ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᔪᖓ ᑐᓴᖅᑎᑦᓯᒍᒪᓪᓗᖓ ᒪᓕᒐᓕᐅᖅᑎᐅᖃᑎᓐᓂᒃ ᒪᕐᕉᓐᓂᒃ ᐃᓚᐅᖃᑕᐅᕋᑖᓚᐅᕐᓂᖏᓐᓄᑦ ᓴᖅᑭᔮᖅᑎᑦᓯᒋᐊᖅᑐᖅᑐᖓ ᓄᓇᕗᒻᒥ ᖃᓄᖅᑑᕈᑕᐅᓯᒪᔪᒃᑯᑦ ᐃᓚᐅᖃᑕᐅᓂᖏᓐᓄᑦ ᐃᓱᒪᑦᓴᖅᓯᐅᕈᑕᐅᑎᓪᓗᒍ ᐅᑭᐅᖅᑕᖅᑐᖅ ᓇᒻᒥᓂᕆᔭᐅᓂᖓᓄᑦ ᓇᓗᓇᐃᖅᓯᓯᒪᓂᕐᒧᑦ ᓇᐅᑦᓯᖅᑐᖅᑕᐅᓂᖓᓄᓪᓗ.
ᑐᓴᐅᒪᓇᑦᓯᐊᕐᖓᑦ ᓵᖓᔭᐅᓂᑦᑎᓐᓂᒃ ᐊᑦᓱᕈᕐᓇᖅᑐᒃᑰᕐᓂᐅᔪᓂᒃ ᒫᓐᓇᐅᔪᖅ ᓄᓇᕐᔪᐊᒥ ᓄᓇᓕᕐᔪᐊᑦ ᐊᑲᐅᙱᓕᐅᕈᑎᖃᕐᓂᖏᓐᓄᑦ. ᑲᓲᒪᖃᑎᖃᕐᓂᕗᑦ ᐱᖃᓐᓇᕆᔭᑦᑎᓐᓂᒃ ᑕᐱᑦᑎᓂᓪᓗ ᐱᒻᒪᕆᐅᓂᐊᕐᖓᑦ ᖃᓄᖅ ᐅᑭᐅᖅᑕᖅᑐᒥ ᑲᒪᒋᔭᖃᕐᓂᐊᕐᒪᖔᑦᑕ ᑕᒪᒃᑯᓂᖓ ᐊᑦᓱᕈᕐᓇᖅᑐᒃᑰᕐᓇᐅᔪᓂᒃ. 20 ᐳᓴᓐᑎᖏᑦ ᑲᓇᑕᐅᑉ ᓄᓇᖓᑕ, ᓄᓇᕗᑦ ᐱᒻᒪᕆᐅᔪᒥᒃ ᐃᓚᐅᖃᑕᐅᕕᖃᕆᐊᓖᑦ ᑲᓇᑕᐅᑉ ᐅᑭᐅᖅᑕᖅᑐᒥ ᖃᓄᖅᑑᕈᑎᖓᓄᑦ.
ᓇᓗᓇᐃᖅᑕᐅᓯᒪᖁᓪᓗᒍ ᓄᓇᕗᒻᒥ ᐱᔪᒪᓂᕆᔭᕗᑦ ᐳᐃᒍᖅᑕᐅᓯᒪᖏᑦᑐᑦ ᐅᖃᖃᑎᒌᓐᓂᐅᕙᑦᑐᓂ, ᐱᕕᖃᑐᐊᕋᐃᒐᒪ ᐃᓚᐅᖃᑕᐅᒍᓐᓇᓂᕐᒧᑦ ᓄᓇᕐᔪᐊᒥᐅᓄᑦ ᑲᑐᔾᔨᖃᑎᑦᑎᓐᓄᑦ.
