ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᕆᐅᖅᓴᔪᓕᕆᓂᕐᒧᑦ ᐸᐃᕆᕕᓕᕆᓂᕐᒧᓪᓗ ᐱᓕᕆᕝᕕᒃ ᐱᔪᓐᓇᖅᓯᕗᑦ ᑮᓇᐅᔭᓂᒃ ᑐᒃᓯᕋᐅᑎᓂᒃ ᓴᖅᑭᑎᑦᑎᓂᕐᒧᑦ ᓄᑖᓂᒃ ᐱᔪᓐᓇᐅᑎᖃᖅᑐᓂᒃ ᐸᐃᕆᕕᖕᓂᑦ ᒪᑐᐃᖅᓯᑲᓐᓂᕐᓂᕐᒧᓪᓗ ᒪᑐᓯᒪᔪᓂᒃ ᐸᐃᕆᕕᖕᓂᒃ. $6 ᒥᓕᐊᓐ ᐅᖓᑖᓂ ᒐᕙᒪᑐᖃᒃᑯᓐᓂ ᑮᓇᐅᔭᑦ ᐊᑐᐃᓐᓇᐅᕗᑦ ᐃᑲᔫᑕᐅᓪᓗᑎᒃ ᐱᓕᕆᐊᓄᑦ ᓴᙱᒃᑎᒋᐊᕈᑕᐅᓗᑎᒃ ᐃᓕᓐᓂᐊᕆᐅᖅᓴᓕᓵᖅᑐᑦ ᑲᒪᒋᔭᐅᔾᔪᑎᖏᓐᓄᑦ ᓄᑕᖅᑲᓄᑦ ᐅᑭᐅᓕᖕᓄᑦ 0-ᒥ 6-ᒧᑦ.
ᑖᓐᓇ ᐱᓕᕆᐊᖅ ᐊᒃᑐᐃᓂᖃᓪᓚᕆᓕᕇᖅᑐᖅ ᓄᓇᕗᒻᒥ. ᓄᑖᖅ−ᐊᖏᒡᓕᒋᐊᖅᑕᐅᔪᖅ ᐃᖃᓗᖕᓂ ᐃᓄᒃᑎᑐᑦ ᐸᐃᕆᕕᒃ ᑐᒥᑯᓗᐃᑦ ᓴᐃᐹᕿᕕᒃ ᓂᐊᖁᙴᒥ ᓴᖅᑭᑎᑦᑎᓯᒪᕗᖅ 16−ᑲᓐᓂᕐᓂᒃ ᐃᓂᒃᓴᓂᒃ ᓄᑕᖅᑲᓄᑦ ᐃᑲᔪᖅᑐᖅᑕᐅᓪᓗᓂ ᑕᒪᑐᒧᖓ ᐱᓕᕆᐊᖑᔪᒧᑦ. ᐊᒻᒪ ᓱᓕ, ᑮᓇᐅᔭᓂᒃ ᐊᑐᐃᓐᓇᕈᖅᑎᑦᑎᓯᒪᓕᖅᑐᑦ ᐃᑲᔪᖅᓱᐃᔾᔪᑎᒃᓴᓂᒃ ᓄᑖᙳᕆᐊᕈᑎᓄᑦ ᓂᕆᐅᒋᔭᐅᕐᔪᐊᖅᑐᓄᑦ ᓄᑖᓄᑦ ᐸᐃᕆᕕᖕᓄᑦ ᐊᕙᑎᓄᑦ ᓄᑕᖅᑲᓄᑦ ᐊᐅᓱᐃᑦᑐᒥ.
ᐱᓕᕆᕝᕕᒋᔭᐅᔪᖅ ᐱᓕᕆᐊᖃᒻᒪᕆᒍᒪᕗᖅ ᓴᖅᑭᑎᑦᑎᓂᕐᒥᒃ 238−ᓂᒃ ᓄᑖᓂᒃ ᓚᐃᓴᓕᖕᓂᒃ ᓄᑕᖅᑲᓂᒃ ᑲᒪᒋᔭᖃᖅᐸᖕᓂᕐᒧᑦ ᐃᓂᒋᔭᐅᔪᓂᒃ ᒫᑦᓯ 2026−ᒧᑦ ᑎᑭᓪᓗᒍ. ᑕᐃᒪᙵᑦ ᐊᑎᓕᐅᖅᑕᐅᓚᐅᖅᑎᓪᓗᒍ ᑲᓇᑕᓕᒫᒥ ᐃᓕᓐᓂᐊᓕᒻᒪᒃᓴᔪᓕᕆᕝᕕᑦ ᐸᐃᕆᕕᓪᓗ ᐊᖏᖃᑎᒌᒍᑎᖓ, ᓄᓇᕗᒻᒥ ᓴᖅᑭᑦᑎᓚᐅᖅᐳᑦ 181-ᓂᒃ ᓄᑖᓂᒃ ᐱᔪᓐᓇᐅᑎᓕᖕᓂᒃ ᐸᐃᕆᕕᒃᓴᓂᒃ, ᐃᒪᐃᓕᖓᓕᕈᑕᐅᓪᓗᓂ ᑲᑎᖦᖢᒋᑦ 104-ᓂᒃ ᐅᓄᖅᓯᒋᐊᖅᖢᑎᒃ, ᐃᓚᖏᑦ ᐃᓂᒃᓴᐃᑦ ᐊᑐᐃᓐᓇᐅᔪᓐᓃᕐᓂᖏᓐᓄᑦ. ᐃᓂᒃᓴᐃᑦ ᐊᒥᓱᕈᖅᐸᓪᓕᐊᑐᐃᓐᓇᕐᒪᑕ ᐃᓚᒌᓄᑦ ᐊᑐᐃᓐᓇᐅᓂᖅᓴᐅᓕᖅᐸᓪᓕᐊᑎᓪᓗᑕ.
