ᐃᖃᓗᐃᑦ, ᓄᓇᕗᑦ (ᐊᐃᕆᓕ 10, 2025) – ᓄᓇᕗᒻᒥ ᐃᒡᓗᒃᓴᑦ ᑭᕙᓪᓕᕐᒥ ᐱᕈᖅᐹᓪᓕᕐᓂᐊᖅᐳᑦ 20-ᐸᓗᖕᓂᒃ ᐊᒡᒍᖅᓯᒪᕙᒌᖅᑐᓂᒃ ᐃᒡᓗᓂᒃ ᑕᒪᑐᒪᓂ ᐊᕐᕌᒍᒥ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ (MOU) ᐊᑎᓕᐅᖅᑕᐅᓯᒪᓪᓗᓂ ᓄᓇᕗᒻᒥ ᐅᔭᕋᖕᓂᐊᕐᓂᕐᒧᑦ ᑲᑎᒪᕐᔪᐊᖅᑐᓂᒃ ᐃᖃᓗᖕᓂ ᐅᓪᓗᒥ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ ᐊᒻᒪ ᐊᒡᓃᑯ ᐅᔭᕋᖕᓂᐊᕐᑎᒃᑯᑦ.
ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅᑎᒍᑦ, ᐊᒡᓃᑯ ᐅᔭᕋᖕᓂᐊᕐᑎᒃᑯᑦ ᐱᑎᑦᑎᓂᐊᖅᐳᑦ ᐃᒪᒃᑯᑦ ᐊᐅᓪᓚᖅᑎᑦᑎᓂᕐᒥᒃ 20−ᐸᓗᖕᓄᑦ ᓄᑖᓄᑦ ᐋᖅᑭᒃᓱᖅᑕᐅᓯᒪᔪᓄᑦ ᐃᒡᓗᒋᔭᐅᖃᑦᑕᕐᓂᐊᖅᑐᓄᑦ ᐃᑲᔪᖅᑐᐃᓗᑎᒃ ᓱᒃᑲᓕᕚᓪᓕᖅᑎᑦᑎᓇᔭᕐᓂᕐᒥᒃ ᐃᒡᓗᒋᔭᐅᖃᑦᑕᕐᓂᐊᖅᑐᓂᒃ ᓄᓇᕗᒻᒥᐅᓄᑦ. ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑲᒪᒋᔭᖃᕐᓂᐊᖅᑐᑦ ᓂᐅᕕᕐᓂᕐᒥᒃ ᐋᖅᑭᒃᓱᖅᑕᐅᓯᒪᔪᓂᒃ ᐃᒡᓗᓂᑦ ᐊᒻᒪᓗ ᐃᓂᑖᖅᑎᑦᑎᓂᕐᒥᒃ ᐃᒡᓗᓂᑦ ᑎᑭᑉᐸᑕ ᓄᓇᓕᖕᓄᑦ.
"ᑖᓐᓇ ᐃᑲᔫᑎᖃᖅᑐᖅ ᐱᓕᕆᖃᑎᒌᖕᓂᐅᔪᖅ ᐊᒡᓃᑰ ᐄᒍᒃᑯᓐᓂ ᑭᒡᒐᖅᑐᐃᕗᖅ ᑲᑐᔾᔨᓪᓗᑕ ᐊᖏᕈᑎᒋᓯᒪᔭᑦᑎᓐᓂᒃ ᐱᕙᓪᓕᐊᔪᓕᕆᓂᕐᒧᑦ ᐊᒻᒪ ᖃᓄᐃᙱᑦᑎᐊᖅᑐᓄᑦ ᓄᓇᓕᖕᓄᑦ ᐃᑲᔫᑕᐅᔅᓲᔭᕈᓐᓇᖅᑐᓄᑦ ᓄᓇᕗᒥᐅᓄᑦ," ᐅᖃᓚᐅᖅᐳᖅ ᖁᐊᓴ ᑯᓱᒐᖅ, ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. "ᐊᒡᓃᑰ ᐄᒍᒃᑯᑦ ᐃᑲᔪᖅᑐᐃᑦᑎᐊᓚᐅᖅᑐᑦ, ᐃᒻᒪᖄ 20−ᐸᓗᐃᑦ ᓄᑖᑦ ᐃᒡᓗᐃᑦ ᑲᖏᖅᖠᓂᕐᒧᑦ ᖃᒪᓂ'ᑐᐊᒧᓪᓗ, ᐱᒻᒪᕆᐅᓂᖅᓴᐅᓪᓗᓂᓗ, 20 ᑭᕙᓪᓕᕐᒥᐅᑦ ᐃᓚᒌᑦ ᓄᑖᒥᒃ ᐃᓂᒃᓴᖃᕐᓂᐊᖅᑐᑦ ᐊᖏᕐᕋᕆᔪᓐᓇᖅᑕᒥᓂᒃ."
