ᐃᖃᓗᐃᑦ, ᓄᓇᕗᑦ (ᐅᑐᐱᕆ 30, 2024) – ᐅᓪᓗᒥ, ᒪᓕᒐᓕᐅᖅᑎ ᔮᓐ ᒪᐃᓐ, ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᐅᐱᒍᓱᒃᖢᑎᒃ ᐊᑎᓕᐅᖅᑲᐅᕗᑦ ᑎᓴᒪᖓᓐᓂᒃ ᐃᓅᓯᕗᑦ ᐊᓐᓂᕐᓇᖅᑐᖅ ᐱᓕᕆᔾᔪᑎᒃᓴᓄᑦ ᐸᕐᓇᐅᑎᒥᒃ 2024-2029−ᒧᑦ ᒪᓕᒐᓕᐅᕐᕕᖕᒥ. ᑖᓐᓇ ᐊᑕᖐᑦᑎᐊᖅᑐᓂᑦ ᐸᕐᓇᐅᑎ, ᐱᕙᓪᓕᐊᑎᑕᐅᓯᒪᔪᖅ ᐅᖃᖃᑎᖃᖃᑦᑕᕐᓂᒃᑯᑦ ᓄᓇᕗᒻᒥᐅᓂᑦ, ᑕᑯᒃᓴᐅᑎᑦᑎᔪᖅ ᐅᖃᐅᓯᐅᓯᒪᔪᓂᑦ ᓄᓇᓕᖕᓂᑦ ᐃᓚᒋᔭᐅᔪᓂᑦ ᓄᓇᕗᓕᒫᒥᑦ ᐊᒻᒪ ᑲᑐᔾᔨᖃᑎᒌᓪᓗᐊᑕᐅᔪᓂᑦ.
ᐃᓅᓯᕗᑦ ᐊᓐᓂᕐᓇᖅᑐᖅ ᖃᓄᐃᓕᐅᕐᓂᕐᒧᑦ ᐸᕐᓇᐅᑦ ᐱᒋᐊᖅᑎᑕᐅᓚᐅᖅᓯᒪᔪᖅ ᔫᓂ 2022−ᒥ ᓄᓇᕗᒻᒥ ᐃᓅᓯᕐᒥᒃ ᑭᐱᓯᑎᑦᑎᑦᑕᐃᓕᒪᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᓄᑦ (NSPS) ᐱᓕᕆᖃᑎᖏᓐᓄᑦ: ᓄᓇᕗᑦ ᒐᕙᒪᒃᑯᑦ (GN), ᓄᓇᕗᑦ ᑐᙵᕕᒃᑯᑦ ᑎᒥᖓᑦ (NTI), ᐃᓴᒃᓯᒪᒋᑦ ᐃᓅᓯᕐᒥ ᑲᑐᔾᔨᖃᑎᒌᑦ (IIKELC), ᐊᒻᒪ ᑲᓇᑕᒥ ᐸᓖᓯᒃᑯᑦ (ᐸᓖᓯᒃᑯᑦ), 'V' ᐱᓕᕆᔩᑦ. ᐸᕐᓇᐅᑎ ᐱᕈᖅᐸᓪᓕᐊᑎᑦᑎᕗᖅ ᖃᐅᔨᔭᐅᔪᓂᒃ 2017-2023−ᒥ ᑭᖑᓪᓕᖅᐹᒥ ᐅᓂᒃᑳᒥ, ᖃᐅᔨᒪᔭᐅᖁᓪᓗᒋᑦ ᐃᓕᑕᐅᔪᑦ ᖃᐅᔨᔭᐅᓚᐅᖅᑐᑦ ᑐᓴᖅᑎᑦᑎᓗᑎᒃ ᐱᓕᕆᐊᖑᕙᓪᓕᐊᔪᒪᔪᓂᒃ ᓯᕗᒻᒧᑦ ᐃᖏᕐᕋᕙᓪᓕᐊᔾᔪᑕᐅᔪᓂᒃ.
