ᐊᖏᖅᑎᑕᐅᓂᖃᖅᑎᓪᓗᒍ ᒫᒻ ᑳᓂ ᑲᓇᑕᐅᑉ 24-ᒋᓕᖅᑕᖓ ᐊᖓᔪᖅᑳᕐᔪᐊᖅᑖᕆᔭᐅᔪᖅ, ᓯᕗᓕᖅᑎ ᐸᐅᓗᓯ ᐊᕿᐊᕈᖅ ᐅᓪᓗᒥ ᐅᖃᐅᓯᔅᓴᖏᓐᓂᑦ ᓴᖅᑭᑎᑦᑎᕗᖅ:
“ᑖᓐᓇ ᑲᓇᑕᐅᑉ ᐊᖓᔪᖅᑳᕐᔪᐊᖅᑖᖓ ᐱᓕᕆᖃᑎᒋᖃᑦᑕᕐᓂᐊᕋᒃᑯᑦ ᓂᕆᐅᑦᑎᐊᖅᐳᖓ ᓯᕗᓕᖅᑎᐅᖃᑎᖏᓪᓗ, ᑖᒃᑯᐊ ᐃᓚᖃᖅᑐᑦ ᒥᓂᔅᑕᓂᑦ ᐱᓕᕆᖃᑎᖃᖅᓯᒪᔪᓂᑦ ᓄᓇᕗᒻᒥ. ᒫᓐᓇ ᓄᓇᕗᒻᒥ ᖃᓄᐃᑦᑐᒦᓐᓂᕆᔭᕗᑦ ᐱᓪᓗᒍ ᑲᓇᑕᒥ ᐊᑐᖅᑕᐅᓚᐅᖅᓯᒪᙱᑦᑐᒥ ᐊᑑᑎᒐᑦᑕ. ᒫᓐᓇ ᑭᓪᓕᒋᔭᖃᙱᑦᑎᐊᕐᓗᑕ, ᐊᓯᔾᔨᕐᓂᓪᓚᑦᑖᕐᒥᑦ, ᑲᓇᑕᒥ−ᐱᕈᖅᓴᐃᓂᕐᒥᒃ ᐱᔭᕆᐊᖃᓕᕋᑦᑕ ᐅᑭᐅᖅᑕᖅᑐᖅ ᑎᑭᐅᑎᔪᓐᓇᖅᑕᖓ ᓈᑦᑎᐊᕐᓗᒍ ᐱᔪᓐᓇᖅᓯᖁᓪᓗᑕ.
ᖁᔭᓐᓇᒦᕈᒪᒋᕙᕋ ᑖᓐᓇ ᐊᖓᔪᖅᑳᕐᔪᐊᖅ ᔭᔅᑎᓐ ᑐᕉᑑ ᐃᓄᓐᓄᑦ ᐱᖃᓐᓇᕆᔭᖃᖅᓯᒪᐃᓐᓇᕐᓂᖓᓄᑦ ᓄᓇᕗᒻᒧᓪᓗ, ᐊᒻᒪᓗ ᐃᔨᒋᓯᒪᐃᓐᓇᓚᐅᕐᒪᑦ ᐋᖅᑭᖃᑎᒌᓐᓂᖅᑕᖃᖁᓪᓗᒍ. ᑖᓐᓇ ᐊᖓᔪᖅᑳᖑᑎᓪᓗᒍ, ᒐᕙᒪᒃᑯᑎᓐᓂᑦ ᐱᓕᕆᖃᑎᖃᖅᑐᓂᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂᓪᓗ ᓄᓇᕗᒻᒥ ᓄᓇᖓᓐᓂᑦ ᓄᓇᒦᖔᖓᔪᓂᓪᓗ ᓇᖕᒥᓂᖅᓱᓕᖅᐸᓪᓕᐊᓂᕐᒧᑦ ᐊᖏᖃᑎᒌᒍᒻᒥ ᑲᔪᓯᑎᑦᑎᓚᐅᖅᑐᖅ ᐊᒻᒪᓗ ᑖᔅᓱᒥᖓ ᓄᓇᕗᒻᒥ ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑎᖓᑕ ᐊᖏᕈᑎᖓᓂᒃ, ᖃᓪᓕᕚᓪᓕᕆᐊᖅᑎᑦᑎᓪᓗᓂ ᐃᓐᓇᖁᑎᒋᔭᑦᑕ ᑕᐅᑐᒐᕆᓯᒪᓚᐅᖅᑕᖏᓐᓂᒃ ᓄᓇᕗᒻᒧ.
