ᐅᖃᖅᑎᑦᑎᔩ, ᒪᐃ 5-ᖑᑎᓪᓗᒍ, ᓯᕗᕐᖓᒍᑦ ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᒪᓂᖓᑕ, ᓯᕗᓕᖅᑎ ᕌᓐᔾ ᐱᓚᐃ, ᓯᕗᓕᖅᑎ ᕋᔭᐃ ᓯᒻᑉᓴᓐ, ᐅᕙᖓᓗ ᑲᑎᖃᑎᖃᓚᐅᖅᑐᒍᑦ ᐱᖓᓱᓂᒃ ᒐᕙᒪᑐᖃᒃᑯᑦ ᒥᓂᔅᑕᖏᓐᓂᒃ ᐃᖃᓗᓐᓂ. ᑲᑎᒪᖃᑎᖃᓚᐅᖅᑐᒍᑦ ᒥᓂᔅᑕ ᑲᓇᑕᐅᑉ ᓯᓚᑖᓃᖔᖅᑐᓕᕆᓂᕐᒧᑦ ᒥᓚᓂ ᔪᓕ, ᒥᓂᔅᑕ ᐅᓇᑕᖅᑐᓕᕆᔨᒃᑯᓐᓄᑦ ᐱᐅᓪ ᐱᓕᐅ, ᐊᒻᒪᓗ ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᑖᓐ ᕙᓐᑕᓪ, ᐊᒻᒪᓗ ᒪᓕᒐᓕᐅᕐᕕᔾᔪᐊᒥ ᑎᑎᕋᖅᑎ ᐃᕚᓐ ᔫᓐᔅ, ᐱᕕᖃᓚᐅᖅᑐᑕ ᑲᑐᔾᔨᓗᑕ ᐅᖃᖃᑎᒌᒍᑎᖃᕐᓂᕐᒧᑦ ᐱᔭᕆᐊᓕᑦᑎᓐᓂᒃ ᐅᑭᐅᖅᑕᖅᑐᒥ.
ᒥᓂᔅᑕ ᐱᓕᐅ ᑐᑭᓯᑎᑦᓯᒋᐊᓚᐅᖅᑐᖅ ᐅᑭᐅᖅᑕᖅᑐᕗᑦ, ᓴᙱᔪᖅ ᐃᓱᒪᐃᓐᓇᕿᕕᐅᔪᕐᓗ: ᓄᑖᕐᖑᕆᐊᖅᓯᓂᖅ ᑕᑯᒍᒪᔭᖏᓐᓂᒃ ᑲᓇᑕᒥ ᓴᐳᔾᔨᓂᕐᒧᑦ, ᒥᓂᔅᑕ ᔪᓕ ᐅᖃᐅᓯᖃᖅᑐᓂ ᓄᓇᕐᔪᐊᒥ ᐅᑭᐅᖅᑕᖅᑐᒥ ᖃᓄᖅᑑᕈᑎᒥᒃ ᑲᓇᑕᐅᑉ ᒐᕙᒪᒃᑯᖏᑕ ᐋᖅᑭᑦᓱᖅᑕᖓᓂᒃ.
ᐅᖃᖅᑎᑦᑎᔩ, ᐃᓱᒪᒋᓪᓗᒍ ᒐᕙᒪᓕᕆᓂᕐᒧᑦ ᐃᓱᒫᓗᓐᓇᖅᑐᒦᓐᓂᖏᓐᓂᒃ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ ᓱᑲᑦᑐᒥᓪᓗ ᐊᐅᑉᐸᓪᓕᐊᓂᖓᓄᑦ ᓯᑯ
ᒪᑐᐃᖅᐸᓪᓕᐊᒍᑕᐅᓪᓗᓂ ᐅᑭᐅᖅᑕᖅᑐᒥ ᓱᓪᓗᑯᑖᒃ, ᑲᓇᑕᒥ ᐅᑭᐅᖅᑕᖅᑐᒥ ᓄᓇᓕᖏᑦ ᐱᒻᒪᕆᐅᒻᒪᑕ ᑲᓇᑕᐅᑉ ᓯᕗᓂᑦᓴᖓᓄᑦ ᓴᐃᒪᖃᑎᒌᓐᓂᕐᒧᑦ ᖃᑭᕙᓪᓕᐊᒍᑎᖃᕐᓂᒧᓪᓗ.
