ᐅᖃᖅᑎᑦᑎᔩ, ᐃᐳᕈ 1-ᖑᑎᓪᓗᒍ ᑐᙵᓱᑦᑎᑦᓯᔪᔪᒍᑦ ᒥᐊᓕ ᓴᐃᒻᒪᓐᒥᒃ. ᓯᕗᓪᓕᖅᐹᒥ ᓂᐅᕐᕈᔪᔪᖅ ᓄᓇᕗᒻᒧᑦ ᓯᕗᓪᓕᖅᐹᒥ ᓄᓇᖃᖅᑳᖅᑐᒥᓂᖅ ᓯᕗᓪᓕᖅᐹᖑᓪᓗᓂᓗ ᐃᓄᒃ ᑭᖕ ᑭᒡᒐᖅᑐᖅᑎᖓ ᑲᓇᑕᒥ.
ᖁᕕᐊᓇᓗᐊᖑᖓᔪᔪᖅ ᖁᕕᐊᓲᑎᖃᔪᒐᑦᑕ 25-ᓂᒃ ᐊᕐᕌᒍᓂᒃ ᓇᓪᓕᐅᓂᖅᓯᐅᕈᑕᐅᑎᓪᓗᒍ ᓄᓇᕗᑦ.
ᐅᖃᖅᑎᑦᑎᔩ, ᐅᐱᓐᓇᓪᓚᕆᔪᔪᖅ ᑐᙵᓱᑦᑎᑦᑐᒍ ᐅᐱᓐᓇᖅᑐᖅ ᐊᒻᒪᓗ ᐅᐱᓐᓇᖅᑐᖅ ᐅᐃᑦ ᕗᕋᐃᓱ ᑕᕝᕙᓂ ᒪᓕᒐᓕᐅᕐᕕᒻᒥ. ᑕᕝᕙᓃᖃᑎᒋᔪᔭᒃᑲ ᑲᒥᓯᓇ ᐄᕙ ᐋᕆᐊᒃ, ᐃᖃᓗᐃᑦ ᒪᓕᒐᓕᐅᖅᑎᖏᑦ ᔪᐊᔾ ᕼᐃᒃᔅ, ᔮᓂᑦ ᐳᕈᔅᑐ ᐊᒻᒪᓗ ᐋᑕᒻ ᓚᐃᑦᓯᑐᓐ, ᒪᐃᔭ ᓴᓚᒪᓐ ᐊᕙ, ᐅᓇᓕᑦᓴᔭᖑᐊᑦ, ᐅᓇᓕᑦᓴᔭ ᔮᓐ ᐳᕆᑭᒪ, ᐅᓇᓕᑦᓴᔭᓄᑦ ᐊᖏᔪᖅᑳᖅ ᓄᓇᕗᒻᒥ ᐅᑭᐅᖅᑕᖅᑐᒥ ᑲᑐᔾᔨᔪᓄᑦ, ᐊᒻᒪᓗ ᓄᓇᕗᑦ ᒪᓕᒐᓕᐅᕐᕕᔾᔪᐊᒥ ᑭᒡᒐᖅᑐᖅᑎᕗᑦ ᓗᐊᕆ ᐃᑦᓚᐅᑦ.
ᓂᐅᕐᕈᓯᒪᑎᓪᓗᒍ, ᑭᖕ ᑭᒡᒐᖅᑐᖅᑎᖓ ᑐᙵᓱᑦᑎᑦᓯᑦᓯᐊᔪᔪᖅ ᓄᓇᕗᒻᒥᐅᓂᒃ ᓲᕐᓗ ᐃᓚᒋᓪᓗᒋᑦ. ᑐᙵᓇᕐᓂᖓ ᐃᔾᔪᐊᕈᒥᓇᔪᔪᖅ.
ᐅᓐᓄᖓᓂ ᐃᐳᕈ 1, ᓄᓇᓕᓐᓂ ᖁᕕᐊᓱᐊᖃᑕᐅᔪᔪᒍᑦ ᐊᒥᓱᐊᓗᐃᑦ ᐅᐸᑦᓯᒪᑎᓪᓗᒋᑦ ᐃᖃᓗᒻᒥᐅᑦ − ᓱᕈᓯᓛᓂᑦ ᐃᓐᓇᒻᒪᕆᓐᓄᑦ − ᓂᕆᖃᑎᒌᑦᑐᑕ ᐃᓄᓕᖅᑕᓂᒃ, ᓂᔾᔭᐅᓯᔭᖅᑐᖃᖅᑐᓂ ᑖᓂᓯᖅᑐᑕᓗ.
ᐅᖃᓕᒪᓂᕆᔪᖓᔭ ᑕᐃᑲᓂ ᐅᓐᓄᖓᓂ, ᑭᖕ ᑭᒡᒐᖅᑐᖅᑎᖓ ᐅᖃᔪᔪᖅ: “ᐊᖏᕐᕋᖅᑯᖓ.” ᑐᑭᓯᓇᑦᓯᐊᔪᒻᒪᑦ ᐃᓱᒪᒋᔪᔭᖓ ᐊᑕᖏᖅᑐᑕᐅᔪᒻᒪᑦ. ᓇᖏᖅᓯᓪᓗᑎᒃ ᐸᑦᑕᑐᖅᑕᐅᔪᔪᖅ ᐅᖃᓕᒪᓚᐅᖅᑎᓪᓗᒍ, ᐅᖃᐅᓯᖃᔪᒻᒪᑦ ᐱᕙᓪᓕᐊᓂᐅᓯᒪᔪᓂᒃ ᓄᓇᕗᒻᒥ.
ᖁᔭᓐᓇᒦᒃ, ᐅᖃᖅᑎᑦᑎᔩ.