ᓯᑎᐱᕆ 29-ᖑᑎᓪᓗᒍ, ᑐᙵᓱᑦᓯᔨᐅᖃᑎᖃᓚᐅᖅᑐᖓ ᑲᓇᑕ-ᐅᑭᐅᖅᑕᖅᑐᒥ ᓄᓇᓕᕐᔪᐊᖏᑕ ᓯᓚᑖᓃᖔᖅᑐᓕᕆᓂᕐᒧᑦ ᒥᓂᔅᑕᐃᑦ ᐅᖃᖃᑎᒌᒍᑎᖃᕐᓂᖏᓐᓂᒃ ᑲᓇᑕᒥ ᑲᓇᑕᐅᑉ ᓯᓚᑖᓃᖔᖅᑐᓕᕆᓂᕐᒧᑦ ᒥᓂᔅᑕᖓᓗ ᒥᓚᓂ ᔫᓖ ᐃᖃᓗᓐᓂ. ᑲᑎᒪᓂᖅ ᑲᑎᖃᑎᒌᒍᑕᐅᓚᐅᖅᑐᖅ ᓄᓇᓕᕐᔪᐊᖏᑕ ᓯᓚᑖᓃᖔᖅᑐᓕᕆᓂᕐᒧᑦ ᒥᓂᔅᑕᖏᓐᓂᒃ ᑲᓇᑕᒥ, ᑎᐊᓐᒫᒃ, ᕕᐅᕈ ᕿᑭᖅᑕᖏᑦ, ᓄᐊᕙᐃ ᐊᒻᒪᓗ ᓱᕖᑕᓐ ᐊᒻᒪᓗ ᐊᖏᔪᖅᑲᐅᑎᑦ ᐃᖅᑲᓇᐃᔭᖅᑎᖏᑦ ᑲᓛᖡᑦ ᓄᓈᓐᓂ, ᕕᓐᓚᓐ, ᐊᒻᒪᓗ ᐊᐃᔅᓚᓐ ᑐᕌᒐᖃᖅᑐᑕ ᑲᑐᔾᔨᖃᑎᒌᓕᒃᑲᓐᓂᕈᒪᓂᕐᒧᑦ ᐊᑕᖏᖅᑐᑕ
ᓯᕗᓪᓕᐅᑎᒍᒪᔭᑦᑎᓐᓂᒃ ᐅᑭᐅᖅᑕᖅᑐᒥ. ᒥᓂᔅᑖᒃ ᑕᐃᕕᑎ ᔪᐊᓇᓯ ᐊᒻᒪᓗ ᑕᐃᕕᑎ ᐊᕿᐊᕈᖅ ᑲᑎᒪᖃᑕᐅᓚᐅᕐᒥᔫᒃ.
ᐊᑕᖏᖅᑐᑕ, ᐅᖃᖃᑎᒌᒍᑎᖃᓚᐅᖅᑐᒍᑦ ᐊᓯᔾᔨᖅᑕᐅᒋᐊᖃᕐᓂᖏᓐᓂᒃ ᓇᐅᑦᓯᖅᑐᕐᓂᕐᒧᑦ ᐋᖅᑭᐅᒪᓂᐅᔪᓂᒃ ᐅᑭᐅᖅᑕᖅᑐᒥ ᖃᓄᕐᓗ ᓯᕗᒧᒋᐊᕈᑕᐅᒍᓐᓇᕐᒪᖔᖅ ᓇᐅᑦᓯᖅᑐᑦᓯᐊᕐᓂᖅ ᒪᑭᒪᔾᔪᑕᐅᓯᓐᓈᕐᓗᓂ ᐱᕙᓪᓕᐊᔪᓕᕆᓂᕐᒧᑦ. ᑐᓴᕈᒥᓇᓚᐅᖅᑐᖅ ᑕᑯᓪᓗᓂ ᐊᑦᓱᕈᕐᓇᖅᑐᒃᑰᕈᑎᒋᔭᕗᑦ ᐱᕕᑦᓴᖃᕐᕕᒋᒍᓐᓇᖅᑕᕗᓪᓗ ᓇᓕᒧᒌᑦᓯᐊᕐᓂᖏᓐᓂᒃ ᐅᑭᐅᖅᑕᖅᑐᓕᒫᒥ.