"ᐊᒡᓃᑰ ᐄᒍᒃᑯᑦ ᐊᓕᐊᓇᐃᒍᓱᒃᑐᑦ ᑲᑎᑎᑦᑎᔪᓐᓇᕋᒥᒃ ᐃᑲᔫᑎᒃᓴᖏᓐᓂᒃ ᖃᐅᔨᒪᓂᕆᔭᖏᓐᓂᒡᓗ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ ᓴᖅᑭᑦᑎᓇᓱᒃᖢᑎᒃ ᐱᕐᔪᐊᓂᒃ ᐃᒡᓗᑖᕆᐊᖃᖅᑐᓂᒃ ᓄᓇᕗᒻᒥ 3000−ᒥ," ᐅᖃᓚᐅᖅᐳᖅ ᑯᕆᔅᑕᕗ ᐋᑕᒻᔅ, ᐊᖓᔪᖅᑳᑉ ᑐᒡᓕᐊ, ᓄᓇᕗᒻᒥ, ᐊᒡᓃᑯ ᐄᒍᑯᑦ. "ᐱᓕᕆᐊᖃᓪᓚᕆᒍᒪᕗᒍᑦ ᖃᓄᐃᙱᑦᑎᐊᕈᓐᓇᕐᓂᕐᒧᑦ ᑲᑐᔾᔨᖃᑎᒋᔭᑦᑎᓐᓂ ᐱᕕᒃᓴᒧᑦ ᓴᖅᑭᑎᑦᑎᕙᒃᖢᑕᓗ ᐊᑕᐅᑦᑎᒃᑯᑦ ᑐᙵᓱᒃᑎᑦᑎᔨᒋᕙᒃᑕᑦᑎᓐᓂᒃ ᓄᓇᓕᖕᓂᒃ ᓄᓇᖃᖅᑳᖅᑐᓂᒡᓗ ᐱᓕᕆᖃᑎᒋᕙᒃᑕᑦᑎᓐᓂᒃ, ᕿᓂᕐᓗᑕ ᐊᑕᖐᔪᒥᒃ ᐊᑐᖅᑕᐅᓇᔭᖅᑐᒥᒃ ᑕᒪᓐᓇ ᑮᓇᐅᔭᓕᐅᕋᓱᒃᐸᖕᓂᖅ ᓴᖅᑭᑎᑦᑎᓕᖅᐸᒃᖢᓂ ᓴᙱᓂᖅᓴᓂᒃ ᓄᓇᓕᖕᓂᒃ."
