Uqaqtittiiji, nagikpun’nga ublumi ilitturipkagumaplugit maligaliuqatitka taaffuminga Kavamatuqait Katimajiita (COF) katimadjutait ilauplunga Halifax mi talvanga Taaqhivaliavia 15 min 17 mun.
Uqaqtittiiji, ukiuq tamaat Kavamatuqait Katimajiita aujami katimadjutit katimapkaivaktait hivuliqtiit tamaani Kanatami hivumuuriami atauttinit hivulliugutaujut havaqatigiiktutigut.
In’ngilraanggutiqhaliuqtuguq uvani ukiumi, hivulliqpaaqpiamik katimadjutini ilaujut pinggahut Nunaqaqqaarhimajut hivuliqtiit, Manitobap Hivuliqtia Kinew, Nunattiarmi Hivuliqtia Simpson uvangalu. Hamna takupkaqtitaujuq hivumuugutaujut piliurhimajainnik Nunaqaqqaarhimajut nunallaanggit tamaani Kanatami.
Uqaqtittiiji, aqhuunaktuqlu ilitturipkailuni haffum ukiumi katimadjutiqhainnik ilaliutilugit an’ngijuat uqarijaujunik taapkuninga Ukiuqtaqtumi atanniqtuitjutiqarniq amirinirmiklu. Ikhivautaupluni Ukiuqtaqtumi Hivuliqtiit katimadjutainni, havaqatigittiaqtatka havaqatitka Nunatsiamin Yukon minlu imaa pijaami taapkua pingahut ukiuqtaqtumi avikturviit hakugiqtumik atautimunlu nipiqaqhutik
ihumagijaujunik pidjutijut aktuqtaunikkut nunagijaptingnut.
Uqaqtittiiji hivuliqtiupluta an’ngiqhimajugun kanatap avikturviit ukiuqtaqtumilu avikturviit an’nginiqaqtun paatnagiiqtuqhani Kanatap amiriijini, aulahimmaaqhutik ilittuqhidjutihainnarnirmik tahapkunanit un’ngahiktuni nunaqaqtut ulapiqutiujuni, ikajurnik pivallianikkut humi nalvaaqhimajut aadlatkiiqnik ujaqqanik ihuagqutit maniliurnirmik, ikajurnirmiklu imaa pijaami amirinirmik aqjaqtuinikkut, auladjutiqhat, ihariagijaujutlu aulapkaidjutiqhanut.
Uqaqtittiiji, hadjalu quviarijumajara Patrick Woodcock, ilihaiji ilihaijilu United for Taiguangnirmun Titirangnirmun Iqalungni, tunijaujuq 20th ukiuq tamaat Katimajiita Kavamatuqatkut Taiguangnirmun Titirangnirmunlu Aittuutaa Nunavunmut.
Mr. Woodcock havakpiaqpaktuq malruungni ukiuni piliurhuni ihuaqtumik titirangnirmun taiguangnirmunlu ilihagutiqhanik itiqtauhimajunut Nunavunmiut. Patrick havakpaktuq hitamani ubluinni atauhirmun havainirmi talvani Aaqqigiarvik Itiqtauvianni Mamihainirmunlu Igluqpaani pingahunilu ubluinni havainirmi talvani Nunavut Arnait Itiqtauvianni, ilihaqhuni inungnut aadlatkiingnik ilihagutinik atauhiaqattagiplugit. Inuk itiqtauhuiqqat, Mr. Woodcock havaqatihimmaaqpagait talvani Uttaqivik Nunallaami Najurvianni talvainnakmiluunniit nunallaami.
Niqiliqivik 1, 2024, Ontario Hivuliqti Doug Ford havaariniaqtaa Ikhivautauluni Katimajiit Kavamatuqaqqut. Ontario mi katimapkainiaqtut aujangguqqat aippaagu katimadjutainnut Kanatap Hivuliqtiit Taaqhivaliavia 21 – 23, 2025 mi.
Quana, Uqaqtittiiji.