Uqaqtittiiji, na’ngiqpunga ublumi tuhaqtittiumaplugit havaqatitka an’nginiqaqtut ublumimut ihumagiplugu pidjutihimmaaqtuq havaqatigiingnikkut Winnipeg Hunaliurhimajunik Qun’ngiaqviujuq-Qaumajuq
Hikutirviami, pulaaqtara Winnipeg Hunaliurhimajunik Qun’ngiaqviuvinga, piqaqhutik Nunavut Kavamaita hunaliuqtauhimajunik katitiqhimajut, havaqatigiiqhutik Winnipeg Hunaliurhimajunik Qun’ngiaqviujuq havagvialu atauttini ikajuutaujuq. Havaqatihimmaaqtuguq qaffinik akhuurutaujunik piumaniinnik aqhuugutaujutlu tunihijaam ilihaidjutiqhanik piliurlunilu piviqhaqarnirmik ilitquhikkutigun havaktiit hunaliuqtiitlu Nunavunmit. Ilauqatigiikhuta, aulapkaijugut hivitujumik-kikliqaqtuq munaqhinirmik hunaujaliuqtunik talvuunatigut atukiqnikkut an’ngigutikkut, tautuktittinikkut pijakhanik, katitirinirmiklu munaridjutiniklu. Hapkua aqhuurutit pijaangini Nunavutim pitquhikkut hunat tamaqtailijaujut uvalu piyaarnikkutlu kinguliptingnun.
Uqaqtittiiji, aipaangani, havakviga, havaqatigiplugit Winnipegmi Hunaliukhimajunik Qun’ngiaqviujuq, takupkaqtitaat Hunaujaliuqtip-Najugaanni Pivinganni. Una piumania tunihijuq Nunavunmi Inuinnarnut hunaujaliujuqtunut hitamani-havainniini hulidjutiujuni ilauniqhatigut atuqpaktunik talvani Winnipeg-Hunaliurhimajunik Qun’ngiaqviuvingani, tunihiplutik pijaangnikkut hunaliurviujumi iniqhainnik, qun’ngiaqtittiplutik ajuirhanikkut piviqhaqarnirmiklu aqhuuqhainirmun Nunavutim Kavamaita katitiqhimajunik Inuinnait hunaujaliuqtainnik.
Quviahuktun’nga uqariami uvani ukiumi iniktirutaat nakuujumik ilaujut, tahapkunanit atauhirmik inungmik tamainni avikturviujunit. Ilauqatigingga quviahuutigilugit Martha Siqiniq Aupaluktuq-Hicks Qamanittuarmin, Andrew Jhon Palongayak Urhuqtuumin, Jamisie Ittulu Mittimatalingmin. Hapkua ajuittiaqhimajut hunaliurnikkut piviqhaqarniaqtut pinniqhaqlugit hunaliugutait qaujimattiariamingniklu ikajungnikkut aadlatkiingniklu takupkaqtittinirmik havagviujumi.
Uqaqtittiiji, talvuuna ihumaliutqiqtaujumin paatnariitigut tahapkuatlu Winnipeg Hunaliurhimajunik Qun’ngiaqviuvingani, tunihijuguk piviqhaqariami Nunavunmut Inuit hunaujaliuqtiinnut ikajuutijuqhanik naupkariami Inuit hunaliuqtainnik, pitquhikkutlu, qaujimanikkutlu. Una ilihaidjut ikajuutijut ajuirhaliqtut hunaujaliuqhutik hakugingniqhapkaijutlu atajumik tahapkunani Nunavut hunaujaliuqtinutlu nunarjuami, imaa pimaamilu Nunavut hunaujaliuqhimajunik quviahuutaulutik kanatami kanatap nunait avataanilu takupkaqtitaulutik.
Hamna piumani pidjutijuq aadjikkuugutigiplugu Katujjiluta hivuniqhaa aadlatkiiqtuni nunallaani maniliurutainnik. Tunihipluni hunaujaliuqtinut pijaamingnik an’ngijuamik havauhiqhamik taapkuatut Winnipeg Hunaliurhimajunik Qun’ngiaqviuvinganik, avaliinggittuq taamna ikajurniq inmi ajuittiariamingnikkutigut, kihimi piliurhunilu piviqhainik akittuqjuummiriami utirutit nunallaami hunajaliuqtunit. Takupkaqtitainiq ilaunikkutlu uvani ilihagutimi, hunaujaliuqtiit amigaiqjuummingniaqtait naupkarlugit ilauqatigiingnikkutigut, hivuliqtigiplugulu pittaangnikkut niuviktaunikkut, imaalu akhut akittuqjuummiklugit inmi maniliugutaita.
Quana, Uqaqtittiiji.