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᒥᒃᓵᓄᑦ
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐅᓄᖅᓯᒋᐊᖅᑎᑦᑎᕗᑦ ᐃᒡᓗᓂᒃ ᓄᓇᕗᒻᒥ ᐸᕐᓇᐅᑎᑎᒍᑦ ᓲᕐᓗ ᓄᓇᕗᒻᒥ 3000-ᓂᒃ, ᑐᕌᒐᖃᖅᑐᑦ ᐃᓚᓯᔪᒪᓪᓗᑎᒃ 3,000-ᓂᒃ ᓄᑖᓂᒃ ᐃᒡᓗᓂᒃ ᐊᔾᔨᒌᙱᑦᑐᓂᒃ ᓄᓇᕘᒥ 2030-ᒧᑦ ᑎᑭᓪᓗᒍ. ᑖᒃᑯᐊ ᓄᑖᑦ ᐋᖅᑭᒃᓱᒐᑦ ᐃᒡᓗᐃᑦ ᐊᑐᖅᑕᐅᓂᐊᖅᐳᑦ ᐃᑲᔪᖅᑐᐃᔾᔪᑕᐅᓗᑎᒃ ᐊᔾᔨᒌᙱᑦᑐᓂᒃ ᐃᒡᓗᑖᕆᐊᖃᖅᑐᓂᒃ, ᐃᓚᒋᔭᐅᓗᑎᒃ ᐃᓄᖕᓄᑦ, ᐃᖅᑲᓇᐃᔭᖅᑎᓄᑦ ᐊᒻᒪ ᐊᑭᑐᓗᐊᙱᑦᑐᑦ ᐃᒡᓗᐃᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ ᓄᓇᕗᑦ 3000 ᒥᒃᓵᓄᑦ, ᑕᑯᒋᐊᕐᓗᒍ nunavuthousing.ca
ᐊᒡᓃᑯ ᐄᒍᒃᑯᑦ ᒥᒃᓵᓄᑦ
ᐊᒡᓃᑯ ᐄᒍᒃᑯᑦ ᑲᓇᑕᒥ-ᑐᙵᕕᖃᖅᐳᑦ ᐊᒻᒪ ᐊᐅᓚᑕᐅᓪᓗᑎᒃ ᒎᓗᓯᐅᖅᑎᑦ ᑲᒻᐸᓂᖓ ᐊᒻᒪ ᓄᓇᕐᔪᐊᕐᒥ ᐱᖓᔪᒋᔭᐅᓪᓗᓂ ᐊᖏᓂᖅᐹᖑᓪᓗᓂ ᒎᓗᓕᐅᖅᑎᐅᓪᓗᓂ, ᓴᖅᑭᑦᑎᕙᒃᖢᑎᒃ ᓴᕕᕋᔭᒃᓴᓂᒃ ᐊᐅᓚᑕᐅᔪᓂᒃ ᑲᓇᑕᒥ, ᐋᔅᑐᕋᐃᓕᐊᒥ, ᕕᓐᓚᓐᒥ ᐊᒻᒪ ᒪᒃᓯᑯᒥ ᓱᓪᓗᓕᖃᖅᖢᑎᒃ ᐱᐅᑦᑎᐊᖅᑐᓂᒃ ᓄᓇᒥᙶᖅᑐᓂᒃ ᕿᓂᖅᑐᓂᒃ ᐊᒻᒪ ᐱᕙᓪᓕᐊᑎᑕᐅᔪᓂᒃ ᐱᓕᕆᐊᓂᒃ. ᑲᒻᐸᓂᐅᔪᖅ ᑮᓇᐅᔭᓕᐅᖅᓯᒪᕐᔪᐊᖅᐳᑦ ᐱᓕᕆᓪᓗᑎᒡᓗ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᕐᕌᒍᑦ 15 ᐅᖓᑖᓄᑦ ᒪᕐᕉᖕᓂᓪᓗ ᐅᔭᕋᖕᓂᐊᕐᕕᖃᖅᖢᑎᒃ ᓄᓇᕗᒻᒥ − ᐊᐳᖅᑎᓐᓈᖅᑐᕐᒥ ᐅᔭᕋᖕᓂᐊᕐᕕᒃ ᑭᕙᓪᓕᕐᒥ − ᐊᒻᒪᓗ ᕼᐆᑉ ᐸᐃ ᐅᔭᕋᖕᓂᐊᕐᕕᖓᓂ ᕿᑎᕐᒥᐅᓂ.
T\ᖃᐅᔨᒃᑲᓐᓂᕈᒪᓐᓂᕈᕕᓪᓕ ᐊᒡᓃᑯ ᐄᒍᒃᑯᑦ ᒥᒃᓵᓄᑦ, ᐅᐸᒡᓗᒍ agnicoeagle.com.