ᑖᓐᓇ ᐱᓕᕆᐊᖅ ᐃᑲᔪᖅᑐᐃᔪᓐᓇᖅᑐᖅ ᐱᓕᕆᐊᓂᑦ ᐃᒪᐃᑦᑐᓂᑦ:
• ᓴᖅᑭᑦᑎᕙᓪᓕᐊᓂᕐᒥᒃ ᓄᑖᕐᒥᒃ ᓚᐃᓴᓐᓯᖃᖅᑐᓂᒃ ᐸᐃᕆᕕᖕᓂᑦ.
• ᓄᑖᙳᖅᑎᑦᑎᓂᕐᒥᑦ ᐱᑕᖃᕇᖅᑐᓂᑦ ᐸᐃᕆᕕᖕᓂᑦ ᐅᓄᖅᓯᒋᐊᕐᓗᒋᑦ ᐸᐃᕆᕖᑦ.
• ᐊᖏᓪᓕᒋᐊᕆᓂᖅ ᐱᓕᕆᐊᓂᒃ ᒫᓐᓇ ᐱᓕᕆᐊᖑᕙᓪᓕᐊᔪᓂᒃ.
ᑭᓇ ᐱᓇᔪᒍᓐᓇᖅᐸ:
• ᓚᐃᓴᓐᓯᖃᖅᑐᑦ ᐸᐃᕆᕝᕖᑦ.
• ᐃᓄᐃᑦ ᒪᑐᐃᖅᓯᔪᒪᔪᑦ ᐱᔪᓐᓇᐅᑎᓕᖕᒥᑦ ᐃᓚᒌᓄᑦ ᐊᖏᕐᕋᒥ ᐸᐃᕆᕕᖕᒥᑦ.
• ᐃᓕᓐᓂᐊᕐᓂᓕᕆᔨᒃᑯᑦ ᐊᒻᒪ ᐅᐃᕖᑦ ᐃᓕᓐᓂᐊᖅᑐᓕᕆᔨᒃᑯᖏᑦ ᓄᓇᕗᒻᒥ.
• ᕼᐋᒻᒪᓚᐃᑦ/ᓄᓇᓕᖕᓂ ᒐᕙᒪᐃᑦ.
• ᑮᓇᐅᔭᓕᐅᕋᓱᒃᑎᐅᙱᑦᑐᑦ ᐊᒻᒪ ᒐᕙᒪᒃᑯᓐᓂᙶᙱᑦᑐᑦ ᑲᑐᔾᔨᖃᑎᒌᑦ.
ᑮᓇᐅᔭᑦ ᐊᑐᐃᓐᓇᐅᕗᑦ ᖃᐃᖅᑳᖅᑐᓄᑦ, ᐱᔨᑦᑎᕋᖅᑕᐅᖅᑳᖅᐸᒃᖢᑎᒃ ᑭᓯᐊᓂ ᑮᓇᐅᔭᑦ ᓄᖑᑉᐸᑕ, ᓯᕗᓪᓕᐅᔾᔭᐅᓗᑎᒃ ᐱᔨᑦᑎᕋᖅᑕᐅᑦᑎᐊᙱᑦᑐᑦ ᓄᓇᓖᑦ.
ᐱᓇᔪᒍᒪᒍᕕᑦ ᑐᑭᓯᒋᐊᒃᑲᓐᓂᕈᒪᒍᕕᓪᓘᓐᓃᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᕈᓐᓇᖅᐳᑎᑦ ELCCAdmin@gov.nu.ca ᐅᕝᕙᓘᓐᓃᑦ ᓄᑕᖅᑲᓂᒃ ᐃᓕᓐᓂᐊᓕᒻᒪᒃᓴᔪᓕᕆᔨᒧᑦ ᖃᐅᔨᒋᐊᕈᓐᓇᖅᐳᑎᑦ. ᐱᔭᐅᔪᓐᓇᖅᓯᓂᐊᕆᕗᑦ ᐃᓕᓐᓂᐊᖅᑐᓕᕆᔨᒃᑯᑦ ᐃᑭᐊᖅᑭᕕᖓᓐᓂ.