᖅ ᓄᓇᕗᒻᒥ ᕿᑲᕐᓇᐅᑎᓪᓗᒍ ᐅᐃᓂᐸᐃᖕᒥ ᔪᓚᐃ 9-ᖑᑎᓪᓗᒍ. ᑕᐃᑯᖓ ᓂᐅᕐᕈᓯᒪᕗᖓ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᔭᖅᑐᖅᖢᖓ ᑲᓇᑕᒥ ᓯᕗᓕᖅᑎᐅᖃᑎᒌᓂᒃ.
ᐊᓕᐊᓇᐃᒍᓱᓚᐅᖅᐳᖓ ᐃᓚᐅᔪᓐᓇᓚᐅᕋᒪ ᐊᑎᓕᐅᖅᑕᐅᑎᓪᓗᒋᑦ ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎᒥ ᒫᓂᑑᐸ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᐅᐃᓂᐸᐃᖕᒥ ᓴᓇᙳᐊᒐᕐᓄᑦ ᑕᑯᔭᒐᖃᕐᕕᖕᒥ. ᑕᒪᓐᓇ ᐱᓕᕆᖃᑎᒌᖕᓂᖅ ᐱᕕᒃᓴᖃᖅᑎᑦᑎᕗᖅ ᓄᑖᓂᒃ ᐱᒋᐊᖅᑕᐅᓯᒪᔪᓂᒃ, ᐃᓚᒋᔭᐅᓪᓗᑎᒃ ᐳᓛᕐᕕᖕᒥ ᑕᑯᔭᖅᑐᕐᓃᑦ ᐃᓄᒃᑐᑦ, ᓄᓇᓕᖕᓄᑦ ᑲᑎᓐᓂᕆᔭᐅᕙᒃᑐᑦ ᐃᓄᖕᓄᑦ ᒫᓂᑑᐸᒥ, ᖃᐅᔨᒪᔭᒥᓂᒡᓗ ᑐᓴᐅᒪᖃᑎᒌᖕᓂᕐᒥᒃ. ᐱᕕᖃᕈᑕᐅᓂᐊᕐᒥᔪᖅ ᐃᖅᑲᓇᐃᔭᖅᑐᓂᒃ ᑲᔪᖏᖅᓴᐃᔪᓕᕆᓂᕐᒧᑦ ᐱᕕᒃᓴᐅᔪᓂᒃ ᐃᓄᖕᓄᑦ, ᐊᒻᒪ ᐱᓕᕆᖃᑎᖃᑦᑎᐊᕈᓐᓇᖅᓯᓗᑎᒃ ᒫᓂᑑᐸᒥ ᐃᓄᐃᑦ ᑲᑐᔾᔨᖃᑎᒌᑦ ᐃᓄᐃᑦ ᐃᓕᓐᓂᐊᖅᑎᑦ ᐃᓕᓐᓂᐊᖅᑎᑕᐅᔪᑦ ᐱᓕᕆᐊᖓᓐᓂ.
ᐅᖃᖅᑎᑦᑎᔩ, ᖁᔭᓐᓇᒦᕈᒪᔭᒃᑲ ᑲᑐᔾᔨᖃᑎᒌᑦ ᐊᒻᒪᓗ ᐳᓛᕐᕕᒃ ᑐᙵᓱᒃᑎᑦᑎᔪᓐᓇᓚᐅᕐᒪᑕ ᐅᕙᑦᑎᓐᓂᒃ ᐱᓕᕆᑎᑦᑎᑎᓪᓗᒋᑦ ᔪᓚᐃ 9-ᒥ.
ᖁᔭᓐᓇᒦᒃ, ᐅᖃᖅᑎᑦᑎᔩ.