ᐃᖃᓗᐃᑦ, ᓄᓇᕗᑦ (ᒫᔾᔨ 17, 2024) – ᓯᕗᓕᖅᑎ ᐸᐅᓗᓯ ᐊᕿᐊᕈᖅ ᐅᓪᓗᒥ ᑐᓴᖅᑎᑦᑎᖅᑲᐅᕗᖅ ᑎᒃᑯᐊᖅᑕᐅᓂᖓᓂᒃ ᓄᑖᖅ ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨᒻᒪᕆᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ, ᐱᒋᐊᕐᓗᒍ ᐊᐃᑉᐹ, ᒪᐃ 21.
ᐆᕐᓂᔅ ᑕᒡᓚᔅ ᐃᓚᒋᔭᐅᓕᖅᐳᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ ᐊᕐᕌᒍᑦ 14 ᐊᓂᒍᖅᑎᓪᓗᒋᑦ ᓯᕗᓕᖅᑎᐅᓪᓗᓂ Eastward Energy−ᑯᓐᓄᑦ ᓅᕙ ᔅᑰᓯᐊᒥ, ᐃᓚᒋᔭᐅᓪᓗᑎᒃ 6−ᖑᔪᑦ ᐊᖓᔪᖅᑳᖃᖅᖢᑎᒃ ᑎᒥᖁᑎᒋᔭᐅᔪᒥᒃ TriSummit Utilities−ᑯᓐᓂ, ᐊᒻᒪ 20−ᐸᓗᐃᑦ ᐅᑭᐅᑦ ᐆᒻᒪᖅᑯᑎᓕᕆᔨᒃᑯᓐᓄᑦ. ᑕᐃᑉᓱᒪᓂ ᑕᐃᑲᓂ ᐱᓕᕆᔨᐅᑎᓪᓗᒍ, ᑕᒡᓚᔅ ᓴᖅᑭᑦᑎᓚᐅᖅᑐᖅ ᐃᓱᒪᑦᑎᐊᕐᓂᕐᒥᑦ ᖃᓄᐃᖏᑦᑎᐊᕐᓂᕐᒧᑦ ᐃᓄᖕᓄᑦ ᐊᒻᒪᓗ ᐊᕙᑎᒧᑦ.
"ᐊᓕᐊᓇᐃᒍᓱᒃᐳᖓ ᑎᒃᑯᐊᖅᓯᔪᓐᓇᕋᒪ ᐆᕐᓂᔅ ᑕᒡᓚᔅᒧᑦ ᐊᖓᔪᖅᑳᖑᓂᐊᓕᖅᖢᓂ ᐊᐅᓚᑦᑎᔨᒻᒪᕆᐅᓪᓗᓂᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ. ᑕᒡᓚᔅ ᑕᑯᒃᓴᐅᑎᑦᑎᓯᒪᕗᖅ ᓯᕗᓕᖅᑎᐅᕙᖕᓂᕐᒧᑦ ᐃᓂᒋᔭᐅᕙᒃᑐᓂᒃ, ᐃᓚᒋᔭᐅᓪᓗᓂ ᐱᓕᕆᖃᑎᒋᔭᖏᓐᓂᒃ ᐊᒃᑐᐊᓂᖃᑦᑎᐊᕐᓂᕐᒥᒃ ᓴᙱᔫᖁᓪᓗᓂᒋᑦ. ᐊᔪᙱᓐᓂᖓ ᐃᑲᔪᕐᓂᐊᖅᑐᖅ ᐃᖏᕐᕋᑎᓪᓗᒍ ᖁᓪᓕᒃᑯᑦ ᓯᕗᒻᒧᐊᒃᓗᓂ ᐊᒡᒋᖅᑐᓄᑦ ᐊᕐᕌᒍᓄᑦ," ᐅᖃᖅᑐᖅ ᓯᕗᓕᖅᑎ ᐊᕿᐊᕈᖅ.
ᑕᒡᓚᔅ ᑎᒃᑯᐊᖅᑕᐅᓂᖓ ᐊᖓᔪᖅᑳᖑᓚᐅᖅᑐᒧᑦ ᐊᒻᒪ ᐊᐅᓚᑦᑎᔨᒻᒪᕆᒃ ᕆᒃ ᕼᐊᓐᑦ ᑎᒃᑯᐊᖅᑕᐅᓚᐅᕐᒪᑦ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᓯᕗᓪᓕᖅᐹᖑᓪᓗᓂ ᓄᓇᕗᒻᒥ ᐊᖓᔪᖅᑳᖑᓪᓗᓂ ᐊᒻᒪ ᐊᐅᓚᑦᑎᔨᒻᒪᕆᐅᓪᓗᓂ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐊᖓᔪᖅᑳᑉ ᑐᒡᓕᐊ ᐊᐅᓚᓂᕆᔭᐅᔪᓄᑦ ᐱᓕᕆᓯᒋᐊᕐᓂᕐᒧᓪᓗ ᐱᐅᓪ ᓂᐹᑦ ᐊᐅᓚᑦᑎᔨᐅᓚᐅᑲᓚᐅᖅᑐᖅ ᐅᑐᐱᕆ 2023 ᐱᒋᐊᖅᖢᓂ.
"ᖁᔭᓐᓇᒦᕈᒪᔭᕋ ᕆᒃ ᕼᐊᓐᑦ ᐊᕐᕌᒍᒐᓴᖕᓄᑦ ᐱᔨᑦᑎᕋᖅᓯᒪᓂᖓᓄᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ, ᐊᒻᒪᓗᑦᑕᐅᖅ ᐱᐅᓪ ᓂᐳᑦ ᐊᖓᔪᖅᑳᖑᓚᐅᑲᓚᐅᕐᓂᖓᓄᑦ," ᐅᖃᖅᑐᖅ ᓯᕗᓕᖅᑎ ᐊᕿᐊᕈᖅ.