ᑲᑎᒪᔪᓂ, ᓇᓗᓇᐃᖅᓯᒋᐊᓪᓚᓚᐅᖅᑐᖓ ᓄᓇᕗᑦ ᑐᙵᓱᑦᑎᑦᓯᓯᒪᓂᖓᓄᑦ ᒐᕙᒪᑐᖃᒃᑯᑦ ᐅᓇᑕᖅᑐᓕᕆᓂᕐᒧᑦ ᐊᑐᐊᒐᖓᓂᒃ ᐅᓪᓗᒥᒧᑦ ᖃᓄᐃᓕᖓᓕᕐᓂᖓᓂᒃ ᐃᑲᔫᑎᖃᑐᐃᓐᓇᕆᐊᖃᕐᓂᖓᓂᓪᓗ ᐅᑭᐅᖅᑕᖅᑐᒧᑦ. ᓇᓗᓇᐃᖅᓯᓚᐅᕐᒥᔪᖓ ᖃᓄᐃᓕᐅᕆᐊᒃᑲᓐᓂᕆᐊᖃᕐᓂᖏᓐᓂᒃ ᓴᐳᒻᒥᔭᐅᒋᐊᖃᕐᓂᖓᓂᒃ ᐅᑭᐅᖅᑕᖅᑐᖅ ᓇᒻᒥᓂᕆᔭᐅᓂᖓᓂᒃ ᓇᓗᓇᐃᖅᓯᓯᒪᒋᐊᖃᕐᓂᕐᒧᑦ ᓇᐅᑦᓯᖅᑐᖅᑕᐅᒋᐊᖃᕐᓂᖓᓄᓪᓗ ᓴᖅᑭᔮᖅᑎᑦᓯᒍᑕᐅᓯᓐᓈᕐᓗᓂ ᑲᓇᑕᐅᑉ ᐊᑦᓱᕉᑎᖃᕆᐊᖃᕐᓂᖏᓐᓄᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᑦᑎᓐᓄᑦ.
ᐅᑭᐅᖅᑕᖅᑐᒥ ᓄᓇᓕᕐᔪᐊᓂᒃ ᑭᒡᒐᑐᖅᑏᑦ ᐊᖏᖃᑕᐅᓚᐅᖅᑐᑦ ᑮᓇᐅᔭᖃᖅᑎᑦᓯᒃᑲᓐᓂᕆᐊᖃᕐᓂᖏᓐᓂᒃ ᐊᑕᖏᖅᑐᓂᒃ ᐊᔾᔨᒌᖏᑦᑐᓄᑦ ᐊᑐᖅᑕᐅᒍᓐᓇᖅᑐᓂᒃ ᐊᑭᑐᔫᑎᓂᒃ ᐱᖁᑎᕐᔪᐊᓂᒃ ᓴᐳᒻᒥᔭᐅᒍᑕᐅᒍᓐᓇᖅᑐᓂᒃ ᐅᑭᐅᖅᑕᖅᑐᒥ, ᑲᔪᖏᖅᓴᐃᒍᑎᐅᓗᑎᒃ ᑮᓇᐅᔭᓕᐅᕈᑎᖃᕈᓐᓇᓂᑦᑎᓐᓂᒃ ᐃᑲᔪᖅᓱᐃᓂᖃᕐᓗᓂᓗ ᐃᓅᓯᖃᑦᓯᐊᕈᓐᓇᕐᓂᖏᓐᓄᑦ ᓄᓇᓕᑦᑎᓐᓂ.
