ᐃᖃᓗᐃᑦ, ᓄᓇᕗᑦ (ᐊᒃᑐᐸ 10, 2024) − ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᐊᑦᓱᕉᑎᖃᖅᑐᑎᒃ ᐱᓕᕆᐊᖃᖅᑐᑦ ᑲᒪᒋᔭᖃᕐᓂᕐᒧᑦ ᐱᓗᐊᖑᐊᖅᑐᒥᒃ 2023-2026 ᐱᓕᕆᐊᑦᓴᓄᑦ ᐸᕐᓇᐅᑎᓂ ᓯᕗᓪᓕᐅᑎᑕᐅᒋᐊᓕᒻᒥᒃ: ᖃᓄᖅᑑᕈᑕᐅᓯᒪᓗᓂ ᓇᓕᒧᒌᓕᖅᑎᑦᓯᓂᖅ ᓄᓇᕗᑦ ᒐᕙᒪᒃᑯᖏᑕ ᐊᑭᑐᔫᑎᓕᕆᓂᕐᒧᑦ, ᓄᓇᓕᕆᓂᕐᒧᑦ, ᓄᓇᓕᓐᓂᓗ ᒐᕙᒪᓕᕆᓂᕐᒧᑦ ᐱᓕᕆᕕᓐᓂᒃ ᐱᕚᓪᓕᖅᑎᑕᐅᒍᓐᓇᖁᓪᓗᒋᑦ ᐱᓕᕆᐊᓂᒃ ᐱᔨᑦᓯᕋᐅᑎᓂᓪᓗ ᐊᐅᓚᑦᓯᖃᑦᑕᕐᓂᖏᑦ.
ᐊᑐᓕᕐᓗᓂ ᐃᐳᕈ 1, 2025, ᐊᑦᑐᐃᓂᖃᒻᒪᕆᓐᓂᐊᖅᑐᒥᒃ ᐋᖅᑭᒋᐊᖅᓯᓂᐊᕐᖓᑕ ᑎᒥᐅᓂᖓᑕ ᐋᖅᑭᐅᒪᓂᖏᓐᓂᒃ ᒐᕙᒪᒃᑯᑦ ᐱᓕᕆᕕᖏᓐᓂᒃ ᓄᓇᓕᓐᓂ ᒐᕙᒪᒃᑯᓂᓪᓗ ᐱᔨᑦᓯᕋᖅᑎᒃᑯᑦ, ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ, ᐊᒻᒪᓗ ᒐᕙᒪᒃᑯᑦ ᑐᑦᑕᕐᕕᖏᑕ ᐊᓪᓚᕝᕕᖏᓐᓂᒃ ᒐᕙᒪᓕᕆᔨᒃᑯᓐᓂ.
ᒪᕐᕉᒃ ᓄᑖᒃ ᒐᕙᒪᒃᑯᑦ ᐱᓕᕆᕕᑖᕆᓂᐊᖅᑕᖏᒃ ᓴᖅᑭᕐᓂᐊᖅᑑᒃ ᑕᒪᑐᒪᖓᑦ ᐊᓯᔾᔨᖅᓯᓂᐅᔪᒃᑯᑦ: ᓄᓇᓕᓐᓄᑦ ᐱᔨᑦᓯᕋᖅᑎᒃᑯᑦ ᐊᒻᒪᓗ ᐃᖏᕐᕋᔪᓕᕆᔨᒃᑯᑦ ᐊᑭᑐᔫᑎᓕᕆᔨᒃᑯᓪᓗ ᓄᓇᕗᒻᒥ. ᒥᓂᔅᑕᐅᖃᑎᒌᑦ ᐊᖏᖅᓯᓯᒪᔪᑦ ᐱᓕᕆᕖᒃ ᐊᑎᖏᓐᓂᒃ, ᓇᓗᓇᐃᖅᓯᒍᑕᐅᓪᓗᓂ ᐱᓗᐊᖑᐊᖅᑐᒥᒃ ᖃᓄᐃᓕᒋᐊᕈᑎᖃᕐᓂᕐᒧᑦ ᑎᒥᐅᓂᖏᑦ ᐋᖅᑭᐅᒪᓂᖏᓐᓂᒃ ᐊᓯᔾᔨᖅᑕᐅᓂᖏᓐᓂᒃ.
ᑕᐃᕕᑎ ᐊᕿᐊᕈᖅ ᒥᓂᔅᑕᐅᓛᓕᖅᑐᖅ ᓄᓇᓕᓐᓄᑦ ᐱᔨᑦᓯᕋᖅᑎᒃᑯᓐᓄᑦ, ᐱᔾᔪᑎᖃᕐᓂᐊᕐᓗᑎᒃ ᐱᔨᑦᓯᕋᕐᓂᕐᒧᑦ ᓄᓇᓕᓐᓄᑦ, ᐃᓚᒋᔭᐅᓗᑎᒃ ᐱᕙᓪᓕᐊᔪᓕᕆᓂᕐᒧᑦ, ᓄᓇᓕᕆᓂᕐᒧᑦ ᐸᕐᓇᐃᓂᕐᒧᓪᓗ, ᓂᐅᕕᖅᑐᓕᕆᓂᕐᒧᑦ, ᐊᑦᑕᓇᖅᑐᒦᑦᑕᐃᓕᑎᑦᓯᓂᕐᒧᑦ ᐱᔨᑦᓯᕋᐅᑎᓄᑦ, ᑐᐊᕕᕐᓇᖅᑐᓕᕆᓂᕐᒧᑦ ᐊᐅᓚᑦᓯᓂᕐᒧᑦ, ᒐᕙᒪᒃᑯᓪᓗ ᑐᑦᑕᕐᕕᖏᓐᓂᒃ ᐊᐅᓚᑕᐅᔪᓂᒃ.
