ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᕗᖓ ᒪᓕᒐᓕᐅᖅᑎᐅᖃᑎᒃᑲ ᑐᓴᖅᑎᑦᑐᒪᓪᓗᒋᑦ ᐱᒻᒪᕆᐅᔪᓂᒃ ᓄᑖᙳᕆᐊᖅᓯᒪᔪᓂᒃ ᐱᔾᔪᑎᓕᖕᓂᒃ ᐱᓕᕆᖃᑎᒌᖏᓐᓇᕐᓂᑦᑎᓐᓂᒃ WINNIPEG (ᐅᐃᓂᐹᒡᒥ) ᓴᓈᓄᑦ ᑕᑯᔭᒐᖃᕐᕕᖕᒥ−ᖃᐅᒪᔪᖅ
ᓄᕕᐱᕆᒥ, ᐳᓛᕆᐊᓚᐅᕋᒪ WINNIPEG (ᐅᐃᓂᐹᒡᒥ) ᓴᓈᓄᑦ ᑕᑯᔭᒐᖃᕐᕕᖕᒧᑦ, ᒫᓐᓇᐅᔪᖅ ᐃᓂᖃᖅᑎᑦᑎᔪᖅ ᓄᓇᕗᑦ ᒐᕙᒪᒃᑯᖏᑕ ᓴᓇᐅᒐᖏᓐᓂᒃ, ᑲᑐᔾᔨᖃᑎᒌᓐᓂᖏᑦ WINNIPEG (ᐅᐃᓂᐹᒡᒥ) ᓴᓈᓄᑦ ᑕᑯᔭᒐᖃᕐᕕᒃ ᐊᒻᒪᓗ ᐱᓕᕆᕕᐅᔪᖅ ᐃᑲᔫᑎᖃᖅᓯᒪᓚᐅᖅᑐᖅ. ᐱᓕᕆᖃᑎᒌᓐᓇᖅᑕᕗᑦ ᖃᔅᓯᒐᓚᖕᓂᑦ ᐱᒋᐊᖅᑕᐅᓯᒪᔪᓂᑦ ᐊᖏᖅᓯᒪᓪᓗᑕᓗ ᐱᓕᒻᒪᒃᓴᐃᓂᕐᓂᑦ ᓴᖅᑭᑦᑎᓂᕐᓂᒡᓗ ᐱᕕᒃᓴᓂᑦ ᐃᑦᑕᕐᓂᓴᓕᕆᔨᓄᑦ ᓴᓇᙳᐊᖅᑎᓄᓪᓗ ᓄᓇᕗᒻᒥ. ᑲᑐᔾᔨᓪᓗᑕ, ᐱᓕᕆᐊᖃᖅᐸᒃᐳᒍᑦ ᐊᕗᖓᑲᓪᓚᒃ ᑲᒪᒋᔭᖃᖅᐸᖕᓂᕐᒥᒃ ᓴᓇᙳᐊᖅᑕᐅᕙᒃᑐᓂᒃ ᐊᑐᖅᑐᐊᖅᑎᑦᑎᓂᕐᒧᑦ ᐊᖏᖃᑎᒌᒍᑕᐅᓯᒪᔪᑎᒍᑦ, ᑕᑯᒃᓴᐅᑎᑦᑎᓂᕐᒧᑦ ᐱᕕᒃᓴᐅᕙᒃᑐᓂᒃ, ᑲᑎᖅᓱᐃᓂᕐᒧᓪᓗ ᐊᐅᓚᑦᑎᕝᕕᖃᕐᓂᕐᒥᒃ. ᑖᒃᑯᐊ ᐊᒃᓱᕉᑕᐅᔪᑦ ᖃᐅᔨᒪᔾᔪᑕᐅᕗᑦ ᓄᓇᕗᒻᒥ ᐃᓕᖅᑯᓯᕆᔭᐅᔪᒃᑯᑦ ᐱᐅᒋᔭᐅᔪᑦ ᐸᐸᑕᐅᓂᖏᓐᓂᒃ ᐊᒻᒪ ᐱᔭᒃᓴᐅᓂᖏᓐᓂᒃ ᑭᖑᕚᒃᓴᑦᑎᓐᓄᑦ ᐊᒡᒋᖅᑐᓄᑦ.
