ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᕗᖓ ᒪᓕᒐᓕᐅᖅᑎᐅᖃᑎᒃᑲ ᑐᓴᖅᑎᑦᑐᒪᓪᓗᒋᑦ ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᑦ ᑲᑎᒪᖃᑕᐅᓂᕆᓚᐅᖅᑕᓐᓂᒃ ᕼᐋᓕᕚᒃᔅᒥ ᔪᓚᐃ 15-ᒥ 17-ᒧᑦ.
ᐅᖃᖅᑎᑦᑎᔩ, ᐊᕐᕌᒍᑕᒫᑦ ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᑦ ᐊᐅᔭᒃᑯᑦ ᑲᑎᒪᖃᑦᑕᖅᑐᑦ ᑲᑎᑎᑦᑎᓲᖑᕗᑦ ᓯᕗᓕᖅᑎᓂᒃ ᑲᓇᑕᓕᒫᒥ ᓯᕗᒻᒧᐊᒃᑎᑦᑎᓇᓱᒃᖢᑎᒃ ᑲᑐᔾᔨᖃᑎᒌᒃᖢᑎᒃ ᓯᕗᓪᓕᐅᔾᔭᐅᔪᒪᔪᓂᒃ ᐱᓕᕆᖃᑎᒌᒃᖢᑎᒃ.
ᑕᒪᑐᒪᓂ ᐊᕐᕌᒍᒥ ᐅᓂᒃᑳᖃᓚᐅᖅᐳᒍᑦ, ᓯᕗᓪᓕᖅᐹᑦᑎᐊᒥ ᑲᑎᓐᓂᐅᔪᒥᑦ ᐃᓚᖃᓚᐅᖅᐳᑦ ᐱᖓᓱᓂᒃ ᓄᓇᖃᖅᑳᖅᓯᒪᔪᑦ ᓯᕗᓕᖅᑎᖏᓐᓂᒃ, ᒫᓂᑑᐸᐅᑉ ᓯᕗᓕᖅᑎᖓ ᑭᓂᐅ, ᓄᓇᑦᓯᐊᒥ ᓯᕗᓕᖅᑎ ᓯᒻᑉᓴᓐᓗ ᐅᕙᖓᓗ. ᑕᒪᓐᓇ ᑕᑯᑎᑦᑎᕗᖅ ᓯᕗᒻᒧᐊᖅᐸᓪᓕᐊᓂᕆᔭᐅᔪᓂᒃ ᓴᓇᔭᐅᓯᒪᔪᓂᒃ ᓄᓇᖃᖅᑳᖅᑐᓄᑦ ᓄᓇᓕᖕᓄᑦ ᑲᓇᑕᓕᒫᒥ.
ᐅᖃᖅᑏ, ᐱᒻᒪᕆᐅᒋᕗᖅᑕᐅᖅ ᑕᒪᑐᒪᓂ ᐊᕐᕌᒍᒥ ᑲᑎᒪᓂᕆᔭᕗᑦ ᐅᖃᐅᓯᖃᓪᓚᕆᓚᐅᕐᒪᑕ ᐅᑭᐅᖅᑕᖅᑐᒥ ᓇᖕᒥᓂᕆᔭᐅᓂᖓᓂᒃ ᐊᒻᒪᓗ ᓴᐳᒻᒥᐅᓯᖅᑕᐅᓯᒪᓂᖓᓂᒃ. ᐃᒃᓯᕙᐅᑕᐅᓪᓗᖓ ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᒪᔨᖏᓐᓄᑦ, ᐱᓕᕆᖃᑎᖃᑦᑎᐊᓚᐅᖅᐳᖓ ᓄᓇᑦᓯᐊᕐᒥᐅᓂᒃ ᔫᑳᓐᒥᓪᓗ ᑖᒃᑯᐊ ᐱᖓᓱᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᑦ ᓴᓐᖏᔪᒥᒃ ᐊᒻᒪᓗ ᐊᑕᐅᓯᐅᖃᑎᒌᑦᑎᐊᖁᓪᓗᒋᑦ ᑕᒪᒃᑯᐊ ᐊᒃᑐᐃᓂᖃᖅᑐᑦ ᒐᕙᒪᐅᔪᓂᒃ.
ᐅᖃᖅᑏ, ᓯᕗᓕᖅᑎᐅᓪᓗᑕ ᐊᖏᖃᑎᒌᓚᐅᖅᑐᒍᑦ ᑲᓇᑕᐅᑉ ᐊᕕᑦᑐᖅᓯᒪᓂᖏᑦ ᐅᑭᐅᖅᑕᖅᑐᒥᓪᓗ ᐱᒻᒪᕆᐅᒋᐊᖃᕐᓂᖏᓐᓂᒃ ᑲᓇᑕᒥ ᐊᑦᑕᓇᔾᔭᐃᖅᓯᓯᒪᓂᕐᒧᑦ, ᐅᔾᔨᖅᑐᐃᑦᑎᐊᓂᕐᒥᒃ ᑲᓇᑕᐅᑉ ᓯᓚᑖᓂᒃ ᐸᕝᕕᓵᖅᑕᐅᔪᖃᖁᓇᒍ, ᐃᑲᔪᖅᑐᐃᓗᑕ ᐱᕙᓪᓕᐊᑎᑦᑎᓂᕐᒥᒃ ᓄᓇᓕᓐᓂ ᐅᔭᕋᑦᓯᐊᕙᓐᓂᒃ, ᐊᒻᒪᓗ ᐃᑲᔪᖃᑦᑕᕐᓗᑎᒃ ᐊᑦᑕᓇᔾᔭᐃᖅᓯᓯᒪᓂᕐᒥᒃ ᐃᖏᕐᕋᔪᓕᕆᓂᕐᒥᒃ ᐊᖅᑯᑎᓂᒃ, ᐆᒪᖅᑯᑎᓂᒃ, ᐊᒻᒪᓗ ᐱᒻᒪᕆᐅᔪᓂᒃ ᓄᓇᓖᑦ ᐊᑐᖅᐸᑦᑕᖏᑦ ᐊᐅᓚᔪᓐᓇᖁᓪᓗᒋᑦ.