ᐅᑭᐅᖅᑕᖅᑐᒥ ᓯᕗᓕᖅᑎᐅᓪᓗᑕ ᖁᔭᓕᓚᐅᖅᑐᒍᑦ ᒐᕙᒪᑐᖃᒃᑯᓐᓂ ᒥᓂᔅᑕᐃᑦ ᓂᐅᕐᕈᓚᐅᕐᖓᑕ ᐅᑭᐅᖅᑕᖅᑐᒧᑦ ᑐᕌᒐᖃᖅᑐᑎᓪᓗ ᐅᑭᐅᖅᑕᖅᑐᒥ ᐃᓱᒫᓘᑕᐅᔪᓂᒃ. ᖃᐅᔨᒪᒐᑦᑕ ᐃᓱᒪᓕᐅᕈᑎᐅᕙᑦᑐᑦ ᐅᑭᐅᖅᑕᖅᑑᑉ ᒥᑦᓵᓄᑦ ᑲᒪᒋᔭᐅᖃᑦᑕᕆᐊᖃᕐᖓᑕ ᑲᑐᔾᔨᖃᑎᖃᕐᓗᑎᒃ ᐃᓄᓐᓂᒃ ᐅᑭᐅᖅᑕᖅᑐᒥᐅᑕᕐᓂᒃ ᐊᖏᕐᕋᖅᓯᒪᔪᓂᒃ.
ᐅᖃᖅᑎᑦᑎᔩ, ᐱᖓᓲᓪᓗᑕ ᐅᑭᐅᖅᑕᖅᑐᒥ ᓯᕗᓕᖅᑎᐅᓪᓗᑕ, ᓇᓗᓇᐃᖅᓯᒋᐊᒃᑲᓐᓂᓚᐅᖅᑐᒍᑦ ᐊᑦᓱᕉᑎᖃᕐᓂᑎᓐᓂᒃ ᑲᑐᔾᔨᖃᑎᒌᒍᑎᖃᕈᒪᓂᕐᒧᑦ ᒐᕙᒪᑐᖃᒃᑯᓐᓂᒃ ᓇᓗᓇᐃᖅᓯᒋᐊᖅᑐᑕᓗ ᑮᓇᐅᔭᖃᖅᑎᑦᓯᒃᑲᓐᓂᕆᐊᖃᕐᓂᖏᓐᓂᒃ ᑭᓱᑐᐃᓐᓇᕐᓄᑦ ᐊᑐᕋᑦᓴᐅᔪᓂᒃ ᐊᑭᑐᔫᑎᓂᒃ ᓴᙱᓕᖅᐹᓪᓕᕈᑕᐅᒐᔭᖅᑐᓂᒃ ᓄᓇᓕᓐᓄᑦ ᑲᒪᒋᔭᖃᖅᓯᓐᓈᕐᓗᑎᒃ ᑲᓇᑕ ᓇᒻᒥᓂᖃᕐᓂᖓᓂᒃ ᓇᓗᓇᐃᖅᓯᓯᒪᓂᕐᒥᒃ ᐅᐊᑦᓯᔨᐅᓂᕐᒥᓪᓗ.
ᓇᓗᓇᐃᖅᓯᒋᐊᓚᐅᕐᒥᔪᒍᑦ ᐃᓚᐅᖃᑕᐅᑎᑦᓰᓐᓇᕆᐊᖃᕐᓂᖏᓐᓂᒃ ᓄᓇᖃᖅᑳᖅᑐᒥᓃᑦ ᒐᕙᒪᖏᓐᓂᒃ ᑲᑐᔾᔨᖃᑎᒌᖏᓐᓂᓪᓗ ᐊᑕᖏᖅᑐᓂ ᐱᖓᓱᓂ ᐊᕕᑦᑐᖅᓯᒪᓂᐅᔪᓂ.
ᑭᖑᓪᓕᖅᐹᒥ, ᑐᑦᓯᕋᕐᕕᒋᓚᐅᖅᑕᕗᑦ ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑦᓯᖁᓪᓗᒋ ᐊᔾᔨᒌᖏᑦᑐᓄᑦ ᓲᕐᓗ ᐃᓪᓗᓕᕆᓂᕐᒧᑦ, ᑐᓴᐅᒪᖃᑦᑕᐅᑎᓕᕆᔾᔪᑎᓄᑦ, ᓴᓗᒪᔪᓂᒃ ᐆᒻᒪᖅᑯᑎᓕᐅᕈᑎᓄᑦ, ᐃᖏᕐᕋᔪᓕᕆᓂᕐᒧᓪᓗ ᖃᓄᐃᖏᑦᓯᐊᕈᓐᓇᖁᓪᓗᒋᑦ, ᓴᐱᓕᖅᑕᐃᓕᖁᓪᓗᒋᑦ, ᖃᑭᖁᓪᓗᒋᑦ ᐅᑭᐅᖅᑕᖅᑐᒥ ᓄᓇᓕᖏᑦ ᐅᑭᐅᖅᑕᖅᑐᒥᐅᓪᓗ.
ᖁᔭᓐᓇᒦᒃ, ᐅᖃᖅᑎᑦᑎᔩ.