Uqaqtittiiji, nan’ngiqpunga ilitariumaplugu Nunarjuami Arnait Ublua, ilitariumaplugitlu hakugiqtut Inuit arnait kivraqtuivakhutik tautuktittiplutik tamainnut arnahugit arnainnutlu Nunavunmi.
Ottawami, Her Excellency Nan’ngarijaujuq Mary Simon hivulliqpaan’ngujuq Inuk hivulliqpaanggupluni Nunaqaqqaarhimajuq arnaq kivraqtuipluni King Kanatami.
Taamnalu Lori Idlout ilaupluni Maligaliurvikjuami, kivraqtuutigiplugit Nunavunmiut Ottawa mi.
Hamani nunaptingni, Nan’ngarijaujuq Eva Aariak Kamisiniujuq Nunavunmut Hivuliqtiugaluaqlu. Hivulliqpaami niruaqtaujuq Maligaliurvingmun 2008 mi, nakuuqpiaqtumik iniktigutivaktuq arnanut nunaptingni. Arnauginnaupluni niruaqtaujuq talvani ukiumi, uqaqhuni naammaginggiplugu ihumaliuqhunilu nakuuhivalliqtuqhat nutaqqiqiviit pipkainiagungnaqhipluni amigaitqianik arnanik ilauttaariamingnik kavamaliqidjutini.
Ilaujuqlu Nuanvut Tunngavikkunni An’ngijuqqaaq Aluki Kotierk, hakugiktumik nipiqaqtuq kivraqtuutigiplugit Inuit Nunavunmiut hakugingniqaqtuqlu aqhuuqhaipluni pilaagutainnut Inuinnarnut talvuuna Nunavut An’ngirutaanni.
Talvauvukli pidjutihimmaaktuq uumunga Tugliujuq Hivuliqtimun Pamela Hakongak Gross, aulaqtiqqaaqhugu kavamaliqidjutinut miijaupluni Iqaluktuuttiami. Havaamini Ministaupluni Ilinniaqtuliriijitkunnut, Ubluirvianni 2022 uqaqtaa $10 taala-ubluq tamaat nutaqqiqiviitigun, hivulliqpaakpian’ngujuq Kanatami. Amaamaupluni nukaqhiupluni inmi, uqaqtaalu atuliqqata talimat ukiut, 238 nik nutaanik nutaqqiqiviiviqhat piliuqtauniaqtut.
Imaalu, taaffumamiklu, ilitariumajara Minista Margaret Nakashuk Ministalu Karen Nutarak, taapkuatlu 6th Maligaliurvingmi havaqatitka MLA kut Janet Pitseolak Brewster, Mary Killiktee, Joanna Quassa aqhuuqpangmata kivraqtuqhutik inungnut.
Uqaqtittijii, nanngarijumajaralu Tukliq Minista, Anna Fowler. Ms. Fowler iniqtiqpaktuq qaujimattiaqhunilu Inuk arnaq havakpakhimajuq ajuittiaqhimanirmik inuuhimini kivgaqtuqhugit Nunavummiut. Quviahuktunga havaqatigigapkit.
Kavamavutlu quviagijait ajuittunik qaujimajutlu aadlat Inuit arnait taapkua Tugliujuq Ministamun Rebecca Hainnu, Tugliujuq Yvonne Niego, Tugliujuq Teresa Hughes An’ngijuqqaaqlu Rebeca Mearns. IIlitariumajatkalu Inuinnait Havaqatiit, ajuirhajut ajuirhaqhutiklu aadlatkiingnik ajuitpiaqtunitlu katimajut Tugliujut: Christine Ellsworth, Sandy Kownak unalu Jacqueline Curley. Tamaita hapkua arnat havakpiaqpaktut ubluq tamaat kivraqtuqhutik Nunavunmiunut.
Hapkua tautuktaujut hakugingniqhamik arnait hivuliqtiuplutik.
Nunarjuaqput an’ngijuamik ihumaliuqtuqhat kitkuugaluaqtillutik-aadjikkiiqtuqhat, kihimi, hamani Nunavut, ukpirijara uvagut ilitarijakkut taamna ajurnaittuq hivuniqhaq aqhuugutigilugu imaa pijaami uvagut pidjutihimmaagutiinnaklugu inuuhiptingni.
Quana, Uqaqtittiiji.