ᐊᖓᔪᖅᑳᕐᔪᐊᖅ ᑐᕉᑑ ᑲᒪᒋᔭᖃᐃᓐᓇᓚᐅᕐᒥᔪᑦ ᐃᓄᓐᓄᑦ ᓯᕗᓕᖅᑕᐅᔪᓂᑦ ᐱᓕᕆᐊᔅᓴᓕᐊᖑᓯᒪᔪᓂᑦ, ᒪᑯᓂᖓ ᓲᕐᓗ ᑕᓪᓗᕆᑎᐅᑉ ᐃᓚᖓᓐᓂ ᐸᐸᑕᐅᓂᔅᓴᖓᓐᓄᑦ ᑕᒪᔅᓱᒪᐅᑉ ᐊᒻᒪᓗ ᓯᓈ ᐊᖏᖃᑎᒌᒍᑎᖓᓐᓂᑦ, ᑖᒃᑯᐊ ᐃᒥᖁᑎᒋᔭᑦᑎᓐᓂᑦ ᓴᐳᒻᒥᐅᓯᖅᓯᒍᑕᐅᔪᑦ ᐊᒻᒪᓗ ᐃᖅᑲᓇᐃᔮᔅᓴᓂᑦ ᓴᖅᑭᑦᑎᕆᔾᔪᑕᐅᓪᓗᓂ ᐱᔭᕆᐊᖃᓪᓚᕆᓕᖅᑕᑎᓐᓂᓪᓗ ᐱᖁᑎᕐᔪᐊᓂᑦ ᓄᓇᓕᓐᓂᑦ ᐱᑖᖅᑎᑦᑎᒍᑕᐅᓪᓗᑎᑦ. ᒐᕙᒪᖓᓗ ᑖᓐᓇ ᐊᑐᓕᖅᑎᑦᑎᓚᐅᕐᒥᔪᑦ ᐃᑲᔪᖅᑐᒻᒪᕆᐅᓯᒪᔪᒥᑦ ᓱᕈᓯᕐᓄᑦ ᐃᓚᒌᖑᔪᓄᓪᓗ ᓂᐅᕕᑎᔅᓴᖃᖅᑎᑦᑎᓂᕐᒥᑦ ᐊᑭᑦᑐᐸᓪᓕᐊᑐᐃᓐᓇᓕᖅᑎᓪᓗᒍ ᐃᓅᓂᕐᒧᑦ, ᓲᕐᓗ ᑖᓐᓇ ᐃᓄᐃᑦ ᓱᕈᓰᑦ ᓯᕗᓪᓕᐅᔾᔭᐅᓂᖏᓐᓄᑦ ᐱᓕᕆᐊᖑᔪᑎᒍᑦ ᐊᒻᒪᓗ $10-ᓂᑦ ᐊᑭᓕᒻᒥᑦ ᐸᐃᕆᕕᓐᓄᑦ ᐊᖏᖃᑎᒌᒍᑎᒥ.
ᑖᓐᓇ ᐊᖓᔪᖅᑳᕐᔪᐊᖅ ᒫᒃ ᑳᓂ ᑕᒪᐅᖓ ᐳᓛᕆᐊᓛᖁᕙᕋ ᑲᔾᔮᕐᓇᖅᑐᒻᒪᕆᐅᓪᓗᓂ ᐱᐅᔪᓪᓚᕆᓪᓗᓂᓗ ᓄᓇᕗᑦ ᑕᑯᖁᓪᓗᒍ ᓇᒻᒥᓂᖅ ᐱᕕᔅᓴᖃᕐᓂᕆᔭᑦᑎᓐᓂᑦ ᓄᓇᕗᒻᒥ ᑖᓐᓇ ᓯᕗᒧᑦᑎᑕᐅᒋᐊᒃᑲᓐᓂᖁᓪᓗᒍ ᐱᓕᕆᖃᑎᒌᑦᑐᑦ ᑲᓇᑕᒥ ᐅᑭᐅᖅᑕᖅᑐᖅ ᑲᓇᑕᐅᑉ ᓇᒻᒥᓂᖁᑎᒋᓂᖓᓂᒃ ᑎᒍᓯᒋᐊᒃᑲᓐᓂᖁᓪᓗᒍ ᐊᒻᒪᓗ ᓴᐳᔾᔭᐅᓯᒪᓂᕆᔭᖓᓐᓄᑦ.