ᐃᖃᓗᐃᑦ, ᓄᓇᕗᑦ (ᒫᑦᓯ 31, 2025) – ᓄᓇᕗᑦ ᒐᕙᒪᒃᑯᑦ ᓴᖅᑭᑦᑎᓂᐊᖅᑐᑦ ᓇᖕᒥᓂᖅᓱᕐᓂᕐᒧᑦ ᐃᓕᓐᓂᐊᕈᑎᒃᓴᖅᑖᖅᐸᒡᓗᑎᒃ ᐃᓕᓐᓂᐊᖅᑎᑦ ᐊᔪᕈᓐᓃᖅᓴᖅᐸᓪᓕᐊᖁᓪᓗᒋᑦ ᐃᖅᑲᓇᐃᔮᒃᓴᓄᑦ ᓅᑕᐅᓂᐊᖅᑐᓄᑦ ᓄᓇᕗᒻᒧᑦ ᐃᓚᒋᔭᐅᓗᓂ ᓄᓇᕗᒻᒥ ᓄᓇᓕᕆᓂᕐᒧᑦ ᐊᒻᒪ ᐱᔾᔪᑎᒃᓴᓄᑦ ᓇᖕᒥᓂᖅᓱᕐᓂᕐᒧᑦ ᐊᖏᖃᑎᒌᒍᑎᒧᑦ.
ᓇᒻᒥᓂᖅᓱᕐᓂᖅ ᐃᓕᓐᓂᐊᕈᑎᑦᓴᖅᑖᕐᓂᕐᒧᑦ ᐱᓕᕆᐊᑦᓴᖅ ᐊᑐᐃᓐᓇᖅ ᖁᓕᓄᑦ ᐃᓕᓐᓂᐊᖅᑎᓄᑦ ᐊᕐᕌᒍᑕᒫᑦ, ᐃᓕᓐᓂᐊᕈᑎᑦᓴᖅᑖᖅᑎᑦᓯᓂᕐᒧᑦ $10,000-ᓂ. ᐱᓇᓱᐊᕈᑕᐅᔪᑦ ᐃᓕᓐᓂᐊᕈᑎᑦᓴᖅᑖᕐᓂᕐᒧᑦ ᒪᑐᐃᓛᖅᑐᑦ ᐄᐳᓗ 1, 2025−ᒥ, ᒪᑐᓗᓂᓗ ᔫᓂ 30, 2025−ᒥ.
ᐃᓕᓐᓂᐊᕈᑎᒃᓴᖅᑖᕈᓯᐊᑦ ᐊᑐᐃᓐᓇᐅᓂᐊᖅᑐᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐱᓇᔪᒃᑐᓄᑦ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᕐᒥᑦ, ᓄᓇᙳᐊᓕᕆᓂᕐᒧᑦ ᑐᑭᓯᒋᐊᕈᑎᓂᑦ, ᐊᕙᑎᒥᒃ ᖃᐅᔨᓴᕐᓂᕐᒥᑦ, ᐱᔾᔪᑎᒃᓴᓄᑦ ᒪᑭᒪᔾᔪᑎᒃᓴᑦ, ᐊᕙᑎᓕᕆᓂᕐᒧᑦ ᐊᑐᐊᒐᑦ, ᓄᓇᙳᐊᓕᕆᓂᕐᒧᑦ, ᐅᕝᕙᓘᓐᓃᑦ ᒐᕙᒪᓕᕆᓂᕐᒧᑦ ᖃᐅᔨᓴᕈᑎᑦ. ᐊᓯᖏᑦ ᖃᐅᔨᓴᖅᑕᐅᔪᑦ ᓇᖕᒥᓂᖅᓱᕐᓂᕐᒧᑦ−ᐊᒃᑐᐊᓂᓖᑦ ᐱᓕᕆᐊᒃᓴᑦ ᐃᓱᒪᒃᓴᖅᓯᐅᕈᑕᐅᑐᐃᓐᓇᕆᐊᓖᑦ.