ᐅᖃᖅᑎᑦᑎᔩ, ᐊᕐᕌᓂ, ᐱᓕᕆᕝᕕᒋᔭᒃᑲ, ᐱᓕᕆᖃᑎᖃᖅᖢᑎᒃ WINNIPEG (ᐅᐃᓂᐹᒡᒥ) ᓴᓈᓄᑦ ᑕᑯᔭᒐᖃᕐᕕᖕᒥ, ᓴᖅᑭᑦᑎᓚᐅᖅᐳᑦ ᓴᓇᙳᐊᖅᑎᑦ−ᐃᒡᓗᖃᖅᑎᐅᓂᕐᒧᑦ ᐱᓕᕆᐊᒥᒃ. ᑖᓐᓇ ᐱᓕᕆᐊᖑᕙᓪᓕᐊᔪᒪᔪᖅ ᐊᑐᐃᓐᓇᐅᑎᑦᑎᕗᖅ ᓄᓇᕗᒻᒥ ᐃᓄᐃᑦ ᓴᓇᙳᐊᖅᑎᖏᓐᓂᒃ ᐱᓇᓱᐊᕈᓯᕐᓄᑦ ᑎᓴᒪᓄᑦ ᐃᓚᐅᕝᕕᐅᔪᓐᓇᕐᓗᓂ WINNIPEG (ᐅᐃᓂᐹᒡᒥ) ᓴᓈᓄᑦ ᑕᑯᔭᒐᖃᕐᕕᖕᒥ, ᐊᑐᐃᓐᓇᐅᑎᑦᑎᓗᓂ ᐊᑐᕈᓐᓇᕐᓂᕐᒥᒃ ᐱᓕᕆᕝᕕᖕᒥ, ᑲᔪᖏᖅᓴᐃᓂᕐᒥᒃ ᐊᒻᒪ ᐱᕕᒃᓴᐅᔪᓐᓇᖅᑐᒥᒃ ᐅᔾᔨᕆᔭᐅᓕᖅᑎᓐᓇᓱᒡᓗᒍ ᓄᓇᕗᑦ ᒐᕙᒪᒃᑯᑦ ᐃᓄᐃᑦ ᓴᓇᐅᒐᖏᑦ ᑲᑎᖅᓱᖅᑕᐅᓯᒪᔪᑦ.
ᖁᕕᐊᓱᒃᐳᖓ ᑐᓴᖅᑎᑦᑎᔪᓐᓇᕋᒪ ᑕᒪᑐᒪᓂ ᐊᕐᕌᒍᒥ ᐃᓚᐅᑦᑎᐊᓚᐅᖅᑐᓂᑦ, ᐊᑐᓂ ᐊᕕᒃᑐᖅᓯᒪᔪᓂᙶᖅᑐᓂᑦ. ᖁᕕᐊᓱᖃᑎᒋᓚᐅᖅᓯᙵ ᒫᑕ ᓯᕿᓂᖅ ᐊᐅᐸᓗᒃᑐᖅ-ᕼᐃᒃᔅ ᖃᒪᓂ'ᑐᐊᕐᒥᒃ, ᐋᓐᓄᓘ ᔮᓐ ᐸᓚᐅᒪᔭᖅ ᐅᖅᓱᖅᑑᕐᒥᐅᖅ, ᐊᒻᒪ ᔭᒥᓯ ᐃᑦᑐᓗ ᒥᑦᑎᒪᑕᓕᖕᒥᐅᑕᖅ. ᑖᒃᑯᐊ ᐊᔪᙱᑦᑐᑦ ᓴᓇᙳᐊᖅᑏᑦ ᐱᕕᖃᕐᓂᐊᖅᑐᑦ ᐋᖅᑭᒋᐊᖅᓯᓂᕐᒥᒃ ᐊᔪᙱᓐᓂᖏᓐᓂᒃ ᐊᒻᒪᓗ ᐊᖏᒡᓕᒋᐊᕐᓗᒋᑦ ᖃᐅᔨᒪᓂᕆᔭᖏᑦ ᐃᑲᔪᖅᓱᐃᓂᒃᑯᑦ ᐊᒻᒪᓗ ᐆᒻᒪᕆᒃᑐᒃᑯᑦ ᐊᕙᑎᖃᕐᓂᕐᒥᒃ.