ᐃᓇᑕᐅᓯᒪᓚᐅᕐᒥᒐᒪ 2024 ᐅᑭᐅᖅᑕᖅᑐᒥᐅᑦ ᑲᑎᒪᕐᔪᐊᕐᓂᖏᓐᓄᑦ ᕋᐃᑲᕕᒃ, ᐊᐃᔅᓚᓐᒥ. ᐃᓚᐅᖃᑕᐅᓚᐅᖅᑐᖓ ᐅᖃᓕᒪᒋᐊᖅᑐᖃᑦᑕᖅᑐᖓ ᒪᕐᕈᐊᖅᑎ ᑲᑎᒪᑎᑕᐅᔪᓄᑦ. ᐅᖃᐅᓯᖃᓚᐅᖅᑐᖓ ᑐᑭᓯᐊᒪᖃᑎᒌᓐᓂᕐᒧᑦ ᐊᖏᕈᑎᒃ ᓄᓇᕗᒻᒥᐅᓄᑦ ᑲᓛᖡᓪᓗ ᓄᓈᓐᓂᒥᐅᓄᑦ ᑲᑎᒪᔪᓂ ᐱᔾᔪᑎᖃᖅᑐᑎᒃ ᑲᓛᖡᑦ ᓄᓈᓐᓂ ᓯᓚᑖᓂ, ᓇᐅᑦᓯᖅᑐᖅᑕᐅᓂᕐᒧᑦ ᐅᓇᑕᖅᑐᑦᓴᓕᕆᓂᕐᒧᓪᓗ ᐊᑐᐊᒐᓕᕆᓂᕐᒧᑦ. ᐃᓚᐅᖃᑕᐅᓚᐅᕐᒥᔪᖓ ᑲᓇᑕᐅᑉ ᐃᓱᒪᒋᔭᖏᓐᓄᑦ ᐅᑭᐅᖅᑕᖅᑐᒥ ᓇᐅᑦᓯᖅᑐᕐᓂᕐᒧᑦ ᑲᑎᒪᔪᓂ ᑐᙵᓱᑦᑎᑦᓯᔨᐅᓪᓗᑎᒃ ᓄᓇᕐᔪᐊᑉ ᐅᐊᓐᓇᖅᐸᓯᐊᓂᒥᐅᑦ ᐅᑭᐅᖅᑕᖅᑐᒥᓗ ᓴᐳᒻᒥᔭᐅᓂᖏᓐᓄᑦ ᐱᓕᕆᖃᑎᒌᑦᑎᓄᑦ.
ᐊᐃᔅᓚᓐᒥ ᐃᓚᐅᖃᑕᐅᓚᐅᕐᒥᔪᖓ ᐊᔾᔨᒋᖏᑦᑐᓄᑦ ᑲᑎᒪᔪᓄᑦ ᐅᖃᖃᑎᒌᑦᑐᓄᓪᓗ ᓯᕗᓕᖅᑎᖏᓪᓗ ᓄᓇᕐᔪᐊᒥᐅᑦ ᑲᒪᒋᔭᖃᖅᐸᑦᑐᓄᑦᑦ ᐅᑭᐅᖅᑕᖅᑐᓕᕆᓂᕐᒧᑦ.
ᐅᖃᖅᑎᑦᑎᔩ, ᖃᐅᔨᒪᔪᖓ ᑕᒪᒃᑯᐊ ᐃᓚᐅᖃᑕᐅᕕᖃᕐᓂᐅᔪᑦ ᓯᕗᓂᑦᓴᑎᓐᓄᑦ ᐊᑑᑎᖃᓛᕐᓂᖏᓐᓂᒃ ᓄᓇᕗᒻᒥ ᐱᔪᔭᕗᑦ ᐃᖅᑲᐅᒪᔭᐅᖏᓐᓇᖃᑦᑕᖁᓪᓗᒋᑦ ᐅᑭᐅᖅᑕᖅᑐᖅ ᓇᒻᒥᓂᕆᔭᐅᓂᖓᓂᒃ ᓇᓗᓇᐃᖅᑕᐅᓯᒪᖁᓪᓗᒍ ᓇᐅᑦᓯᖅᑐᖅᑕᐅᑦᓯᐊᖁᓪᓗᒍᓗ.
ᖁᔭᓐᓇᒦᒃ, ᐅᖃᖅᑎᑦᑎᔩ.