"ᑖᓐᓇ ᐃᓕᓐᓂᐊᕈᑎᒃᓴᖅᑖᕈᓯᐊᖅ ᐃᑲᔫᑕᐅᓂᐊᖅᐳᖅ ᓄᓇᕗᒻᒥᐅᓄᑦ, ᐱᓗᐊᖅᑐᒥᒃ ᒪᒃᑯᒃᑐᓄᑦ ᐃᓕᓐᓂᐊᖅᑎᓄᑦ, ᐃᓕᓐᓂᐊᖅᑕᐅᒋᐊᓕᖕᓂᒃ ᐱᓗᑎᒃ ᐃᖅᑲᓇᐃᔮᒃᓴᓄᑦ ᐋᖅᑭᒃᓯᔾᔪᑕᐅᓂᐊᖅᑐᓄᑦ ᓄᓇᕗᒻᒥ ᓯᕗᓂᒃᓴᑦᑎᓐᓄᑦ," ᐅᖃᓚᐅᖅᐳᖅ ᓯᕗᓕᖅᑎ ᐲᔾᔭᐃ ᐊᕿᐊᕈᖅ. "ᓅᑕᐅᑎᓪᓗᒋᑦ ᐆᒻᒪᖅᑯᑎᑦ ᐋᑐᕚᒥᑦ ᓄᓇᕗᒻᒧᑦ ᓄᓇᕗᒻᒥ ᓄᓇᒥᒃ ᐊᒻᒪ ᐱᔾᔪᑎᒃᓴᓄᑦ ᓇᖕᒥᓂᖅᓱᕐᓂᕐᒧᑦ ᐊᖏᖃᑎᒌᒍᑎᒥᙶᖅᑐᑦ, ᓄᓇᕗᒻᒥᐅᑦ ᖃᐅᔨᒪᔨᑦᑎᐊᕆᐊᖃᕐᒪᑕ ᐊᐅᓚᑦᑎᓂᕐᒥᒃ ᓄᓇᑦᑎᓐᓂ ᐊᒻᒪ ᐱᔾᔪᑎᒃᓴᑦᑎᓐᓂ. ᑎᓕᐅᖅᐸᒃᑲ ᓄᓇᕗᒻᒥ ᐃᓕᓐᓂᐊᖅᑎᓕᒫᑦ ᐃᓱᒪᒋᐊᖁᓪᓗᒋᑦ ᐃᓕᓐᓂᐊᕋᓱᐊᕐᓂᕐᒥᒃ ᓲᕐᓗ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᕐᒧᑦ, ᓄᓇᒥᙶᖅᑐᓂᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᒻᒪᓗ ᒐᕙᒪᓕᕆᓂᕐᒧᑦ ᖃᐅᔨᓴᕐᓂᕐᒧᑦ. ᓄᓇᕗᑦ ᐱᔭᕆᐊᖃᖅᑖᑎᑦ ᑖᒃᑯᓂᖓ ᐱᔭᕆᐊᖃᒻᒪᕆᒃᑐᓂᒃ ᐃᖅᑲᓇᐃᔮᓂᑦ ᑲᔪᓯᓂᐊᖅᑎᓪᓗᒋᑦ ᓄᓇᕘᖑᑎᓪᓗᒍ,"
ᐃᓚᐅᖃᑕᐅᔪᒪᓗᓂ ᓇᖕᒥᓂᖅᓱᕐᓂᕐᒥᒃ ᐃᓕᓐᓂᐊᒃᑲᓐᓂᕈᑎᒃᓴᒧᑦ ᐃᑲᔫᑎᓂᑦ, ᐱᓇᔪᒃᑐᑦ ᐅᑯᓄᖓ ᒪᓕᒋᐊᓕᖕᓄᑦ ᓈᒻᒪᖅᑰᑦᑎᓯᒪᓪᓗᐊᖅᑐᑦ:
• ᐊᑎᓕᐅᖅᑕᐅᓯᒪᓗᓂ ᐅᓪᓗᓕᒫᖅ ᐃᓕᓐᓂᐊᖅᑎᐅᖃᑕᐅᓂᕐᒧᑦ ᐃᓕᓴᕆᔭᐅᓯᒪᔪᒥ ᓯᓚᑦᑐᖅᓴᕐᕕᒃ ᐃᓕᓐᓂᐊᕐᕕᖕᒥ.
