Uqariijaqhimagutigiplugu Mark Carney Kanatap 24 guqtuq An’ngijuqqaaguqhuni, Hivuliqti P.J. Akeeagok ublumi tunihijuq haffuma titiraqhimajaminik:
"Nigiuktun’nga havaqatigijaami An’ngijuqqaaq Mark Carney nutaaqlu Ministait Katimajiita, taapkuatlu ministat havaqatigivaktait paatnagiiqhutik Nunavunmun. Hadja aqhuungnaktuq ihumaliugutiqhanut Nunavunmi Kanataplu ilitquhiit. Hadja hakugingniqhaqtuqhat, aadlangguqtiriahangguqtuqhatlu, kanatami-naupkaqtuqhatlu qanurinniitigut ammaumajaami Ukiuqtaqtup atauttini pittaaqtaigutimingnut.
Qujagigiumajaralu An’ngijuqqaaq Justin Trudeau ilannauvangmat Inuinnarnut Nunavunmutlu, hivuliqtivangmatlu qun’ngiaqhugu mamittirnirmut. Havaqhimatilluni, havaqatigivagait kavamavut Nunavut Tunngavikkutlu an’ngigutigiplugu Nunavut Nunait Avatimiutatlu Nanminiqhuuqhainirmun An’ngirutaanik Nunavutlu Nanminiqhuuqhainirmun An’ngirutaa Nunavutlu Atuliqtittinirmun Upalun’ngaijaidjutaa An’ngirutaata, qaqliliqhuta takunnaqhiliqhuni Inirnikhaavut’ tautuktuujaagutait Nunavunmik.
An’ngijuqqaaq Trudeau munarijaqaqpaktuqlu amigaittunut Inuit-hivuliqhuqhugit piumaniit, taapkuatut Tallurutiup Imanga Tariumi Hapummivik SINNA lu An’ngirutit, happumiplugit imautivut piliuqtilluni ihuaqpiaqtunik havaaqhanik aqhungnaktuniklu aulapkaidjutiqhanik nunallaani. Kavamangit atuliqtittijut pittiagutigiplugit ikajuutauplutik nutaqqanut ilagiiktunutlu pidjutigiplugit akituvallaaliqpalliajuni inuujaami, taapkuatut Inuinnaujut Nutaraq Hivulliq Pidjutiuqhamun taamnalu $10 taala/ubluq tamaat Nutaqqiqiviijuqhani An’ngirutaa.
Niriuqtun’nga An’ngijuqqaaq Carney pulaaqlugu pinnikpiaqtuq ukiuqtaqtuvigijavut qilamik takujaami hivulliqpaagutigilugu piviqhainnut Nunavunmi hivumuugutigijaami Iligiiktut Kanatap havakpagait hakugingniqhaqhugu Ukiuqtaqtumi Atanniqtuidjutiqarniq amirhidjutiqhanutlu”.