ᐅᖃᖅᑎᑦᑎᔩ, ᐱᕕᖃᕈᒪᒋᕗᖓᑦᑕᐅᖅ ᐱᒃᑯᒋᔪᒪᓪᓗᒍ ᐹᑐᕆᒃ ᕗᑦᑲᒃ, ᐃᓕᓴᐃᔨ ᐃᓕᓴᐃᔨᓗ ᐊᑕᐅᓯᐅᖃᑎᒌᒃᖢᑎᒃ ᐅᖃᓕᒫᕈᓐᓇᕐᓂᕐᒧᑦ/ᑎᑎᕋᕈᓐᓇᕐᓂᕐᒧᑦ ᐃᖃᓗᖕᓂ, ᑐᓂᔭᐅᓚᐅᖅᑐᖅ ᐊᕙᑎᓄᑦ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᔩᑦ ᑲᑐᔾᔨᖃᑎᒌᖑᔪᑦ ᐅᖃᓕᒫᕈᓐᓇᕐᓂᕐᒧᑦ/ᑎᑎᖅᑭᕿᔪᓐᓇᕐᓂᕐᒧᓪᓗ ᑐᓐᓂᖅᑯᓯᐊᖅ ᓄᓇᕗᒻᒧᑦ.
ᒥᔅᑕ ᕗᑦᑲᒃ ᐱᓕᕆᓯᒪᔪᖅ ᑕᖃᔪᐃᑦᑑᓪᓗᓂ ᐊᕐᕌᒍᓄᑦ ᒪᕐᕉᓐᓄᑦ ᓴᖅᑮᓇᓱᐊᖅᑐᓂ ᐅᖃᓕᒫᕆᐅᔅᓴᓂᕐᒧᑦ ᐃᓕᓐᓂᐊᕈᑎᒥᒃ ᑎᒍᔭᐅᓯᒪᔪᓄᑦ ᓄᓇᕗᒻᒥᐅᓄᑦ. ᐹᑐᕆᒃ ᐃᖅᑲᓇᐃᔭᖃᑦᑕᖅᑐᖅ ᓯᑕᒪᓄᑦ ᐅᓪᓗᓄᑦ ᐱᓇᓱᐊᕈᓯᕐᒥᑦ ᐊᖅᑭᕆᐊᕐᕕᒃ ᐃᑲᔪᖅᑕᐅᕕᒻᒥᑦ ᒪᒥᓴᕐᕕᒻᒥᑦ ᐊᒻᒪᓗ ᐅᓪᓗᓄᑦ ᐱᖓᓱᓄᑦ ᐱᓇᓱᐊᕈᓯᕐᒥᑦ ᓄᓇᕗᒻᒥ ᐊᕐᓇᐃᑦ ᑎᒍᔭᐅᒪᕕᖓᓂᑦ, ᐃᓕᓐᓂᐊᑎᑦᓯᑦᓱᓂ ᐊᔾᔨᒌᖏᑦᑐᓂᑦ ᐃᓄᑑᔾᔨᓂᕐᒥᑦ. ᐊᓂᔪᖃᕋᐃᒻᒪᑦ, ᒥᔅᑕ ᕗᑦᑲᒃ ᐃᖅᑲᓇᐃᔭᖃᑎᖃᐃᓐᓇᓲᖅ ᐅᑕᖅᑭᕕᒻᒥ ᐅᕝᕙᓘᓐᓃᑦ ᓄᓇᓕᓐᓂ.
ᐋᒡᒌᓯ 1, 2024−ᒥ, ᐋᓐᑎᐅᕆᐅᒥ ᓯᕗᓕᖅᑎ ᑕᒡ ᕗᐊᑦ ᐃᒃᓯᕙᐅᑕᕆᔭᐅᓕᕐᓂᐊᖅᑐᖅ ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᓐᓄᑦ. ᐋᓐᑎᐅᕆᐅᒥ ᑭᖑᓪᓕᕐᒥ ᐊᐅᔭᒃᑯᑦ ᑲᑎᒪᓛᖅᑐᑦ ᑲᓇᑕᒥ ᓯᕗᓕᖅᑏᑦ ᔪᓚᐃ 21-ᒥ 23-ᒧᑦ, 2025.
ᖁᔭᓐᓇᒦᒃ, ᐅᖃᖅᑎᑦᑎᔩ.