ᐃᖃᓗᐃᑦ, ᓄᓇᕗᑦ (ᔫᓂ 17, 2024) – ᓄᓇᕗᒻᒥ ᐱᓕᕆᖃᑎᒌᑦ ᑲᑎᒪᔨᕋᓛᖏᑦ (NPC) – ᐅᑯᐊᖑᓪᓗᑎᒃ ᓯᕗᓕᖅᑏᑦ ᑲᑎᒪᔨᖏᑦ ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᓐᓂᒃ. (ᓄᓇᕗᑦ ᑐᙵᕕᒃᑯᑦ) − ᑲᑎᒪᓚᐅᖅᑐᑦ ᔫᓂ 17−ᒥ ᓯᕗᒻᒧᐊᒃᑎᑦᑎᓇᓱᒃᖢᑎᒃ ᑲᑐᑎᔭᒥᖕᓂᒃ ᑭᓱᓂᒃ ᐱᓕᕆᐊᖃᖅᓯᒪᓕᕐᒪᖔᕐᒥᓂᒃ.
ᑲᑎᒪᑎᓪᓗᒋᑦ, ᑲᑎᒪᔨᕋᓛᑦ ᐊᖏᕈᑎᖃᓚᐅᖅᐳᑦ ᐃᖅᑲᓇᐃᔮᒧᑦ ᐸᕐᓇᒃᑕᐅᔪᓂᒃ ᓯᕗᓪᓕᐅᔾᔭᐅᔪᒪᔪᓂᒃ ᓄᑕᖅᑲᓄᑦ ᖃᓄᐃᙱᑦᑎᐊᖅᑎᑦᑎᓂᕐᒧᑦ, ᐃᓐᓇᕐᓄᑦ, ᐃᒡᓗᓕᕆᓂᕐᒧᑦ, ᓄᓇᓕᖕᓂ ᐱᕙᓪᓕᐊᔪᓕᕆᓂᕐᒧᑦ, ᐊᒻᒪ ᐱᓕᒻᒪᒃᓴᖅᑎᑦᑎᓂᕐᒧᑦ.
ᑲᑎᒪᔨᕋᓛᑦ ᐱᓕᕆᓲᖑᕗᑦ ᑲᔪᓯᑎᑦᑎᓇᓱᒃᖢᑎᒃ ᐱᓕᕆᖃᑎᒌᓄᑦ ᓱᓕᓂᕋᕈᑎᒥᒃ, ᐊᖏᖅᑕᐅᓚᐅᖅᓯᒪᔪᖅ ᒫᑦᓯ 2022−ᒥ, ᐃᓕᑕᖅᓯᐅᒪᓪᓗᑎᒡᓗ ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᔾᔨᒌᓂᒃ ᓯᕗᓪᓕᐅᑎᔪᒪᔭᖏᓐᓂᒃ ᐃᓱᒪᒋᔭᖃᕐᓂᖏᓐᓂᒃ, ᐊᒻᒪ ᐱᓕᕆᖃᑎᒌᖕᓃᑦ ᐃᑲᔫᑕᐅᓂᐊᕐᓂᖏᓐᓂᒃ ᓄᓇᕗᒥᐅᓕᒫᓄᑦ.
"ᐱᓕᕆᖃᑎᒌᖕᓂᐊᕐᓂᕐᒧᑦ ᓱᓕᓂᕋᕈᑦ ᐱᕕᖃᕈᑎᒋᕙᕗᑦ ᑲᑐᔾᔨᖃᑎᒌᒡᓗᑕ ᓇᓗᓇᐃᖅᓯᔪᓐᓇᖅᓯᓪᓗᑕ ᓯᕗᓪᓕᐅᔾᔭᐅᔭᕆᐊᓕᖕᓂᒃ ᐊᒻᒪ ᐱᓕᕆᓪᓚᕆᒍᒪᓪᓗᑕ ᑲᑐᔾᔨᖃᑎᒌᒡᓗᑕ ᓯᕗᓪᓕᐅᑎᑕᐅᔪᒪᔪᓂᒃ, ᓄᓇᕗᒻᒥᐅᑦ ᐃᓅᓯᖏᑦ ᐱᐅᓯᕚᓪᓕᖁᓪᓗᒋᑦ," ᓯᕗᓕᖅᑎ ᐅᖃᓚᐅᖅᑐᖅ ᐸᐅᓗᓯ ᐊᕿᐊᕈᖅ.
"ᓄᓇᕗᒻᒥᐅᑦ 85-ᐳᓴᓐᑎᐅᑎᓪᓗᒋᑦ ᐃᓄᐃᑦ, ᐱᒻᒪᕆᐅᕗᖅ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᒻᒪ ᓄᓇᕗᑦ ᒐᕙᒪᒃᑯᑦ ᐱᓕᕆᖃᑎᒌᒋᐊᖃᓪᓚᕆᒃᐳᑦ ᓄᓇᕗᒻᒥᐅᑦ ᐃᓄᖏᑦ ᐃᓅᓯᖏᑦ ᐱᐅᓯᕚᓪᓕᖁᓪᓗᒋᑦ. ᓂᕆᐅᖕᓂᖃᑦᑎᐊᖅᐳᖓ ᐱᓕᕆᖃᑎᒌᖕᓂᖅ ᑲᑐᑎᔾᔪᑎᒋᔭᑦᑎᓐᓄᑦ ᐃᑲᔫᑎᖃᕐᓂᐊᕐᓂᖓᓂᒃ ᐊᑲᐅᓯᕚᓪᓕᕐᓂᕐᒧᑦ ᓄᓇᕗᒻᒥᐅᑦ ᐃᓄᖁᑎᖏᓐᓄᑦ. ᐃᓄᐃᑦ ᓯᕗᓕᖅᑎᖏᑦ ᐱᓕᕆᖃᑎᖃᕈᒪᐃᓐᓇᖅᑐᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐃᓱᐊᓄᑦ," ᐅᖃᖅᑐᕕᓂᖅ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ.
ᐊᖓᔪᖅᑲᐅᑎᐅᖃᑕᐅᔪᑦ ᐊᑐᓂ ᑎᒥᓂᖔᖅᑐᑦ ᐱᓕᕆᐊᒃᓴᖓᑕ ᐃᓚᒋᓪᓗᓂᐅᒡᓕ ᑕᖅᑭᑕᒫᖅ ᑲᑎᒪᖃᑦᑕᑕᕆᐊᖃᖅᖢᑎᒃ ᑕᓪᓕᒪᑦ ᓯᕗᓪᓕᐅᑎᔭᕆᐊᓖᑦ ᓯᕗᒧᐊᒃᐸᓪᓕᐊᒐᓗᐊᕐᒪᖔᑕ, ᐃᖏᕐᕋᓂᕆᔭᖏᓪᓗ ᖃᓄᐃᓕᖓᓕᕐᒪᖔᑕ ᐅᓂᒃᑲᐅᓯᐅᔪᒫᖅᖢᑎᒃ ᑭᖑᓪᓕᕐᒥ ᑲᑎᒪᓂᖃᓕᕐᒥᒍᑎᒃ ᑲᑐᑎᔾᔪᑎᒋᔭᒥᓄᑦ.