• ᐊᑎᓕᐅᖅᑕᐅᓯᒪᓗᓂ ᓇᓕᐊᖕᓂᑐᐃᓐᓇᖅ ᐊᖏᖅᑕᐅᓯᒪᔪᓂ ᐱᓕᕆᐊᒃᓴᓂ ᑎᑎᕋᖅᓯᒪᔪᓂ ᖁᓛᓂ.
• ᓄᓇᕗᒻᒥᐅᑕᐅᓗᓂ ᐅᕝᕙᓘᓐᓃᑦ ᐱᔪᓐᓇᕐᓂᖃᖃᑕᐅᓗᓂ ᓄᓇᕗᒻᒥ ᐊᖏᕈᑎᐅᑉ ᐊᑖᒍᑦ.
ᓄᓇᕗᒻᒥᐅᑦ ᐃᓄᐃᑦ ᓯᕗᓪᓕᐅᔾᔭᐅᓂᐊᖅᑐᑦ.
ᐃᓕᓐᓂᐊᕈᑎᑖᕈᑎᑦ ᑐᓂᐅᖅᑲᖅᑕᐅᓂᐊᖅᑐᑦ ᐱᒋᐊᓚᐅᙱᓐᓂᖓᓂ ᐅᑭᐊᒃᓵᖅ 2025−ᒥ ᐃᓕᓐᓂᐊᕐᓇᖅ.
ᑐᑭᓯᒋᐊᒃᑲᓐᓂᕈᒪᒍᕕᑦ, ᐅᕝᕙᓘᓐᓃᑦ ᐱᔪᒪᒍᕕᑦ ᑐᒃᓯᕋᐅᑎᒥᒃ ᑕᑕᑎᕆᐊᓕᖕᒥᒃ, ᖃᐅᔨᒋᐊᕐᕕᒋᓗᒍ ᓇᖕᒥᓂᖅᓱᕐᓂᕐᒧᑦ ᑎᑎᕋᖅᑎ ᐅᕗᖓ dkenneally2@gov.nu.ca ᐅᐸᒡᓗᒍᓘᓐᓃᑦ www.gov.nu.ca/devolution.
ᓄᓇᕗᑦ ᒐᕙᒪᒃᑯᑦ, ᑲᓇᑕᒥ ᒐᕙᒪᒃᑯᑦ, ᐊᒻᒪ ᓄᓇᕗᑦ ᑐᙵᕕᒃ ᑎᒥᖓᑦ ᐊᑎᓕᐅᓚᐅᖅᑐᑦ ᓄᓇᕗᒻᒥ ᓄᓇᐃᑦ ᐊᒻᒪ ᐱᔾᔪᑎᒃᓴᓄᑦ ᓇᖕᒥᓂᖅᓱᕐᓂᕐᒧᑦ ᐊᖏᖃᑎᒌᒍᑎᒃᑯᑦ ᔭᓄᐊᕆ 18, 2024−ᒥ, ᓅᖦᖢᒋᑦ ᐃᓱᒪᓕᐅᕈᑎᒃᓴᑦ ᐋᑐᕚᒥ ᓄᓇᕗᒻᒧᑦ. ᓄᓇᕗᑦ ᒐᕙᒪᒃᑯᑦ ᐱᓕᕆᐊᒃᓴᖃᖅᐳᑦ ᐱᕙᓪᓕᐊᑎᑦᑎᔪᒪᓪᓗᑎᒃ ᐊᔪᙱᑦᑐᓂᒃ, ᓄᓇᕗᒻᒥ−ᑐᙵᕕᓕᖕᓂᒃ ᐃᖅᑲᓇᐃᔭᖅᑎᓂᒃ ᐊᐅᓚᑦᑎᔾᔪᑎᒃᓴᓂᒃ ᑖᒃᑯᓂᖓ ᑲᒪᒋᔭᒃᓴᓂᑦ.