"ᑖᓐᓇ ᐱᓕᕆᔾᔪᑎᒃᓴᓄᑦ ᐸᕐᓇᐅᑦ ᑭᒡᒐᖅᑐᐃᕗᖅ ᓂᐱᖏᓐᓂᒃ ᐃᓱᒫᓘᑎᖏᓐᓂᒡᓗ ᓄᓇᕗᒻᒥᐅᑦ, ᐊᒻᒪ ᐊᖏᖅᓯᒪᓪᓗᑕ ᑐᑭᖃᑦᑎᐊᖅᑐᓂᒃ ᐊᓯᔾᔩᔪᒪᓪᓗᑕ," ᒥᓂᔅᑕ ᒪᐃᓐ ᐅᖃᖅᑐᖅ. "ᑐᕌᒐᕆᔭᕗᑦ ᓴᖅᑭᑦᑎᔪᒪᓪᓗᑕ ᓯᕗᓂᒃᓴᒥ ᐃᒻᒥᓃᖃᑦᑕᕐᓂᖅ ᐊᑐᖅᑕᐅᖃᑦᑕᕈᓐᓃᕐᓗᓂ ᓄᓇᕗᒻᒥ. ᑖᒃᑯᐊ ᓇᓗᓇᐃᖅᑕᐅᓯᒪᔪᑦ ᑕᕝᕙᓂ ᓇᓗᓇᐃᕈᑎᓂᒃ ᑐᙵᕕᖃᖅᑐᑦ ᐊᒻᒪᓗ ᑐᕌᒐᖃᖅᖢᑎᒃ ᒥᑭᒡᓕᒋᐊᕆᓂᕐᒥᒃ ᐃᒻᒥᓃᖃᑦᑕᖅᑐᑦ ᐅᓄᕐᓂᖏᓐᓂᒃ ᓇᓕᒧᓕᖁᓪᓗᒍ ᐅᕝᕙᓘᓐᓃᑦ ᐊᑦᑎᓂᖅᓴᐅᓗᓂ ᑲᓇᑕᓕᒫᒥ. ᑲᔪᓯᑦᑎᐊᕐᓂᖓ ᑖᔅᓱᒪ ᐱᕙᒌᔭᐅᑦ ᒪᓕᒃᐳᖅ ᑭᒃᑯᓕᒫᑦ ᐱᓕᕆᐊᖃᖃᑕᐅᓂᖏᓐᓂᒃ. ᓄᓇᓕᖕᓂᙶᖅᑐᓂᒃ ᒐᕙᒪᒃᑯᑦ ᐱᓕᕆᕝᕕᖏᓐᓄᑦ, ᑖᓐᓇ ᑲᑐᔾᔭᐅᓪᓗᓂ ᑲᒪᒋᔭᒃᓴᐅᕗᖅ," ᐃᓚᓕᐅᔾᔨᔪᖅ ᒥᓂᔅᑕ ᒪᐃᓐ. "ᑖᓐᓇ ᓈᓴᐅᑎᓂᑐᐃᓐᓇᐅᙱᑦᑐᖅ − ᐃᓅᓯᕐᓂᒃ ᐱᐅᓕᒃᖠᓂᖅ ᐊᒻᒪ ᓯᕗᓂᒃᓴᓕᐅᕐᓂᖅ ᓄᓇᕗᒻᒥᐅᓕᒫᑦ ᐃᑲᔪᖅᓱᖅᑕᐅᖅᑰᔨᓗᑎᒃ ᐱᒻᒪᕆᐅᒋᔭᐅᓗᑎᒡᓗ."
“ᑲᑐᔾᔨᖃᑎᒌᓐᓂᖅ ᐱᓕᕆᖃᑎᒌᑦᑐᓕᒫᓂᒃ ᐱᓪᓗᐊᑕᐅᓚᐅᖅᐳᖅ ᓇᓗᓇᐃᖅᓯᓂᕐᒧᑦ ᑖᓐᓇ ᐸᕐᓇᐅᑎ ᐅᔾᔨᕈᓱᑦᑎᓯᒐᓗᐊᕐᒪᖔᑦ ᐃᓅᓯᕐᒥᒃ ᐱᓕᕆᐊᖃᕐᓂᒃᑯᑦ ᐊᑕᖐᔪᓂᒃ ᐃᑲᔪᖅᑐᐃᓂᕐᒧᓪᓗ ᐃᓄᐃᑦ ᐃᓅᖃᑎᒌᑉᐸᓐᓂᕐᒧᑦ ᐱᔾᔪᑕᐅᓕᖅᐸᑦᑐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ.” ᐅᖃᖅᑐᖅ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ. "ᐊᑦᓱᕈᖅᓱᑕ ᐱᓕᕆᓯᒪᔪᒍᑦ ᓇᓗᓇᐃᖅᓯᓂᕐᒧᑦ ᓂᐱᖏᑦ ᒪᒃᑯᑦᑐᐃᑦ, ᐃᓄᓕᒫᓪᓗ ᑕᑯᑦᓴᐅᔪᓐᓇᐅᖁᓪᓗᒋᑦ ᑕᕝᕙᓂ ᐸᕐᓇᐅᑎᒥ. ᐱᓕᕆᖃᑎᒌᓪᓗᑕ, ᐅᖃᐅᓯᖃᕈᓐᓇᖅᑐᒍᑦ ᐱᔾᔪᑕᐅᓪᓗᐊᑕᖅᐸᑦᑐᓂᑦ ᐃᓅᓯᕐᒥ ᑭᐱᓯᖃᑦᑕᕐᓂᐅᔪᖅ ᐅᔾᔨᕈᓱᑦᑎᑦᓯᓂᕐᒧᓪᓗ ᖃᓄᐃᙱᑦᓯᐊᕐᓂᕐᒥᒃ ᓄᓇᕗᒻᒥ."
