Uqaqtittiiji, nan’ngiqpunga ublumi ilitturipkagumaplugit maligaliuqatitka taaffuminga malruuq pilihaaqtut ilauqatigiingnirmun talvuuna aqhuuqhaijara Nunavutim ihumaliutqiqtuqhat piumaniit ihumagitigplugu Ukiuqtaqtumi atanniqtuitjutiqarniq amirhimanirmiklu.
Naunaittuq takudjutiliktuguq ajurnaktunik hadjamin kavamaliqidjutinut nunaniittutigut. Atadjutivut ilannaptingnun ikajuutigijavutlu qajarnarniaqtut qanuqtun Ukiuqtaqtumi kiudjutiniaqtaitigut hapkununga aqhuungnaktunut. 20 pusanmik Nunavutim nunait Kanatap an’ngijuaq nunaitanit havaaqaqjuaqtut Kanatap Ukiuqtaqtumi ihumaliutqiqhatigun.
Naunaittiariami Nunavutim piumaniit tammanggillutik uqaqatigiiqtuni, piinnaktun’nga piviqhaqagumi ilauqatigiplugit nunarjuami paatnavut.
Apitilirvia 29 mi, katimapkaiqataujun’nga Kanatap-Nordic Nunarjuanit Ministait’ Ihumaliutqidjutigut tahapkuatlu Kanatap Nunarjuatigut Minista Mélanie Joly Iqalungni. Katimadjuti atauttimunggaqtittijuq Nunarjuani Ministainnik Kanatamun, Denmark, Faroe Island, Norway Sweden lu an’ngajuqhiitniklu Nunarjuani Ministaujut Kalaaqliitnit, Finland, Iceland minlu hivuniqhaqaqhutik havaqatigiingnikkut havaqatigiingnikkutlu hivuliujuqhanik tamaani Ukiuqtaqtumi. Ministat David Joanasie David Akeeagok lu ilauqataujut katimadjutimi.
Atauttimut, uqarijavut aadlanggurniit amiqhinirmun pidjutait Ukiuqtaqtumi qanuqlu hivumuungniaqqiq amirinirmun talvuunatigut pidjutihimmaaqluni maniliurhimmaangnikkut. Quvianaqpiaqtuq takujaami aqhuungnaktunut piviqhaqarniinnutlu aadjikkiiqtut tamaani Ukiuqtaqtumi.
Katimadjutaanni, uqaqtatka Nunavut pidjutigiinnaktaat taamna federal defence policy ublumimun pidjutihimajuq pittaagutittaaqtutlu aittuutiqhat Ukiuqtaqtumi. Uqaqtatkalu amigaittut iniktiqtaujuqhat munaqhijaami Ukiuqtaqtumi Atanniqtuitjutiqarniq amirinirmiklu takupkaqlugit Kanatap aqhuugutait ukiuqtaqtumi avikturviit.
Nordic kivraqtuijit an’ngiqtait ihariagijaujumik an’ngijuatqiamik maniliurnirmun tahapkunani hakugiqtuni amigaittuni-aturnikkut aulapkaidjutiqhani hapummitijunut Ukiuqtaqtumun, pipkaidjutiplutiklu maniliurnirmun ikajuutiniklu inuuhirinnaktumik pijaangginni nunallaapta.
Qaitqujauplun’nga ilaujaami 2024 Ukiuqtaqtumi Katimavikjuanggani Reykjavik, Iceland mi. Ilaudjutitka ilaliutilgit kivraqtugiplugit malruuq naalaktinni. Uqarijatka Titigagutait An’ngigutaanut tahapkunani Nunavut Kalaaqliitlu naalaktuni ihumagilluagiplugu Kalaalliit Nunarjuanut, Amirinikkut An’ngujaktiitlu Atugaqhaa. Ilauplun’ngalu Kanaitian Ihumagijainnik Ukiuqtaqtumi Amirinirmun’ naalaktiinni tun’ngahuktittijuni North American Ukiuqtaqtumilu An’ngujaqtiit Amirinikkutlu Havauhiit.
Iceland miitillun’nga ilaujungalu qaffini aadlani katimadjutini uqaqviqattaqhugitlu hivuliqtiit tamaani nunarjuaptingni tuhaajumajunut nunarjuaptingni ihumagijaujunik.
Uqaqtittiiji, ilihimajun’nga hapkua ilaudjutit hivumuraaluk pidjutauniaqtut imaa pijaami Nunavutim piumaniit ihumagilluaraqhat pidjutikpata Ukiuqtaqtumi Atanniqtuitjutiqarnirmik amirinirmunlu.
Quana, Uqaqtittiiji.