ᐅᖃᖅᑏ, ᐱᓕᕆᖃᑎᖃᕐᓂᒃᑯᑦ (Winnipeg) ᐅᐃᓂᐹᒡᒥ ᓴᓈᓄᑦ ᑕᑯᔭᒐᖃᕐᕕᖕᒥ, ᐱᕕᒃᓴᖃᖅᑎᑦᑎᕗᒍᑦ ᓄᓇᕗᒻᒥ ᐃᓄᐃᑦ ᓴᓇᙳᐊᖅᑎᖏᓐᓂᑦ ᐃᑲᔪᖃᑦᑕᖅᑐᓂᒃ ᐱᕈᖅᐸᓪᓕᐊᑎᑦᑎᓪᓗᑎᒃ ᐃᓄᐃᑦ ᓴᓈᖏᓐᓂᑦ, ᐃᓕᖅᑯᓯᑐᖃᖏᓐᓂᑦ ᐊᒻᒪ ᖃᐅᔨᒪᔭᖏᓐᓂᑦ. ᑖᓐᓇ ᐱᓕᕆᐊᖑᔪᖅ ᐃᑲᔪᖅᑐᐃᕗᖅ ᓴᖅᑭᑉᐸᓪᓕᐊᔪᓂᒃ ᓴᓇᙳᐊᖅᑎᓂᒃ ᓴᙱᒃᑎᒋᐊᖅᑎᑦᑎᓪᓗᓂᓗ ᐊᑕᓂᕆᔭᐅᔪᒥᒃ ᐅᑯᖕᓄᙵ, ᓄᓇᕗᒻᒧᑦ ᐊᖏᓂᖅᓴᒧᓪᓗ ᓴᓇᙳᐊᕐᓂᕐᒧᑦ ᓄᓇᕐᔪᐊᓕᒫᒥ, ᓇᓗᙱᑦᑎᐊᕈᒪᓂᕐᒥᓄᑦ ᓄᓇᕗᒻᒥ ᓴᓇᙳᐊᖅᑕᐅᕙᒃᑐᑦ ᖁᕕᐊᓱᒍᑕᐅᒐᓗᐊᕐᒪᖔᑕ ᑲᓇᑕᓕᒫᒥ ᓄᓇᕐᔪᐊᓕᒫᒥᓗ.
ᑖᓐᓇ ᐱᓕᕆᐊᖑᔪᖅ ᐊᑕᐅᑦᑎᒃᑰᖃᑎᖃᑲᐅᑎᒋᕗᖅ ᑲᑐᔾᔨᓗᑕ ᐱᓕᕆᐊᒃᓴᖏᓐᓂᒃ ᐊᔾᔨᒌᙱᑦᑑᑎᐅᓕᖁᓪᓗᒋᑦ ᓄᓇᓕᖕᓂᑦ ᑮᓇᐅᔭᓕᐅᕈᑎᑦ. ᓴᓇᙳᐊᖅᑎᑦ ᐊᑐᕈᓐᓇᖅᑎᓪᓗᒋᑦ ᐱᕐᔪᐊᖑᓪᓗᓂ ᓲᕐᓗ (Winnipeg) ᐅᐃᓂᐹᒡᒥ ᓴᓈᓄᑦ ᑕᑯᔭᒐᖃᕐᕕᖕᒥ, ᐃᑲᔪᖅᓱᐃᑐᐃᓐᓇᙱᑦᑐᒍᑦ ᓇᖕᒥᓂᖅ ᐱᕈᖅᐸᓪᓕᐊᓂᖏᓐᓂᒃ ᑭᓯᐊᓂᑦᑕᐅᖅ ᐱᕕᒃᓴᓕᐅᕐᓗᑕ ᐱᕚᓪᓕᖅᑎᓪᓗᒋᑦ ᑮᓇᐅᔭᓕᐅᕈᑕᐅᔪᑦ ᓄᓇᓕᖕᓂ ᓴᓇᙳᐊᖅᑎᓄᑦ. ᓴᖅᑭᔮᕐᓂᒃᑯᑦ ᐊᒻᒪ ᐃᓚᐅᖃᑕᐅᓂᒃᑯᑦ ᑕᕝᕙᓂ ᐱᓕᕆᐊᒥ, ᓴᓇᙳᐊᖅᑎᑦ ᐱᕚᓪᓕᖅᑎᑦᑎᔪᓐᓇᖅᑐᑦ ᐱᓕᕆᔨᓄᑦ ᑐᓴᐅᒪᖃᑦᑕᐅᑎᖃᑎᒌᒍᑎᓂᒃ, ᓂᐅᕐᕈᑎᖃᕈᓐᓇᖅᓯᓪᓗᑎᒃ, ᐊᒻᒪ ᐅᓄᖅᓯᒋᐊᖅᑎᑦᑎᓪᓗᑎᒃ ᑮᓇᐅᔭᓕᐅᕋᓱᖕᓂᕐᒧᑦ ᐱᕙᓪᓕᐊᓂᕐᒧᓪᓗ ᐱᕕᒃᓴᐅᔪᓐᓇᖅᑐᓂᒃ.
ᖁᔭᓐᓇᒦᒃ, ᐅᖃᖅᑎᑦᑎᔩ.