ᑖᓐᓇ ᐱᕙᒌᔭᖅᑕᐅᓯᒪᔪᖅ ᐅᖃᐅᓯᖃᓪᓚᕆᒃᐸᖅᐳᖅ ᐊᑐᖅᑎᑦᑎᑦᑕᐃᓕᒪᓪᓗᓂ ᒪᕐᕈᐃᓕᖅᑲᖓᔪᓂᒃ ᐱᑕᖃᖅᐸᒌᖅᑐᓂᒃ ᐱᓕᕆᐊᒃᓴᓂᒃ, ᐅᔾᔨᕐᓇᖅᓯᑎᑦᑎᓪᓗᓂ ᐱᓕᕆᖃᑎᒌᖕᓂᕐᒥᒃ ᑐᑦᑕᕐᕕᒋᔭᐅᔪᓂ, ᓇᓗᙱᑦᑎᐊᕈᒪᓂᕐᒥᓄᑦ ᐱᓕᕆᐊᒃᓴᓄᑦ ᑲᔪᓯᔪᓐᓇᑦᑎᐊᕋᓗᐊᕐᒪᖔᑕ, ᐊᑐᓕᖅᑎᑦᑎᓗᑎᒡᓗ ᐆᒃᑐᕋᒐᒃᓴᐅᔪᓂᒃ ᐱᓕᕆᐊᒃᓴᓂᒃ. ᓄᓇᕗᒻᒥ ᐃᒻᒥᓃᖅᑕᐃᓕᒪᑎᑦᑎᓂᕐᒧᑦ ᐸᕐᓇᐅᑎᓕᐊᖅ ᑲᑎᒪᓂᖃᖅᑎᓪᓗᒍ ᐃᖃᓗᒃᑑᑦᑎᐊᒥ ᐅᑐᐱᕆ 2022-ᒥ, ᐋᖅᑭᒃᓯᔪᖃᓚᐅᖅᐳᖅ ᒪᒃᑯᒃᑐᑦ ᓂᐱᖏᑦ ᑐᑦᑕᕐᕕᓪᓗᐊᑕᐅᔭᕆᐊᖃᕐᓂᖏᓐᓂᒃ ᓄᑖᒧᑦ ᐸᕐᓇᐅᑎᒧᑦ, ᐊᒻᒪ ᒐᕙᒪᒃᑯᑦ ᐱᓕᕆᕝᕕᓕᒫᖏᑦ ᐱᓕᕆᐊᒃᓴᖅᑖᖅᑎᑕᐅᓗᑎᒃ ᓵᑕᐅᔪᓐᓇᑦᑎᐊᖁᓪᓗᒋᑦ, ᓂᐅᕕᕐᓗᑎᒃ, ᐊᒻᒪ ᐅᓂᒃᑳᓕᐅᒐᔪᒡᓗᑎᒃ.