ᑕᐃᕕᑎ ᔪᐊᓇᓯ ᒥᓂᔅᑕᐅᓛᓕᖅᑐᖅ ᐃᖏᕐᕋᔪᓕᕆᔨᒃᑯᓐᓄᑦ ᐊᑭᑐᔫᑎᓕᕆᔨᒃᑯᓄᓪᓗ ᓄᓇᕗᒻᒥ, ᐃᑲᔪᖅᓱᐃᔨᐅᓂᐊᕐᓗᑎᒃ ᒐᕙᒪᒃᑯᑦ ᐱᓕᕆᕕᖏᓐᓂᒃ, ᐃᓚᒋᔭᐅᓗᑎᒃ ᐊᑭᑐᔫᑎᓕᕆᓂᖅ, ᖃᕆᓴᐅᔭᓕᕆᓂᖅ ᑐᓴᐅᒪᖃᑦᑕᐅᑎᒍᑎᓂᓪᓗ, ᐃᖏᕐᕋᔫᓕᕆᓂᖅ, ᓂᐅᕕᖅᑐᓕᕆᓂᕐᒧᓪᓗ.
“ᖁᕕᐊᑦᑐᖓ ᓇᓗᓇᐃᖅᓯᒍᓐᓇᕋᒪ ᑖᑦᓱᒥᖓ ᐱᒻᒪᕆᐅᔪᒥᒃ ᖃᓄᐃᓕᒋᐊᕈᑎᒋᔭᑦᑎᓐᓂᒃ ᓄᓇᕗᑦ ᒐᕙᒪᒃᑯᖏᑦ ᐱᕈᖅᐸᓪᓕᐊᓂᖏᓐᓄᑦ ᐋᖅᑭᑉᐸᓪᓕᐊᓂᖏᓐᓄᓪᓗ,” ᐅᖃᖅᓯᒪᔪᖅ ᓯᕗᓕᖅᑎ ᐱᔭᐃ ᐊᕿᐊᕈᖅ. “ᑎᒥᐅᓂᖏᑕ ᐋᖅᑭᐅᒪᓂᖏᓐᓂᒃ ᐋᖅᑭᒋᐊᖅᓯᓂᖅ ᐱᓕᕆᕕᑦᑎᓐᓂᒃ ᖃᓄᖅᑑᕈᑕᐅᓯᒪᓪᓗᓂ ᖃᓄᐃᓕᒋᐊᕈᑕᐅᔪᖅ ᐊᐅᓚᑦᓯᑦᓯᐊᒃᑲᓐᓂᕈᓐᓇᖁᓪᓗᑕ ᐱᔨᑦᓯᕋᐅᑎᓂᒃ ᓄᓇᕗᒻᒥ. ᓄᓇᕗᒻᒥᐅᑦ ᑕᑯᒍᒪᓚᐅᕐᖓᑕ ᑲᑎᖅᓱᖅᑕᐅᓯᒪᔪᓄᑦ ᐅᐸᒐᖃᕐᕕᖃᕈᒪᓪᓗᑎᒃ ᐊᑐᐃᓐᓇᖃᕈᓐᓇᕐᓗᑎᒃ ᒐᕙᒪᒃᑯᑦ ᐱᔨᑦᓯᕋᐅᑎᖏᓐᓂᒃ, ᐱᓕᕆᐊᖃᓕᖅᑐᑕᓗ ᑖᑦᓱᒧᖓ ᑐᕌᒐᐅᔪᒧᑦ. ᒐᕙᒪᒃᑯᑦ ᐱᓕᕆᕕᖏᒃ ᐃᖏᕐᕋᔪᓕᕆᓂᕐᒧᑦ ᐊᑭᑐᔫᑎᓕᕆᓂᕐᒧᓪᓗ ᓄᓇᕗᒻᒥ ᐊᒻᒪᓗ ᓄᓇᓕᓐᓄᑦ ᐱᔨᑦᓯᕋᖅᑎᒃᑯᑦ ᐊᑲᐅᓈᖅᑐᒦᓐᓂᖅᓴᐅᓂᐊᖅᑑᒃ ᐊᖑᒻᒪᑎᒍᓐᓇᕐᓗᑎᒃ ᐱᕈᖅᐸᓪᓕᐊᓂᖏᓐᓄᑦ ᐱᔭᐅᔭᕆᐊᓕᓐᓄᑦ ᒐᕙᒪᒋᔭᑦᑎᓐᓄᑦ, ᕼᐊᒻᓚᓄᑦ, ᓄᓇᕗᒻᒥᐅᓕᒫᓄᓪᓗ.”
ᑎᒥᐅᓂᖏᑕ ᐋᖅᑭᐅᒪᓂᖏᑦ ᐋᖅᑭᒋᐊᖅᑕᐅᓂᖏᑦ ᓇᓗᓇᐃᖅᓯᓯᒪᒍᑕᐅᓂᐊᖅᑐᖅ ᐃᖅᑲᓇᐃᔮᓂᒃ ᐊᓐᓇᐃᔭᐅᔪᖃᔾᔮᖏᓐᓂᖓᓂᒃ, ᐃᑯᓪᓕᐊᑦᓯᐊᖅᑐᒃᑯᑦ ᐃᓂᓪᓚᑦᑎᖅᐸᓪᓕᐊᒍᒪᓪᓗᑎᒃ ᐃᖅᑲᓇᐃᔭᖅᑎᓕᒫᓄᑦ ᐊᑦᑐᖅᑕᐅᓂᖃᕐᓂᐊᖅᑐᓄᑦ.