ᓯᓯᐅᓪ ᒍᕆᓐ, ᑐᑭᒧᐊᖅᑎᑦᑎᔨᒻᒪᕆᒃ ᐃᓴᒃᓯᒪᒋᑦ ᐃᓅᓯᕐᒥ ᑲᑐᔾᔨᖃᑎᒌᑦ ᑐᓴᖅᑎᑦᑎᓚᐅᖅᑐᖅ "IIKELC−ᑯᑦ ᓂᕆᐅᒋᔭᖃᖅᐳᑦ ᓴᙱᒃᑎᒋᐊᖅᓯᒪᔪᒥᒃ ᐱᓕᕆᖃᑎᒌᖕᓂᕐᒥᒃ ᐱᓕᕆᖃᑎᖃᕐᓂᕐᒥᒡᓗ ᐱᓕᕆᖃᑎᒌᓂᒃ ᐊᓯᖏᓐᓂᒡᓗ ᑲᑐᔾᔨᖃᑎᒌᓂᒃ ᐊᐅᓚᔾᔭᒃᑎᑦᑎᔪᒪᓪᓗᑎᒃ ᐱᓕᕆᐊᒃᓴᓂᒃ ᐃᒻᒥᓃᖅᑎᑦᑎᑦᑕᐃᓕᒪᓂᕐᒧᑦ."
"ᓂᕆᐅᒋᔭᖃᑦᑎᐊᖅᐳᒍᑦ ᐱᓕᕆᖃᑎᖃᐃᓐᓇᕐᓂᐊᕐᓂᕐᒥᒃ NSPS−ᒧᑦ ᐱᓕᕆᖃᑎᒌᓂᒃ ᐃᑲᔪᕈᒪᓂᕐᒧᑦ ᒥᑭᒡᓕᒋᐊᖅᑎᑦᑎᓂᕐᒥᒃ ᑕᓗᕈᒃᑯᑎᓂᕐᒥᒃ ᐋᓐᓂᖅᑎᑦᑎᓂᕐᒥᒡᓗ ᓄᓇᕗᒻᒥᐅᓄᑦ," ᑕᐃᒪᓐᓇ ᐃᖅᑲᓇᐃᔭᖅᑎ ᐹᓖᓐ ᒥᓚᓴᓐ ᐅᖃᖅᖢᓂ. "ᐸᓖᓯᒃᑯᑦ ᐃᓚᓕᐅᔾᔨᕙᓪᓕᐊᖏᓐᓇᖅᐳᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᖃᐅᑕᒫᑦ ᐊᐅᓚᓂᕆᕙᒃᑕᑦᑎᓐᓂ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥ."
ᐃᓅᓯᕗᑦ ᐊᓐᓂᕐᓇᖅᑐᖅ ᐱᓕᕆᔾᔪᑎᒃᓴᓄᑦ ᐸᕐᓇᐅᑦ ᓯᕗᒻᒧᐊᒍᑎᑦᑎᐊᕙᐅᕗᖅ ᓴᖅᑭᔾᔪᑕᐅᓪᓗᓂ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ ᐊᒻᒪ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒧᑦ ᓄᓇᕗᒻᒥ. ᑲᑐᔾᔨᓪᓗᑎᒃ ᐱᓇᓱᐊᖅᑎᓪᓗᒋᑦ ᓄᓇᕗᒥ ᐃᒻᒥᓃᖅᑕᐃᓕᒪᑎᑦᑎᓂᕐᒧᑦ ᐸᕐᓇᐅᑎᓕᐊᒧᑦ ᐱᓕᕆᖃᑕᐅᔪᑦ ᐊᒻᒪ ᐃᑲᔪᖅᓱᖅᑕᐅᓪᓗᑎᒃ ᓄᓇᕗᒥᐅᑦ, ᑖᓐᓇ ᐸᕐᓇᐅᑎ ᑐᕌᒐᖃᖅᐳᖅ ᖃᓄᐃᙱᓐᓂᖅᓴᒥᒃ ᓴᓇᖁᓪᓗᒋᑦ, ᓴᐱᓕᖅᓴᕋᐃᙱᓐᓂᖅᓴᒥᒃ ᓄᓇᕗᒻᒥ ᑭᖑᕚᒃᓴᑦᑎᓐᓄᑦ.
ᑐᓴᕆᐊᒃᑲᓐᓂᕈᑎᓄᑦ ᐃᓅᓯᕗᑦ ᐊᓐᓂᕐᓇᖅᑐᖅ ᖃᓄᐃᓕᐅᕐᓂᕐᒧᑦ ᐱᕙᒌᔭᐅᒻᒧᑦ, ᐅᐸᒃᓗᒍ ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᖓ ᖃᐅᔨᒋᐊᕐᕕᒋᓗᒍᓘᓐᓃᑦ ᑭᐊᓂᑎ ᕼᐊᐃᓐᔅ ᐅᕙᓂ khaines1@gov.nu.ca.